Read fon 1 Samuwɛ́li 14 Bible Online

1 Samuwɛ́li 14 - fon bible

1 Samuwɛ́li 14

¹É wá su gbe ɖokpó, bɔ Jonatáan Sawúlu ví ɔ́ ɖɔ nú nyaví dɔ̌nkpɛvú e nɔ hɛn ahwanfunnú tɔ́n lɛ́ɛ ɖɔ: “Wǎ mǐ ní hun káká yi fí e Filisitɛ́ɛn lɛ́ɛ ɖó gɔnu ɖó é.” Lo ɔ́, é ɖɔ xó ɖěbǔ nú tɔ́ tɔn ǎ.

²Sawúlu ka ɖo ayǐjínjɔ́n ɖo Giveya to ɔ́ sín dogbó jí dɔ̌n, ɖo glenáditín e ɖo Miglɔni é sá. Ahwanfuntɔ́ e xwedó e lɛ́ɛ ná yi nǔwɔntɔn (600) mɔ̌.

³Vɔ̌sánú-xwlémawutɔ́ e ɖo yě mɛ, bɔ nǔ e è nɔ dó kan nǔ byɔ́ Mawu lɛ́ɛ ɖo así tɔn ɔ́ nɔ́ nyí Axiya. Axitúvu ví wɛ, bɔ tɔ́ tɔn nɔví nɔ́ nyí Ikavodi. Ikavodi ɔ́, Pínxási ví wɛ, bó nyí Eli vívú. Eli ɔ́ wɛ nyí vɔ̌sánú-xwlémawutɔ́ e nɔ Silóo ɖ'ayǐ é. Ahwanfuntɔ́ ɖě ká tunwun ɖɔ Jonatáan yi fí ɖé ǎ.

⁴Sónuvínu we tɛ́ntin gbɔn wɛ Jonatáan ɖe bó ná yi Filisitɛ́ɛn lɛ́ɛ gɔ́n, bɔ nuvínu ɖě ɖo dě, bɔ ɖě ɖo dě. Sónuvínu ɖokpó nyí Bocesi, bɔ wegɔ́ ɔ́ nyí Sɛnnɛ́ɛ.

⁵Sónuvínu ɖokpó ɖo totaligbé ɖo Mikumasi nukɔn, bɔ wegɔ́ ɔ́ ɖo tofɔligbé ɖo Gɛva nukɔn.

⁶Jonatáan ɖɔ nú nyaví e nɔ́ hɛn ahwanfunnú tɔn lɛ́ɛ ɖɔ: “Wǎ mǐ ní hun káká yi fí e yě mɛ énɛ́ lɛ́ɛ e má nɔ sɛn Mawu ǎ lɛ́ɛ ɖó gɔnu ɖó é; afɔ nyɔ́ ɔ́, Mawu Mavɔmavɔ sixú wa ɖagbe nú mǐ, ɖó mǐ sukpɔ́ kpó mǐ má sukpɔ́ kpó ɔ́, é sixú hwlɛ́n mǐ gán; nǔ ɖěbǔ gló e ǎ.”

⁷Nyaví e nɔ́ hɛn ahwanfunnú tɔn lɛ́ɛ ɔ́ ɖɔ n'i ɖɔ: “Nǔɖé wá ayi towe mɛ hǔn, blǒ, ma xokpɔ́n ó; nǔ e ɖo ayi towe mɛ ɔ́ jɛ́n ɖo nyi lɔ sín ayi mɛ.”

⁸Bɔ Jonatáan ɖɔ: “É nyɔ́! Bo wá mǐ yi mɛ énɛ́ lɛ́ɛ gɔ́n, bó ná sɔ́ mǐɖée xlɛ́ yě.

⁹Nú yě ɖɔ mǐ ní nɔ te káká nú émí ná wá mǐ gɔ́n ɔ́, mǐ sɔ́ ná sɛ tɛn ǎ, mǐ sɔ́ ná yi yě gɔ̌n ǎ.

¹⁰Lo ɔ́, nú yě ɖɔ mǐ ní wá gɔ̌n émítɔn ɔ́, mǐ ná yi. Énɛ́ ɔ́ wɛ ná ɖe xlɛ́ mǐ ɖɔ Mawu Mavɔmavɔ jó yě nú mǐ.”

