Read fon 1 Samuwɛ́li 29 Bible Online

1 Samuwɛ́li 29 - fon bible

1 Samuwɛ́li 29

¹Filisitɛ́ɛn lɛ́ɛ kplé ahwangɔnu yětɔn lɛ́ɛ bǐ ɖó Afɛ́ki, bɔ Izlayɛ́li ví lɛ́ɛ ka ɖó gɔnu yětɔn ɖó tɔjɔtɛn e ɖo Izleyɛ́li ɔ́ kpá.

²Axɔ́sú Filisitɛ́ɛn lɛ́ɛ tɔn ɖokpó ɖokpó ɖo ahwankánɖó yětɔn yětɔn nukɔn bó ɖidó; Davídi kpó mɛ tɔn lɛ́ɛ kpó kplá axɔ́sú Akíci bó jɛ yě gúdo.

³Ahwangán Filisitɛ́ɛn lɛ́ɛ tɔn lɛ́ɛ kanbyɔ́ ɖɔ: “Étɛ́ wa wɛ Eblée élɔ́ lɛ́ɛ ka ɖe ɖo fí?” Bɔ Akíci yí gbe nú yě ɖɔ: “É má nyí Sawúlu Izlayɛ́li xɔ́sú ɔ́ sín mɛsɛntɔ́ Davídi nɛ́ a? É ɖo gɔ̌n ce din ɔ́, xwe ko yi ɖokpó abǐ we; sín gbe e gbe é jó gǎn tɔn dó ɔ́ káká jɛ égbé din ɔ́, un ko mɔ nǔjɛdo ɖěbǔ ɖo wǔ tɔn ǎ.”

⁴Lo ɔ́, ahwangán lɛ́ɛ sin xomɛ dó Akíci bo ɖɔ n'i ɖɔ: “Lɛ̌ kɔ nú dǎwe énɛ́ ɔ́ nú é yi nɔ toxo e mɛ a sɔ́ ɛ ɖó é. É ma xwedó mǐ yi ahwangbénu ó, é táá wá húzú kpan nukɔn mǐ ɖo dɔ̌n. Nú é ká ná nyí mɛ ɖo gǎn tɔn sí ɔ́, é má nyí mɛ mǐtɔn lɛ́ɛ jɛ́n é ná hu a?

⁵ É má nyí Davídi énɛ́ wɛ nyɔ̌nu lɛ́ɛ nɔ́ ɖú we ná bó nɔ ji han ná ɖɔ: ‘Sawúlu hu kɛntɔ́ afatɔ́n (1.000), Davídi ka hu děgba we afɔwó (10.000) ǎ cé?’ ”

⁶Ée yě ɖɔ mɔ̌ ɔ́, Akíci gbɔ bo ylɔ́ Davídi bó xwlé Mawu n'i ɖɔ: “Mawu Mavɔmavɔ ɖo gbɛ! Gbɛtɔ́ e nɔ wa nǔ jlɔ́jlɔ́ é wɛ nú we; nú a yi fun ahwan élɔ́ xá mì ɔ́, é ná víví nú mì, ɖó sín gbe e gbe a wǎ gɔ̌n ce ɔ́ káká wá jɛ égbé din ɔ́, un mɔ nǔjɛdo ɖěbǔ ɖo wǔ we ǎ. Amɔ̌, axɔ́sú ɖě lɛ́ɛ ba xó towe ǎ.

⁷Hǔn din ɔ́, bo lɛ́ kɔ; a nǎ yi xwé ɖagbe; ma nɔ fí, bó wá wa nǔɖé nyi do nú gǎn Filisitɛ́ɛn lɛ́ɛ tɔn lɛ́ɛ ó.”

⁸Davídi ka ɖɔ nú Akíci ɖɔ: “Nǔjɛdo tɛ́ a ka mɔ ɖo wǔ ce sín gbe e gbe un wá gɔ̌n towe é káká jɛ égbé? Étɛ́ un ka wa bo ma ná yi fun ahwan xá axɔ́sú sɛ́mɛɖó ce sín kɛntɔ́ lɛ́ɛ ǎ?”

⁹Akíci yí gbe nú Davídi ɖɔ: “Un tunwun ɖɔ gbɛtɔ́ ɖagbe wɛ a nyǐ nú nyɛ. A nyɔ̌ bó cí wɛnsagun Mawu tɔn ɖɔhun. Lo ɔ́, ahwangán Filisitɛ́ɛn lɛ́ɛ tɔn lɛ́ɛ gbɛ́ ɖɔ a kún ná xwedó émí yi ahwangbénu ó.

¹⁰Énɛ́ ɔ́, bo fɔ́n zǎn hwi kpó sɛ́mɛɖó towe sín mɛsɛntɔ́ e wá fí lɛ́ɛ kpó. Mi fɔ́n zǎn, bónú ayǐxomɛ hɔ́n lě tlóló hǔn, mi ɖidó.”

¹¹Davídi kpó mɛ tɔn lɛ́ɛ kpó fɔ́n zǎnzǎn tɛɛn, bó lɛ́ kɔ yi Filisitɛ́ɛn lɛ́ɛ tomɛ, bɔ Filisitɛ́ɛn lɛ́ɛ ɖidó Izleyɛ́li.