Read Tungag ИИ ХАБЕР МАТФЕЙДӒН 11 Bible Online

ИИ ХАБЕР МАТФЕЙДӒН 11 - Tungag bible

ИИ ХАБЕР МАТФЕЙДӒН 11

¹Ачан Иисус верди бу насаатлары оники ӱӱрениӂисинӓ, гитти орадан, ки ӱӱретсин инсаны хем насаат етсин оннарын касабаларында.

²Иоан Ваатизедиӂи капандайкан ишитти Христозун ишлери ичин.

³Йоллады кенди ӱӱрениӂилерини [11] сорсуннар Она: «Сӓнсин ми О, Ким лӓӓзым гелсин, оса башкасыны мы беклейелим?»

⁴Иисус ӂувап етти оннара: «Гидин да сӧлейин Иоана, не ишидерсиниз хем не гӧрерсиниз:

⁵кӧӧрлар гӧрерлӓр, топаллар гезерлӓр, лепралылар пакланэрлар, саарлар ишидерлӓр, ӧлӱлӓр дирилерлӓр, фукааралара ии хабер насаат олэр.

⁶Мутлу о, кимин ичин Бӓн кӧстек олмайаӂам».

⁷Ачан оннар гиттилӓр, Иисус башлады сӧлемӓӓ инсана Иоан ичин: «Не чыктыныз гӧрмӓӓ чолда? Бир сааз мы, ани лӱзгердӓн салланар?

⁸Не чыктыныз гӧрмӓӓ? Бир адам мы, йымышак рубайлан гиийимни? Оннар, ким гиийимни йымышак рубайлан, падишах биналарында йашээрлар.

⁹Озаман нечин чыктыныз? Бир пророк му гӧрмӓӓ? Аслы, хем деерим сизӓ, ани о таа бӱӱк, некадар бир пророк.

¹⁰Одур, кимин ичин йазылы: „Тӓ Бӓн йоллээрым Сенин ӧнӱн сора хаберӂими, ангысы хазырлайаӂэк йол Сана“.

¹¹Доору сӧлеерим сизӓ, ани оннардан, ким карыдан дууду, йок башка биркимсей таа бӱӱк Иоан Ваатизедиӂидӓн. Хеп окадар ен кӱчӱӱ Гӧк Падишахлыында таа бӱӱк ондан.

¹²Иоан Ваатизедиӂинин вакыдындан бӱӱнкӱ гӱнӓ кадар Гӧк Падишахлыы ичин кувет койулур. Бир бойу куветлӓн бакэр она ел коймаа.

¹³Хепси пророклар хем Закон Иоана кадар ӧнӂӓ сӧледилӓр, не олаӂэк.

¹⁴Истӓрсейдиниз буну каблетмӓӓ, одур Илийа, ангысы лӓӓзымды гелсин.

¹⁵Кимин вар кулаа /ишитсин дейни/, ко ишитсин.

¹⁶Кимӓ бензедейим бу бой инсаны? Оннар бензеерлӓр ушаклара, ангылары отурэрлар мейданнарда да баарэрлар кафадарларына:

¹⁷„Чалдык сизӓ каваллан, ойнамадыныз; чалдык сизӓ гамны тӱркӱ, ааламадыныз“.

¹⁸Гелди Иоан, не ийӓрди, не ичӓрди, деерлӓр: „Онда вар фена дух“.

¹⁹Гелди Адам Оолу, хем ийер хем ичер, деерлӓр: „Хобур хем ичкиӂи, харччыларын хем гӱнахкерлерин досту!“ Хеп окадар аарифлик гӧстерер ишлериндӓн, ани о доорудур».

²⁰Озаман Иисус башлады азарламаа касабалары, нередӓ ен чок кудретли ишлӓр йапты, зерӓ гӱнахларындан Аллаха дӧнмедилӓр:

²¹«Вай сана, Хоразин! Вай сана, Вифсаида! Зерӓ, еер бу кудретли ишлӓр, ани сиздӓ йапылды, Тир хем Сидон касабаларында йапылайды, чоктан чуваллан гиийимни хем кӱл ӱстӱндӓ отуруп, гӱнахларындан Аллаха дӧнеӂейдилӓр.

²²Ама сизӓ сӧлеерим, ани даава гӱнӱндӓ таа илин олаӂэк Тир хем Сидон касабаларына, некадар сизӓ.

²³Сӓн, Капернаум, гӧкӓ кадар мы ӱӱсекленеӂӓн? Диил, сӓн ӧлӱлӓр еринӓ дӱшеӂӓн. Зерӓ, еер бу кудретли ишлӓр, ани сендӓ йапылды, Содом касабасында йапылайды, о айакча дураӂэйды бӱӱнкӱ гӱнӓ кадар.

²⁴Ама сизӓ сӧлеерим, ани даава гӱнӱндӓ таа илин олаӂэк Содом касабасына, некадар сана».

²⁵Озаман Иисус деди: «Шӱкӱр едерим Сана, Боба, гӧкӱн хем ерин Саабиси, ани сакладын буннары аариф хем фикирли оланнардан да ачтын евлатлара.

²⁶Хакына, Боба, будур Сенин истедиин!

²⁷Хепсини Бобам Беним елимӓ верди. Кимсей хептӓн аннамээр Оолу, Бобадан каарӓ, хем кимсей хептӓн аннамээр Бобайы, Оолдан каарӓ, хем оннардан, кимӓ Оол истеер ачмаа.

²⁸Гелин Бана, хепси йоргуннар хем ӱклӱ оланнар! Бӓн сизӓ раатлык веририм.

²⁹Алын ӱстӱнӱзӓ Беним бойундурууму, Бендӓн ӱӱренин, зерӓ Бӓн йавашым хем услуйум ӱреемдӓн, да сиз ӂаныныза раатлык булаӂэныз.

³⁰Бойундуруум Беним иидир, хем ӱкӱм Беним илин».