¹¹Yě mɛ we lɛ́ɛ yi ɖe yěɖée xlɛ́ bɔ Filisitɛ́ɛn lɛ́ɛ mɔ yě bó ɖɔ: “Hǐn! Eblée lɛ́ɛ ɖíe; yě ɖo tíntɔ́n sín do e mɛ yě hɔn hwlá dó lɛ́ɛ é wɛ.”

¹²Bɔ Filisitɛ́ɛn lɛ́ɛ ɖɔ nú Jonatáan kpó mɛ e nɔ hɛn ahwanfunnú tɔn lɛ́ɛ ɔ́ kpó ɖɔ: “Mi wá gɔ̌n mǐtɔn nú mǐ ná xlɛ́ nǔɖé mi.” Bɔ Jonatáan ɖɔ nú mɛ e nɔ hɛn ahwanfunnú tɔn lɛ́ɛ ɔ́ ɖɔ: “Xwedó mì, ɖó Mawu Mavɔmavɔ jó yě nú Izlayɛ́li.”

¹³Jonatáan ɖo sísá gbɔn só ɔ́ jí wɛ, bɔ mɛ e nɔ hɛn nǔ tɔn lɛ́ɛ ɔ́ jɛ gǔdo tɔn. Jonatáan nɔ ɖo Filisitɛ́ɛn lɛ́ɛ xo zin dɛ́ wɛ, bɔ mɛ e nɔ hɛn ahwanfunnú tɔn lɛ́ɛ ɔ́ nɔ́ ɖo yě hu wɛ.

¹⁴Azɔn nukɔntɔn énɛ́ e Jonatáan kpó mɛ e nɔ hɛn nǔ tɔn lɛ́ɛ ɔ́ kpó ɖu ɖo Filisitɛ́ɛn lɛ́ɛ jí ɔ́, gbɛtɔ́ ná yi ko mɔ̌ wɛ yě hu. Yě ká yi fí jɔ fí ɖé có bó hu mɛ sɔ mɔ̌ ǎ.

¹⁵Nǔ énɛ́ e jɛ ɔ́ gba kpé gbě énɛ́ ɔ́ bǐ jǐ, bó gba kpé togun ɔ́ bǐ mɛ. Ahwanfuntɔ́ e ɖo ahwankpá ɔ́ mɛ lɛ́ɛ kpó mɛ e ko tɔ́n bó ná vɔ Izlayɛ́li ví lɛ́ɛ kpó bǐ bɛ́ xɛsi. Ayǐkúngban dán wǔ, bɔ é nyí nǔdóxɛsi ɖaxó ɖé, bɔ Mawu sɛ́ dó.

¹⁶Mɛcɔ́tɔ́ Sawúlu tɔn e ɖo Giveya ɖo Bɛnjamɛ́ɛ yíkúngban jí lɛ́ɛ mɔ sɛ́ dó ɖɔ Filisitɛ́ɛn lɛ́ɛ ɖo hinhɔn wɛ, bó gba kpé tánmɛ tánmɛ.

¹⁷Bɔ Sawúlu ɖɔ nú ahwanfuntɔ́ lɛ́ɛ ɖɔ: “Mi kpɔ́n mɛ mɛ, bó kpɔ́n ɖɔ mɛɖé hwe ɖo mǐ mɛ a jí.” Yě kpɔ́n mɛ mɛ nǔgbó, bó mɔ ɖɔ é hwe Jonatáan kpó mɛ e nɔ hɛn ahwanfunnú tɔn lɛ́ɛ é kpó.

¹⁸Sawúlu ɖɔ nú Axiya ɖɔ ní zé akɔjijɛgbá Mawu tɔn ɔ́ wá. Đó hwe énɛ́ ɔ́ nu ɔ́, akɔjijɛgbá Mawu tɔn ɔ́ ɖo fí e Izlayɛ́li ví lɛ́ɛ ɖó gɔnu ɖó é.

¹⁹Hwenu e Sawúlu ɖo xó ɖɔ nú vɔ̌sánú-xwlémawutɔ́ ɔ́ wɛ é ɔ́, zǐngídi ɔ́ lɛ́ ɖo syɛ́nsyɛ́n d'é jí wɛ ɖo fí e Filisitɛ́ɛn lɛ́ɛ ɖó gɔnu ɖó é; énɛ́ ɔ́, Sawúlu ɖɔ nú vɔ̌sánú-xwlémawutɔ́ ɔ́ ɖɔ: “Ma xaji kan nǔɖé byɔ́ Mawu ó.”

