Read fon 1 Samuwɛ́li 4 Bible Online

1 Samuwɛ́li 4 - fon bible

1 Samuwɛ́li 4

¹Samuwɛ́li nɔ ɖɔ xó énɛ́ lɛ́ɛ nú Izlayɛ́li togun ɔ́ bǐ. Izlayɛ́li ví lɛ́ɛ tɔ́n gbe ɖokpó, bó ná yi fun ahwan xá Filisitɛ́ɛn lɛ́ɛ. Yě yi ɖó gɔnu ɖó malín málín mɛ dó Evɛ́ni-Ezɛ́ɛ. Filisitɛ́ɛn lɛ́ɛ ká ɖó gɔnu ɖó Afɛ́ki.

²Filisitɛ́ɛn lɛ́ɛ sí te, bó tɔ́n ahwan Izlayɛ́li ví lɛ́ɛ, bɔ ahwan ɔ́ bɛ́, bó syɛ́n ɖésú. Filisitɛ́ɛn lɛ́ɛ wá ɖu ɖo ahwan ɔ́ jí, bó hu Izlayɛ́li ví děgba (4.000) mɔ̌.

³Izlayɛ́li ví lɛ́ɛ lɛ́ kɔ wá yi ahwankpá yětɔn mɛ, bɔ tomɛxó yětɔn lɛ́ɛ ɖɔ: “Étɛ́wú Mawu Mavɔmavɔ ká jó mǐ dó égbé, bɔ Filisitɛ́ɛn lɛ́ɛ ɖu ɖo mǐ jí? Mi nú mǐ ná yi Silóo, bó ná yi sɔ́ akɔjijɛgbá Mawu Mavɔmavɔ tɔn ɔ́ wá. Nú akɔjijɛgbá ɔ́ ɖo tɛ́ntin mǐtɔn ɔ́, é ná hwlɛ́n mǐ sín kɛntɔ́ mǐtɔn lɛ́ɛ sí.”

⁴ Togun ɔ́ sɛ́ mɛ dó Silóo nǔgbó, bɔ è yi sɔ́ akɔjijɛgbá Mawu Mavɔmavɔ Nǔbǐwúkpétɔ́ ɔ́ tɔn wá. Akɔjijɛgbá ɔ́ jí wɛ Mawu Mavɔmavɔ ɖo ayǐjínjɔ́n ɖe, ɖo axɔ́súzinkpo tɔn jí. Eli ví we lɛ́ɛ: Pínxási kpó Hofíni kpó ɖo akɔjijɛgbá ɔ́ kɔn.

⁵Ée akɔjijɛgbá Mawu Mavɔmavɔ tɔn byɔ́ fí e Izlayɛ́li ví lɛ́ɛ ɖó gɔnu ɖó ɔ́ lě tlóló ɔ́, Izlayɛ́li ví lɛ́ɛ bǐ ɖo xó sú wɛ, bó ɖo awǒbóbó kpa wɛ káká bɔ ayǐkúngban dán wǔ.

⁶Filisitɛ́ɛn lɛ́ɛ se awǒbóbó e kpa wɛ yě ɖe ɔ́, bó ɖɔ: “Étɛ́ sín awǒbóbó kpa wɛ Eblée lɛ́ɛ ká ɖe sɔ mɔ̌ ɖo fí e yě ɖǒ gɔnu ɖó ɔ́?” Yě wá se ɖɔ akɔjijɛgbá Mawu Mavɔmavɔ tɔn ɔ́ wɛ yě sɔ́ wá fí e yě ɖǒ gɔnu ɖó é.

⁷Énɛ́ ɔ́, xɛsi jɛ Filisitɛ́ɛn lɛ́ɛ jí, ɖó yě ɖo ɖiɖɔ wɛ ɖɔ: “Mawu wá fí e Eblée lɛ́ɛ ɖó gɔnu ɖó ɔ́. É ɖo fínɛ́ ɖ'ayǐ ǎ. Étɛ́ ɖíe gbo mǐ e!

⁸Étɛ́ ɖíe ká gbo mǐ e! Mɛ̌ ká ná hwlɛ́n mǐ gán ɖo nǔmɛsɛn hlɔ̌nhlɔ́nnɔ énɛ́ ɔ́ sí din. Nǔmɛsɛn énɛ́ ɔ́ wɛ dó nǔ tɛnmɛ tɛnmɛ sin xá Ejípunu lɛ́ɛ ɖo gbětótló mɛ.

⁹Filisitɛ́ɛn e mi, mi dó wǔsyɛ́n lanmɛ nú miɖée, bó wa nǔ súnnu ɖɔhun; é má nyí mɔ̌ ǎ ɔ́, mi ná húzú kannumɔ Eblée lɛ́ɛ tɔn, lě e yě ɖésú kó nyí kannumɔ mǐtɔn kpɔ́n gbɔn é. Mi wa nǔ súnnu ɖɔhun. Mi fun ahwan.”

¹⁰Ée Filisitɛ́ɛn lɛ́ɛ ɖɔ mɔ̌ ɔ́, yě tɔ́n ahwan Izlayɛ́li ví lɛ́ɛ, bó ɖu ɖo yě jí, bɔ mɛ ɖokpó ɖokpó hɔn yi xwé tɔn gbe. Lě e Filisitɛ́ɛn lɛ́ɛ ɖu ɖo Izlayɛ́li ví lɛ́ɛ jí gbɔn ɔ́ syɛ́n ɖésú. Izlayɛ́li ví adɔ̌kpo ɖě děgba we afɔwó (30.000) wɛ è hu gbe nɛ́ gbe.

