Read fon 1 Samuwɛ́li 15 Bible Online

1 Samuwɛ́li 15 - fon bible

1 Samuwɛ́li 15

¹ É wá su gbe ɖokpó bɔ Samuwɛ́li ɖɔ nú Sawúlu ɖɔ: “Nyi wɛ Mawu Mavɔmavɔ sɛ́ dó bɔ un wá kɔn ami dó ta nú we, bó sɔ́ we axɔ́sú ɖó Izlayɛ́li nu. Hǔn bo ɖótó xó e Mawu Mavɔmavɔ ɖɔ é.

² Xó e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ ɖíe; é ɖɔ: ‘Un ná dɔn tó nú Amalɛ́ki ví lɛ́ɛ ɖó nǔ e yě blǒ xá Izlayɛ́li ví lɛ́ɛ ɔ́ wú. Hwenu e Izlayɛ́li ví lɛ́ɛ gosín Ejípu bo wá xweyǐgbe ɔ́, Amalɛ́ki ví lɛ́ɛ gbo ali nú yě.

³Din ɔ́, yi bo gba Amalɛ́ki, bó hɛn nǔ tɔn lɛ́ɛ bǐ gblé. Ma jó é ɖésúnɔ dó ó. A nǎ hu nǔ e ɖo to ɔ́ mɛ lɛ́ɛ bǐ; a nǎ hu súnnu kpó nyɔ̌nu kpó, yɔkpɔ́vú kpó vǐ yɛ̌yɛ́ kpó, nyibú kpó gbɔ̌ kpó, lǎkúnmí kpó tócí kpó.’ ”

⁴Sawúlu ylɔ́ ahwanfuntɔ́ lɛ́ɛ kplé, bó xa yě ɖo Telayimu. É mɔ gbɛtɔ́ adɔ̌kpo wǒ (200.000) ɖo akɔta e ɖo totaligbé lɛ́ɛ mɛ, bɔ súnnu Judáa ví děgba we afɔwó (10.000) gɔ́ ná.

⁵Sawúlu kplá yě káká yi Amalɛ́ki ví lɛ́ɛ sín toxo mɛ, bɔ yě tɔwu nú Amalɛ́ki ví lɛ́ɛ ɖó tɔdo ɔ́ mɛ.

⁶Sawúlu ɖɔ nú Keni ví lɛ́ɛ ɖɔ: “Mi gosín fí, mi tɔ́n sín Amalɛ́ki ví lɛ́ɛ mɛ bónú un ma wá hu mi kpó yě kpó ó. Đó hwenu e Izlayɛ́li ví lɛ́ɛ gosín Ejípu ɔ́, mi nyɔ́ xomɛ dó yě wú.” Ée é ɖɔ mɔ̌ ɔ́, Keninu lɛ́ɛ tɔ́n sín Amalɛ́ki ví lɛ́ɛ mɛ.

⁷Ée Keninu lɛ́ɛ tɔ́n ɔ́, Sawúlu gba Amalɛ́ki ví lɛ́ɛ, sín Hawíla káká wá Cúu, ɖo Ejípu kpá.

⁸É wlí Amalɛ́ki xɔ́sú Agagi ɔ́ gbɛɖe gbɛɖe, bo hu mɛ e kpo lɛ́ɛ bǐ.

⁹Lo ɔ́, Sawúlu kpó ahwanfuntɔ́ tɔn lɛ́ɛ kpó wa nǔɖé nú Agagi ǎ. Yě hu kanlin ɖagbe ɖagbe e ɖo to ɔ́ mɛ lɛ́ɛ ɖě ǎ. Gbɔ̌ kpó nyibú kpó, kpódó lɛ̌ngbɔ́ví kpó e ɖo ganjí lɛ́ɛ ɔ́, yě hu ɖě ǎ. Kanlin ɖagbe ɖagbe, kanlin kloklo e ɖo to ɔ́ mɛ lɛ́ɛ ɔ́, yě hu ɖě ǎ. Nǔ e ma nyí nǔjɔnǔ, nǔɖé wa nú ǎ bó gbɛ́ hɛn lɛ́ɛ kɛ́ɖɛ́ wɛ yě hɛn gblé.

¹⁰Énɛ́ ɔ́ gúdo ɔ́, Mawu Mavɔmavɔ ɖɔ nú Samuwɛ́li ɖɔ:

¹¹“Sawúlu e un sɔ́ axɔ́sú ɔ́ vɛ́ nú mì, ɖó é jó mì dó; é bló nǔ e un ɖɔ lɛ́ɛ ǎ.” Bɔ Samuwɛ́li sin xomɛ bó sa vo nú Mawu Mavɔmavɔ zǎn ɔ́ mɛ káká bɔ ayǐ hɔ́n.