²⁰Ée é ɖɔ mɔ̌ ɔ́, é kplé ahwanfuntɔ́ tɔn lɛ́ɛ, bɔ é kpó yě kpó yi fí e fun ahwan ɔ́ ɖe wɛ yě ɖe é, bó mɔ Filisitɛ́ɛn lɛ́ɛ ɖo yěɖée hu wɛ, bɔ mɛɖé sɔ́ mɔ nukúnnú jɛ nǔɖé mɛ ǎ.

²¹Eblée ɖé lɛ́ɛ ká ɖo Filisitɛ́ɛn lɛ́ɛ sín acɛ mɛ ɖ'ayǐ, bó nɔ kplá yě yi ahwangbénu. Ée Izlayɛ́li ví lɛ́ɛ kpó Sawúlu kpó Jonatáan kpó wá ɔ́, Eblée énɛ́ lɛ́ɛ lílɛ́ jɛ jǐ yětɔn.

²²Izlayɛ́li ví e yi hɔn hwlá ɖo Eflayímu sókan mɛ lɛ́ɛ se ɖɔ Filisitɛ́ɛn lɛ́ɛ ɖo hinhɔn wɛ lobo tɔ́n, bó zun dó Filisitɛ́ɛn lɛ́ɛ jí.

²³Lě e Mawu Mavɔmavɔ bló bɔ Izlayɛ́li ví lɛ́ɛ ɖu ɖ'é jí gbɔn ɔ́ nɛ́. Izlayɛ́li ví lɛ́ɛ fun ahwan ɔ́ káká bó zɛ Bɛti-Awɛni wú.

²⁴Izlayɛ́li ví lɛ́ɛ mɔ wǔvɛ́ gbe énɛ́ ɔ́ gbe ɖésú. Đó Sawúlu dó sɛ́n nú togun ɔ́ ɖɔ: “Mɛ ɖěbǔ ɖo mi mɛ bó sɔ́ nǔ ɖokpó dó nu cóbónú zǎn kú ɔ́, heelú mɛ ɔ́. Ényí mɛɖé ɖu nǔ cóbónú un ba hlɔn kɛntɔ́ ce lɛ́ɛ bǐ wú hǔn, heelú mɛ ɔ́.” Nǔgbó ɔ́, mɛɖé dó kɛ́n nu ǎ.

²⁵Ahwanfuntɔ́ lɛ́ɛ bǐ wá zungbó ɖé mɛ, bɔ wǐin ɖo fínɛ́ káká bó nɔ sa.

²⁶Ée yě byɔ́ zungbó ɔ́ mɛ ɔ́, yě mɔ wǐin ɖo sisa wɛ, mɛɖé ká glá dó ɖɛ̌ ǎ, ɖó mɛ bǐ ɖo xɛsi ɖi nú nǔ e Sawúlu ɖɔ é wɛ.

²⁷Jonatáan ka tunwun ɖɔ tɔ́ émítɔn dó sɛ́n mɔ̌hunkɔtɔn ǎ, bó sɔ́ kpo e ɖo alɔ tɔn mɛ ɔ́ ɖó wǐin ɔ́ mɛ bó sɔ́ dó nu. Ée é bló mɔ̌ ɔ́, nukún tɔn mɔ nǔ ganjí.

²⁸Ahwanfuntɔ́ lɛ́ɛ ɖokpó ká ɖɔ n'i ɖɔ: “Tɔ́ towe zín togun ɔ́ bǐ jí, bɔ mɛ bǐ xwlé nǔ, bɔ é ɖɔ heelú mɛ e ná ɖu nǔ égbé ɔ́. Énɛ́ ɔ́ wú wɛ nǔ ci kɔ nú mɛ bǐ.”

²⁹Jonatáan ɖɔ: “Tɔ́ ce ɔ́, tagba dó nú togun ɔ́ wɛ é ɖe kpowun. Mi kpɔ́n! Ée nyɛ dó wǐin kpɛɖé nu din ɔ́, nukún ce mɔ nǔ ganjí.

³⁰Ényí mǐ Izlayɛ́li ví lɛ́ɛ ko ɖu nǔ e mǐ gba Filisitɛ́ɛn lɛ́ɛ, bó yí ɖo yě sí lɛ́ɛ ɖě wɛ ɔ́, nǔ e mǐ nǎ kó wa xá yě ɔ́ ná hú mɔ̌.”

³¹Gbe énɛ́ gbe ɔ́, Izlayɛ́li ví lɛ́ɛ ɖu ɖo Filisitɛ́ɛn lɛ́ɛ jí, bó nya yě sín Mikumasi káká yi Ayalɔ́ni, bɔ nǔ cikɔ nú Izlayɛ́li ví lɛ́ɛ ɖésú.

