Read Tungag ИИ ХАБЕР МАТФЕЙДӒН 21 Bible Online

ИИ ХАБЕР МАТФЕЙДӒН 21 - Tungag bible

ИИ ХАБЕР МАТФЕЙДӒН 21

¹Ачан йаклаштылар Иерусалимӓ да етиштилӓр Виффагийа кӱӱйӱнӓ, Зейтин байырын йанына, Иисус йоллады ики ӱӱрениӂисини

²да деди оннара: «Гидин ӧндеки кӱӱйӓ, да гириркӓн кӱӱ ичинӓ, хемен булаӂэныз баалы бир ешек, кодуу да йанында. Чӧзӱн да гетирин Бана.

³Еер биркимсей сорарсайды бишей сизӓ, ӂувап един, ани оннар лӓӓзым Саабийӓ, сора хемен геери йоллайаӂэк».

⁴Хепси буннар олду, таманнансын дейни, не хаберленмишти пророктан, ани деер:

⁵«Сӧлейин Сионун кызына [21]: „Сенин Падишахын сана гелер, йаваш, атлы бир ешек ӱстӱндӓ, ешӓӓн кодуу ӱстӱндӓ“».

⁶Ӱӱрениӂилӓр гиттилӓр да йаптылар, ниӂӓ Иисус деди.

⁷Гетирдилӓр ешӓӓ хем кодуу, дӧшедилӓр кенди рубаларыны оннарын ӱстӱнӓ, да сора О атлы пинди кодуун ӱстӱнӓ.

⁸Инсандан чойу дӧшӓрдилӓр рубаларыны йол ӱстӱнӓ, башкалары кесӓрдилӓр аачлардан даллары да йол ӱстӱнӓ серӓрдилӓр.

⁹Инсан, ани гидӓрди ӧнӱ сора хем арды сора баарарды: «Осанна [22], Давидин Оолу! Иисӧзленмиш олсун, Саабинин адына Гелӓн! Осанна ӱӱсек гӧклердӓ!»

¹⁰Ачан Иисус гирди Иерусалим ичинӓ, бӱтӱн касаба кайнамаа башлады. Хепси сорардылар: «Кимдир Бу?»

¹¹«Иисус, пророк Галилейадан, Назарет касабасындан», — ӂувап едӓрди башкалары.

¹²Иисус гирди Айоз бина аулуна да коолады орадан хепсини, ким сатарды хем аларды, девирди пара дииштиреннерин масаларыны хем гугуш сатаннарын скемнелерини.

¹³Да деди оннара: «Вар йазылы: „Беним евимӓ денеӂек дуа еви“. Ама сиз чевирдиниз ону хайдут ининӓ».

¹⁴Гелди Она кӧӧрлар хем топаллар, да О алыштырды оннары.

¹⁵Бӱӱк попазлар хем билгичлӓр, гӧрӱп мераклы ишлери, ани О йапарды, хем ушаклары баараркан Айоз бинада: «Осанна, Давидин Оолу!», ӱфкелендилӓр.

¹⁶«Ишидерсин ми, не деерлӓр?» — сордулар Иисуса. «Елбетки, — ӂувап етти Иисус. — Аӂаба, сиз хич окумадыныз мы: „Ушакларын хем мемедӓ евлатларын аазындан Сӓн метинник чыкардын?“»

¹⁷Сора бракты оннары да, чыкып касабадан, йолланды Вифанийа кӱӱйӱнӓ да орада геӂеледи.

¹⁸Сабаалӓн, дӧнерӓк касабайа, Иисус аӂыкты.

¹⁹Йол бойунда гӧрдӱ бир инӂир фиданы. Йаклашып она, йапраклардан каарӓ бишей булмады да деди: «Бӱӱндӓн ӧтӓӓ хич мейва йапмайасын!» Инӂир фиданы осаат куруду.

²⁰Ачан ӱӱрениӂилӓр гӧрдӱлӓр буну, шаштылар: «Насыл бу инӂир фиданы бӧлӓ тез куруду?»

²¹Иисус оннара ӂувап етти: «Доору сӧлеерим сизӓ, еер инаныныз олайды хем икилӓмейдиниз, сиз йапаӂэйдыныз диил салт буну, не бу фиданнан олду, ама дейеӂейдиниз бу байыра: „Калк да атыл дениз ичинӓ“, — о да олаӂэйды.

²²Инаннан дуа едӓрсейдиниз, не дӓ истейеӂениз, кабледеӂениз».

²³Иисус гирди Айоз бина аулуна, да, ачан ӱӱредӓрди инсаны, гелдилӓр бӱӱк попазлар хем халк аксакаллары да дедилӓр Она: «Не заабитликлӓн йапэрсын бу ишлери, хем ким верди Сана бу заабитлии?»

