Read fon 1 Samuwɛ́li 18 Bible Online

1 Samuwɛ́li 18 - fon bible

1 Samuwɛ́li 18

¹Ée Davídi ɖo xó ɖɔ xá Sawúlu fó wɛ ɔ́, Davídi sín nǔ jɛ Jonatáan Sawúlu ví ɔ́ tɔn jí, bɔ é yí wǎn nú Davídi é ɖésúnɔ ɖɔhun.

²Gbe énɛ́ gbe ɖokpó ɔ́, Sawúlu cí Davídi jí. É jó e dó ní lɛ́ kɔ yi tɔ́ tɔn xwé ǎ.

³Jonatáan nu alɛ xá Davídi ɖó é yí wǎn n'i é ɖésúnɔ ɖɔhun.

⁴É ɖe awu ɖaxó e ɖo kɔ n'i é, bó ná Davídi. É lɛ́ ná ɛ ahwanwu tɔn lɛ́ɛ, bó lɛ́ ná ɛ hwǐ tɔn kpó gǎ tɔn kpó, kpódó gǒjíblánú tɔn kpó.

⁵Sawúlu sɛ́ Davídi dó ahwangbénu hweɖěbǔnu ɔ́, Davídi nɔ ɖu ɖ'é jí, bɔ Sawúlu sɔ́ ɛ ahwangán, bɔ é nyɔ́ togun ɔ́ bǐ nukún mɛ, káká bó lɛ́ nyɔ́ mɛsɛntɔ́ Sawúlu tɔn lɛ́ɛ lɔ nukún mɛ.

⁶Ée Davídi hu Filisitɛ́ɛn ɔ́ bɔ Izlayɛ́li ví lɛ́ɛ lɛ́ kɔ bo wá xwe xwé ɔ́, nyɔ̌nu e ɖo Izlayɛ́li lɛ́ɛ bǐ gosín toxo lɛ́ɛ mɛ toxo lɛ́ɛ mɛ, bó wá ɖo han ji wɛ ɖo Sawúlu nukɔn, bó ɖo hǔn tɛnmɛ tɛnmɛ xo wɛ, bó ɖo we ɖú wɛ, bó ɖo xó sú wɛ kpó awǎjijɛ kpó.

⁷ Nyɔ̌nu lɛ́ɛ ɖo han ji wɛ, mɛ ɖě nɔ́ dó bɔ mɛ ɖě nɔ́ yí, bó nɔ ɖɔ: “Sawúlu hu kɛntɔ́ afatɔ́n (1.000), Davídi ka hu děgba we afɔwó (10.000).”

⁸Ée Sawúlu se han e ji wɛ yě ɖe ɔ́, xomɛ sin i ɖésú, bɔ é ɖɔ: “È ɖɔ Davídi hu kɛntɔ́ děgba we afɔwó (10.000), bɔ nyɛ hu kɛntɔ́ afatɔ́n (1.000). Nǔ e kpo din ɔ́ wɛ nyí ɖɔ è nǎ sɔ́ axɔ́súzinkpo ɔ́ jó n'i.”

⁹Bɛ́ sín gbe nɛ́ ɔ́ gbe ɔ́, Sawúlu jɛ nukún nyanya dó kpɔ́n Davídi ná jí.

¹⁰Ayǐhɔ́ngbe tɔn ɔ́, Mawu sɛ́ yɛ nyanya ɖokpó dó Sawúlu bɔ é wá jǐ tɔn, bɔ é jɛ gblǒ ɖɔ jí ɖo xwé é ɖésúnɔ tɔn gbe. Davídi jɛ kanhún xo n'i jí lě e é nɔ xo n'i gbɔn ɖ'ayǐ é. Sawúlu ka hɛn hwǎn tɔn alɔ mɛ.

¹¹È nǎ mɔ nǔɖé kpowun ɔ́, Sawúlu dlɛ́n hwǎn ɔ́, bó ɖɔ dó ayi mɛ ɖɔ: “Un ná xwe e dó dǒ wú.” Lo ɔ́, Davídi sɛ sín hwǎn ɔ́ nu azɔn we.

¹²Sawúlu jɛ xɛsi ɖi nú Davídi jí, ɖó Mawu Mavɔmavɔ ɖo kpɔ́ xá ɛ, bó ká jó éyɛ́ Sawúlu ɔ́ dó.

¹³Énɛ́ ɔ́ wú wɛ é ɖe Davídi sín akpá, bó sɔ́ ɛ ahwangán, bɔ é kpa acɛ dó sɔ́ja afatɔ́n (1.000) nu. Bɔ Davídi nɔ nɔ sɔ́ja lɛ́ɛ nu, bɔ yě nɔ́ yi fun ahwan, bó nɔ wá xwé.

¹⁴Davídi sɔ́ nǔ ɖěbǔ bó ná wa ɔ́, é nɔ bló ganjí, bɔ Mawu Mavɔmavɔ ɖo kpɔ́ xá ɛ.

¹⁵Ée Sawúlu mɔ ɖɔ é sɔ́ nǔ ɖěbǔ ɔ́, é nɔ bló ganjí ɔ́, xɛsi ɔ́ ɖě lɛ́ɛ jɛ ɖě jí.

¹⁶Lo ɔ́, Izlayɛ́li to ɔ́ bǐ kpó Judáa to ɔ́ bǐ kpó yí wǎn nú Davídi, ɖó é nɔ́ nɔ yě nu bɔ yě nɔ́ yi fun ahwan bo nɔ wá.

