Read Tungag ИИ ХАБЕР МАРКТАН 4 Bible Online

ИИ ХАБЕР МАРКТАН 4 - Tungag bible

ИИ ХАБЕР МАРКТАН 4

¹Иисус енидӓн башлады ӱӱретмӓӓ инсаны гӧл бойунда. Йанына топландыйды ӧлӓ чок инсан, ани Иисус, пинип, отурду бир кайык ичинӓ су бойунда, ама хепси инсаннар калдылар кенарда.

²Иисус башлады оннары ӱӱретмӓӓ ӧрнеклӓрлӓн чок ишлӓр ичин. Ӱӱредерӓк оннары, Иисус сӧледи бу ӧрнӓӓ:

³«Сеслейин. Тӓ екиӂи чыкты тоом екмӓӓ.

⁴Ачан екӓрди, разгелди, ани тоомнардан биразы дӱштӱ йол бойуна. Кушлар кондулар да идилӓр оннары.

⁵Башка тоомнар ташлык ерӓ дӱштӱлӓр, нередӓ аз топрак варды. Тоомнар тез филизленди, зерӓ топрак диилди дерин.

⁶Ама ачан гӱнеш чыкты, оннар сӧрпештилӓр да курудулар, зерӓ кӧклери сувадайды.

⁷Таа башка тоомнар чалылар ичинӓ дӱштӱлӓр. Чалылар бӱӱдӱлӓр да буулттулар филизлери, оннар верӓмедилӓр берекет.

⁸Ама калан тоомнар ии топраа дӱштӱлӓр. Бӱӱдӱлӓр, башак вердилӓр да берекет гетирдилӓр: бириси отуз, ӧбӱрӱ алтмыш, таа ӧбӱрӱ ӱз катына».

⁹Сора деди оннара: «Кимин вар кулаа ишитмӓӓ дейни, ко ишитсин!»

¹⁰Ачан Иисус инсандан айырыкты, оники ӱӱрениӂиси хем калан излейиӂилери сордулар Она бу ӧрнек ичин.

¹¹О ӂувап етти оннара: «Сизӓ верилди, аннайасыныз Аллахын Падишахлыынын саклылыыны, ама калан инсана хепси сӧленер ӧрнеклӓрлӓн.

¹²Ӧлӓ ки, „оннар гӧзлериннӓн бакэрлар, ама гӧрмеерлӓр; кулакларыннан ишидерлӓр, ама аннамээрлар, ки биртӱрлӱ дӧнмесиннӓр Аллаха, да баашлансын гӱнахлары“».

¹³Сора сорду оннара: «Аннамээрсыныз бу ӧрнӓӓ ми? Озаман несой аннайаӂэныз калан ӧрнеклери?

¹⁴Екиӂи екер Аллахын сӧзӱнӱ.

¹⁵Кими инсаннар бензеер тоомнара, ани дӱшер йол бойуна, нередӓ о сӧз екилер. Оннар сӧзӱ ишиттийнӓн, тез гелер шейтан да чалэр сӧзӱ, ани екилийди ӱреклериндӓ.

¹⁶Тоомнар, екилмиш ташлык ерӓ, оннардыр, ангылары, сӧзӱ ишидип, чабук кабледерлӓр севинмӓклӓн,

¹⁷ама йок кӧклери хем аз вакыт тутунэрлар. Ачан гелер зорлук еки кооламак Аллахын сӧзӱ ичин, оннар тез атылэрлар.

¹⁸Башка тоомнар, екилмиш чалылар ичинӓ, оннардыр, ким ишидер сӧзӱ,

¹⁹ама бу заманын кахырлары, зенгинниин алдангачлыы хем башка хамеллӓр, гирип оннара, буулдэрлар сӧзӱ, да оннар берекет гетирӓмеерлӓр.

²⁰Тоомнар, екилмиш ии топраа, оннардыр, ким, ишидип сӧзӱ, кабледерлӓр да берекет гетирерлӓр: бириси отуз, ӧбӱрӱ алтмыш, таа ӧбӱрӱ ӱз катына».

