Read fon 1 Samuwɛ́li 17 Bible Online

1 Samuwɛ́li 17 - fon bible

1 Samuwɛ́li 17

¹Filisitɛ́ɛn lɛ́ɛ kplé ahwangɔnu yětɔn lɛ́ɛ ɖo Soko ɖo Judáa yíkúngban jí, bó ná yi fun ahwan xá Izlayɛ́li ví lɛ́ɛ. Yě ɖǒ gɔnu ɖó Azeka kpó Soko kpó tɛ́ntin ɖo Efɛ́si-Damumímu.

²Sawúlu kpó ahwangɔnu Izlayɛ́li tɔn lɔ kpó kplé, bó ɖó gɔnu ɖó tɔdo Telebɛ́ntitín tɔn mɛ, bó sɔ́ ahwan nú, bó ná fun ahwan xá Filisitɛ́ɛn lɛ́ɛ.

³Énɛ́ ɔ́, Filisitɛ́ɛn lɛ́ɛ ɖo só jí ɖo akpá ɖě xwé, bɔ Izlayɛ́li ví lɛ́ɛ ɖo só jí ɖo akpá ɖě ɔ́ xwé bɔ tɔdo ɔ́ ɖo tɛ́ntin yětɔn.

⁴Ahwanfuntɔ́ Filisitɛ́ɛn lɛ́ɛ tɔn ɖokpó tɔ́n sín ahwankpá yětɔn mɛ, bó wá gblɔ́n adǎn nú Izlayɛ́li ví lɛ́ɛ. Nya ɔ́ nɔ nyí Goliyati; Gati toxomɛnu wɛ. Ga tɔn yi mɛ̌tlukpo atɔn jɛjí.

⁵Ganvɔgbákún ɖo ta tɔn, ganvɔwu kacakaca ɖé ɖo kɔ n'i bó da kilóo kanɖé ko (60).

⁶É bú ganvɔ dó asá, bó kplá hwǎn kpɛví ɖokpó, bɔ è zě ganvɔ dó bló.

⁷É lɛ́ hɛn hwǎn ɖaxó ɖokpó bɔ kpo tɔn kló sɔ avɔlɔnkpɔntín, bɔ gan e ɖo kpo ɔ́ nu ɔ́ da kilóo tɛ́nwe jɛjí. Mɛ e nɔ hɛn gǎglónú tɔn ɔ́ ɖo zɔnlin ɖi wɛ ɖo nukɔn tɔn.

⁸Goliyati nɔ te bó sú xó sɛ́ dó ahwanfuntɔ́ Izlayɛ́li tɔn lɛ́ɛ ɖɔ: “Étɛ́wú mi ka wá tun ahwanfɔ te? Nyɛ ɔ́, Filisitɛ́ɛn wɛ un nyí, bɔ midɛɛ lɛ́ɛ ká nyí Sawúlu sín kannumɔ. Mi kpɔ́n miɖée mɛ bó ɖe mɛ ɖokpó nú nyi kpó é kpó ná li za.

⁹Ényí mɛ ɔ́ kpé wú bó ɖu ɖo jǐ ce bó hu mì ɔ́, mǐdɛɛ lɛ́ɛ ná húzú kannumɔ mitɔn, bó ná nɔ wa azɔ̌ nú mi. Lo ɔ́, ényí nyɛ wɛ kpé wú bó ɖu ɖo jǐ tɔn, bó hu i ɔ́, midɛɛ lɛ́ɛ ná nyí kannumɔ mǐtɔn, bó ná nɔ́ wa azɔ̌ nú mǐ.”

¹⁰Nya Filisitɛ́ɛn ɔ́ lɛ́ ɖɔ: “Mi nyi gbehwán sɛ́ dó wɛ un ɖe égbé. Mi ɖe mɛ ɖokpó sɛ́ dó mì, nú nyi kpó é kpó ná kpé hun.”

