Read Tungag ИИ ХАБЕР МАРКТАН 6 Bible Online

ИИ ХАБЕР МАРКТАН 6 - Tungag bible

ИИ ХАБЕР МАРКТАН 6

¹Иисус орадан гитти да гелди Кенди мемлекетинӓ. Ӱӱрениӂилӓр гиттилӓр Онун ардына.

²Ӂумертеси гӱнӱ Иисус башлады ӱӱретмӓӓ синагогада. Чойу, ани сеслӓрдилӓр Ону, шашмаклан сорардылар: «Нередӓн хепси буннар вар Онда? Несой аарифлик верили Она? Несой Онун еллериндӓн олэр бу кудретли ишлӓр?

³Диил ми О дӱлгер, Марийанын оолу, Иаковун, Иосифин, Иуданын хем Симонун кардашы? Диил ми Онун кызкардашлары бизим арамызда?» Бу бетерӓ Иисус ичин шӱпейӓ дӱштӱлӓр.

⁴Иисус деди оннара: «Бир дӓ пророк диил паасызландырылмыш ӧлӓ, ниӂӓ кенди мемлекетиндӓ, кенди хысымнарында хем кенди евиндӓ».

⁵Йапамады орада бир дӓ кудретли иш, саде некадар биркач хастайы, койуп еллерини, алыштырды.

⁶О шашарды оннарын инансызлыына. Сора гитти долай кӱӱлерӓ да орада ӱӱредӓрди.

⁷Чаарды Кендинӓ оники ӱӱрениӂисини да башлады йолламаа икишӓр-икишӓр. Верди оннара заабитлик фена духларын ӱстӱнӓ

⁸да сымарлады оннара: «Бишей алмайын йол ичин, сопадан каарӓ. Алмайын не екмек, не хийбӓ, не дӓ пара.

⁹Айакларыныза гиийин сандали, сыртыныза гиимейин ики кат руба».

¹⁰Сора деди: «Ангы евӓ гиреӂениз, о евдӓ калын, орадан гидинӂӓ.

¹¹Еер бир ердӓ инсан сизи каблетмӓрсейди еки сеслӓмӓрсейди, чыкып орадан, артык тозлары да айакларыныздан силкин, азар гиби оннара каршы. Доору сӧлеерим сизӓ: даава гӱнӱндӓ Содома хем Гоморрайа олаӂэк таа илин, некадар о касабайа».

¹²Оннар гиттилӓр да насаат еттилӓр, ани инсан дӧнсӱн гӱнахларындан Аллаха.

¹³Чок фена духлары уураттылар хем чок хасталары алыштырардылар, йаалайып зейтин йаайыннан.

¹⁴Падишах Ирод ишитти Иисус ичин, зерӓ Онун ады херердӓ аныларды. Кимиси дейӓрди: «Иоан Ваатизедиӂи ӧлӱдӓн дирилди, онуштан йапабилер кудретли ишлӓр».

¹⁵Башкалары дейӓрдилӓр: «О Илийа», таа башкасы дейӓрди: «О бир пророк, евел вакыттан пророклардан бири гиби».

¹⁶Буну сеслейип, Ирод деди: «Бу — Иоан, ангысынын кафасыны алдым. О дирилди ӧлӱдӓн».

¹⁷Зерӓ Ирод кендиси йолладыйды, тутсуннар да капасыннар Иоаны зындана, Иродиаданын бетеринӓ, ангысы Филипин, Иродун кардашынын, карысыйды, ама Ирод она евленмишти.

¹⁸Иоан дейӓрди она: «Дӱшмеер йашайасын сенин кардашынын карысыннан».

¹⁹Онуштан Иродиада кин гӱдӓрди Иоана да бакарды ӧлдӱртмӓӓ ону, ама йокту колайлыы.

²⁰Ирод коркарды Иоандан, ама коруйарды ону, зерӓ билӓрди, ани о доору хем айоз бир адам. Ону сеслӓркӓн, хич билмӓрди, не йапсын, ама хеп окадар майыллыклан сеслӓрди ону.

²¹Бир уйгун гӱн олду, ачан Ирод кенди дуумак гӱнӱн йортусунда йапты конуш ӧндерӂилеринӓ, аскер заабитлеринӓ хем Галилейадан бӱӱклерӓ.

²²Иродиаданын кызы гирди да ойнады. Беендирди кендини Ирода хем конаклара. Озаман падишах деди кыза: «Истӓ бендӓн, не истӓрсейдин, да бӓн вереӂӓм сана».

²³Бааланды еминнӓн: «Не дӓ истӓрсейдин бендӓн, вереӂӓм сана, артык истӓрсейдин падишахлыымын йарысыны да».

²⁴Кыз чыкты дышары да сорду кенди анасына: «Не истейим?» О ӂувап етти: «Истӓ Иоан Ваатизедиӂинин кафасыны».

²⁵Кыз чабук гитти падишаха да деди: «Истеерим, шинди верӓсин бана бир чини ичиндӓ Иоан Ваатизедиӂинин кафасыны!»

²⁶Падишах чок гӱчленди, ама атылмаа истӓмеди, зерӓ емин еттийди конакларын ӧнӱндӓ.

²⁷Йоллады бир ӂеллат аскер да сымарлады, гетирсин Иоанын кафасыны.

²⁸Аскер гитти да алды Иоанын кафасыны, гетирди бир чини ичиндӓ да верди кыза, кыз да верди кенди анасына.