¹²Ée ayǐ hɔ́n zǎnzǎn tɛɛn ɔ́, é xwe Sawúlu gɔ́n, bɔ è wǎ ɖɔ n'i ɖɔ Sawúlu yi Kaamɛ́li toxo mɛ, bó mɛ kpe ɖokpó ɖó fínɛ́. Énɛ́ ɔ́ gúdo ɔ́, Sawúlu lɛ́ kɔ bo yi gbɔn zɔ, bó yi Gilugalu.

¹³Samuwɛ́li yi Sawúlu gɔ́n, bɔ Sawúlu ɖɔ n'i ɖɔ: “Mawu Mavɔmavɔ ní kɔn acɛ dó jǐ we. Un bló nǔ e Mawu Mavɔmavɔ ɖɔ é.”

¹⁴Samuwɛ́li ka kanbyɔ́ ɛ ɖɔ: “Bɔ gbɔ̌ tɛ́ lɛ́ɛ ká ɖo xó sú wɛ? Nyibú tɛ́ lɛ́ɛ ká ɖo xó sú wɛ?”

¹⁵Sawúlu ka yí gbe n'i ɖɔ: “Sɔ́ja lɛ́ɛ wɛ bɛ́ yě sín Amalɛ́ki ví lɛ́ɛ gɔ́n. Đó gbɔ̌ e nyí gbɔ̌ ɖagbe lɛ́ɛ, kpó nyibú ɖagbe lɛ́ɛ kpó ɔ́, yě bɛ̌ yě sín Amalɛ́ki ví lɛ́ɛ gɔ́n, bó ná dó sá vɔ̌ nú Mawu Mavɔmavɔ, Mawu towe. Ée kpo lɛ́ɛ ɔ́, mǐ hu.”

¹⁶Samuwɛ́li ka ɖɔ n'i ɖɔ: “É kpé mɔ̌! Nɔ te ma ɖɔ nǔ e Mawu Mavɔmavɔ ɖɔ nú mì égbé zǎn mɛ ɔ́ nú we.” Bɔ Sawúlu ná ɛ xó.

¹⁷Énɛ́ ɔ́, Samuwɛ́li ɖɔ: “Đ'ayǐ ɔ́, a nɔ sɔ́ hwiɖée dó mɔ mɛjɔmɛ ɖě ǎ. Din ɔ́, a hǔzú akɔta Izlayɛ́li tɔn lɛ́ɛ bǐ sín gǎn. Mawu Mavɔmavɔ wɛ kɔn ami dó ta nú we bó sɔ́ we Izlayɛ́li xɔ́sú.

¹⁸Mawu Mavɔmavɔ wɛ sɛ́ we dó ɖɔ hwi ní vívá kún nú Amalɛ́ki ví lɛ́ɛ bǐ, ɖó hwɛhutɔ́ wɛ nú yě. Đɔ hwi ná fun ahwan xá yě káká bó ná hu yě bǐ.

¹⁹Étɛ́wú a ma ka bló nǔ e Mawu Mavɔmavɔ zɔn we ɔ́ ǎ? Étɛ́wú a ka zɔn dɔkun e a mɔ ɖo dɔ̌n lɛ́ɛ jí, bó bɛ́? Nǔ énɛ́ nyɔ́ Mawu Mavɔmavɔ nukún mɛ ǎ.”

²⁰Sawúlu ka yí gbe nú Samuwɛ́li ɖɔ: “Un ɖótó Mawu Mavɔmavɔ ganjí hǔn. Nǔ e é zɔ́n mì ɔ́, un bló. Un wlí axɔ́sú Amalɛ́ki tɔn, Agagi ɔ́ wá, bó ká hu Amalɛ́ki ví e kpo lɛ́ɛ bǐ.

²¹Lo ɔ́, ényí ahwanfuntɔ́ ce lɛ́ɛ cyán kanlin ɖagbe lɛ́ɛ ɖo kanlin e è ɖǒ ná hu lɛ́ɛ mɛ, bó bɛ́ wá Gilugalu fí ɔ́, è nǎ zé yě dó sá vɔ̌ nú Mawu Mavɔmavɔ, Mawu towe wú wɛ.”

²²Samuwɛ́li lɛ́ ɖɔ: “Lě e Mawu Mavɔmavɔ yí wǎn nú tónú se nú xó tɔn gbɔn ɔ́ wɛ é yí wǎn nú vɔ̌ e è nɔ dó zo ɔ́, kpódó vɔ̌sísá ɖě lɛ́ɛ kpó gbɔn a? Gbeɖé! É yí wǎn nú tónú se n'i hú vɔ̌sísá. È blǒ nǔ e é ɖɔ ɔ́, é nɔ́ víví n'i hú jǒ.

