Read Tungag ИИ ХАБЕР МАТФЕЙДӒН 28 Bible Online

ИИ ХАБЕР МАТФЕЙДӒН 28 - Tungag bible

ИИ ХАБЕР МАТФЕЙДӒН 28

¹Ӂумертеси гечтиктӓн сора, ачан айдыннанырды хафтанын илк гӱнӱ [33], Марийа Магдалина хем ӧбӱр Марийа гелдилӓр гӧрмӓӓ мезары.

²Бирдӓн олду бир бӱӱк ер тепремеси, зерӓ бир ангил Саабидӓн инди гӧктӓн да, гелип, девирди ташы мезарын аазындан да отурду таш ӱстӱнӓ.

³Онун гӧрӱмӱ чимчирик гибийди. Рубалары бийазды ниӂӓ каар.

⁴Бекчилӓр коркудан титиредилӓр да ӧлӱ гиби ерӓ дӱштӱлӓр.

⁵Ангил деди карылара: «Коркмайын, зерӓ билерим, ани аарээрсыныз ставроза герилмиш Иисусу.

⁶О йок бурада, О дирилди, ниӂӓ сӧледийди. Гелин, гӧрӱн ерини, нередӓ Сааби койулуйду.

⁷Да хызлы гидин, сӧлейин Онун ӱӱрениӂилеринӓ, ани О дирилди ӧлӱдӓн. О гидер сиздӓн ӧнӂӓ Галилейайа. Орада гӧреӂениз Ону. Тӓ бӓн сизӓ сӧледим».

⁸Оннар хызлы чыктылар мезар ичиндӓн коркуйлан хем бӱӱк севинмӓклӓн, качарак гиттилӓр, хабер версиннӓр ӱӱрениӂилеринӓ.

⁹Ама ачан гидӓрдилӓр, сӧлесиннӓр ӱӱрениӂилеринӓ, тӓ, Кенди Иисус каршы чыкэр оннара да деер: «Селӓм!» Оннар йаклаштылар, сармаштылар айакларына да баш иилттилӓр Она.

¹⁰Озаман Иисус деди оннара: «Коркмайын, гидин да сӧлейин кардашларыма, гитсиннӓр Галилейайа. Орада Бени гӧреӂеклӓр».

¹¹Ачан оннар гидӓрдилӓр, кимиси бекчилердӓн гирдилӓр касаба ичинӓ да сӧледилӓр хепси бу олушлар ичин бӱӱк попазлара.

¹²Буннар топландылар аксакалларлан бирери да, аннашып, вердилӓр чок пара бекчилерӓ,

¹³дейип оннара: «Сӧлейин бӧлӓ: „Онун ӱӱрениӂилери гелдилӓр геӂӓ, да биз уйуйаркан чалдылар Онун гӱӱдесини“.

¹⁴Бу хабер етишӓрсейди кулланыӂынын кулаана, биз ону инандыраӂэз, да сизи беладан куртараӂэз».

¹⁵Аскерлӓр алдылар парайы да йаптылар ӧлӓ, ниӂӓ оннары ӱӱреттилӓр. Иудейлерин арасында бу хабер даалды да етишти бӱӱнкӱ гӱнӓ кадар.

¹⁶Онбир ӱӱрениӂи гиттилӓр Галилейайа байырын ӱстӱнӓ, нерейи Иисус сымарладыйды.

¹⁷Гӧрдӱлӓр Ону да баш иилттилӓр Она, ама кимиси шӱпели калды.

¹⁸Иисус, йаклашып оннара, деди: «Бана бӱтӱн заабитлик верилди гӧктӓ хем ердӓ.

¹⁹Гидин да хепси миллетлери Бана ӱӱрениӂи йапын, ваатиз едип оннары Бобанын хем Оолун хем Айоз Духун адына.

²⁰Ӱӱредин, хепсини таманнасыннар, не сизӓ сымарладым. Да билиниз, Бӓн олаӂам сизиннӓн хер гӱн, заманын биткисинӓдӓн». /Амин./