Read fon 1 Samuwɛ́li 10 Bible Online

1 Samuwɛ́li 10 - fon bible

1 Samuwɛ́li 10

¹Ée Sawúlu nɔ te ɔ́, Samuwɛ́li sɔ́ ami goví ɖokpó bó kɔn dó ta nú Sawúlu, bó kplá así kɔ n'i, bó ɖɔ: “Mawu Mavɔmavɔ ɖésú wɛ kɔn ami dó ta nú we, bó sɔ́ we axɔ́sú ɖó togun tɔn nu.

²Zaanɖé din ɔ́, a nǎ jó mì dó, bó ná ɖidó; a nǎ mɔ nya we ɖé lɛ́ɛ ɖo yɔdo Hlacɛ́li tɔn kɔn, ɖo Bɛnjamɛ́ɛ sín dogbó jí, ɖo Sɛlusáxi; yě ná ɖɔ nú we ɖɔ: ‘Tócí asi e ba gbé a yi lɛ́ɛ ɔ́, è ko mɔ yě. Din ɔ́, tɔ́ towe sɔ́ ɖo tócí xó ɖé ɖɔ wɛ ǎ, lo ɔ́ mi lin wɛ é ɖe bó nɔ ɖɔ: nɛ̌ un ka ná bló gbɔn din bo mɔ vǐ ce?’

³A gosín fínɛ́ bó sɛ yi kpɛɖé ɔ́, a nǎ jɛ Tabɔ́ɔ cɛ́nitín kpá. A nǎ mɔ nya atɔn ɖé lɛ́ɛ ɖo fínɛ́, bɔ yě ná xwe Mawu gɔ́n ɖo Betɛ́li: mɛ ɖokpó ná hɛn gbɔ̌ví atɔn, mɛ wegɔ́ ɔ́ ná hɛn wɔ̌xúxú atɔn bɔ mɛ atɔngɔ́ ɔ́ ná hɛn vɛ̌ɛn anyǔglo ɖokpó.

⁴Yě ná kanbyɔ́ we ɖɔ hwi ɖo ɖagbe a jí, bó ná ná we wɔ̌xúxú we, bɔ a na yí ɖo yě sí.

⁵Énɛ́ gúdo ɔ́, a na wá Giveya-Eloyimu fí e ahwankpá Filisitɛ́ɛn lɛ́ɛ tɔn ɖokpó ɖe é. A ɖo toxo ɔ́ mɛ byɔ́ wɛ ɔ́, a nǎ kpé gbeyíɖɔ Mawu tɔn sín gbɛ̌ta ɖé; yě ná jɛ te sín só jí, bɔ agǐdigbo kpó hǔn kpó, kpete kpó kanhún kpó ná ɖo nukɔn nú yě, bɔ Yɛ Mawu tɔn ná wá ta yětɔn, bɔ yě ná ɖo xó e Mawu ɖɔ nú yě ɔ́ ɖɔ wɛ.

⁶Mawu Mavɔmavɔ sín Yɛ ná wá jǐ we, bɔ Mawu ná jɛ xó ɖɔ gbɔn jǐ we jí yě ɖɔhun, bɔ a nǎ húzú gbɛtɔ́ ɖěvo.

⁷Ényí nǔ énɛ́ lɛ́ɛ bǐ jɛ ɔ́, a nǎ tunwun ɖɔ Mawu ɖo kpɔ́ xá émí nǔgbó. Hwenɛ́nu ɔ́, a nǎ jɛ nǔ wa jí lě e é byɔ́ gbɔn é.

⁸Énɛ́ ɔ́ gúdo ɔ́, a nǎ zɔn mǐ yi Gilugalu, bɔ un ná wá mɔ we ɖo fínɛ́, bó ná sá vɔ̌ e è nɔ dó zo é, kpódó kɔnɖókpɔ́ sín vɔ̌ kpó. A na nɔ te káká nú azǎn tɛ́nwe, bɔ un ná wá bó ná ɖɔ nǔ e a na wa ɔ́ nú we.”

