Read Tungag ИИ ХАБЕР МАТФЕЙДӒН 5 Bible Online

ИИ ХАБЕР МАТФЕЙДӒН 5 - Tungag bible

ИИ ХАБЕР МАТФЕЙДӒН 5

¹Иисус ачан гӧрдӱ инсаны, пинди байыр ӱстӱнӓ да, отурдуктан сора, Она йаклаштылар Онун ӱӱрениӂилери.

²О сора башлады лафетмӓӓ да бутӱрлӱ ӱӱретмӓӓ:

³«Мутлу духлан фукаара оланнара, зерӓ Аллахын Падишахлыы оннарын олаӂэк!

⁴Мутлу аалайаннара, зерӓ оннар иилендирилеӂек!

⁵Мутлу йаваш оланнара, зерӓ оннар ерин мирасчылары олаӂэк!

⁶Мутлу аач хем сусуз оланнара доорулук ичин, зерӓ оннар дойунаӂэк!

⁷Мутлу аӂыйаннара, зерӓ оннар аӂыйанылмыш олаӂэк!

⁸Мутлу темиз ӱреклилерӓ, зерӓ оннар Аллахы гӧреӂек!

⁹Мутлу барыштырыӂылара, зерӓ оннара денеӂек Аллахын ооллары!

¹⁰Мутлу доорулук ичин кооланмыш оланнара, зерӓ Гӧк Падишахлыы оннарын олаӂэк!

¹¹Мутлу сизӓ, ачан сизи инсан фена лафедер хем коолээр хем хертӱрлӱ йалан лафларлан Беним ичин кӧтӱлеер!

¹²Севинин хем шенненин, зерӓ бӱӱктӱр сизин ӧдеениз гӧклердӓ. Хеп ӧлӓ коолардылар пророклары, сиздӓн илери.

¹³Сизсиниз ерин тузу. Ама еер туз кайбедӓрсейди дадыны, несой вар насыл ону енидӓн тузлу йапмаа? Озаман бишей ичин йарамаз. Калэр саде атылсын дышары, ки инсан ону айаклан чиинесин.

¹⁴Сизсиниз — дӱннейин айдынныы. Касаба, ани дурэр байыр ӱстӱндӓ, йок насыл саклансын.

¹⁵Инсан тутуштурмээр шафкы, ки койсун ону бир кап алтына, ама койэрлар кандиллик ӱстӱнӓ, ки айдыннык етсин хепсинӓ, ким ичердӓ.

¹⁶Хеп ӧлӓ шафк етсин сизин дӓ айдынныыныз инсанын ӧнӱндӓ, ки оннар, гӧрӱп ии ишлеринизи, метиннесиннӓр сизин Гӧктеки Бобанызы.

¹⁷Санмайасыныз, ани Бӓн гелдим йок етмӓӓ Айоз Закону еки пророклары. Гелмедим йок едейим, ама таманнайым.

¹⁸Зерӓ доору сӧлеерим сизӓ: окадар вакыт, некадар гӧк хем ер гечмейеӂек, гечмейеӂек бир дӓ нокта, бир дӓ чизги Закондан, хепси таманнанмайынӂа.

¹⁹Ӧлӓ ки, ким буннардан ен кӱчӱк сымарламайы басаӂэк да ӧлӓ башкасыны да ӱӱредеӂек, она денеӂек ен кӱчӱк Гӧк Падишахлыында. Ама хепси, ким таманнайаӂэк хем башкасыны да ӧлӓ ӱӱредеӂек, она ен бӱӱк Гӧк Падишахлыында денеӂек.

²⁰Зерӓ сизӓ сӧлеерим: еер сизин доорулуунуз гечмӓрсейди билгичлерин хем фарисейлерин доорулукларыны, озаман хич биртӱрлӱ билӓ гирмейеӂениз Гӧк Падишахлыына.

²¹Ишиттиниз, ани евел вакыттан инсаннара сӧленди: „Ӧлдӱрмейӓсин. Херкез, ким ӧлдӱреӂек, дааваланмыш олаӂэк“.

²²Ама Бӓн деерим сизӓ, ани херкез, ким ӱфкеленер кардашына, даавалы олаӂэк. Ким деер кардашына: „Рака“ [3], Синедриондан [4] дааваланаӂэк, ама ким деер: „Ахмак“, дааваланаӂэк атештӓ йанмаа ӂендемдӓ.

²³Ӧлӓ ки, ачан сӓн курбаннаа гетирерсин баашышыны да орада аклына гетирӓрсейдин, ани сенин кардашын кӱсӱлӱ сана,

²⁴брак курбанныын ӧнӱндӓ баашышыны, илкин гит да барыш кардашыннан, сора гел да гетир баашышыны.

