Read fon 1 Samuwɛ́li 23 Bible Online

1 Samuwɛ́li 23 - fon bible

1 Samuwɛ́li 23

¹É wá su gbe ɖokpó, bɔ mɛ ɖokpó wá ɖɔ nú Davídi ɖɔ: “Filisitɛ́ɛn lɛ́ɛ yi tɔ́n ahwan Keyila toxo ɔ́, bó bɛ́ jinukún e è kplé ɖó fí e è nɔ só jinukún ɖe lɛ́ɛ bǐ.”

²Ée Davídi se mɔ̌ ɔ́, é kan nǔ byɔ́ Mawu Mavɔmavɔ ɖɔ: “Má yi fun ahwan xá Filisitɛ́ɛn lɛ́ɛ a?” Bɔ Mawu Mavɔmavɔ yí gbe n'i ɖɔ: “Yi, a nǎ ɖu ɖo Filisitɛ́ɛn lɛ́ɛ jí, bó ná hwlɛ́n Keyila toxo ɔ́ gán.”

³Lo ɔ́, Davídi sín mɛ lɛ́ɛ ɖɔ n'i ɖɔ: “Mǐ ɖíe kó ɖo xɛsi ɖi wɛ ɖo Judáa fí din e, mǐ ká yi Keyila bó ná tɔ́n ahwan Filisitɛ́ɛn lɛ́ɛ ɔ́, nɛ̌ ká ná nyí gbɔn lo?”

⁴Énɛ́ ɔ́, Davídi lɛ́ kan nǔ byɔ́ Mawu Mavɔmavɔ, bɔ Mawu Mavɔmavɔ yí gbe n'i ɖɔ: “Sɔ́ nǔ bó yi Keyila, ɖó un ná jó Filisitɛ́ɛn lɛ́ɛ nú we.”

⁵Nǔgbó ɔ́, Davídi kpó mɛ tɔn lɛ́ɛ kpó yi Keyila, bó yi fun ahwan xá Filisitɛ́ɛn lɛ́ɛ, bó gba yě bǐ gbídí gbídí, bó bɛ́ kanlin yětɔn lɛ́ɛ wá yi xwé. Lě e Davídi hwlɛ́n Keyilanu lɛ́ɛ gán gbɔn é nɛ́.

⁶Hwenu e Abiyatáa Aximɛlɛ́ki ví ɔ́ hɔn xwe Davídi gɔ́n ɖo Keyila ɔ́, é hɛn nǔ e è nɔ dó kan nǔ byɔ́ Mawu ɔ́ alɔ mɛ.

⁷Sawúlu se ɖɔ Davídi wá Keyila; ée é se mɔ̌ ɔ́, é ɖɔ: “Mawu jó Davídi nú mì, ɖó é wá sú éɖée dó toxo e ɖó hɔntogbó, bɔ è nɔ dó gan mɛ é mɛ.”

⁸Sawúlu ylɔ́ ahwanfuntɔ́ lɛ́ɛ bǐ kplé, nú yě ná nyi ahwan, bó ná yi xá Davídi kpó mɛ tɔn lɛ́ɛ kpó ɖo Keyila toxo ɔ́ mɛ.

⁹Davídi se nǔ baɖabaɖa e lin dó wǔ tɔn wɛ Sawúlu ɖe é, bó ɖɔ nú vɔ̌sánú-xwlémawutɔ́ Abiyatáa ɖɔ: “Sɔ́ nǔ e è nɔ dó kan nǔ byɔ́ Mawu ɔ́ wá.”

¹⁰Bɔ Davídi ɖɔ: “Mawu Mavɔmavɔ, Mawu Izlayɛ́li tɔn, nyɛ mɛsɛntɔ́ towe se ɖɔ Sawúlu jló ná wá Keyila, bó ná wá gba toxo ɔ́ bǐ ɖó nyɛ wú.

¹¹Ényí Sawúlu wá ɔ́, Keyilanu lɛ́ɛ ná jó mì n'i wɛ a? Sawúlu ka jǎwe nǔgbó lě e nyɛ mɛsɛntɔ́ towe se gbɔn é a? Mawu Mavɔmavɔ, Mawu Izlayɛ́li tɔn, kɛnklɛ́n bó ɖe xlɛ́ nyɛ mɛsɛntɔ́ towe.” Bɔ Mawu Mavɔmavɔ yí gbe nú Davídi ɖɔ: “Sawúlu ná wá.”

¹²Davídi lɛ́ kanbyɔ́ ɖɔ: “Keyilanu lɛ́ɛ ná jó nyɛ kpó mɛ ce lɛ́ɛ kpó nú Sawúlu wɛ a?” Bɔ Mawu Mavɔmavɔ yí gbe n'i ɖɔ: “Yě ná jó mi n'i.”

¹³Ée Davídi se mɔ̌ ɔ́, é yá wǔ sɔ́ nǔ, é kpó mɛ tɔn lɛ́ɛ kpó. Mɛ tɔn lɛ́ɛ ná yi gbɛtɔ́ nǔwɔntɔn mɔ̌ (600), bɔ yě tɔ́n sín Keyila toxo mɛ, bó byɔ́ gbɛ ɔ́ mɛ ɖidó. Ée Sawúlu se ɖɔ Davídi hɔn sín Keyila toxo mɛ ɔ́, é ɖó ahwan e ná fun wɛ é ɖe ɔ́ te.

¹⁴Davídi yi gbětótló Zifu tɔn mɛ, bó yi cí sókan mɛ fí e è ma ná sixú kpé wǔ tɔn ɖe ǎ é. Sawúlu fɔ́n ɔ́, é nɔ ɖo Davídi ba wɛ, Mawu ka jó e n'i ǎ.