¹¹Sawúlu kpó Izlayɛ́li ví lɛ́ɛ bǐ kpó se xó e ɖɔ wɛ nya Filisitɛ́ɛn énɛ́ ɔ́ ɖe é. Ée yě se xó énɛ́ lɛ́ɛ ɔ́, ado hu yě bǐ, bɔ xɛsi ɖi yě ɖésú.

¹²Davídi ɔ́, Jɛsée ví wɛ. Jɛsée ɔ́ ka jɔ ɖo Efláta sín hɛ̌nnu mɛ, bó nɔ́ nɔ Bɛteleyɛ́mu Judáa tɔn. Jɛsée ɔ́, vǐ súnnu tántɔn wɛ é ɖó. Hwenu e Sawúlu ɖo gǎn jí ɔ́, Jɛsée sín xwe ko sɛ yi tawun.

¹³Jɛsée sín vǐ súnnu mɛxó atɔn lɛ́ɛ bǐ ka ɖo ahwangbénu xá Sawúlu. Vǐ nukɔntɔn ɔ́ nɔ nyí Eliavu, wegɔ́ ɔ́ nɔ nyí Avinadávu, bɔ atɔngɔ́ ɔ́ nɔ nyí Camúma.

¹⁴Davídi wɛ nyí yɔkpɔ́vú ɖo yě mɛ, bɔ ée fofó tɔn atɔn lɛ́ɛ xwedó Sawúlu yi ahwan ɔ́,

¹⁵Davídi nɔ yi wa azɔ̌ nú Sawúlu bó ká nɔ́ lɛ́ kɔ wá yi kpé nukún dó tɔ́ tɔn sín kanlin lɛ́ɛ wú ɖo Bɛteleyɛ́mu.

¹⁶Zǎnzǎn gbada ɔ́, nya Filisitɛ́ɛn ɔ́ nɔ wá, bó nɔ wá ɖɔ nǔ ɖokpó ɔ́. É ɖ'é wú mɔ̌ káká nú azǎn kanɖé (40).

¹⁷Jɛsée ɖɔ nú vǐ tɔn Davídi gbe ɖokpó ɖɔ: “Sɔ́ nǔkún mimɛ ati ɖokpó élɔ́, kpó wɔ̌xúxú wǒ élɔ́ lɛ́ɛ kpó, bó kán wezun bó sɔ́ yi jó nú fofó towe lɛ́ɛ ɖo ahwankpá Izlayɛ́li ví lɛ́ɛ tɔn mɛ.

¹⁸Lɛ̌ fɔ amɔ̌ wǒ élɔ́ lɛ́ɛ, bó bɛ́ yi jó nú sɔ́ja afatɔ́ngán ɔ́. A nǎ kpɔ́n ɖɔ fofó towe lɛ́ɛ ɖo ganjí a jí, bó ná yí nǔɖé ɖo yě sí wá nú mì, bónú má tunwun ɖɔ yě ɖo ganjí.

¹⁹A nǎ mɔ yě kpó Sawúlu kpó ahwangɔnu Izlayɛ́li tɔn ɔ́ bǐ kpó ɖo tɔdo Telebɛ́ntitín tɔn mɛ, bó ɖo ahwan fun xá Filisitɛ́ɛn lɛ́ɛ wɛ.”

²⁰Ée tɔ́ tɔn ɖɔ mɔ̌ n'i ɔ́, é fɔ́n zǎn bó ɖidó. É ɖó kanlin lɛ́ɛ nú mɛ ɖěvo, bó dó nǔ e sín xó tɔ́ tɔn ɖɔ lɛ́ɛ sín agban bo ɖidó, lě e tɔ́ ɔ́ kó ɖɔ gbɔn n'i é. Hwenu e é ɖo ahwankpá ɔ́ mɛ byɔ́ wɛ ɔ́, sɔ́ja lɛ́ɛ ɖo zɔnlin ɖi wɛ, bo ɖo ahwanfɔ ɖe wɛ, bó ɖo ahwandán gblɔ́n wɛ.