²⁵Аннаш сенин каршы дураныннан некадар тез, онуннан таа йолда булунаркан, ки каршы дуранын вермесин сени дааваӂынын елинӓ, дааваӂы да зынданӂыйа, да капамасыннар сени биртӱрлӱ зындана.

²⁶Доору сӧлеерим сана, ани чыкамайаӂан орадан, ӧдӓмейинӂӓ битки кодранты [5].

²⁷Ишиттиниз, не сӧленди /евел вакыттан инсаннара/: „Ороспулук йапмайасын“.

²⁸Ама Бӓн деерим сизӓ: ким бакэр бир карыйа майыллыклан, артык ӱреендӓ ороспулук йапэр онуннан.

²⁹Еер саа гӧзӱн гӱнаха дӱшӱрӓрсӓ сени, чыкар ону да сыбыт. Таа ислӓӓ кайбедӓсин бир ек гӱӱдендӓн, некадар бӱтӱн гӱӱдӓннӓн ӂендемӓ атыласын.

³⁰Еер саа елин гӱнаха дӱшӱрӓрсӓ сени, кес ону да сыбыт. Таа ислӓӓ кайбедӓсин бир ек гӱӱдендӓн, некадар бӱтӱн гӱӱдӓннӓн ӂендемӓ гидӓсин.

³¹Хеп ӧлӓ сӧленмиш: „Херкез, ким айырылэр карысындан, она айырылмак кийады версин“.

³²Ама Бӓн деерим: херкез, ким айырылэр карысындан хайырсызлыктан башка бетерӓ, верер колайлык она ороспулук йапсын. Хем херкез, ким евленер коӂасындан айырылмыш карыйа, ороспулук йапэр.

³³Хеп ӧлӓ ишиттиниз, не сӧленди евел вакыттан инсаннара: „Йалан емин етмейӓсин, ама таманнайасын Аллахын ӧнӱндӓ, не емин еттин“.

³⁴Ама Бӓн сизӓ деерим: хич емин етмейин, не гӧклӓн, зерӓ о Аллахын чорбаӂылык скемнеси,

³⁵не ерлӓн, зерӓ о Аллахын айак скемнеси, не дӓ Иерусалимнӓн, зерӓ о бӱӱк Падишахын касабасы.

³⁶Емин етмӓ кенди башына, зерӓ йапамээрсын бир дӓ сачыны кара йада бийаз.

³⁷Ко олсун сизин лафыныз: „Еер ӧлӓйсӓ — ӧлӓ. Еер олмазса — олмаз“. Не буннардан зеедӓ, о йарамаздан гелер.

³⁸Ишиттиниз, не сӧленди: „Гӧз — гӧз ичин, диш — диш ичин“.

³⁹Ама Бӓн сизӓ деерим: дурмайын каршы фена йапаннара, ама ким урэр сенин саа йанаана, чевир она сол йанааны да.

⁴⁰Ким сениннӓн даавалашмаа истеер, ки алсын гӧлмеени, вер она ӱст рубаны да.

⁴¹Зорларсайды биркимсей сени, гидӓсин онуннан бин адым, гит ики бин.

⁴²Ким истеер сендӓн, вер она. Дӧнмӓ арканы она, ким истеер ӧдӱнч сендӓн.

⁴³Ишиттиниз, не сӧленди: „Севӓсин йакын оланыны, ама душманындан азетмейӓсин“.

⁴⁴Ама Бӓн сизӓ деерим: душманнарынызы севин, /бетва еденнери иисӧзлейин. Йапын иилик оннара, ким азетмеер сиздӓн,/ дуа един оннар ичин, ким /гӱӂендирер хем/ коолээр сизи,

⁴⁵Гӧктеки Бобанын ооллары оласыныз дейни. Зерӓ О йапэр, ки гӱн дуусун ниӂӓ ии оланнара, хеп ӧлӓ фена оланнара да. Верер йаамур доору оланнара, хеп ӧлӓ кӧтӱ оланнара да.

⁴⁶Еер севӓрсейдиниз салт оннары, ким сизи север, не ӧдек беклеерсиниз? Йапмээр мы буну харччылар да?

⁴⁷Еер селӓм верӓрсейдиниз саде кенди кардашларыныза, не ӱстӱн иш йапэрсыныз? Аӂаба тайфӓннар [6] да хеп бӧлӓ йапмээрлар мы?

⁴⁸Онуштан, олун таман, ниӂӓ сизин Гӧктеки Бобаныз таман.