²⁹Ачан Иоанын ӱӱрениӂилери ишиттилӓр буну, гелип, алдылар онун гӱӱдесини да мезар ичинӓ койдулар.

³⁰Апостоллар дӧндӱлӓр геери Иисуса да аннаттылар Она хепсини, не йаптылар хем ниӂӓ ӱӱреттилӓр инсаны.

³¹Иисус деди: «Гелин Бенимнӓн бир сапа ерӓ йалныз да динненин бираз». Зерӓ варды чоклук, ани гелӓрдилӓр хем гидӓрдилӓр, да оннарын йокту колайлыклары артык екмек исиннӓр.

³²Гиттилӓр кайыклан бир сапа ерӓ, ки олсуннар йалныз.

³³Инсан гӧрдӱ оннары гидӓркӓн да таныды. Хербир касабадан качтылар орайы йайан да етиштилӓр оннарын ӧннери сора.

³⁴Ачан чыкты кайык ичиндӓн, Иисус гӧрдӱ чок инсан. Ӂаны аӂыды оннара, зерӓ оннар ниӂӓ гӱдӱӂӱсӱз койуннарды. Башлады оннары ӱӱретмӓӓ хертӱрлӱ ишлӓр.

³⁵Чӱнкӱ вакыт хайли гечмишти, ӱӱрениӂилӓр йаклаштылар Иисуса да дедилӓр: «Бурасы чол ер, вакыт шиндӓн сора геч.

³⁶Колвер инсаны, гитсиннӓр долай кӱӱлерӓ хем кырдакы евлерӓ да сатын алсыннар кендилеринӓ бишей имӓӓ, /зерӓ йок не исиннӓр/».

³⁷«Сиз верин оннара имӓӓ», — деди Иисус. Ама ӱӱрениӂилӓр ӂувап еттилӓр: «Вар мы ниӂӓ икиӱз динарлан гиделим да сатын алалым екмек, ки дойурабилелим оннары?»

³⁸Иисус сорду оннара: «Йа гидин да бакын, кач екмек сиздӓ вар?» Аннадыктан сора ӂувап еттилӓр: «Вар беш екмек хем ики балык».

³⁹Озаман сымарлады, отуртсуннар хепсини бӧлӱк-бӧлӱк ешил чимен ӱстӱнӓ.

⁴⁰Инсан отурду ерӓ сыра-сыра еллишӓр хем ӱзӓр киши бир сырада.

⁴¹Иисус алды беш екмӓӓ хем ики балыы, калдырды бакышыны гӧкӓ, иисӧзледи да кырып екмеклери, верди ӱӱрениӂилеринӓ, ки оннар пайетсиннӓр инсана. Ики балыы да бӧлдӱ хепсинӓ.

⁴²Хепси иди да дойунду.

⁴³Топладылар оники сепет, долу екмек парчасыннан хем не балыклардан калдыйды.

⁴⁴Хепси, ким иди, варды беш бин адам.

⁴⁵Иисус чалыштырды ӱӱрениӂилерини, тез гирсиннӓр кайык ичинӓ да ӧнӱ сора гечсиннӓр гӧлӱн ӧбӱр тарафына, Вифсаида касабасына. Бу вакыт Кендиси лӓӓзымды салверсин инсаны.

⁴⁶Ачан сӧледи инсана «кал саалыӂаклан», гитти бир байыр ӱстӱнӓ, ки дуа етсин.

⁴⁷Ачан авшам олду, кайык гӧлӱн ортасындайды, ама Иисус йалныз булунарды кенарда.

⁴⁸Гӧрдӱ, ани оннар савашэрлар кӱрек чекерӓк, зерӓ лӱзгӓр каршы есӓрди. Онуштан геӂенин дӧрдӱнӂӱ бекчилииндӓ [5] Иисус гелди оннара, гидерӓк су ӱстӱндӓ, да гечмӓӓ истеди оннарын йанындан.

⁴⁹Оннар, гӧрӱп Ону гидерӓк су ӱстӱндӓ, Ону бир тылсым сандылар да кескин сеслӓн баардылар.

⁵⁰Зерӓ хепси, гӧрӱп Ону, корктулар. Озаман Иисус деди оннара: «Усланын, бу Бӓним, коркмайын!»

⁵¹Сора, гелип оннара, пинди кайык ичинӓ, да лӱзгӓр дургунду. Оннар сарп чок шаштылар.

⁵²Чӱнкӱ ӱреклери уйвашыкты, оннар аннамадыйдылар екмеклӓрлӓн мераклы иши.

⁵³Суйу гечтийнӓн, оннар етиштилӓр кенара, Геннисарет еринӓ.

⁵⁴Ачан чыктылар кайык ичиндӓн, кенарда инсан хемен таныды Иисусу.

⁵⁵Качтылар хепси долай ерлерӓ да херердӓ, нередӓ ишиттилӓр Онун ичин, башладылар гетирмӓӓ йатаклар ӱстӱндӓ хасталары орайы, нередӓ О булунурду.

⁵⁶Ангы касабалара, кӱӱлерӓ хем кырдакы евлерӓ гирӓрди Иисус, херердӓ чыкарырдылар мейданнара хасталары да йалварардылар, браксын, ки диисиннӓр баарлем Онун рубасына. Хепси, ким Она диийӓрди, алышарды.