Read Tungag ИИ ХАБЕР МАТФЕЙДӒН 15 Bible Online

ИИ ХАБЕР МАТФЕЙДӒН 15 - Tungag bible

ИИ ХАБЕР МАТФЕЙДӒН 15

¹Озаман фарисейлӓр хем билгичлӓр Иерусалимдӓн гелдилӓр Иисуса да дедилӓр:

²«Нечин Сенин ӱӱрениӂилерин чиинерлӓр ихтӓрларын адетлерини? Зерӓ имектӓн илери йыкамээрлар еллерини».

³Иисус ӂувап етти оннара: «Сиз нечин чиинерсиниз Аллахын сымарладыыны сизин адетлеринизин бетеринӓ?

⁴Зерӓ Аллах деди: „Икрамна бобаны хем ананы“ хем „Ким бобасыны йада анасыны кӧтӱлейеӂек, ӧлӱмнӓн ӂезалы олсун“.

⁵Ама сиз деерсиниз: „Ким деер анасына йада бобасына: Не лӓӓзымды сана верейим, баашыш Аллаха вердим,

⁶о вар ниӂӓ икрамнамасын бобасыны /хем анасыны/“. Бутӱрлӱ паасызландырдыныз Аллахын сӧзӱнӱ кенди адетинизлӓн.

⁷Икиӱзлӱлӓр! Доору пророклук етти сизин ичин Исайа, ачан деди:

⁸„Бу инсан Бени икрамнээр саде аазыннан, ама ӱреклериннӓн узак Бендӓн дурэр.

⁹Наафилӓ Бана баш иилдерлӓр, зерӓ адам сымарламакларыны ӱӱредерлӓр, сансыннар ани Аллахын ӱӱретмеклери“».

¹⁰Иисус чаарды инсаны да деди: «Сеслейин да аннайын Бени.

¹¹Мындарлээр адамы диил о, не ичинӓ гирер, ама не аазындан чыкэр, о мындарлээр адамы».

¹²Озаман ӱӱрениӂилӓр йаклаштылар Иисуса да дедилӓр: «Билерсин ми, ани бу лафлары ишидип, фарисейлӓр гӱӂендилӓр?»

¹³Иисус ӂувап етти оннара: «Хербир расат, ани диил койулу Беним Гӧктеки Бобамдан, кӧктӓн йолунаӂэк.

¹⁴Бракын оннары, оннар кӧӧрларын кӧӧр гӱдӱӂӱлери. Ачан бир кӧӧр гӱдер башка кӧӧру, оннар икиси дӓ чукур ичинӓ дӱшерлӓр».

¹⁵Петри лафетти да Она деди: «Ачыкла бизӓ бу ӧрнӓӓ».

¹⁶Иисус деди: «Не, сиз дӓ ми ӧлӓ зор аннээрсыныз?

¹⁷Аннамээрсыныз мы, ани не гирер адамын аазындан, гирер шкембесинӓ, сора дышары уурадылэр?

¹⁸Ама не адамын аазындан чыкэр, о ӱректӓн гелер. Те бу мындарлээр адамы.

¹⁹Зерӓ ӱректӓн чыкэр фена неетлӓр, ӧлдӱрмӓк, ороспулук, хайырсызлык, хырсызлык, йаланӂылык, кӧтӱлемӓк.

²⁰Тӓ не адамы мындарлээр, ама йыканмадык еллӓн имӓӓ адамы мындарламаз».

²¹Иисус гитти орадан, узакланды Тир хем Сидон ерлеринӓ.

²²Тӓ бир кары ханаанныйка гелди Она да башлады баармаа: «Аӂы бени, Сааби, Давидин Оолу! Беним кызым титси зеетленер бир фена духтан».

²³Иисус ӂувап етмеди бир дӓ лаф. Озаман Онун ӱӱрениӂилери йаклаштылар Она да йалвардылар: «Салвер ону, зерӓ баарэр бизим ардымыза».

²⁴Иисус ӂувап етти: «Бӓн йолланмышым салт Израил миллетин кайып койуннарына».

²⁵Ама бу кары гелди, баш иилтти да деди: «Сааби, йардым ет бана!»

²⁶Иисус она ӂувап етти: «Диил ислӓӓ алмаа екмӓӓ ушаклардан да атмаа кӧпеклерӓ».

²⁷«Ӧлӓ, Сааби, ама кӧпеклӓр дӓ ийерлӓр кырынтылары, ани дӱшер чорбаӂыларынын софрасындан», — деди бу кары.

²⁸Озаман Иисус ӂувап етти: «О, кары, бӱӱктӱр сенин инанын. Олсун, ниӂӓ сӓн истеерсин». Бирдӓн онун кызы алышты.

²⁹Иисус айырылды орадан да гитти Галилейайа, гӧлӱн йанына. Пинди бир байыр ӱстӱнӓ да отурду орада.

³⁰Чок инсан гелди Она орайы. Гетирдилӓр кендилериннӓн топаллары, кӧӧрлары, мутулары, сакатлары хем чок башка хасталары, койдулар оннары Онун айакларына, да О оннары алыштырды.

³¹Инсан шашарды, гӧрӱп ани мутулар лафедерлӓр, сакатлар алышэрлар, топаллар гезерлӓр, кӧӧрлар гӧрерлӓр. Онуштан метиннӓрдилӓр Израилин Аллахыны.

³²Иисус топлады ӱӱрениӂилерини да деди: «Ӂаным аӂыйэр бу инсана, зерӓ ӱч гӱн дурэрлар йанымда да йок не исиннӓр. Истӓмеерим оннары салверейим аач, аники байылмасыннар йолда».

³³Ӱӱрениӂилери дедилӓр: «Нередӓн алалым букадар екмек бу чол ердӓ да дойуралым букадар инсан?»

³⁴«Кач екмеениз вар?» — сорду Иисус. «Еди екмек хем биркач балык», — ӂувап еттилӓр оннар.

³⁵Озаман Иисус сымарлады инсана, отурсуннар ерӓ.

³⁶Алды еди екмӓӓ хем балыклары, шӱкӱр етти Аллаха, сора кырып верди ӱӱрениӂилеринӓ. Оннар да пайеттилӓр инсана.

³⁷Хепси идилӓр да дойундулар. Сора топладылар имӓк парчаларыны, еди сепет долу.

³⁸Оннар, ани идилӓр, варды бир дӧрт бин адам, карылардан хем ушаклардан каарӓ.

³⁹Сонда Иисус бракты инсаны гитсиннӓр, Кендиси гирди кайык ичинӓ да гечти Магдала [12] ерлеринӓ.