¹¹Filisitɛ́ɛn lɛ́ɛ yí akɔjijɛgbá Mawu tɔn ɔ́, bɔ Eli ví we lɛ́ɛ: Hofíni kpó Pínxási kpó kú.

¹²Gbe nɛ́ ɔ́ gbe ɖokpó ɔ́, nya ɖokpó bɛ́ wezun sín ahwangbé ɔ́ nu wá yi Silóo. É vún awu dó kɔ nú éɖée, bó lɛ kɔ́ dó ta dó ɖe xlɛ́ ɖɔ émí ɖo aluwɛ mɛ. Nya énɛ́ ɔ́, Bɛnjamɛ́ɛ sín akɔta mɛ wɛ é tɔ́n sín.

¹³Eli ɖo ayǐjínjɔ́n ɖo zinkpo tɔn jí ɖo ali kpá, bó ɖo te kpɔ́n wɛn e ná gosín ahwangbé ɔ́ nu é, ɖó ado ɖo huhu i wɛ, ɖó akɔjijɛgbá Mawu tɔn e ɖo dɔ̌n é wú. Nya e gosín ahwangbé ɔ́ nu ɔ́ byɔ́ to ɔ́ mɛ, bó ɖɔ nǔ e jɛ lɛ́ɛ, bɔ to ɔ́ bǐ bɛ́ xósúsú.

¹⁴Ée Eli se xósúsú énɛ́ ɔ́, é ɖɔ: “Étɛ́ xósúsú ká sɔ mɔ̌?” Tlóló ɔ́, nya ɔ́ wá ɖɔ xó ɔ́ bǐ n'i.

¹⁵Eli ka ko ɖó xwe kanwe afɔtɔn-nukún-atɔn (98). Nukún tɔn lɛ́ɛ ɖo te bó ká sɔ́ ɖo nǔ mɔ wɛ ǎ.

¹⁶Nya ɔ́ ɖɔ nú Eli ɖɔ: “Fí e fun ahwan ɖe wɛ yě ɖe é wɛ un gosín. Dɔ̌n wɛ un hɔn sín égbé din.” Bɔ Eli kanbyɔ́ ɛ ɖɔ: “Vǐ ce, étɛ́ ká jɛ?”

¹⁷Bɔ nya e hɛn wɛn ɔ́ wá é yí gbe n'i ɖɔ: “Izlayɛ́li ví lɛ́ɛ hɔn ɖo Filisitɛ́ɛn lɛ́ɛ nukɔn, bɔ Filisitɛ́ɛn lɛ́ɛ ɖu ɖo yě jí bǐ gbídígbídí, káká bɔ vǐ towe we lɛ́ɛ: Hofíni kpó Pínxási kpó kú, bɔ yě yí akɔjijɛgbá Mawu tɔn ɔ́.”

¹⁸Káká nú nya ɔ́ ná ɖɔ akɔjijɛgbá Mawu tɔn xó lě ɔ́, Eli nyi agbo sín zinkpo e jí é ɖe ɔ́, bó j'ayǐ wɛn, bó sɔ́ zogúdo xo dó kɔ́ mɛ ɖo Mawu Mavɔmavɔ xwé ɔ́ sín hɔntogbó kpá, bó kú. Đó Eli ko kpo, bó ká lɛ́ ɖó zin. Xwe kanɖé (40) wɛ é nɔ togun Izlayɛ́li tɔn ɔ́ nu xɔ.

¹⁹Eli ɔ́, vǐ tɔn Pínxási sín asi ka ɖo xo hwenɛ́nu, bɔ azǎn tɔn kó vɔ. Ée é se ɖɔ Filisitɛ́ɛn lɛ́ɛ yí akɔjijɛgbá Mawu tɔn, bɔ asú émítɔn tɔ́ kpó asú émítɔn kpó kú ɔ́, é syán ayǐ kpowun ɔ́, vǐ jɛ́n é ji, ɖó vǐ tɔ́n ɛ ajijimɛ.

²⁰É ji vǐ ɔ́ mɔ̌, lobo lɛ́ tɔ́n kú, bɔ nyɔ̌nu e nɔ aji n'i lɛ́ɛ ɖɔ: “Ma ɖi xɛsi ó, vǐ súnnu wɛ a ji.” Có é kɛ nu ǎ, é ká tlɛ wlí tó xó e yě ɖɔ n'i ɔ́ wú ǎ.

²¹É sun nyǐ vǐ ɔ́ ɖɔ Ikavodi; tínmɛ tɔn wɛ nyí susu Mawu tɔn vɔ ɖo Izlayɛ́li. É ɖɔ mɔ̌ ɖó Filisitɛ́ɛn lɛ́ɛ yí akɔjijɛgbá Mawu tɔn ɔ́, bɔ asú tɔn tɔ́ kú; asú tɔn lɔ ka lɛ́ kú.

²²É ɖo ɖiɖe xlɛ́ gbɔn mɔ̌ wɛ ɖɔ Izlayɛ́li sín wi kɔ́n ɖó akɔjijɛgbá Mawu tɔn ɔ́ jɛ kɛntɔ́ sí.