Read Tungag ИИ ХАБЕР ЛУКАДАН 11 Bible Online

ИИ ХАБЕР ЛУКАДАН 11 - Tungag bible

ИИ ХАБЕР ЛУКАДАН 11

¹Бир гӱн Иисус дуа едӓрди бир ердӓ. Ачан битирди дуасыны, бириси ӱӱрениӂилердӓн деди: «Сааби, ӱӱрет бизи дӓ дуа еделим, ниӂӓ Иоан ӱӱретти кенди ӱӱрениӂилерини, дуа етсиннӓр».

²Иисус деди: «Ачан дуа едерсиниз, дейин: „/Ей гӧклердӓ олан/ Боба, Ко айозлансын Сенин адын. Ко гелсин Сенин Падишахлыын. /Ко олсун Сенин истедиин, ниӂӓ гӧктӓ, ӧлӓ ердӓ дӓ./

³Хергӱнкӱ екмеемизи хер гӱн бизӓ вер.

⁴Баашла бизим гӱнахларымызы, Зерӓ биз дӓ баашлээрыз хепсини, ким бизӓ борчлу. Гӧтӱрмӓ бизи денемейӓ, /Ама куртар кӧтӱ оландан/“».

⁵Сора деди: «Еер сизин биринизин варса досту, да о геӂӓ йарысы гидӓрсӓ она да дейӓрсӓ: „Достум, вер бана ӧдӱнч ӱч екмек,

⁶зерӓ гелди йолдан беним бир достум, да йок не онун ӧнӱнӓ койайым“;

⁷ичйандан онун досту ӂувап едӓрсӓ: „Саваштырма бени, зерӓ капу китли, ушакларым бенимнӓн пат ӱстӱндӓ, йок насыл калкайым да екмек верейим сана“.

⁸Сӧлеерим сизӓ, еер калкмарсайды версин достуна гиби, хеп окадар бунун калын ӱзлӱлӱӱ бетеринӓ калкаӂэк да хепсини, не лӓӓзым, вереӂек.

⁹Онун ичин деерим сизӓ: истейин — да верилеӂек; аарайын — да булаӂэныз; урун — да ачылаӂэк.

¹⁰Зерӓ ким истеер — еденер, ким аарээр — булэр, хем ким урэр — она ачылэр.

¹¹Вар мы сизин араныздан боба, ангысынын оолу екмек истӓркӓн, версин она таш? Оса балык истӓркӓн, версин йылан балык еринӓ?

¹²Оса йымырта истӓркӓн, версин скорпион?

¹³Еер сиз, ани фенайсыныз, билӓрсениз ушакларыныза ии баашышлар вермӓӓ, некадар таа чок сизин Гӧктеки Бобаныз вереӂек Айоз Духу оннара, ким Ондан истейеӂек».

¹⁴Иисус бир хастадан, ангысы лафедӓмӓрди, чыкарарды фена духу. Ачан йапты буну, о хаста олан башлады лафетмӓӓ, да инсан шашты.

¹⁵Кимиси дейӓрди: «Фена духлары чыкарэр Веелзевулун — фена духларын ӧндерӂисинин — кувединнӓн».

¹⁶Башкалары, ки денесиннӓр Иисусу, истӓрдилӓр бир нышан гӧктӓн гӧстерсин.

¹⁷Иисус аннады оннарын неетлерини, онуштан деди: «Хербир падишахлык, ани бӧлӱнер да каршы гидер кенди-кендинӓ, даалэр. Хеп ӧлӓ хербир ев, нередӓ бӧлӱнмӓк олэр, даалэр.

¹⁸Еер шейтан бӧлӱндӱсейди кенди-кендинӓ, несой вар насыл дурсун онун падишахлыы? Сиз деерсиниз, ани Бӓн уурадармышым фена духлары Веелзевулун кувединнӓн.

¹⁹Еер Бӓн чыкарарсайдым фена духлары Веелзевулун кувединнӓн, озаман сизин адамнар кимин кувединнӓн чыкарэрлар? Бунда оннар сизӓ даава кесеӂеклӓр.

²⁰Еер Бӓн чыкарарсайдым фена духлары Аллахын кувединнӓн, озаман Аллахын Падишахлыы сизӓдӓн етишти.

²¹Ачан бир адам, каави хем ислӓӓ силӓхлы, коруйэр кенди евини, онун варлыы коркусузлукта.

²²Ама ачан гелер онун ӱстӱнӓ биркимсей, таа каави ондан, да енсеер ону, озаман алэр куветлӓн онун силӓхларыны, ангыларына о умутланарды, да пайедер, не ондан алды.

²³Ким диил Бенимнӓн, о каршы Бана. Ким топламээр Бенимнӓн, о даадэр.

²⁴Ачан фена дух чыкэр адамдан, о гезер сусуз ерлердӓ, раатлык аарээр, да чӱнкӱ буламээр, деер: „Дӧнейим евимӓ, нередӓн чыктым“.

²⁵Гелдии заман, булэр ону сӱпӱрӱлмӱш хем донак.

²⁶Сора гидип, алэр кендисиннӓн башка еди дух, таа фена, некадар кендиси. Гирерлӓр ичйанына да орада ерлешерлӓр. Бутакым, адамын сон халы олэр таа кӧтӱ, некадар баштакы».

²⁷Ачан Иисус сӧлӓрди бу лафлары, бир кары инсандан бӱӱк сеслӓн баарды: «Не мутлу Сенин анан, ким ташыды хем емзирди Сени!»

²⁸Иисус ӂувап етти: «Таа не мутлу оннара, ангылары сеслеерлӓр хем таманнээрлар Аллахын сӧзӱнӱ!»