³²Yě zɔn nǔ e yě yí ɖo Filisitɛ́ɛn lɛ́ɛ sí é jí, bó nɔ́ hu gbɔ̌ kpó nyibúsú kpó, kpó nyibúví kpó kɔn nyi kɔ́ mɛ, bó nɔ ɖu kpó hun kpó.

³³ È yi ɖɔ xó nɛ́ ɔ́ nú Sawúlu bó ɖɔ: “Ahwanfuntɔ́ lɛ́ɛ ɖíe ɖo lan ɖu kpó hun kpó wɛ, bó dó ɖo Mawu Mavɔmavɔ sɛ́n gba wɛ e.” Bɔ Sawúlu ɖɔ: “Étɛ́ ɖíe mi dó sin e! Mi yá wǔ blí awǐnnya ɖaxó ɖokpó wá nú mì.”

³⁴É lɛ́ ɖɔ nú yě ɖɔ: “Mi gbɔn togun ɔ́ bǐ mɛ, bó ɖɔ nú yě ɖɔ mɛ ɖokpó ɖokpó ní hɛn nyibú tɔn abǐ gbɔ̌ tɔn, bó wá gɔ̌n ce. Nukún ce mɛ fí wɛ yě ná hu kanlin yětɔn lɛ́ɛ ɖe, bó ná ɖu. Énɛ́ ɔ́, yě sɔ́ ná ɖu kpó hun kpó bó ná dó gba Mawu Mavɔmavɔ sɛ́n ǎ.” Gbe nɛ́ gbe zǎn mɛ ɔ́, mɛ ɖokpó ɖokpó hɛn nyibú tɔn wá, bó hu bó kɔn hun tɔn dó awǐnnya ɔ́ jí.

³⁵Lě e Sawúlu mɛ vɔ̌sákpe ɖokpó nú Mawu Mavɔmavɔ gbɔn ɔ́ nɛ́. Vɔ̌sákpe nukɔntɔn e Sawúlu mɛ nú Mawu Mavɔmavɔ é nɛ́.

³⁶Sawúlu ɖɔ: “Mi wá mǐ ní zɔn zǎn bó ná tɔ́n ahwan Filisitɛ́ɛn lɛ́ɛ. Mǐ nǎ ɖo nǔ yětɔn lɛ́ɛ bɛ́ wɛ káká bɔ ayǐ ná hɔ́n. Mǐ nǎ jó mɛ e kpo ɖo gbɛ lɛ́ɛ ɖokpó dó ǎ.” Bɔ yě yí gbe n'i ɖɔ: “Ayi towe mɔ nǔɖé hǔn wa.” Vɔ̌sánú-xwlémawutɔ́ ɔ́ ká ɖɔ: “Mi wá mǐ ní kan nǔ byɔ́ Mawu hwɛ̌.”

³⁷Bɔ Sawúlu kanbyɔ́ Mawu ɖɔ: “Ma yi tɔ́n ahwan Filisitɛ́ɛn lɛ́ɛ a? A nǎ jó yě nú mǐ a?” Mawu ká kɛ nu d'é mɛ n'i gbe nɛ́ gbe ǎ.

³⁸Énɛ́ ɔ́, Sawúlu ylɔ́ gǎn lɛ́ɛ bǐ, bó ɖɔ: “Mi ba do nú hwɛ e jɛ́n mǐ hu égbé é.

³⁹Un xwlé Mawu nú mi. Mawu Mavɔmavɔ Izlayɛ́li tɔn Mɛhwlɛ́ngántɔ́ ɔ́ ɖo gbɛ. É ná bó nyí vǐ ce Jonatáan ɔ́ wɛ hu hwɛ ɔ́, é ná kú.” Ée é ɖɔ mɔ̌ ɔ́, mɛ ɖokpó kɛ nu d'é mɛ n'i ǎ.

⁴⁰É ɖɔ nú Izlayɛ́li togun ɔ́ bǐ ɖɔ: “Mi jɛ vo bónú nyi kpó vǐ ce Jonatáan ɔ́ kpó ná jɛ vo.” Togun ɔ́ ká yí gbe nú Sawúlu ɖɔ: “Ayi towe mɔ nǔɖé hǔn, wa.”

