Read Tungag ИИ ХАБЕР МАТФЕЙДӒН 20 Bible Online

ИИ ХАБЕР МАТФЕЙДӒН 20 - Tungag bible

ИИ ХАБЕР МАТФЕЙДӒН 20

¹Зерӓ Гӧк Падишахлыы бензеер бир чорбаӂы адама, ани чин сабаалӓн чыкты, кенди баасына ишчи тутсун.

²Ишчилӓрлӓн аннашты, ӧдесин бирӓр динар гӱндӓ, сора йоллады оннары кенди баасына.

³Чыкып бир ӱчӱнӂӱ саатта [18], башка хайлак дураннары гӧрдӱ мейданда.

⁴Сора деди оннара: „Сиз дӓ гидин беним баайымда ишлемӓӓ. Не дӱшер, ӧдейеӂӓм сизӓ“. Оннар гиттилӓр.

⁵Енидӓн чыкты бир алтынӂы хем докузунӂу [19] саатта, хеп ӧлӓ йапты.

⁶Биткидӓ, онбиринӂи [20] саада йакын, булду башка хайлак дураннары да деди оннара: „Нечин бурада бӱтӱн гӱн хайлак дурэрсыныз?“

⁷Оннар ӂувап еттилӓр: „Чӱнкӱ бизи кимсей ишӓ алмады“. О деди: „Сиз дӓ гидин беним баайыма /да не дӱшер кабледеӂениз/“.

⁸Авшамнен баайын чорбаӂысы деди кенди хазнатарына: „Чаар ишчилери да ӧдӓ, чекедип биткилериндӓн илкинкилеринӓдӓн“.

⁹Оннар, ани гиттилӓр ишӓ онбиринӂи саатта, гелип каблеттилӓр бирӓр динар.

¹⁰Илкинкилери, гелдийнӓн, есап еттилӓр, ани кабледеӂеклӓр таа чок. Ама оннар да каблеттилӓр хеп бирӓр динар.

¹¹Ачан каблеттилӓр парайы, башладылар баайын чорбаӂысына каршы мырылданмаа.

¹²Да дейӓрдилӓр: „Сонда оланнар ишледилӓр саде бир саат, ама ӧдеклӓн сӓн йаптын оннары бизимнӓн бир. Биз са гечирдик бӱтӱн гӱнӱн кызгынныын аарлыыны“.

¹³Чорбаӂы оннарын бирисинӓ ӂувап етти: „Достум, бӓн сени хич йаландырмадым. Аннашмадын мы бенимнӓн бир динара?

¹⁴Ал, не сенин, да гит. Бӓн истеерим бу сондакы инсана да ӧдейим хеп ӧлӓ, ниӂӓ сана.

¹⁵Доорулуум йок му кенди парамнан йапайым, не истеерим? Оса сӓн кысканэрсын, ани бӓн ии ӱреклийим?“

¹⁶Ӧлӓ ки, сондакылар илк олаӂэк, илклӓр да битки олаӂэк. /Зерӓ чок чаарылмыш, ама аз сечилмиш/».

¹⁷Ачан гидӓрдилӓр Иерусалимӓ, Иисус йолда алды бир тарафа оники ӱӱрениӂисини да деди оннара:

¹⁸«Тӓ, биз гидериз Иерусалимӓ. Адам Оолу верилеӂек бӱӱк попазларын хем билгичлерин елинӓ. Она даава кесилеӂек ӧлӱмӓ,

¹⁹да Ону йабанӂыларын елинӓ вереӂеклӓр, ки гӱлмӓӓ алсыннар, камчыйлан дӱӱсӱннӓр да ставроза герсиннӓр, ама О ӱчӱнӂӱ гӱнӱ дирилеӂек».

²⁰Озаман Зеведейин оолларын аналары йаклашты Иисуса оолларыннан барабар, баш иилтти да несӓ йалварарды Она.

²¹Иисус сорду: «Не истеерсин?» «Сымарла, ки Сенин Падишахлыында беним бу ики оолум отурсуннар бириси Сенин саа тарафында, бириси дӓ сол тарафында», — ӂувап етти бу ана.

²²Озаман Иисус деди: «Билмеерсиниз, не истеерсиниз. Вар мы ниӂӓ сиз ичӓсиниз о чӧлмектӓн, ани Бӓн ичеӂӓм /хем ваатиз оласыныз о ваатизликлӓн, ани Бӓн олаӂам/?» «Вар ниӂӓ», — ӂувап етти оннар.

²³Иисус деди: «Хакына, ани ичеӂениз Беним чӧлмеемдӓн /хем ваатиз олаӂэныз о ваатизликлӓн, ани Бӓн олэрым/. Ама Бендӓн тутунмээр, изин верейим отурмаа саа еки сол тарафымда. Бу верилеӂек оннара, кимӓ хазырланмыш Бобамдан».

²⁴Калан он ӱӱрениӂилӓр, ишидип буну, ӱфкелендилӓр бу ики кардаша.

²⁵Иисус чаарды оннары да деди: «Билерсиниз, ани миллетлерин ӧндерӂилери чорбаӂылык едерлӓр оннарын ӱстӱнӓ хем бӱӱклери заабитлик едерлӓр.

²⁶Ама сизин аранызда бӧлӓ олмасын. Ким сиздӓн истеер бӱӱк олсун, о изметкӓр олсун каланына.

²⁷Ким сиздӓн истеер илк олсун, о чырак олсун ӧбӱрлерӓ.

²⁸Зерӓ Адам Оолу гелмеди, ки Она измет етсиннӓр, ама Кенди измет етсин инсана хем версин йашамасыны чойун еринӓ, ки куртарабилсин оннары».

²⁹Ачан чыкардылар Иерихон касабасындан, чок инсан гитти Иисусун ардына.

³⁰Тӓ, йол бойунда отурарды ики кӧӧр адам. Оннар ачан ишиттилӓр, ани Иисус гечер орадан, башладылар баармаа: «Сааби, Давидин Оолу, аӂы бизи!»

³¹Инсан таказалады оннары, суссуннар дейни, ама оннар таа пек баарардылар: «Сааби, Давидин Оолу, аӂы бизи!»

³²Иисус дургунду, чаарды оннары да сорду: «Не истеерсиниз йапайым сизӓ?»

³³«Сааби, ачылсын гӧзлеримиз!» — деди оннар.

³⁴Иисусун ӂаны аӂыды, да дииди оннарын гӧзлеринӓ. Кӧӧр оланнар чабук гӧрмӓк едендилӓр. Оннар гиттилӓр Онун ардына.