²³Đó mɛ e gbɛ́ gbe nú Mawu ɔ́, hwɛ ɖokpó ɔ́ wɛ é hu xá mɛ e kan nǔ é. Mɛ e dó tókúse nǔ e Mawu ɖɔ ɔ́ mɛ ɔ́, hwɛ ɖokpó ɔ́ wɛ é hu xá mɛ e nɔ sɛn vodún é kpó mɛ e nɔ sɛn bǒcyɔ lɛ́ɛ kpó. Ée a hɔn xó Mawu tɔn sɔ́ nyi gbě ɔ́, élɔ́ ɖe we sín axɔ́súzinkpo jí.”

²⁴Ée Samuwɛ́li ɖɔ mɔ̌ ɔ́, Sawúlu ɖɔ: “Un hu hwɛ, un bló nǔ e Mawu Mavɔmavɔ ɖɔ lɛ́ɛ ǎ, un ka bló nǔ e hwi lɔ ɖɔ lɛ́ɛ ǎ. Ahwanfuntɔ́ lɛ́ɛ ɖi xɛsi ná wɛ un ka ɖe, bó gbɔ bó bló nǔ e yě ɖɔ é.

²⁵Din ɔ́, kɛnklɛ́n, sɔ́ hwɛ ce kɛ mì, bó wá kplá mì nú má yi ɖe kɔ́ nú Mawu Mavɔmavɔ.”

²⁶Samuwɛ́li ka ɖɔ nú Sawúlu ɖɔ: “Un ná kplá we yi ǎ. Đó a hɔn xó Mawu Mavɔmavɔ tɔn nyi gbě, bɔ Mawu Mavɔmavɔ gbɛ́ hwi lɔ, bɔ a sɔ́ nyí Izlayɛ́li xɔ́sú ǎ.”

²⁷ Ée Samuwɛ́li lɛ́ kɔ bó ná ɖidó ɔ́, Sawúlu hɛn awu ɖaxó e é dó ɔ́ sín tó, bɔ é sun.

²⁸Bɔ Samuwɛ́li ɖɔ n'i ɖɔ: “Éénɛ́! Lě e Mawu Mavɔmavɔ yí axɔ́súɖuto Izlayɛ́li tɔn sín así towe, bó sɔ́ jó nú mɛ ɖěvo, mɛ e nyɔ́ hú hwɛ é ɖěvo gbɔn é nɛ́.

²⁹Mawu Mavɔmavɔ e nyí susu Izlayɛ́li tɔn ɔ́ nɔ ɖó adingban ǎ; nǔ e é ká ɖɔ ɔ́, é nɔ lɛ́ vɔ́ wá jí ǎ. Đó é nyí gbɛtɔ́, bó ná ɖɔ xó bó lɛ́ húzú ǎ.”

³⁰Sawúlu lɛ́ ɖɔ: “Hwɛ wɛ un hu. Ka kɛnklɛ́n bó sɔ́ mì su ɖo tomɛxó lɛ́ɛ nukɔn, bó sɔ́ mì su ɖo Izlayɛ́li ví lɛ́ɛ nukɔn. Wǎ kplá mì nú má yi ɖe kɔ́ nú Mawu Mavɔmavɔ, Mawu towe.”

³¹Énɛ́ ɔ́, Samuwɛ́li lɛ́ kɔ, bó kplá Sawúlu, bɔ é yi ɖe kɔ́ nú Mawu Mavɔmavɔ.

³²Énɛ́ ɔ́ gúdo ɔ́, Samuwɛ́li ɖɔ: “Mi kplá Agagi Amalɛ́ki xɔ́sú ɔ́ wá nú mì.” Bɔ Agagi ɖidó Samuwɛ́li gɔ́n kpó xomɛhunhun kpó, ɖó é ɖo ɖiɖɔ dó ayi mɛ wɛ ɖɔ: “Un ɖiɖɔ kú xó ɖé sɔ́ ɖ'é mɛ nú mì din ǎ.”

³³Samuwɛ́li ka ɖɔ: “Lě e a sɔ́ hwǐ towe dó hu vǐ ɖé lɛ́ɛ sín nɔ yětɔn kɔn ɔ́, mɔ̌ ɖokpó ɔ́, vǐ ɖokpó ná kú sín nɔ towe kɔn égbé.” Ée Samuwɛ́li ɖɔ mɔ̌ ɔ́, é já Agagi ɖo Mawu Mavɔmavɔ nukɔn ɖo Gilugalu.

³⁴Énɛ́ ɔ́ gúdo ɔ́, Samuwɛ́li lɛ́ kɔ yi Hlama, bɔ Sawúlu lɔ yi xwé tɔn gbe ɖo Giveya.

³⁵Samuwɛ́li sɔ́ mɔ Sawúlu gbeɖé có bó kú ǎ; é nɔ ɖo avǐ ya wɛ hwebǐnu ɖó Sawúlu tamɛ. Đó Mawu Mavɔmavɔ ɖésú wɛ sɔ́ Sawúlu Izlayɛ́li xɔ́sú bɔ é ká lɛ́ wá vɛ́ n'i.