²¹Filisitɛ́ɛn lɛ́ɛ kpó Izlayɛ́li ví lɛ́ɛ kpó sí ahwante dó yěɖée jí. Yě kpan nukɔn yěɖée, bó ná fun ahwan.

²²Ée Davídi wá ɔ́, é bɛ́ nǔ e é hɛn ɔ́ jó nú mɛ e nɔ kpé nukún dó agban lɛ́ɛ wú é, bó bɛ́ wezun yi fí e sɔ́ja lɛ́ɛ ɖe é. É yi fofó tɔn lɛ́ɛ gɔ́n, bó kanbyɔ́ ɖɔ nɛ̌ yě ɖe gbɔn a jí.

²³Hwenu e Davídi ɖo xó ɖɔ xá fofó tɔn lɛ́ɛ wɛ ɔ́, nya Filisitɛ́ɛn Goliyati Gati toxomɛnu ɔ́ lɛ́ tɔ́n sín Filisitɛ́ɛn lɛ́ɛ mɛ, bó jɛ nǔ e é nɔ́ wlí ɖɔ ɖ'ayǐ lɛ́ɛ wlí ɖɔ jí, bɔ Davídi se.

²⁴Ée Izlayɛ́li ví lɛ́ɛ mɔ nya énɛ́ ɔ́ lě ɔ́, xɛsi jɛ yě jí, bɔ yě bǐ jɛ agɔ jó yi gǔdo jí.

²⁵Mɛ ɖokpó ɖokpó nɔ ɖɔ: “Mi ma mɔ nya énɛ́ e wá é a? Adǎn gblɔ́n nú Izlayɛ́li ví lɛ́ɛ gbé wɛ é ja bó wá. Ényí mɛɖé kpé wú bó hu i ɔ́, axɔ́sú mǐtɔn ná dó dɔkun nú mɛ ɔ́, bó ná ná ɛ vǐ tɔn nyɔ̌nu bɔ é ná da, bó ná sɔ́ mɛ énɛ́ ɔ́, bɔ mɛ e ɖo daá tɔn xwé lɛ́ɛ sɔ́ ná nɔ ná nǔjɔ ɖo Izlayɛ́li ǎ.”

²⁶Davídi kanbyɔ́ sɔ́ja e ɖo akpá tɔn lɛ́ɛ ɖɔ: “Étɛ́ è ka ná ná mɛ e ná hu Filisitɛ́ɛn énɛ́, bó ná ɖe winnyá nú Izlayɛ́li to ɔ́ é? Bɔ mɛ̌ ká nyí Filisitɛ́ɛn énɛ́ ɔ́, mɛ e ma nɔ sɛn Mawu ǎ nɛ́ ɔ́, bó glá káká bó zun Mawu gbɛɖe ɔ́ sín ahwangɔnu?”

²⁷Bɔ mɛ lɛ́ɛ lɛ́ vɔ́ nǔ e è nǎ ná mɛ e ná hu i ɔ́ ɖɔ nú Davídi.

²⁸Lo ɔ́, Eliavu Davídi sín fofó ɖaxó ɔ́ se xó e ɖɔ xá sɔ́ja lɛ́ɛ wɛ é ɖe é, bɔ xomɛ sin i dó Davídi wú tlala, bɔ é ɖɔ: “Étɛ́wú a ka wá fí? Mɛ̌ a ka jó kanlin kpɛ e ɖo mǐ sí é dó ná nyi gbětótló mɛ bó wá fí? Un tunwun ɖɔ go wɛ a nɔ yí bó nɔ zán ayi wínníwínní. Lě e fun ahwan gbɔn wɛ mǐ ɖe é kpɔ́n gbé wɛ a tɔ́n.”

