Read Tungag ИИ ХАБЕР МАРКТАН 11 Bible Online

ИИ ХАБЕР МАРКТАН 11 - Tungag bible

ИИ ХАБЕР МАРКТАН 11

¹Ачан йаклаштылар Иерусалимӓ, Виффагийа хем Вифанийа кӱӱлеринӓ, ани Зейтин байырын йанында, Иисус йоллады икисини ӱӱрениӂилериндӓн

²да деди оннара: «Гидин ӧндеки кӱӱйӓ. Ачан гиреӂениз кӱӱ ичинӓ, хемен булаӂэныз бир ешеӂик баалы, ангысына таа кимсей атлы пинмеди. Чӧзӱн ону да гетирин Бана.

³Еер биркимсей сорарсайды: „Нечин буну йапэрсыныз?“ — ӂувап един: „О лӓӓзым Саабийӓ, сора хемен геери йоллайаӂэк“».

⁴Ӱӱрениӂилӓр гиттилӓр, булдулар ешеӂии, баалы сокакта, бир евин дышанда токат йанында, да чӧздӱлӓр ону.

⁵Кимиси орада дураннардан дедилӓр: «Не йапэрсыныз, нечин ешӓӓ чӧзерсиниз?»

⁶Оннар ӂувап еттилӓр, ниӂӓ Иисус ӱӱретти, да оннары брактылар.

⁷Иисуса ешеӂии гетирдилӓр, кенди ӱстӱнкӱ рубаларыны ӱстӱнӓ дӧшедилӓр, да Иисус атлы пинди.

⁸Чойу инсандан рубаларыны йол ӱстӱнӓ дӧшӓрдилӓр, башкалары даллары серӓрдилӓр, ани кырда аачлардан кесӓрдилӓр.

⁹Иисусун ӧнӱндӓ хем ардында гиденнӓр баарардылар: «Осанна [8]! Иисӧзленмиш олсун Саабинин адына Гелӓн!

¹⁰Иисӧзленсин бобамызын, Давидин падишахлыы, ани гелер /Саабинин адына/! Осанна ӱӱсек гӧклердӓ!»

¹¹Иисус гирди Иерусалимдеки Айоз бина ичинӓ, бакты долайа, ама чӱнкӱ вакыт гечти, дӧндӱ оникисиннӓн Вифанийа кӱӱйӱнӓ.

¹²Икинӂи гӱнӱ, ачан оннар чыктылар Вифанийадан, Иисус аӂыкты.

¹³О гӧрдӱ йырактан бир йапраклы инӂир фиданы. Гитти, баксын, вар мы мейвасы, ама йаклаштыйнан, йапрактан каарӓ бишей булмады, зерӓ диилди мейва вакыды.

¹⁴Озаман Иисус деди: «Бӱӱндӓн ӧтӓӓ хич кимсей имесин сендӓн мейва». Онун ӱӱрениӂилери ишиттилӓр буну.

¹⁵Ачан етиштилӓр Иерусалимӓ, Иисус гирди Айоз бина аулуна да башлады кооламаа орадан оннары, ким сатарды хем аларды, девирди пара дииштиреннерин масаларыны хем гугуш сатаннарын скемнелерини.

¹⁶Кимсейи бракмарды, бишей гечирсин Айоз бинанын аулу ичиндӓн.

¹⁷Ӱӱредип, дейӓрди инсана: «Диил ми йазылы: „Беним евимӓ денеӂек дуа еви хепси миллетлӓр ичин“, ама сиз чевирдиниз ону хайдут ининӓ».

¹⁸Ачан ишиттилӓр бӱӱк попазлар хем билгичлӓр буну, бакардылар, несой ӧлдӱрӓбилсиннӓр Ону, ама коркардылар Ондан, зерӓ Онун ӱӱретмесинӓ шашарды хепси инсан.

¹⁹Ачан авшам олду, Иисус хем ӱӱрениӂилери касабадан чыктылар.

²⁰Сабаалӓн, инӂир фиданын йанындан гечӓркӓн, ӱӱрениӂилӓр гӧрдӱлӓр, ани фидан курумуш кӧкӱндӓн.

²¹Петри аклына гетирди да деди: «Ӱӱредиӂи, йа бак, инӂир фиданы, ани бетваладын, курумуш».

²²Иисус ӂувап етти оннара: «Олсун сиздӓ инан Аллаха.

²³Доору сӧлеерим сизӓ, еер биркимсей бу байыра дейӓрсейди: „Калк да атыл дениз ичинӓ“, да шӱпесиз ӱректӓн инанарсайды, ани не сӧледи таманнанаӂэк, озаман олаӂэк.

²⁴Онуштан сӧлеерим сизӓ: Не дӓ истейеӂениз дуада, инанын каблетмиш гиби, да олаӂэк сизӓ.

²⁵Ачан дуада дурэрсыныз, еер сиздӓ варсайды биркимсейӓ каршы бишейиниз, баашлайын, Гӧктеки Бобаныз да баашласын дейни сизин кабаатларынызы.

²⁶Еер сиз баашламарсайдыныз, Гӧктеки Бобаныз да баашламайаӂэк сизин кабаатларынызы».

²⁷Дӧндӱлӓр геери Иерусалимӓ. Иисус, ачан гезинӓрди Айоз бина аулунда, йаклашты бӱӱк попазлар, билгичлӓр хем аксакаллар да сордулар Она:

²⁸«Не заабитликлӓн йапэрсын бу ишлери, хем ким верди Сана бу заабитлии, буннары йапасын?»

²⁹Иисус деди оннара: «Койаӂам Бӓн дӓ сизӓ бир соруш. Ӂувап един Бана, сора Бӓн дӓ сизӓ сӧлейеӂӓм, не заабитликлӓн йапэрым бу ишлери.

³⁰Иоанын ваатизлии гӧктӓн ми гелди оса инсандан мы? Ӂувап един Бана».

³¹Оннар бири-бириннӓн лафедӓрдилӓр: «Еер дейӓрсейдик: „Гӧктӓн“, О дейеӂек: „Ӧлейсӓ, нечин ону инанмадыныз?“».

³²Ама дейӓрсейдик: «Инсандан» — коркардылар халктан, зерӓ хепси инанарды, ани Иоан хакына пророк.

³³Онуштан ӂувап еттилӓр Иисуса: «Билмеериз». Озаман Иисус деди: «Бӓн да сӧлӓмейеӂӓм сизӓ, не заабитликлӓн йапэрым бу ишлери».