Read fon 1 Samuwɛ́li 30 Bible Online

1 Samuwɛ́li 30 - fon bible

1 Samuwɛ́li 30

¹Ée Filisitɛ́ɛn lɛ́ɛ nya Davídi bɔ é lɛ́ kɔ ɔ́, é kpó mɛ tɔn lɛ́ɛ kpó wá Siklági toxo mɛ azǎn atɔngɔ́ ɔ́ gbe. Amalɛ́ki ví lɛ́ɛ byɔ́ Judáa tofɔligbé bó tɔ́n ahwan Siklági toxo ɔ́. Yě gba Siklági toxo ɔ́ bǐ, bó dó zo.

²Yě ká to wlí nyɔ̌nu kpó yɔkpɔ́vú kpó e ɖo toxo ɔ́ mɛ é bǐ hwɛ̌ có bó dó zo. Yě hu mɛɖé ɖo toxo ɔ́ mɛ ǎ, yě bɛ̌ mɛ énɛ́ lɛ́ɛ bǐ bó jɛ ali.

³Ée Davídi kpó mɛ tɔn lɛ́ɛ kpó wá toxo ɔ́ mɛ ɔ́, yě mɔ ɖɔ è ko wlí asi yětɔn lɛ́ɛ kpó vǐ yětɔn lɛ́ɛ bǐ kpó, bó kó bɛ́ yě yi kannumɔgbénu, bo ko dó toxo ɔ́ zo.

⁴Bɔ Davídi kpó mɛ e kpó é kpó zɔn lɛ́ɛ bǐ kpó wlí avǐ bo ya káká bɔ agbɔ̌ kpé yě.

⁵ Amalɛ́ki ví lɛ́ɛ kplá Davídi sín asi we lɛ́ɛ: Axinɔwamu Izleyɛ́linu ɔ́ kpó Avigayilu Kaamɛ́linu asúkúsi Navalu tɔn kpó.

⁶Hwenɛ́nu ɔ́, nukún myá Davídi ɖésú, ɖó togun ɔ́ bǐ ɖo ɖiɖɔ wɛ ɖɔ émí ná nyi awǐnnyaglo dó hu i. Đó yě ɖokpó ɖokpó ɖo akpɔ mɔ wɛ ɖó vǐ yětɔn lɛ́ɛ wú. Amɔ̌, Davídi lɛ́ kpan akɔ́n, ɖó é gán jɛ Mawu Mavɔmavɔ, Mawu tɔn wú.

⁷ É ɖɔ nú vɔ̌sánú-xwlémawutɔ́ Abiyatáa Aximɛlɛ́ki ví ɔ́ ɖɔ: “Sɔ́ efódu ɔ́ wá.” Abiyatáa sɔ́ wá n'i.

⁸Bɔ Davídi kan nǔ byɔ́ Mavɔmavɔ bo ɖɔ: “Má jɛ ahwangɔnu énɛ́ gúdo a? Un ka ná sixú xwedó yě wǔ a?” Bɔ Mawu Mavɔmavɔ yí gbe n'i ɖɔ: “Jɛ yě gúdo; a nǎ xwedó yě wǔ, bó ná yí mɛ towe lɛ́ɛ sín kɛntɔ́ lɛ́ɛ sí.”

⁹Davídi jɛ Amalɛ́ki ví lɛ́ɛ gúdo é kpó súnnu nǔwɔntɔn (600) e kpó é kpó ɖo yiyi wɛ lɛ́ɛ kpó. Yě yi jɛ Besɔ́ɔ tɔ ɔ́ kɔn,

¹⁰bɔ mɛ e nǔ cikɔ ná lɛ́ɛ nɔ te fínɛ́. Yě mɛ afɔɖé (200) wɛ. Davídi kpó yě mɛ afɔwe (400) e kpo lɛ́ɛ kpó ká lɛ́ wlí ali yětɔn bó jɛ Amalɛ́ki ví e nya wɛ yě ɖe lɛ́ɛ gúdo.