⁹Ée Sawúlu dó gǔdo Samuwɛ́li lě tlóló ɔ́, Mawu sɔ́ ayi ɖěvo dó xomɛ n'i, bɔ nǔ e Samuwɛ́li ɖɔ n'i lɛ́ɛ bǐ jɛ gbe énɛ́ ɔ́ gbe.

¹⁰Ée yě wǎ Giveya ɔ́, gbeyíɖɔ Mawu tɔn sín gbɛ̌ta ɖokpó wá kpé Sawúlu, bɔ Yɛ Mawu tɔn wá jǐ tɔn, bɔ é jɛ xó e Mawu ɖɔ gbɔn jǐ tɔn lɛ́ɛ ɖɔ jí ɖo tɛ́ntin yětɔn.

¹¹Mɛ ɖěɖě kó tunwun i ɖ'ayǐ lɛ́ɛ mɔ ɛ bo ɖɔ: “É ɖo xó e Mawu sɔ́ dó nu n'i lɛ́ɛ ɖɔ wɛ éé kpó gbeyíɖɔ Mawu tɔn lɛ́ɛ kpó.” Bɔ mɛ lɛ́ɛ nɔ kanbyɔ́ yěɖée ɖo togun ɔ́ mɛ ɖɔ: “Nɛ̌ ka gbɔn nú Sawúlu Kícu ví ɔ́? Élɔ́ nyí gbeyíɖɔ Mawu tɔn wɛ a?”

¹² Nya Giveyanu ɖokpó kanbyɔ́ ɖɔ: “Bɔ mɛ̌ ká nyí tɔ́ yětɔn lo?” Fínɛ́ wɛ è jɛ lǒ dó jí ɖe ɖɔ: “Sawúlu lɔ nyí gbeyíɖɔ Mawu tɔn wɛ a?”

¹³Ée é ɖɔ xó e Mawu ɖɔ n'i lɛ́ɛ fó ɔ́, é ɖidó só ɔ́ jí.

¹⁴Sawúlu ɔ́, tɔ́ tɔn nɔví kanbyɔ́ é kpó mɛsɛntɔ́ tɔn kpó ɖɔ: “Fítɛ́ mi ka yi?” Sawúlu ka yí gbe n'i ɖɔ: “Tócí lɛ́ɛ ba gbé wɛ mǐ yi, mǐ ká mɔ yě ǎ, bɔ mǐ yi kan nǔ byɔ́ Mawu ɖo Samuwɛ́li gɔ́n.”

¹⁵Tɔ́ tɔn nɔví ɔ́ lɛ́ ɖɔ nú yě ɖɔ: “Mi bo ɖɔ nǔ e Samuwɛ́li ɖɔ nú mi é nú mì.”

¹⁶Sawúlu ka yí gbe n'i ɖɔ: “É ɖɔ nú mǐ ɖɔ è ko mɔ tócí lɛ́ɛ.” É ká ɖɔ xó ɖěbǔ n'i dó axɔ́súɖuɖu e xó Samuwɛ́li ɖɔ n'i ɔ́ wú ǎ.

¹⁷Samuwɛ́li ylɔ́ Izlayɛ́li ví lɛ́ɛ bǐ kplé ɖo Mawu Mavɔmavɔ nukɔn ɖo Misipa,

¹⁸bó ɖɔ nú yě ɖɔ: “Xó e Mawu Mavɔmavɔ, Mawu Izlayɛ́li tɔn ɖɔ ɔ́ ɖíe; é ɖɔ: ‘Nyɛ wɛ ɖe mi tɔ́n sín Ejípu tomɛ, bó hwlɛ́n mi gán ɖo Ejípunu lɛ́ɛ kpó axɔ́sú e ɖo tagba dó nú mi wɛ lɛ́ɛ bǐ kpó sí.’

