Read Tungag ИИ ХАБЕР МАТФЕЙДӒН 7 Bible Online

ИИ ХАБЕР МАТФЕЙДӒН 7 - Tungag bible

ИИ ХАБЕР МАТФЕЙДӒН 7

¹Даава кесмейин, да Аллах сизӓ даава кесмейеӂек.

²Не даавайлан даавалайаӂэныз, о даавайлан дааваланмыш олаӂэныз. Не ӧлчӱйлӓн ӧлчеӂениз, о ӧлчӱйлӓн Аллахтан ӧлчӱлмӱш олаӂэныз.

³Нечин гӧрерсин кыймыы сенин кардашынын гӧзӱндӓ, ама кенди гӧзӱндӓ казыы есап алмээрсын?

⁴Несой вар насыл сӓн дейӓсин кардашына: „Брак чыкарайым кыймыы сенин гӧзӱндӓн“, ачан кенди гӧзӱндӓ казык дурэр?

⁵Икиӱзлӱ, илкин чыкар казыы кенди гӧзӱндӓн да сора ачык гӧреӂӓн, несой чыкармаа кыймыы кардашынын гӧзӱндӓн.

⁶Вермейин кӧпеклерӓ айоз ишлери. Атмайын седефлеринизи домузлар ӧнӱнӓ, ки чиинӓмесиннӓр оннары, сора дӧнӱп, сизи параламасыннар.

⁷Истейин, да сизӓ верилеӂек; аарайын, да булаӂэныз; урун, да ачылаӂэк.

⁸Зерӓ ким истеер — еденер, ким аарээр — булэр, хем ким урэр — она ачылэр.

⁹Ким сизин араныздан, оолу екмек истӓрсӓ, верер она таш?

¹⁰Еки балык истӓрсӓ, верер она йылан?

¹¹Еер сиз, ани фенайсыныз, билирсениз ушакларыныза ии баашышлар вермӓӓ, некадар таа чок сизин Гӧктеки Бобаныз вереӂек ии ишлӓр оннара, ким Ондан истейеӂек!

¹²Несой истеерсиниз, инсан сизиннӓн гӧтӱрсӱн кендини, ӧлӓ гӧтӱрӱнӱз сиз дӓ кендинизи инсаннан. Бундан тутунэр Закон хем пророклар.

¹³Гирин дар токаттан, зерӓ геништир токат хем мейданныдыр йол, ани кайыплаа гӧтӱрер, да чок инсан ондан гидер.

¹⁴Ама дардыр токат хем сыкынчтыр йол, ани йашамайа гӧтӱрер, хем аз инсан ону булур.

¹⁵Корунун йаланӂы пророклардан. Оннар гелерлӓр сизӓ гиийимни койун дерисиннӓн, ама ичйандан паралайан йабанылар.

¹⁶Оннары таныйаӂэныз оннарын мейваларындан. Аӂаба топлээрлар мы ӱзӱм салкымы тикенни гӱмедӓн еки инӂир чӧкелектӓн?

¹⁷Ӧлӓ ки, хербир ии фидан йапэр ии мейва, ама йабан фиданы йапэр йабан мейвасы.

¹⁸Ии фидан йок насыл йапсын йабан мейвасы. Хеп ӧлӓ йабан фиданы да йок насыл йапсын ии мейва.

¹⁹Хербир фидан, ани йапмээр ии мейва, кесилер да атешӓ атылэр.

²⁰Ӧлӓ ки, мейваларындан таныйаӂэныз оннары.

²¹Диил оннар, ким Бана деер „Сааби, Сааби!“, гиреӂек Гӧк Падишахлыына, ама оннар, ким таманнээр Беним Гӧктеки Бобамын истедиини.

²²Чойу о гӱнӱ Бана дейеӂеклӓр: „Сааби, Сааби! Пророклук етмедик ми биз Сенин адыннан? Сенин адыннан чыкармадык мы биз фена духлары? Йапмадык мы Сенин адыннан чок кудретли ишлӓр?“

²³Озаман ачык ӂувап едеӂӓм оннара: „Бир сыра билӓ сизи танымадым, хепсиниз Бендӓн узакланын, ким законсузлукта йашады!“

²⁴Онуштан херкези, ким ишидер Беним сӧзлерими дӓ таманнээр, бензедеӂӓм аариф адама, ангысы йапты евини таш ӱстӱндӓ.

²⁵Йаады йаамур, акты селлӓр, ести лӱзгерлӓр, евин ӱстӱнӓ ӱӱштӱлӓр, ама ев йыкылмады, зерӓ темели таш ӱстӱндӓ койулуйду.

²⁶Ама ким ишидер Беним бу сӧзлерими дӓ таманнамээр, бензӓр фикирсиз адама, ани йапты евини кум ӱстӱндӓ.

²⁷Йаамур йаады, селлӓр акты, лӱзгӓр ести да евин ӱстӱнӓ ӱӱштӱлӓр. Ев йыкылды, да бир бӱӱк йыкынтылык олду».

²⁸Иисус лафеттиктӓн сора, инсан шашарды Онун ӱӱретмесинӓ.

²⁹Зерӓ Иисус ӱӱредӓрди оннары ниӂӓ бир адам, ангысында вар заабитлик, диил, ниӂӓ оннарын билгичлери /хем фарисейлӓр/.