¹¹Ahwanfuntɔ́ Davídi tɔn lɛ́ɛ mɔ nya Ejípunu ɖokpó ɖo gbě ɔ́ jí, bó kplá ɛ yi jó nú Davídi. È nǎ ɛ nǔɖuɖu bɔ é ɖu, bó ná ɛ sin bɔ é nu,

¹²bó ná ɛ fígi xúxú, bó ná ɛ vǐwun xúxú hwǐn we. Ée é ɖu nǔ énɛ́ lɛ́ɛ ɔ́, é mɔ gǎn, ɖó é má sɔ́ ɖu nǔ ǎ ɔ́, kéze atɔn zǎn atɔn ko nɛ́.

¹³Davídi kanbyɔ́ nya ɔ́ ɖɔ: “Mɛ̌ wɛ nyí gǎn towe? Fítɛ́ a ka gosín?” Nya ɔ́ yí gbe n'i ɖɔ: “Ejípunu wɛ un nyí, lobo ɖo nya Amalɛ́ki ví ɖé sín kan nu. Sín azǎn atɔn ɖíe wɛ é ka ko jó mì dó, ɖó un ɖo azɔn jɛ wɛ.

¹⁴Mǐ wɛ yi fun ahwan ɖo Keleti lɛ́ɛ sín tofɔligbé, bó fun ɖo Judáa ví lɛ́ɛ sín tofɔligbé, bó fun ɖo Kalɛ́bunu lɛ́ɛ sín tofɔligbé lobo dó Siklági toxo ɔ́ zo.”

¹⁵Ée é ɖɔ mɔ̌ ɔ́, Davídi kanbyɔ́ ɛ ɖɔ: “A nǎ sixú kplá mì yi fí e sɔ́ja énɛ́ lɛ́ɛ ɖe ɔ́ a?” Nya ɔ́ yí gbe n'i ɖɔ: “Đɔ bó xwlé Mawu d'é jí ɖɔ émí kún ná hu mì ó, émí kún ká ná sɔ́ mì yi jó nú gǎn ce ó. Énɛ́ ɔ́, un ná kplá we yi fí e yě ɖe ɔ́.”

¹⁶Ée nya ɔ́ ɖɔ mɔ̌ ɔ́, é jɛ nukɔn nú Davídi, bó kplá ɛ yi Amalɛ́ki ví lɛ́ɛ gɔ́n. Ée yě jɛ dɔ̌n ɔ́, yě mɔ ɖɔ Amalɛ́ki ví lɛ́ɛ kó gba kpé gbě nɛ́ ɔ́ jí bǐ, bó ɖo nǔ ɖu wɛ, bó ɖo ahan nu wɛ, bó ɖo we ɖú wɛ, ɖó dɔkun tobutóbú e yě bɛ́ sín Filisitíi kpó Judáa kpó lɛ́ɛ wú.

¹⁷Davídi zɔn yě mɛ, bó ɖo yě hu wɛ sín ayǐtéhɔ̌nnu káká jɛ ayǐhɔ́ngbe tɔn gbadanu. Yě ɖě kpé wú bó hɔn yi zɛ dɔ̌nkpɛvú afɔwe (400) e xá lǎkúnmí jí bó hɔn yi lɛ́ɛ wú ǎ.

¹⁸Nǔ e Amalɛ́ki ví lɛ́ɛ ko bɛ́ lɛ́ɛ ɔ́, Davídi yí bǐ; é yí asi tɔn we lɛ́ɛ lɔ.

¹⁹Mɛ yětɔn e è kplá yi lɛ́ɛ ɖokpó hwe ǎ; mɛxó hwe ǎ, yɔkpɔ́vú hwe ǎ. Súnnu hwe ǎ, nyɔ̌nu hwe ǎ. Nǔ yětɔn e è bɛ̌ lɛ́ɛ ɖěbǔ hwe ǎ, bǐ wɛ Davídi bɛ́ wá xwé.

²⁰Davídi bɛ́ nyibú kpó gbɔ̌ kpó bǐ wá, bɔ mɛ e ɖo kanlin lɛ́ɛ kplá wɛ lɛ́ɛ nɔ ɖɔ: “Nǔ e Davídi bɛ́ sín ahwangbénu wá lɛ́ɛ ɖíe.”

