Read Tungag ИИ ХАБЕР МАРКТАН 7 Bible Online

ИИ ХАБЕР МАРКТАН 7 - Tungag bible

ИИ ХАБЕР МАРКТАН 7

¹Фарисейлӓр хем биркач билгич, гелмӓ Иерусалимдӓн, топландылар Иисусун долайына.

²Оннар гӧрдӱлӓр ӱӱрениӂилери ийӓркӓн диил пак [6], башка лафлан, йыканмадык еллӓн.

³Фарисейлӓр хем хепси иудейлӓр, ихтӓрларын адетлеринӓ гӧрӓ, имеерлӓр, ислӓӓ йыкамайынӂа еллерини.

⁴Гелип панайырдан, имеерлӓр, йыкамайынӂа еллерини. Хем чок башка адетлӓр таманнээрлар, ниӂӓ: чӧлмек, кӱп, бакыр хем пат йыкамаклары.

⁵Фарисейлӓр хем билгичлӓр сордулар Иисуса: «Нечин сенин ӱӱрениӂилерин тутмээрлар ихтӓрларын адетлерини да ийерлӓр йыканмадык еллӓн?»

⁶Иисус ӂувап етти оннара: «Икиӱзлӱлӓр! Доору пророклук етти сизин ичин Исайа, ниӂӓ вар йазылы: „Бу инсан икрамнээр Бени саде аазыннан, ама ӱреклериннӓн узак Бендӓн дурэр.

⁷Наафилӓ Бана баш иилдерлӓр, зерӓ адам сымарламакларыны ӱӱредерлӓр, сансыннар ани Аллахын ӱӱретмеклери“.

⁸Сиз брактыныз Аллахын сымарламасыны да тутэрсыныз адетлери, ани ерлештирилди инсандан, /ниӂӓ кӱп хем чӧлмек йыкамаклары, хем йапэрсыныз чок башка ишлӓр буннара бензӓр/».

⁹Сора деди оннара: «Не колай атылэрсыныз Аллахын сымарламасындан, ки ерлештирӓсиниз кенди адетлеринизи!

¹⁰Моисей деди: „Икрамна бобаны хем ананы“ хем: „Ким бобасыны еки анасыны кӧтӱлейеӂек, ӧлӱмнӓн ӂезалы олсун“.

¹¹Ама сиз деерсиниз: „Ким деер бобасына еки анасына: Не лӓӓзымды сана верейим, шинди корван (аннамасы баашыш Аллаха)“,

¹²ону бракмээрсыныз, йардым етсин кенди бобасына йада анасына.

¹³Бутӱрлӱ паасызландырдыныз Аллахын сӧзӱнӱ кенди адетинизлӓн. Хем йапэрсыныз чок таа башка ишлӓр буна бензӓр!»

¹⁴Сонда енидӓн топлады инсаны долайына да деди: «Хепсиниз сеслейин да аннайын Бени.

¹⁵Не гирер адам ичинӓ дышандан, йок насыл мындарласын ону, ама не чыкэр адамдан, о мындарлээр адамы. /

¹⁶Кимин вар кулаа ишитмӓӓ дейни, ко ишитсин!/»

¹⁷Бракып инсаны, ачан гирди бир ев ичинӓ, ӱӱрениӂилери йалвардылар, аннатсын бу ӧрнӓӓ.

¹⁸О деди: «Не, сиз дӓ ми ӧлӓ аар кафалыйсыныз? Аннамээрсыныз мы, ани не гирер адам ичинӓ, йок насыл мындарласын ону?

¹⁹Зерӓ о гирмеер ӱреенӓ, ама карнына, сора дышары уурадылэр».

²⁰Сора деди: «Не чыкэр адамдан, о мындарлээр адамы.

²¹Зерӓ адамын ичиндӓн, ӱреендӓн, чыкэр фена неетлӓр, ороспулук, хайырсызлык, ӧлдӱрмӓк,

²²хырсызлык, тамахлык, феналык, шалвирлик, утанч ишлӓр, кысканчлык, кӧтӱлемӓк, шишкинник, акылсызлык.

²³Хепси бу фена ишлӓр чыкэрлар ичйандан да мындарлээрлар адамы».

²⁴Иисус гитти орадан Тир /хем Сидон/ касабасынын тарафына. Гирди бир евӓ да истӓмӓрди, кимсей билсин буну. Ама сакланамады.

²⁵Чок гечмеди, бир кары, ангысынын кызы фена духтан тутулмушту, ишитти Иисус ичин да, гелип Она, дӱштӱ Онун айакларына.

²⁶Бу кары урумӂа лафедӓрди, ама кендиси Сирийа-финикийалыйды. О йалварарды, чыкарсын фена духу онун кызындан.

²⁷Иисус деди: «Брак, илкин дойунсун ушаклар, зерӓ диил ислӓӓ алмаа екмӓӓ ушаклардан да атмаа кӧпеклерӓ».

²⁸«Ӧлӓ, Сааби, — ӂувап етти бу кары. — Ама кӧпеклӓр дӓ ийерлӓр кырынтылары, ани дӱшер ушакларын софрасындан».

²⁹Озаман Иисус деди: «Чӱнкӱ бӧлӓ ӂувап еттин, шинди гит, фена дух чыкты сенин кызындан».

³⁰Кары, ачан етишти евӓ, булду ушаа патта йатаркан. Фена дух чыкмышты ондан.

³¹Иисус айырылды Тир ерлериндӓн, енидӓн гитти Сидон ашыры Декаполис ерлерин ортасындан Галилейа гӧлӱнӓ.

³²Гетирдилӓр Она бир саар, ангысы зор лафедӓрди, да йалвардылар, койсун елини онун ӱстӱнӓ.

³³Иисус алды ону бир тарафа инсандан, койду пармакларыны адамын кулакларына да, тӱкӱрӱп, дииди онун дилинӓ.

³⁴Калдырды бакышыны гӧкӓ, дериндӓн солуду да деди: «Еффата», аннамасы «Ачыл».

³⁵Бирдӓн ачылды кулаклары хем чӧзӱлдӱ дилин дӱӱнӱклери, да о лафетти ачык.

³⁶Иисус сымарлады оннара, кимсейӓ сӧлӓмесиннӓр, ама некадар сыкы сымарларды, окадар таа чок дандана едӓрдилӓр.

³⁷Оннар пек чок шашардылар да дейӓрдилӓр: «Хепси, не йапэр, — ислӓӓ. Артык саарлара да ишитмӓк верер, мутуларын да диллерини чӧзер».