¹⁷Sawúlu ɖɔ nú Davídi ɖɔ: “Éɖíe, un ná ná we Mɛlávu vǐ ce nyɔ̌nu nukɔn tɔn ɔ́, bɔ a nǎ da. Vɛ̌ ko hun xomɛ bo ɖo azɔ̌ wa nú mì wɛ kpowun, bó ɖo ahwan fun nú Mawu Mavɔmavɔ wɛ kpowun.” Lo ɔ́, é ɖo ɖiɖɔ dó ayi mɛ wɛ ɖɔ: “Nyɛ ɖésúnɔ wɛ ná hu i ǎ, Filisitɛ́ɛn lɛ́ɛ wɛ ná hu i.”

¹⁸Davídi ka yí gbe nú Sawúlu ɖɔ: “Sɛ́mɛɖó, un nyí mɛɖé ǎ. Daá ce xwédo ɔ́ kpó hɛ̌nnu tɔn kpó nyí nǔtí ɖo Izlayɛ́li ǎ. Mɛ̌ nyɛ ka nyí bó ná da axɔ́sú sín ví?”

¹⁹Ée hwenu e Sawúlu ná sɔ́ vǐ tɔn Mɛlávu ɔ́ da nú Davídi ɔ́ su ɔ́, é sɔ́ ɛ da nú Adliɛ́li Avɛ́li-Mɛholanu ɔ́.

²⁰Sawúlu ka ɖó vǐ nyɔ̌nu ɖokpó; è nɔ ylɔ́ ɛ ɖɔ Mikali; éyɛ́ yí wǎn nú Davídi. È yi ɖɔ xó nɛ́ ɔ́ nú axɔ́sú ɔ́, bɔ é yí gbe ná.

²¹Sawúlu nɔ ko ɖɔ dó ayi mɛ ɖɔ: “Un ná sɔ́ Mikali da nú Davídi, bɔ é ná nyí mɔ ɖokpó n'i, bɔ Filisitɛ́ɛn lɛ́ɛ ná kpé wǔ tɔn.” Lo ɔ́, Sawúlu wá ɖɔ nú Davídi azɔn wegɔ́ ɔ́ ɖɔ: “É jló mì ma ná vǐ ce ɖokpó we bónú a nǎ da.”

²²Sawúlu blá ɖɔ gbɔn mɛsɛntɔ́ tɔn lɛ́ɛ jí ɖɔ: “Mi yi gba kpá nú Davídi. Mi ɖɔ n'i ɖɔ: ‘Axɔ́sú ɔ́ kpó mǐ mɛsɛntɔ́ tɔn lɛ́ɛ kpó bǐ yí wǎn nú we. Axɔ́sú ɔ́ jló ná ná vǐ tɔn we; yǐ gbe lobo da vǐ tɔn.’ ”

²³Mɛsɛntɔ́ lɛ́ɛ yi ɖɔ xó énɛ́ ɔ́ nú Davídi, bɔ Davídi ɖɔ: “Mi vɛdó ɖɔ axɔ́súví dida ɔ́, nǔ da ayihún wɛ sín a? Nyɛ ɔ́ wamamɔnɔ wɛ nú mì, un nyí mɛɖé ǎ.”

²⁴Bɔ mɛsɛntɔ́ lɛ́ɛ yi ɖó gbe nú Sawúlu.

²⁵Sawúlu ɖɔ nú mɛsɛntɔ́ tɔn lɛ́ɛ ɖɔ: “Mi yi ɖɔ nú Davídi ɖɔ: ‘Axɔ́sú ɔ́ ɖo asigban ba ɖo así we wɛ ǎ; lo ɔ́ Filisitɛ́ɛn lɛ́ɛ sín atɔtɔ kanwe ko (100) ba wɛ jɛ́n é ɖe kpowun, bó ná dó ba hlɔn.’ ” Lě e Sawúlu ka ná bló gbɔn bɔ Filisitɛ́ɛn lɛ́ɛ sín alɔ ná jɛ Davídi wú ɔ́ sín wě wɛ nyí énɛ́ ɔ́ bɔ é ɖe.

²⁶Mɛsɛntɔ́ lɛ́ɛ yi ɖɔ xó énɛ́ ɔ́ nú Davídi, bɔ é yí gbe ná, bó ná da axɔ́sú ɔ́ sín vǐ. Cóbónú azǎn e yě ɖǒ ɔ́ ná sɔgbe ɔ́,

²⁷Davídi sɔ́ nǔ, é kpó mɛ tɔn lɛ́ɛ kpó, bɔ yě ɖidó, bó yi hu Filisitɛ́ɛn súnnu afɔɖé (200), bó sɛ́n atɔtɔ yětɔn wá, bó xa bǐ ɖo axɔ́sú ɔ́ nukún mɛ, bó ná dó da vǐ tɔn. Énɛ́ ɔ́, Sawúlu sɔ́ vǐ tɔn Mikali ɔ́ da nú Davídi.

²⁸Sawúlu mɔ nukúnnú jɛ wú din ɖɔ Mawu Mavɔmavɔ ɖo kpɔ́ xá Davídi, bɔ vǐ émítɔn Mikali lɔ ka yí wǎn n'i.

²⁹Ée é mɔ mɔ̌ ɔ́, é fɔ́n ɔ́, é nɔ ɖo xɛsi ɖi nú Davídi d'é ji wɛ, bó dó kɛn Davídi káká yi kú.

³⁰Hwenɛ́nu ɔ́, gǎn Filisitɛ́ɛn lɛ́ɛ tɔn lɛ́ɛ nɔ ɖo ahwan tɔ́n Izlayɛ́li ví lɛ́ɛ wɛ. Yě ká ko wá tɛgbɛ ɔ́, Davídi nɔ ɖu ɖ'é jí hú Sawúlu sín ahwanfuntɔ́ lɛ́ɛ bǐ, bɔ nyǐkɔ tɔn fɔ́n ɔ́, é nɔ́ ɖo jǐ yi wɛ.