²¹Davídi lɛ́ kɔ wá mɛ afɔɖé (200) e nǔ cikɔ ná káká bɔ yě má sixú xwedó e ǎ, bɔ è jó yě dó nyi Besɔ́ɔ tɔ ɔ́ tó lɛ́ɛ gɔ́n. Ée yě mɔ Davídi ɔ́, yě bǐ sí te bo wá kpé e, kpódó mɛ e zɔn xá ɛ lɛ́ɛ kpó. Davídi sɛkpɔ́ yě, bó kan lě e yě ɖe gbɔn é byɔ́.

²²Gbɛtɔ́ nyanya, gbɛtɔ́ dídá ɖé lɛ́ɛ ɖo mɛ e kpó Davídi kpó zɔn lɛ́ɛ mɛ, bó yí xó bó ɖɔ: “Mǐ ná ná dɔkun e mǐ hɛn sín ahwangbénu lɛ́ɛ kwín ɖokpó géé mɛ e ma xwedó mǐ yi lɛ́ɛ é ǎ. Nǔ ɖokpó e mǐ ná wa nú yě ɔ́ wɛ nyí ɖɔ mɛ ɖokpó ɖokpó ná kplá asi tɔn kpó vǐ tɔn lɛ́ɛ kpó, bó ná yi.”

²³Davídi ka yí xó bó ɖɔ: “Nɔví ce lɛ́ɛ mi, mi kpɔ́n ɖagbe e Mawu Mavɔmavɔ wa nú mǐ é; é nyɔ́ nú mǐ ná wa nǔ gbɔn mɔ̌ ǎ. Đó Mawu Mavɔmavɔ nya xɛ ɖo mǐ jí, bó jó mɛ e wá tɔ́n ahwan mǐ lɛ́ɛ nú mǐ.

²⁴Xó énɛ́ e ɖɔ wɛ mi ɖe ɔ́, mɛ̌ ká ná se xá mi? ‘Mɛ e yi ahwangbénu ɔ́ kpó, mɛ e nɔ agban lɛ́ɛ kɔn é kpó, bǐ wɛ ná má nǔ e mǐ hɛn sín ahwangbénu wá lɛ́ɛ bǐ ɖó zɛ̌nzɛ̌n.’ ”

²⁵Lě e è nɔ wa nǔ gbɔn ɖo Izlayɛ́li sín gbe énɛ́ gbe káká wá jɛ égbé ɔ́ nɛ́, bɔ é húzú sɛ́n ɖo Izlayɛ́li, bó ɖo ayǐ káká jɛ égbé.

²⁶Ée Davídi lɛ́ kɔ wá Siklági ɔ́, é sɛ́ dɔkun e yě hɛn wá sín ahwangbénu lɛ́ɛ ɖě dó tomɛxó Judáa tɔn e nyí xɔ́ntɔn tɔn lɛ́ɛ, bó ɖɔ sɛ́ dó yě ɖɔ: “Dɔkun e mǐ yí ɖo Mawu Mavɔmavɔ sín kɛntɔ́ lɛ́ɛ sí ɔ́, mitɔn ɖíe.”

²⁷Yě mɛ énɛ́ lɛ́ɛ wɛ nyí tomɛxó e ɖo Betɛ́li lɛ́ɛ, tomɛxó e ɖo Hlamɔti tofɔligbé lɛ́ɛ kpó éé ɖo Yatíi lɛ́ɛ kpó.

²⁸Tomɛxó e ɖo Alowɛ́ɛ lɛ́ɛ, éé ɖo Sifemɔ́ti lɛ́ɛ, éé ɖo Ɛcitemɔwa lɛ́ɛ,

²⁹éé ɖo Hlakalu lɛ́ɛ, éé ɖo Yelaximɛyɛ́linu lɛ́ɛ sín toxo mɛ lɛ́ɛ, éé ɖo Keni ví lɛ́ɛ sín toxo mɛ lɛ́ɛ,

³⁰éé ɖo Hɔ́ɔma lɛ́ɛ, éé ɖo Bɔɔ-Acáni lɛ́ɛ, éé ɖo Atáki lɛ́ɛ.

³¹Tomɛxó e ɖo Eblɔ́n lɛ́ɛ, kpó éé ɖo fí e é kpó mɛ tɔn lɛ́ɛ kpó ko gbɔn lɛ́ɛ bǐ kpó.