²⁴Иисус ӂувап етти оннара: «Койаӂам Бӓн дӓ сизӓ бир соруш. Ӂувап един Бана, сора Бӓн дӓ сизӓ сӧлейеӂӓм, не заабитликлӓн йапэрым бу ишлери.

²⁵Иоанын ваатизлии нередӓн? Гӧктӓн ми оса инсандан мы?» Оннар бири-бириннӓн лафедӓрдилӓр: «Еер дейӓрсӓк: „Гӧктӓн“, О дейеӂек: „Ӧлейсӓ, нечин она инанмадыныз?“

²⁶Ама дейӓрсейдик: „Инсандан“, — коркэрыз халктан, зерӓ хепси инанэр, ани Иоан пророк».

²⁷Онуштан ӂувап еттилӓр Иисуса: «Билмеериз». О да деди оннара: «Бӓн дӓ сизӓ сӧлӓмейеӂӓм, не заабитликлӓн йапэрым бу ишлери.

²⁸Несой аннээрсыныз? Бир адамын варды ики оолу. О гитти илкинкисинӓ да деди: „Оолум, гит бӱӱн да ишлӓ беним баайымда“.

²⁹Ама оолу ӂувап етти: „Истӓмеерим“, ама сора пишман олду да гитти.

³⁰Сора йаклашты икинӂисинӓ да хеп бӧлӓ деди. Бу оол ӂувап етти: „Гидерим, чорбаӂы!“, ама гитмеди.

³¹Ангысы оннардан таманнады бобанын истедиини?» «Илкинкиси», — ӂувап етти оннар. Иисус деди оннара: «Доору сӧлеерим сизӓ, ани харччылар хем маскаралар [23] сизин ӧнӱнӱз сора гидерлӓр Гӧк Падишахлыына.

³²Зерӓ Иоан гелди, доорулук йолуну гӧстерсин. Сиз ону инанмадыныз, ама харччылар хем маскаралар инандылар. Сиз гӧрдӱнӱз буну, ама хеп окадар пишман олмадыныз гӱнахларыныздан хем инанмадыныз.

³³Сеслейин бир башка ӧрнек. Варды бир ев чорбаӂысы, ангысы койду бир баа, долайлады ауллан, ортада казды ер ӱзӱм тӓскасы ичин, йывды бир бекчи кӱлеси, сора, баайы верип бааӂылара, гитти башка мемлекетӓ.

³⁴Ачан гелди ӱзӱм вакыды, йоллады кенди чыракларыны бааӂылара, ки алсыннар берекедини.

³⁵Бааӂылар туттулар онун чыракларыны, бирисини дӱӱдӱлӓр, икинӂисини ӧлдӱрдӱлӓр, таа башкасыны ташладылар.

³⁶Сора чорбаӂы йоллады башка чыраклары, таа чоклук, некадар илкин. Бааӂылар оннарлан йаптылар хеп ӧлӓ, ниӂӓ илкинкилӓрлӓн.

³⁷Сонда йоллады оннара кенди оолуну да деди: „Оолуму кабледирлӓр икрамнан“.

³⁸Ама бааӂылар, ачан гӧрдӱлӓр оолуну, дедилӓр бири-биринӓ: „Тӓ чорбаӂынын оолу, хайди ӧлдӱрелим ону, да баа бизӓ калаӂэк“.

³⁹Туттулар ону, чыкардылар баадан бир тарафа да ӧлдӱрдӱлӓр.

⁴⁰Шинди, ачан гелеӂек баайын чорбаӂысы, не йапаӂэк бу бааӂыларлан?»

⁴¹Оннар ӂувап еттилӓр: «Бу хайырсызлары, зеетлейип, ӧлдӱреӂек. Баайы башка бааӂылара вереӂек, ангылары вакыдында она берекедини вереӂеклӓр».

⁴²Иисус деди оннара: «Не, окумадыныз мы Айоз Йазыда: „Таш, ани усталар сыбытты, сонда етишти кӧшӓ ташы олсун. Бу — Саабидӓн, хем пек шашмаклы иш бизим ичин!“

⁴³Онуштан деерим сизӓ, ани Аллахын Падишахлыы сиздӓн алынаӂэк да башка миллетӓ баашланаӂэк, ани вакыдында мейвасыны вереӂек.

⁴⁴Ким дӱшеӂек бу таш ӱстӱнӓ, езилеӂек. Ама кимин ӱстӱнӓ таш дӱшеӂек, ону туз-буз йапаӂэк».

⁴⁵Иисусун ӧрнеклерини сеследиктӓн сора, бӱӱк попазлар хем фарисейлӓр аннадылар, ани лаф гитти оннар ичин.

⁴⁶Оннар аарардылар Ону тутсуннар, ама коркардылар инсандан, зерӓ инсан сайарды Ону пророк.