¹⁵Ée Davídi mɔ ɖɔ Sawúlu dó ahwan gbě, bó ɖo émí ná hu wɛ ɔ́, é cí gbětótló Zifu tɔn mɛ ɖo Holɛ́ca.

¹⁶É wá su gbe ɖokpó bɔ Jonatáan Sawúlu ví ɔ́ yi mɔ Davídi ɖo Holɛ́ca, bó dó wǔsyɛ́n lanmɛ n'i, ɖɔ é ní ɖeji dó Mawu wǔ.

¹⁷É ɖɔ n'i ɖɔ: “Ma ɖi xɛsi nú nǔ ɖěbǔ ó, ɖó tɔ́ ce Sawúlu sixú wlí we ǎ. A nǎ ɖu axɔ́sú ɖo Izlayɛ́li, bɔ nyɛ ná bɔ dó wǔ we, bó ná nɔ glɔ́ towe. Tɔ́ ce ɖésú tunwun mɔ̌ ganjí.”

¹⁸ Ée é ɖɔ mɔ̌ ɔ́, yě mɛ we lɛ́ɛ nu alɛ ɖo Mawu Mavɔmavɔ nyíkɔ mɛ. Davídi ka cí Holɛ́ca, bɔ Jonatáan yi xwé.

¹⁹ Zifunu ɖé lɛ́ɛ yi Sawúlu gɔ́n ɖo Giveya, bó ɖɔ n'i ɖɔ: “Davídi hɔn wá cí to mǐtɔn mɛ ɖo Holɛ́ca fí e è ma sixú kpé wǔ tɔn ɖe ǎ é, ɖo Hakila só ɔ́ jí, ɖo zunkan ɔ́ sín afɔligbé.

²⁰Sɛ́mɛɖó, ényí a ɖo biba ná wlí i wɛ ɔ́, vɛ̌ kó wá kpowun, mǐdɛɛ lɛ́ɛ ná jó e nú we.”

²¹Sawúlu ɖɔ nú yě ɖɔ: “Mawu Mavɔmavɔ ní xo ɖɛ dó mi jí, ɖó nǔ ce blá wǔ nú mi.

²²Mi kɛnklɛ́n bó lɛ́ yi gǔdo, bó yi ba do ná céɖécéɖé, bó ná tunwun fí e é ɖe é, bó ná tunwun mɛ e mɔ ɛ ɖo fínɛ́ é, ɖó un se ɖɔ é bí ɖésú.

²³Mi ba do ná, bó tunwun fí e é nɔ hɔn hwlá cí lɛ́ɛ bǐ, bó lɛ́ kɔ wá mɔ mì, bó ná ɖɔ fí e é ɖe tawun ɔ́ nú mì. Énɛ́ ɔ́, un ná xwedó mi yi. Ényí to ɔ́ mɛ jɛ́n é ɖe ɔ́, un ná ba ɛ gbɔn Judáa yíkúngban ɔ́ jí káká bó ná mɔ ɛ.”

²⁴Ée Sawúlu ɖɔ mɔ̌ ɔ́, Zifunu lɛ́ɛ lɛ́ kɔ yi xwé. Hwenɛ́nu ɔ́, Davídi kpó mɛ tɔn lɛ́ɛ kpó ká ɖo gbětótló Mawɔ́ni tɔn ɔ́ sín dodomɛ, ɖo zunkan ɔ́ sín afɔligbé.

²⁵Sawúlu kpó mɛ tɔn lɛ́ɛ kpó yi Davídi ba gbé, bɔ è gba kpá tɔn nú Davídi, bɔ é yi cí awǐnnya kan mɛ, ɖo gbětótló Mawɔ́ni tɔn ɔ́ mɛ. Ée Sawúlu se mɔ̌ ɔ́, élɔ́ yi gbětótló Mawɔ́ni tɔn ɔ́ mɛ, bó ɖo Davídi ba wɛ.

²⁶Sawúlu ɖo zɔnlin ɖi gbɔn só ɔ́ sín akpá ɖě xwé wɛ ɔ́, Davídi ɔ́ nɔ ɖo zɔnlin ɖi gbɔn akpá ɖě ɔ́ xwé wɛ, é kpó mɛ tɔn lɛ́ɛ kpó. Davídi ɖo hwlɛ̌nhwlɛ́n dó wɛ bó ná gló Sawúlu. Lo ɔ́, Sawúlu kpó ahwan tɔn lɛ́ɛ kpó ko ɖo Davídi kpó mɛ tɔn lɛ́ɛ kpó ná xá wɛ hwenɛ́nu, bó ná wlí yě.

²⁷Énɛ́ ɖɔ wɛ è ɖe bɔ mɛ ɖokpó wá ɖɔ nú Sawúlu ɖɔ: “Yǎ wǔ bó wá yi xwé, ɖó Filisitɛ́ɛn lɛ́ɛ wá tɔ́n ahwan to mǐtɔn.”

²⁸Énɛ́ ɔ́, Sawúlu lɛ́ kɔ sín Davídi gúdo, bó yi ahwan fun xá Filisitɛ́ɛn lɛ́ɛ gbé. Énɛ́ ɔ́ wú wɛ è nɔ ylɔ́ fí énɛ́ ɔ́ ɖɔ Sela-Hamahlekɔti, tínmɛ tɔn wɛ nyí awǐnnya e kɔn yě jǒ yěɖée dó ɖe é.