²⁹Davídi ka yí gbe n'i bo ɖɔ: “Étɛ́ un ka wa nyi do din? Nǔ wɛ un kanbyɔ́ kpowun ǎ cé?”

³⁰Ée é ɖɔ mɔ̌ é ɔ́, é jó fofó tɔn dó, bo jɛ xó ɖɔ nú mɛ ɖěvo jí, bó kan nǔ ɖokpó e kanbyɔ́ wɛ é ɖe é byɔ́ mɛ ɔ́, bɔ yě lɛ́ ɖɔ xó ɖokpó ɔ́ n'i.

³¹Ée mɛ lɛ́ɛ se xó e Davídi ɖɔ lɛ́ɛ ɔ́, yě yi ɖɔ nú Sawúlu, bɔ é ɖɔ è nǐ kplá ɛ wá nú émí.

³²Ée Davídi yi ɔ́, é ɖɔ nú Sawúlu ɖɔ: “Mɛ ɖokpó ma ɖi xɛsi nú nya Filisitɛ́ɛn énɛ́ ɔ́ ó. Nyɛ mɛsɛntɔ́ towe ná yi kpé hun xá ɛ.”

³³Sawúlu ka ɖɔ nú Davídi ɖɔ: “A sixú kpé hun xá Filisitɛ́ɛn énɛ́ ɔ́ ǎ, ɖó yɔkpɔ́vú wɛ nú we, éyɛ́ ká kó ɖo ahwan mɛ sín vǔ.”

³⁴Ée Sawúlu ɖɔ mɔ̌ ɔ́, Davídi ɖɔ n'i ɖɔ: “Mɛsɛntɔ́ towe wɛ nɔ kplá tɔ́ ce sín kanlin lɛ́ɛ yi amagbo mɛ, bɔ nú kinnikínní abǐ lɔnmɔ ɖé wá wlí kanlin lɛ́ɛ ɖokpó ɔ́,

³⁵un nɔ bɛ́ wezun ɖo gǔdo tɔn, bó nɔ xo e, bó nɔ yí kanlin ɔ́ sín nu tɔn. Ényí é lílɛ́ kpan nukɔn mì ɔ́, un nɔ hɛn vɛ̌go tɔn, bó nɔ xo káká bɔ é nɔ kú.

³⁶Lě e nyɛ mɛsɛntɔ́ towe hu kinnikínní mɔ̌kpán, bó hu lɔnmɔ mɔ̌kpán gbɔn é nɛ́. Nǔ e un nɔ dó sin xá lan énɛ́ lɛ́ɛ ɔ́ wɛ un ná dó sin xá Filisitɛ́ɛn énɛ́ lɔ. Đó mɛ énɛ́ e ma nɔ sɛn Mawu ǎ ɔ́ gblɔ́n adǎn nú ahwangɔnu Mawu gbɛɖe ɔ́ tɔn.”

³⁷Davídi lɛ́ ɖɔ: “Mawu e nɔ hwlɛ́n mì sín kinnikínní fɛn mɛ, bó nɔ hwlɛ́n mì sín lɔnmɔ fɛn mɛ ɔ́ ná hwlɛ́n mì ɖo Filisitɛ́ɛn énɛ́ sí.” Bɔ Sawúlu ɖɔ nú Davídi ɖɔ: “Bo yi! Mawu Mavɔmavɔ ní nɔ kpɔ́ xá we.”

³⁸Sawúlu ná gbe bɔ è fɔ awu tɔn lɛ́ɛ dó nú Davídi. È sɔ́ ganvɔgbákún tɔn xwe n'i, bó sɔ́ ganvɔwu tɔn dó n'i.

