Read fon 1 Samuwɛ́li 3 Bible Online

1 Samuwɛ́li 3 - fon bible

1 Samuwɛ́li 3

¹Nyaví Samuwɛ́li ɔ́ ká ɖo azɔ̌ wa nú Mawu Mavɔmavɔ wɛ ɖo Eli glɔ́. Hwe nɛ́ ɔ́ nu ɔ́, Mawu Mavɔmavɔ nɔ ɖɔ xó nú mɛ gbɔn mɔ̌ ǎ. Mawu Mavɔmavɔ ká nɔ xlɛ́ nǔ mɛ gbɔn mɔ̌ ǎ.

²É ká wá jɛ zǎn mɛ gbe ɖokpó, bɔ Eli ɖo ayǐmlɔ́mlɔ́ ɖo fí e é nɔ́ mlɔ́ é; é ká sɔ́ ɖo nǔ mɔ wɛ ganjí ǎ.

³Zogbɛ́n e è tá ɖó Mawu Mavɔmavɔ sín goxɔ mɛ ɔ́, è ko xo cí hwenɛ́nu ǎ, bɔ Samuwɛ́li ka ɖo ayǐmlɔ́mlɔ́ ɖo goxɔ Mawu Mavɔmavɔ tɔn mɛ, fí e akɔjijɛgbá Mawu tɔn ɔ́ ɖe é.

⁴Mawu Mavɔmavɔ ylɔ́ Samuwɛ́li, bɔ é ɖɔ: “Wěyi!”

⁵Bó bɛ́ wezun yi Eli gɔ́n, bó ɖɔ: “Un se a ylɔ̌ mì; nyi ɖíe!” Eli ka ɖɔ: “Un ylɔ́ we ǎ. Lɛ̌ kɔ bo yi mlɔ́ ayǐ.” Bɔ é yi mlɔ́ ayǐ.

⁶Mawu Mavɔmavɔ ylɔ́ Samuwɛ́li azɔn wegɔ́ ɔ́, bɔ é sí te bo yi Eli gɔ́n, bó ɖɔ: “Nyi ɖíe!” Eli ka yí gbe n'i ɖɔ: “Vǐ ce, un ylɔ́ we ɖě ǎ, lɛ̌ kɔ bo yi mlɔ́ ayǐ.”

⁷Samuwɛ́li ko tunwun Mawu Mavɔmavɔ hwenɛ́nu ǎ, Mawu Mavɔmavɔ ko ɖɔ xó n'i kpɔ́n hwenɛ́nu ǎ.

⁸Mawu Mavɔmavɔ lɛ́ ylɔ́ Samuwɛ́li azɔn atɔngɔ́ ɔ́, bɔ é bɛ́ wezun yi Eli gɔ́n, bó ɖɔ: “Un se a ylɔ̌ mì; nyi ɖíe!” Bɔ Eli wá mɔ nǔ jɛ wú ɖɔ Mawu Mavɔmavɔ wɛ ɖo ylɔ̌ylɔ́ ɛ wɛ.

⁹Énɛ́ ɔ́, é ɖɔ nú Samuwɛ́li ɖɔ: “Yi mlɔ́ ayǐ, nú è sɔ́ ylɔ́ we ɖě ɔ́, a nǎ ɖɔ: ‘Mawu Mavɔmavɔ, ɖɔ xó; nyɛ mɛsɛntɔ́ towe ɖo tó ɖó we wɛ.’ ” Bɔ Samuwɛ́li yi mlɔ́ ayǐ fí e é fɔ́n sín é.

¹⁰Mawu Mavɔmavɔ wá Samuwɛ́li gɔ́n, bó ylɔ́ ɛ lě e é ko nɔ ylɔ́ ɛ gbɔn é; é ɖɔ: “Samuwɛ́li! Samuwɛ́li!” Samuwɛ́li yí gbe ɖɔ: “Đɔ xó, nyɛ mɛsɛntɔ́ towe ɖo tó ɖó we wɛ.”

¹¹Bɔ Mawu Mavɔmavɔ ɖɔ nú Samuwɛ́li ɖɔ: “Un ná dó nǔ ɖokpó sin ɖo Izlayɛ́li, bɔ mɛ ɖěbǔ se ɔ́, tó tɔn ná sú hɔn.

¹²Gbe énɛ́ ɔ́ gbe ɔ́, nǔ e un ko ɖɔ un ná wa xá Eli sín xwédo ɔ́ bǐ ná jɛ. Un bɛ́ ɔ́, un ná bló yi fó.

¹³Un ɖɔ n'i ɖɔ un jló ná dɔn tó nú xwédo tɔn káká sɔ́yi, ɖó vǐ tɔn lɛ́ɛ ké ya nú mì ǎ; yě hu hwɛ dó mì bɔ é tunwun, bó ká gbɛ́ nú yě dó nǔjɔnǔ mɛ ǎ.

¹⁴Énɛ́ ɔ́ wútu wɛ un xwlé nǔ nú Eli xwédo ɔ́ ɖɔ hwɛ e é hu ɔ́, vɔ̌sísá kún ná súnsún ó; nǔníná kún ká ná súnsún ó.”

¹⁵Samuwɛ́li nɔ ayǐmlɔ́mlɔ́ káká bɔ ayǐ hɔ́n, bɔ é hun Mawu Mavɔmavɔ xwé sín hɔn lɛ́ɛ. É ká glá ɖɔ nǔ e é mɔ ɔ́ nú Eli ǎ, ɖó é ɖo xɛsi ɖi wɛ.

¹⁶Eli ka ylɔ́ Samuwɛ́li bo ɖɔ: “Samuwɛ́li vǐ ce!” Bɔ é ɖɔ: “Wěyi!”

¹⁷Eli kanbyɔ́ ɛ ɖɔ: “Xó tɛ́ Mawu ka ɖɔ nú we? Ma hwlá ɖěbǔ dó mì ó. Ényí a hwlǎ ɖěbǔ dó mì hǔn, Mawu ní dɔn tó nú we, bónú é syɛ́n hú tódɔnnúmɛ lɛ́ɛ bǐ.”

¹⁸Énɛ́ ɔ́, Samuwɛ́li wlí bǐ ɖɔ n'i; é ɖe ɖě kpo ǎ. Eli ka ɖɔ: “Mawu Mavɔmavɔ wɛ, ní bló lě e é jló e gbɔn é.”

¹⁹Samuwɛ́li ɖo susu wɛ, bɔ Mawu Mavɔmavɔ ɖo kpɔ́ xá ɛ, bɔ nǔ e é nɔ́ ɖɔ dó Mawu Mavɔmavɔ nyíkɔ mɛ ɔ́ bǐ nɔ́ jɛ.

²⁰Izlayɛ́li to ɔ́ bǐ, bɛ́ sín Dan ɖo taligbé káká yi Bɛ̌-Ceva ɖo afɔligbé ɔ́, bǐ wɛ tunwun ɖɔ Mawu Mavɔmavɔ sɔ́ Samuwɛ́li gbeyíɖɔ tɔn.

²¹Mawu Mavɔmavɔ ká nɔ gɔn éɖée ɖe xlɛ́ ɖo Silóo ǎ. Đó Silóo fínɛ́ wɛ é nɔ́ tɔ́n dó Samuwɛ́li jí ɖe, bó nɔ́ ɖɔ xó n'i.