²⁹Ачан чок инсан топланды, Иисус лафетмӓӓ башлады: «Бу сенселӓ — кӧтӱ бир сенселӓ, истеер бир нышан, ама она верилмейеӂек башка нышан, пророк Ионанын нышанындан каарӓ.

³⁰Зерӓ, ниӂӓ Иона олду бир нышан Ниневийа касабасынын инсаны ичин, хеп ӧлӓ Адам Оолу да олаӂэк нышан бу сенселӓ ичин.

³¹Ӱӱлендӓн падишахка калкаӂэк даава гӱнӱндӓ бу сенселенин адамнарыннан да кабаатландыраӂэк оннары, зерӓ о гелди дӱннейин кенарындан, ки ишитсин Соломонун аарифлиини, ама бӱӱн бурада дурэр Бириси, Ангысы таа бӱӱк Соломондан.

³²Ниневийа касабасындан инсаннар даава гӱнӱндӓ калкаӂэклар бу сенселенин адамнарыннан да кабаатландыраӂэклар оннары, зерӓ оннар, Ионанын насаадыны ишидип, кенди гӱнахларындан Аллаха дӧндӱлӓр, ама бӱӱн бурада дурэр Бириси, Ангысы таа бӱӱк Ионадан.

³³Кимсей тутуштурмээр шафкы, ки койсун ону бир саклы ерӓ еки кӱп алтына, ама койэр ону кандиллик ӱстӱнӓ, ки ким гирер, гӧрсӱннӓр айдынныы.

³⁴Гӧз — гӱӱденин айдынныы. Еер сенин гӧзӱн саа оларсайды, бӱтӱн гӱӱдӓн айдынныкта олаӂэк. Ама сенин гӧзӱн кӧтӱсейди, бӱтӱн гӱӱдӓн каранныкта калаӂэк.

³⁵Онун ичин бак айдыннык, ани сендӓ, караннык олмасын.

³⁶Еер бӱтӱн сенин гӱӱдӓн айдынныкса, да хич бир тарафы каранныклы диилсӓ, бу таман бир айдыннык олаӂэк, ӧлӓ ниӂӓ бир шафк йалабыклыыннан сени айдыннадэр».

³⁷Ачан Иисус буннары сӧлӓрди, бир фарисей Ону буйур етти кендисинӓ конаа. Иисус гелди да софрайа отурду.

³⁸Ачан фарисей гӧрдӱ, ани Иисус имектӓн ӧнӂӓ еллерини йыкамады, шашты.

³⁹Ама Сааби деди: «Сиз, фарисейлӓр, йыкээрсыныз чӧлмӓӓн хем чанаан дышансыны, ама ичйансы хырсызлыклан хем феналыклан долу.

⁴⁰Фикирсизлӓр! Ким йаратты дышансыны, йаратмады мы ичйансыны да?

⁴¹Йапын иилик, не вар сиздӓ, озаман сизин ичин хепси темиз олаӂэк.

⁴²Вай сизӓ, фарисейлӓр, зерӓ сиз верерсиниз онунӂу пайыны наанедӓн, седеф отундан хем башка ешилликлердӓн, ама унудэрсыныз доорулуу хем Аллахын севгилиини. Буннары лӓӓзым йапасыныз, каланыны да бракмайасыныз!

⁴³Вай сизӓ, фарисейлӓр! Зерӓ сиз синагогаларда северсиниз отурмаа илк скемнелерӓ, беенерсиниз, инсан селӓм версин сизӓ мейданнарда.

⁴⁴Вай сизӓ, /билгичлӓр хем икиӱзлӱ фарисейлӓр/! Сиз нышансыз мезарлар гиби, ани гӧрӱнмеерлӓр, да инсан билмейерӓк, чиинеер оннары».

⁴⁵Закон ӱӱредиӂилериндӓн бириси деди: «Ӱӱредиӂи, сӧлӓркӓн буннары, бизи дӓ гӱӂендирерсин».

⁴⁶Иисус ӂувап етти: «Вай сизӓ, закон ӱӱредиӂилери! Зерӓ сиз аар ӱклӓр инсан ташысын койэрсыныз, ама кендиниз о ӱклерӓ баарлем пармаанызлан диимеерсиниз.

⁴⁷Вай сизӓ, ани пророклара мезар курэрсыныз, кими ӧлдӱрдӱ сизин бобаларыныз.

⁴⁸Бутакым, гӧстерерсиниз, ани бобаларынызын ишлериннӓн кайылсыныз, чӱнкӱ оннар пророклары ӧлдӱрдӱлӓр, сиз дӓ мезар дӱзерсиниз.

⁴⁹Онуштан Аллахын Аарифлии деер: „Йоллайаӂам оннара Беним пророкларымы хем апостолларымы: кимисини ӧлдӱреӂеклӓр, кимисини коолайаӂэклар!“.

⁵⁰Онун ичин бу сенселедӓн есап сорулаӂэк пророкларын каннары ичин, ани дӧкӱлдӱ таа дӱннейин курулмасындан,

⁵¹Авелин канындан Захарийанын канынадан, ангысы ӧлдӱрӱлдӱ Айоз бинанын хем курбанныын арасында. Аслы сӧлеерим сизӓ: есап сорулаӂэк бу бой инсандан!

⁵²Вай сизӓ, закон ӱӱредиӂилери, зерӓ сиз алдыныз елинизӓ билги капусунун анатарыны, ама не кендиниз гирерсиниз, не дӓ, ким истеер гирсин, бракэрсыныз!»

⁵³Ачан Иисус чыкты орадан, билгичлӓр хем фарисейлӓр, дакылып, чок сормаклар койдулар, ки сӧлесин чок ишлӓр ичин.

⁵⁴Чалыштылар, кыстырсыннар Ону бир йанныш лафлан, ки сора кабаатландырсыннар.