Read fon 1 Samuwɛ́li 26 Bible Online

1 Samuwɛ́li 26 - fon bible

1 Samuwɛ́li 26

¹ Zifunu lɛ́ɛ yi mɔ Sawúlu ɖo Giveya, bó ɖɔ n'i ɖɔ: “Davídi hɔn yi cí sókan Hakila tɔn mɛ, ɖo zunkan ɔ́ kpá.”

²Ée Sawúlu se mɔ̌ ɔ́, é kplá ahwanfuntɔ́ syɛ́nsyɛ́n afɔwó-afatɔ́n (3.000) sín Izlayɛ́li, bɔ yě yi gbětótló Zifu tɔn mɛ, bó ɖo Davídi ba wɛ.

³Sawúlu yi ɖó gɔnu ɖó sókan Hakila tɔn ɔ́ mɛ, ɖo gbětótló Zifu tɔn ɔ́ nukɔn, ɖo alitó. Davídi ka ɖo gbětótló ɔ́ mɛ, bó se ɖɔ Sawúlu ɖo gbě émítɔn mɛ.

⁴É sɛ́ mɛ dó bɔ è yi ba do ná, bó wá ɖɔ n'i ɖɔ Sawúlu ɖo fínɛ́ nǔgbó.

⁵Bɔ Davídi wá fí e Sawúlu ɖó gɔnu ɖó é, bó mɔ fí e Sawúlu mlɔ́ ɔ́, bó lɛ́ mɔ fí e ahwangán Avunɛ́ɛ Nɛ̌ɛ ví ɔ́ lɔ mlɔ́ é. Sawúlu mlɔ́ ahwankpá ɔ́ tɛ́ntin, bɔ sɔ́ja lɛ́ɛ lɛ́ lɛ̌ dó e.

⁶Davídi ɖɔ nú Aximɛlɛ́ki Hitíti ɔ́ kpó Avicáyi Selúya ví e nyí Jowabu nɔví é kpó ɖɔ: “Mɛ̌ ká jló ná xwedó mì yi Sawúlu gɔ́n ɖo ahwankpá ɔ́ mɛ ɖo mi mɛ?” Bɔ Avicáyi ɖɔ émí ná yi.

⁷Davídi kpó Avicáyi kpó zɔn zǎn bó yi fí e Sawúlu ɖó gɔnu ɖó é, bɔ Sawúlu ɖo ayǐmlɔ́mlɔ́, bó ɖo amlɔ dɔ́ wɛ ɖo ahwankpá ɔ́ tɛ́ntin, bɔ hwǎn tɔn ɖo te ɖo ta tɔn ligbé. Avunɛ́ɛ kpó sɔ́ja lɛ́ɛ kpó ɖo ayǐmlɔ́mlɔ́ lɛ́ lɛ̌ dó e.

⁸Avicáyi ɖɔ nú Davídi ɖɔ: “Mawu jó kɛntɔ́ towe nú we égbé. Gbɔ nú má yi sɔ́ hwǎn tɔn bó xwe dó lanmɛ n'i dó ká ɛ nyi kɔ́ mɛ. Hwǎn ɖokpó jɛ́n un ná sɔ́ ɛ, un ná sɔ́ ɛ we ǎ.”

⁹Lo ɔ́, Davídi ɖɔ nú Avicáyi ɖɔ: “Ma hu i ó. Ényí mǐ hu axɔ́sú e Mawu Mavɔmavɔ sɔ́ ɔ́, Mawu Mavɔmavɔ ná gɔn tó tɔn dɔn nú mǐ wɛ a vɛdó a?”

¹⁰Bɔ Davídi lɛ́ xwlé Mawu ɖɔ: “Mawu Mavɔmavɔ ɖo gbɛ. Mawu Mavɔmavɔ ɖésú jɛ́n ná hu i. Afɔ nyɔ́ ɔ́, é sixú kú sɛ́ kú, é ká sixú yi ahwan bo cí ahwan.

¹¹ Mawu má lɔn nú un hu mɛ e Mawu Mavɔmavɔ sɔ́ axɔ́sú é ó. Mǐ ní sɔ́ hwǎn e ɖo ta tɔn ligbé é, bó sɔ́ anyǔglo e mɛ sin ɖe é, bó ná yi.”

¹²Bɔ Davídi sɔ́ hwǎn ɔ́, bó sɔ́ anyǔglo ɔ́ ɖo Sawúlu taligbé, bɔ é kpó Avicáyi kpó ɖidó. Mɛ ɖěbǔ ká mɔ yě ǎ, mɛɖé ká tunwun ɖɔ nǔ mɔ̌hun ɖé jɛ ǎ, mɛɖé ká fɔ́n ǎ, ɖó sɛnmlɔ wɛ Mawu Mavɔmavɔ sɛ́ dó yě.

¹³Tɔdo ɖé ɖo fínɛ́, bɔ Davídi dó asá, bó sɛ yi zɔ nú ahwangɔnu Sawúlu tɔn ɔ́ ganjí, bó xá só ta aga ɖéé,

¹⁴bó sú xó ylɔ́ Avunɛ́ɛ Nɛ̌ɛ ví ɔ́ ɖo ahwanfuntɔ́ lɛ́ɛ tɛ́ntin ɖɔ: “Avunɛ́ɛ, Avunɛ́ɛ, a nǎ sɔ ǎ cé?” Bɔ Avunɛ́ɛ yí gbe n'i ɖɔ: “Mɛ̌ ká ɖo tagba dó nú axɔ́sú ɔ́ wɛ mɔ̌?”