⁴¹ Sawúlu ka ɖɔ nú Mawu Mavɔmavɔ ɖɔ: “Mawu Izlayɛ́li tɔn! Đe nǔgbó ɔ́ xlɛ́.” Bɔ Mawu Mavɔmavɔ ɖe Sawúlu kpó vǐ tɔn Jonatáan ɔ́ kpó.

⁴²Sawúlu ɖɔ: “Mi bo nyi akɔ dó mɛ e wɛ é ɖo nyɛ kpó vǐ ce Jonatáan kpó mɛ.” È ka nyi akɔ, bɔ é nyí Jonatáan wɛ.

⁴³Bɔ Sawúlu ɖɔ n'i ɖɔ: “Jonatáan! Đɔ nǔ e a dó sin ɔ́ nú mì.” Bɔ Jonatáan ka yí xó bó ɖɔ: “Kpo e ɖo alɔ ce mɛ é wɛ un sɔ́ dó wǐin mɛ bó dó nu; din ɔ́, un yí kú gbe.”

⁴⁴Sawúlu sú xó bó ɖɔ: “Jonatáan, ényí a ma kú ǎ hǔn, Mawu ní wa nǔ bǐ xá mì.”

⁴⁵Ahwanfuntɔ́ lɛ́ɛ ká yí xó, bó ɖɔ: “Étɛ́, Jonatáan ná kú o! É mɛ e hwlɛ́n Izlayɛ́li to ɔ́ gán é! Gbeɖé kpɔ́n! Mǐ xwlé Mawu nú we ɖɔ: Mawu Mavɔmavɔ ɖo gbɛ; ɖa ɖokpó géé vɔ́vɔ́ ná j'ayǐ sín ta tɔn ǎ, ɖó Mawu wɛ bló bɔ é wa azɔ̌ égbé.” Lě e ahwanfuntɔ́ lɛ́ɛ hwlɛ́n Jonatáan gán gbɔn é nɛ́, bɔ é sɔ́ kú ǎ.

⁴⁶Sawúlu lɛ́ kɔ sín Filisitɛ́ɛn lɛ́ɛ gúdo, bɔ yě lɛ́ kɔ yi xwé.

⁴⁷Ée Sawúlu ɖu axɔ́sú ɖo Izlayɛ́li ɔ́, é fun ahwan xá kɛntɔ́ tɔn lɛ́ɛ bǐ. Yě wɛ nyí: Mɔwabunu lɛ́ɛ, Amumɔ́ɔ ví lɛ́ɛ, Edɔ́munu lɛ́ɛ, bó fun ahwan xá Sova xɔ́sú lɛ́ɛ, kpó Filisitɛ́ɛn lɛ́ɛ kpó. É fun ahwan ɖěbǔ ɔ́, é nɔ ɖu ɖ'é jí.

⁴⁸É wá su gbe ɖokpó, bɔ é fun ahwan xá Amalɛ́ki ví lɛ́ɛ, bó gba yě dó, bó ɖe hlɔ̌nhlɔ́n tɔn xlɛ́. Lě e é hwlɛ́n Izlayɛ́li to ɔ́ ɖo mɛ e ɖo yě vɔ wɛ lɛ́ɛ sí gbɔn ɔ́ nɛ́.

⁴⁹Sawúlu ví lɛ́ɛ wɛ nyí Jonatáan, Yicíwi kpó Maluki-Cua kpó. Vǐ nyɔ̌nu we wɛ é ɖó: vǐ tɔn nyɔ̌nu ɖaxó ɔ́ nyí Mɛlávu, bɔ kpɛví ɔ́ nyí Mikali.

⁵⁰Sawúlu sín asi nɔ nyí Axinɔwamu; Aximáasi ví wɛ. Mɛ e kpa acɛ dó ahwangɔnu tɔn nu é nɔ nyí Avunɛ́ɛ. Sawúlu sín tɔ́ nɔví Nɛ̌ɛ ɔ́ sín vǐ wɛ.

⁵¹Đó Kícu Sawúlu tɔ́ ɔ́ kpó Nɛ̌ɛ Avunɛ́ɛ tɔ́ ɔ́ kpó ɔ́, Aviɛ́li wɛ ji yě.

⁵²Sawúlu ɔ́, ɖo gbɛ hwenu tɔn bǐ ɔ́, é fun ahwan xá Filisitɛ́ɛn lɛ́ɛ káká. É nyí Sawúlu mɔ súnnu hlɔ̌nhlɔ́nnɔ akɔ́nkpantɔ́ ɖé ɔ́, é nɔ yí dó ahwan mɛ.