³⁹Davídi sɔ́ hwǐ Sawúlu tɔn blá dó nǔ e é dó lɛ́ɛ jí, bó jló ná ɖi zɔnlin kpɔ́n bɔ é gló e, ɖó é dó nǔ mɔ̌hunkɔ kpɔ́n ǎ. É wá ɖɔ nú Sawúlu ɖɔ: “Un sixú ɖi zɔnlin kpó akpa e è blǎ nú mì ɔ́ kpó ǎ, ɖó é má mì ǎ.” Ée é ɖɔ mɔ̌ ɔ́, é ɖe nǔ lɛ́ɛ bǐ kɔn nyi ayǐ.

⁴⁰É sɔ́ kpo tɔn, bo yi cyán kɛ́n e wǔtu tɔn ɖíɖí ganjí ɔ́ atɔ́ɔ́n ɖo tɔ tó, bó bɛ́ dó lɛ̌ngbɔ́nyitɔ́ gló tɔn mɛ, bó sɔ́ klohwán tɔn hɛn alɔ mɛ, bo ɖidó Filisitɛ́ɛn ɔ́ gɔ́n.

⁴¹Filisitɛ́ɛn ɔ́ jɛ sisɛkpɔ́ Davídi jí kpɛɖé kpɛɖé, bɔ mɛ e nɔ hɛn gǎglónú tɔn n'i ɔ́ ɖo nukɔn tɔn.

⁴²Ée Filisitɛ́ɛn ɔ́ mɔ Davídi sɛ́ dó ɔ́, é hu tɛ́ n'i, ɖó é mɔ ɖɔ é kpo ɖo yɔkpɔ́vú, bó nyí nyaví vɔvɔ ɖagbe ɖagbe ɖé.

⁴³Nya ɔ́ kanbyɔ́ Davídi ɖɔ cukú wɛ émí ká nyí bɔ é ja émí gɔ́n bó hɛn kpo a jí. Ée é ɖɔ mɔ̌ ɔ́, é ɖó vodún Davídi.

⁴⁴Bó lɛ́ ɖɔ: “Sɛkpɔ́ mì, sɛkpɔ́ mì, un ná ná lan towe xɛ lɛ́ɛ kpó gběkanlin lɛ́ɛ kpó, bɔ yě ná ɖu.”

⁴⁵Davídi ka ɖɔ nú Filisitɛ́ɛn ɔ́ ɖɔ: “Hwɛ ɔ́, a hɛn hwǐ bó hɛn hwǎn kpɛví, bó hɛn hwǎn ɖaxó, bo ja ahwan fun xá mì gbé. Nyɛ ɔ́, Mawu Mavɔmavɔ Nǔbǐwúkpétɔ́, Mawu Izlayɛ́li tɔn e sín ahwangɔnu a zun ɔ́ sín nyǐkɔ mɛ wɛ nyɛ ná fun ahwan xá we dó.

⁴⁶Mawu Mavɔmavɔ ná jó we nú mì égbé, bɔ un ná hu we sɔ́ nyi ayǐ, bó gbo ta towe. Égbé ɔ́, un ná ná Filisitɛ́ɛn lɛ́ɛ sín lan xɛ lɛ́ɛ kpó gběkanlin lɛ́ɛ kpó bɔ yě ná ɖu. Énɛ́ ɔ́, gbɛ ɔ́ bǐ ná tunwun ɖɔ Mawu Izlayɛ́li tɔn ɔ́ hú gan nǔ bǐ.

⁴⁷Bɔ mɛ e ɖo fí lɛ́ɛ bǐ ná tunwun ɖɔ Mawu Mavɔmavɔ kún ba hwǐ abǐ hwǎn cóbó ná hwlɛ́n mɛ gán ó, ɖó Mawu Mavɔmavɔ wɛ nɔ ná ɖuɖéjí mɛ; é ná jó mi nú mǐ.”

⁴⁸Filisitɛ́ɛn ɔ́ xo zǐn, bó ná sɛkpɔ́ Davídi, bɔ Davídi bɛ́ wezun ɖidó gɔ̌n tɔn.