¹⁵Bɔ Davídi ɖɔ nú Avunɛ́ɛ ɖɔ: “Súnnu glegbenu wɛ a nyǐ ǎ cé? Ahwanfuntɔ́ hwi ɖɔhun ɖě sɔ́ ɖo Izlayɛ́li ǎ. Étɛ́wú a ma ka kpé nukún dó gǎn towe wú ǎ? Mɛ ɖé wá axɔ́sú ɔ́ hu gbé.

¹⁶Un xwlé Mawu nú we ɖɔ Mawu Mavɔmavɔ ɖo gbɛ. É nyɔ́ nú a nǎ dó vɛ̌ nú azɔ̌ towe mɔ̌ ǎ. Hu wɛ è ɖǒ ná hu mi bǐ, ɖó mi kpé nukún dó gǎn mitɔn axɔ́sú e Mawu Mavɔmavɔ sɔ́ ɔ́ wú ǎ! Kpɔ́n axɔ́sú ɔ́ sín taligbé; fítɛ́ hwǎn tɔn kpó anyǔglo tɔn kpó ká ɖe?”

¹⁷Sawúlu wá tunwun ɖɔ Davídi wɛ ɖo xó ɖɔ wɛ, bó ɖɔ: “Vǐ ce Davídi, hwi jɛ́n wɛ ɖo xó ɖɔ wɛ a?” Bɔ Davídi yí gbe n'i ɖɔ: “Sɛ́mɛɖó, nyi jɛ́n wɛ.”

¹⁸Davídi lɛ́ ɖɔ: “Sɛ́mɛɖó, étɛ́wú è ka ɖo gbě ce mɛ? Étɛ́ un ka wa nú mɛ? Nǔ nyanya tɛ́ un wa?

¹⁹Sɛ́mɛɖó, kɛnklɛ́n bó ɖótó xó e ɖɔ nú mɛ gbé un ja é. Ényí Mawu Mavɔmavɔ ɖésú wɛ sɛ́ mɛ dó ɖɔ mɛ wá wa mɔ̌ xá mì hǔn, ní yí vɔ̌ e è nǎ sá n'i ɔ́ dó fá xomɛ. É ká nyí gbɛtɔ́ lɛ́ɛ wɛ hǔn, Mawu Mavɔmavɔ ní dó nu yě, ɖó yě ɖo nyinya mì wɛ égbé din sín Mawu Mavɔmavɔ to ɔ́ mɛ, bó ɖo ɖiɖɔ nú mì wɛ ɖɔ nyi ní yi sɛn vodún.

²⁰É ní ma lɔn nú un kú jɛ zɔ nú Mawu Mavɔmavɔ ó. Sɛ́mɛɖó, nyɛ mɛ e cí jɔ̌ ɖɔhun ɔ́, étɛ́wú è ka ɖo gbě ce nya wɛ? Étɛ́wú è ɖo gbě ce nya wɛ lě e è nɔ ɖo asɔklé nya wɛ gbɔn sókan mɛ sókan mɛ ɔ́ ɖɔhun mɔ̌?”

²¹Ée é ɖɔ mɔ̌ ɔ́, Sawúlu sú xó, bó ɖɔ: “Davídi, vǐ ce, wǎ, hwɛ wɛ un hu, un sɔ́ ná wa nǔɖé nú we ǎ, ɖó égbé ɔ́, a ɖǒ sísí nú gbɛ ce. Taɖunɔ ɖɔhun wɛ un wa nǔ; nǔ ɖaxó ɖokpó wɛ un wa nyi do.”

²²Ée é ɖɔ mɔ̌ ɔ́, Davídi lɛ́ yí xó, bó ɖɔ: “Sɛ́mɛɖó, kpɔ́n, hwǎn mɛtɔn ɖíe, mɛ mɛtɔn ɖokpó ní wá yí.

²³Mawu Mavɔmavɔ ní kpɔ́n dó nǔjlɔ́jlɔ́wiwa tɔn kpó gbejíninɔ tɔn kpó wú, dó wa nǔ xá mǐ mɛ ɖokpó ɖokpó. Đó Mawu Mavɔmavɔ jó mɛ nú mì égbé, un ka jló ná hu mɛ ǎ, ɖó Mawu Mavɔmavɔ wɛ sɔ́ mɛ axɔ́sú.

²⁴Lě e gbɛ mɛtɔn xɔ akwɛ́ ɖo nukún ce mɛ gbɔn ɔ́, gbɛ ce lɔ ní xɔ akwɛ́ ɖo Mawu Mavɔmavɔ nukún mɛ, bónú é ní ɖe mì sín tagba bǐ mɛ.”

²⁵Ée Davídi ɖɔ mɔ̌ ɔ́, Sawúlu ɖɔ: “Vǐ ce Davídi, Mawu Mavɔmavɔ ní xo ɖɛ dó jǐ we. A sɔ́ nǔ ɖěbǔ bó ná wa ɔ́, a nǎ mɔ nu tɔn.” Davídi ka wlí ali tɔn bo ɖidó, bɔ Sawúlu lɔ wá yi xwé.