Read Tungag ИИ ХАБЕР МАРКТАН 13 Bible Online

ИИ ХАБЕР МАРКТАН 13 - Tungag bible

ИИ ХАБЕР МАРКТАН 13

¹Иисус ачан чыкарды Айоз бинадан, ӱӱрениӂилериндӓн бириси деди Она: «Ӱӱредиӂи! Йа бак, не гӧзӓл ташлар хем не гӧзӓл йапылар!»

²Иисус ӂувап етти она: «Гӧрерсин ми бу бӱӱк йапылары? Бурада калмайаӂэк таш ӱстӱндӓ таш, хепси йыкылаӂэк».

³Ачан отурарды Зейтин байырында, Айоз бинайа каршы, Петри, Иаков, Иоан хем Андрей, йалнызкан, Она сордулар:

⁴«Сӧлӓ бизӓ, незаман олаӂэк буннар, хем не нышан гӧстереӂек, ани буннар хепси таманнанаӂэк?»

⁵Озаман Иисус оннара аннатмаа башлады да деди: «Бакын, биркимсей алдатмасын сизи.

⁶Зерӓ чойу гелеӂек Беним адыма да дейеӂек: „Бӓним Христос“, да чойуну алдадаӂэклар.

⁷Ачан ишидеӂениз ӂенк уултусу хем ӂенклӓр ичин хабер, коркмайасыныз. Зерӓ буннар лӓӓзым олсун, ама бу таа диил биткиси.

⁸Зерӓ миллет миллетӓ каршы хем падишахлык падишахлаа каршы калкаӂэк. Кими ерлердӓ олаӂэк ер тепремелери, аачлык /хем карышмалык/. Буннар дуума санӂыларын башлантысы.

⁹Ама сиз есап алын кендинизӓ, зерӓ вереӂеклӓр сизи даавалара, дӱӱйеӂеклӓр синагогаларда, Беним бетеримӓ чыкараӂэклар кулланыӂыларын хем падишахларын ӧнӱнӓ, ки шаатлык едӓсиниз оннара.

¹⁰Илкин хепси миллетлерӓ лӓӓзым насаат едилсин Ии Хабер.

¹¹Ачан гӧтӱреӂеклӓр сизи, даавайа версиннӓр, кахырланмайын, не лафедеӂениз. Сӧлейин, не озаман верилеӂек сизӓ, зерӓ лафетмейеӂениз сиз, ама лафедеӂек Айоз Дух.

¹²Кардаш кардашыны хем боба ушааны ӧлӱмӓ вереӂек. Ушаклар кенди бобаларына хем аналарына каршы калкаӂэклар да оннары ӧлдӱреӂеклӓр.

¹³Беним адым ичин сиздӓн хепси азетмейеӂек, ама ким биткийӓдӓн дайанаӂэк, о куртулаӂэк.

¹⁴Ачан гӧреӂениз дикили, нередӓ дӱшмеер, ииренч иши, ани бозгунӂулук йапэр, /ангысы ичин лафетти пророк Даниил,/ — ким окуйэр, аннасын — озаман ким олаӂэк Иудейада, качсын байырлара.

¹⁵Ким булунаӂэк ев ӱстӱндӓ, инмесин хем ичери гирмесин бишей алмаа.

¹⁶Ким олаӂэк кырда, дӧнмесин геери ӱст рубасыны алмаа.

¹⁷О гӱннердӓ вай маамул хем ушак емзирӓн карылара!

¹⁸Дуа един, сизин качманыз олмасын кышын.

¹⁹Зерӓ о гӱннердӓ ӧлӓ бӱӱк зеет олаӂэк, ани о вакыттан, незамандан Аллах йаратты дӱннейи, шиндийӓ кадар олмады, ондан сора да олмайаӂэк.

²⁰Еер Сааби кысалтмайды о вакыды, кимсей куртуламайаӂэйды. Ама сечилмишлерин хатыры ичин, ангыларыны сечти, Сааби о вакыды кысалтты.

²¹Озаман еер биркимсей дейӓрсейди сизӓ: „Тӓ, Христос бурада!“ еки „Тӓ, Христос орада!“, инанмайын.

²²Зерӓ пейдаланаӂэк йаланӂы христослар хем йаланӂы пророклар. Йапаӂэклар нышаннар хем шашмаклы ишлӓр, алдатсыннар дейни, оларсайды колай, сечилмиш оланнары да.

²³Сиз корунун. Тӓ, Бӓн вакытлан сизӓ хепсини хаберледим.

²⁴О гӱннердӓ, о зеетлердӓн сора гӱн карараӂэк, ай вермейеӂек айдынныыны,

²⁵йылдызлар гӧктӓн дӱшеӂеклӓр, хем гӧкӱн куветлери сарсаланаӂэк.

²⁶Озаман гӧреӂеклӓр Адам Оолуну гелӓркӓн булутлар ичиндӓ бӱӱк куветлӓн хем метинниклӓн.

²⁷Озаман О йоллайаӂэк ангиллерини да топлайаӂэк сечилмишлерини дӧрт тарафтан, ерин кенарындан гӧкӱн кенарынадан.

²⁸Инӂир фиданындан ӧрнек алын. Ачан даллары йымышээрлар, хем йапраклары ешерерлӓр, билерсиниз, ани йаз йакын.

²⁹Хеп ӧлӓ, сиз дӓ ачан гӧреӂениз буннары олуркан, билиниз, ани бу иш [10] йакын, артык капуда.

³⁰Доору сӧлеерим сизӓ, ани бу бой инсан гечмейеӂек, хепси буннар таманнанмайынӂа.

³¹Гӧк хем ер гечеӂек, ама Беним сӧзлерим гечмейеӂек.

³²О гӱнӱ хем о саады кимсей билмеер: не ангиллӓр гӧктӓ, не дӓ Оол, ама салт Боба.

³³Бакын, кушку олун, /дуа един,/ зерӓ билмеерсиниз, незаман о вакыт гелеӂек.

³⁴Бу — бир адам гиби, ани йола йолланэр, евини чыракларына бракэр, херкезинӓ ӂувапчылык хем иш верер, ама бекчийӓ, кушку беклесин, сымарлээр.

³⁵Онуштан кушку олун, зерӓ билмеерсиниз, незаман гелеӂек евин чорбаӂысы, беки авшамнен, беки геӂӓ йарысы, беки хороз ӧтмесиндӓ, беки сабаалӓн.

³⁶Бакын, ансыздан гелип, сизи уйуйар булмасын.

³⁷Не сӧлеерим сизӓ, сӧлеерим хепсинӓ: Кушку олун».