²¹Сора Иисус деди оннара: «Шафкы гетирерлӓр, ки койсуннар кӱп алтына оса пат алтына мы? Диил ми койсуннар дейни кандиллик ӱстӱнӓ?

²²Йок бишей ӧртӱлӱ, ани ачылмасын, хем йок бишей саклы, ани ӱзӓ чыкмасын.

²³Кимин вар кулаа, ишитмӓӓ дейни, ко ишитсин».

²⁴Хем деди оннара: «Бакын, не ишидерсиниз. Не ӧлчӱйлӓн ӧлчеӂениз, о ӧлчӱйлӓн Аллахтан ӧлчӱлмӱш олаӂэныз, салт таа зееделенмиш.

²⁵Зерӓ кимдӓ вар, она таа чок верилеӂек, ама кимдӓ йок, ондан алынаӂэк, нейи дӓ вар».

²⁶Сора деди: «Аллахын Падишахлыы бензеер она, ниӂӓ бир адам екер тоом тарласына.

²⁷Геӂӓ уйуйэр, гӱндӱз уйанык дурэр, ама тоом филиз салверер, бӱӱмӓӓ башлээр. Нетӱрлӱ бу олэр, адам хич билмеер.

²⁸Топрак кендилииндӓн берекет верер: илкин бир ешил филиз, сора башак, биткидӓ башак долу тенейлӓн.

²⁹Ачан берекет олгун олэр, ишӓ хич ойаланмайарак, ораа койэр, зерӓ гелди бичмӓк вакыды».

³⁰Сора деди: «Нейлӓн бензеделим Аллахын Падишахлыыны, не ӧрнеклӓн ачыклайалым ону?

³¹О бензеер хардал тоомуна, ани, екилдийнӓн топрак ичинӓ, таа кӱчӱк хепси тоомнардан ер ӱстӱндӓ.

³²Ама екилдиктӓн сора бӱӱйер да олэр таа бӱӱк хепси ешилликлердӓн. Онун даллары бӱӱйер ӧлӓ, ки гӧк кушлары вар ниӂӓ йуваларыны йапсыннар онун гӧлгесиндӓ».

³³Иисус бунун гиби чок ӧрнеклӓрлӓн насаат етти Аллахын сӧзӱнӱ оннара, некадар оннар аннайабилдилӓр.

³⁴Лафетмӓрди ӧрнексиз. Сора, ачан каларды йалныз ӱӱрениӂилериннӓн, хепсини ачыкларды.

³⁵О гӱнӱ авшамнен Иисус деди оннара: «Гечелим гӧлӱн ӧбӱр тарафына».

³⁶Ӱӱрениӂилӓр, салверип инсаны, гӧтӱрдӱлӓр Ону кайыклан, ангысында О булунурду. Онуннан билӓ варды башка кайыклар да.

³⁷Башлады есмӓӓ бир бӱӱк боран, далгалар фырладарды су кайык ичинӓ, да кайык доларды суйлан.

³⁸Ама Иисус кайыын геерисиндӓ уйуйарды, йастык башы алтында. Ӱӱрениӂилӓр уйандырдылар Ону да дедилӓр: «Ӱӱредиӂи, не Сенин йок касаветин, ани биз кайбелериз?»

³⁹О калкты, азарлады лӱзгери да гӧлӓ деди: «Сус, да ишидилмесин сесин!» Лӱзгӓр дурду да бӱӱк услулук олду.

⁴⁰Сора деди ӱӱрениӂилеринӓ: «Нечин ӧлӓ коркаксыныз? Не, сиздӓ таа йок му инан?»

⁴¹Оннары басты бир бӱӱк корку. Бири-бириннӓн лафедӓрдилӓр: «Кимдир Бу, Ангысыны лӱзгӓр хем далгалар сеслеерлӓр?»