¹⁹Égbé din ɔ́, mi ka gbɛ́ nyɛ Mawu mitɔn. Nyɛ mɛ e hwlɛ́n mi gán ɖo ya e mi ji é kpó nǔ e gbo mi lɛ́ɛ kpó bǐ mɛ é. Bɔ mi nɔ ɖɔ nú mì ɖɔ: ‘Sɔ́ axɔ́sú ɖokpó ɖó mǐ nu.’ Din ɔ́, mi zɔn akɔta mitɔn mitɔn mɛ, hɛ̌nnu mitɔn mitɔn mɛ, bó wá Mawu Mavɔmavɔ nukɔn.”

²⁰Samuwɛ́li ylɔ́ akɔta Izlayɛ́li tɔn ɖokpó ɖokpó wá Mawu Mavɔmavɔ nukɔn, bó nyi akɔ dó yě bɔ Mawu Mavɔmavɔ ɖe akɔta Bɛnjamɛ́ɛ tɔn.

²¹Bɔ Samuwɛ́li ylɔ́ xwédo e ɖo akɔta Bɛnjamɛ́ɛ tɔn mɛ lɛ́ɛ ɖokpó ɖokpó wá Mawu Mavɔmavɔ nukɔn, bó nyi akɔ dó yě, bɔ akɔ jɛ xwédo Matli tɔn jí; é nyi akɔ dó mɛ e ɖo xwédo énɛ́ ɔ́ mɛ lɛ́ɛ, bɔ akɔ jɛ Sawúlu Kícu ví ɔ́ jí. È jɛ Sawúlu ba jí, è ka mɔ ɛ ǎ.

²²Bɔ è lɛ̌ kan nǔ byɔ́ Mawu Mavɔmavɔ ɖɔ mɛ mɔ̌hunkɔtɔn wá fí a jí, bɔ Mawu Mavɔmavɔ yí gbe ɖɔ: “Mi yi ba ɛ ɖo agban lɛ́ɛ tɛ́ntin; fínɛ́ wɛ é hɔn hwlá cí.”

²³Ée Mawu Mavɔmavɔ ɖɔ mɔ̌ ɔ́, è bɛ̌ wezun bo yi dɔn ɛ sín dɔ̌n wá togun ɔ́ nukɔn; é hú taga yě bǐ.

²⁴Ée é wá ɔ́, Samuwɛ́li ɖɔ nú togun ɔ́ bǐ ɖɔ: “Mi mɔ mɛ e Mawu Mavɔmavɔ sɔ́ é a? Mɛ éé ɖɔhun ɖě ɖo to ɔ́ mɛ ǎ.” Bɔ togun ɔ́ bǐ kpa awǒbóbó bó sú xó ɖɔ: “Susu nú axɔ́sú ɔ́.”

²⁵Samuwɛ́li wá ɖɔ acɛ e axɔ́sú ɔ́ ɖó ɔ́, bó wlán bǐ dó wěma mɛ, bó sɔ́ ɖó Mawu Mavɔmavɔ nukɔn. Énɛ́ ɔ́ gúdo ɔ́, é nyi togun ɔ́, bɔ mɛ ɖokpó ɖokpó yi xwé tɔn gbe.

²⁶Sawúlu ɖésú ká yi xwé tɔn gbe ɖo Giveya, bɔ Mawu ɖɔ xó dó ayi mɛ nú mɛ e nyɔ́ ahwan fun ganjí lɛ́ɛ ɖě, bɔ yě kplá ɛ hɛn yi.

²⁷Nǔ ɖo mɔ̌ có, nǔvɔ́nɔ ɖé lɛ́ɛ tíin bó nɔ́ ɖɔ: “Étɛ́! Mɛ e ɖo mǐ ná hwlɛ́n gán wɛ é ɖíe a?” Bɔ yě gbɛ́ wǎn n'i, bó hɛn nǔɖé wá ná ɛ ǎ. Sawúlu ka ké ya ná ǎ.