⁴⁹Bó dó alɔ glo mɛ, bó sɔ́ awǐnnya ɖokpó dó klohwán tɔn mɛ bó da, bɔ é yi xo Filisitɛ́ɛn ɔ́ dó nukɔngɛ́ngɛ́n jí bó byɔ́ taká tɔn mɛ, bɔ é xwe agbɔ̌nnusú do viwun.

⁵⁰ Lě e Davídi ɖu ɖo Filisitɛ́ɛn ɔ́ jí gbɔn ɔ́ nɛ́; klohwán kpó awǐnnya kpó jɛ́n é dó hu i ná. É hɛn hwǐ ǎ.

⁵¹ Ée Filisitɛ́ɛn ɔ́ j'ayǐ ɔ́, Davídi kán wezun yi gɔ̌n tɔn, bó yi nɔ te ɖo akpá tɔn, bo dɔn hwǐ e Filisitɛ́ɛn ɔ́ blá é sín akún mɛ, bó hu i, bó gbo ta ɛ. Ée Filisitɛ́ɛn lɛ́ɛ mɔ ɖɔ ahwanfuntɔ́ e syɛ́n hú émí mɛ bǐ ɔ́ kú é ɔ́, yě bǐ hɔn.

⁵²Bɔ Izlayɛ́li ví lɛ́ɛ kpó Judáa ví lɛ́ɛ kpó sú xó, bó zun dó yě jí. Yě nya Filisitɛ́ɛn lɛ́ɛ káká yi tɔdo ɔ́ mɛ, bó nya yě káká yi ɖó hɔntogbó Eklɔ́ni tɔn lɛ́ɛ jí. Yě gblé wǔ Filisitɛ́ɛn lɛ́ɛ vantankánnyá, bɔ yě kú jɛ alixo. Cyɔ yětɔn kpé alixo alixo sín Caalayímu káká yi Gati kpó Eklɔ́ni kpó.

⁵³Izlayɛ́li ví lɛ́ɛ wá lɛ́ kɔ sín Filisitɛ́ɛn lɛ́ɛ gúdo, bó wá bɛ́ nǔ e Filisitɛ́ɛn lɛ́ɛ jó dó nyi fí e yě ɖó gɔnu ɖó é bǐ.

⁵⁴Bɔ Davídi sɔ́ nya Filisitɛ́ɛn ɔ́ sín ta yi Jeluzalɛ́mu, bó bɛ́ ahwanfunnú tɔn lɛ́ɛ dó goxɔ tɔn mɛ.

⁵⁵Hwenu e Sawúlu mɔ Davídi bɔ é xwe ahwan fun xá Filisitɛ́ɛn ɔ́ gbé ɔ́, é kanbyɔ́ Avunɛ́ɛ ahwangán tɔn e kpa acɛ nú ahwangɔnu ɔ́ ɖɔ: “Avunɛ́ɛ, mɛ̌ ví ká nyí nyaví énɛ́?” Bɔ Avunɛ́ɛ xwlé nǔ n'i ɖɔ: “Sɛ́mɛɖó, un mɔ do ná ǎ.”

⁵⁶Bɔ axɔ́sú ɔ́ ɖɔ nú Avunɛ́ɛ ɖɔ: “Bo ba do ná nú mì, bó tunwun mɛ e ví wɛ é.”

⁵⁷Ée Davídi yi hu Filisitɛ́ɛn ɔ́ bó lɛ́ kɔ wá ɔ́, Avunɛ́ɛ kplá ɛ yi Sawúlu gɔ́n. Filisitɛ́ɛn ɔ́ sín ta ka kpo ɖo alɔ tɔn mɛ hwenɛ́nu.

⁵⁸Sawúlu ɖɔ n'i ɖɔ: “Nyaví ɛ, mɛ̌ vǐ ká nú we?” Davídi ka yí gbe n'i ɖɔ: “Mɛsɛntɔ́ towe Jɛsée Bɛteleyɛ́munu ɔ́ ví wɛ nú mì.”