Read Tungag ИИ ХАБЕР ЛУКАДАН 12 Bible Online

ИИ ХАБЕР ЛУКАДАН 12 - Tungag bible

ИИ ХАБЕР ЛУКАДАН 12

¹Бу вакыт, ачан чок биннӓн инсан топланды ӧлӓ, ани чиинӓрдилӓр бири-бирини, Иисус башлады ӱӱретмӓӓ ӱӱрениӂилерини, дейип: «Корунун фарисейлерин майасындан, ани икиӱзлӱлӱктӱр.

²Йок бишей ӧртӱлӱ, ани ачылмасын хем йок бишей саклы, ани аннашылмасын.

³Онуштан, не сӧлединиз каранныкта, о ишидилеӂек айдынныкта. Не фисирдединиз ичердӓ, о хаберленеӂек евлерин ӧртӱлери ӱстӱндӓн.

⁴Сӧлеерим сизӓ, Беним достларым, коркмайын оннардан, ким гӱӱдейи ӧлдӱрер, ама башка бишей йапамээр.

⁵Сӧлеерим, кимдӓн коркасыныз: коркун Аллахтан, Ангысы ӧлдӱрдӱктӓн сора, куведи вар ӂендемӓ атсын. Сизӓ деерим: елбетки, Ондан коркун.

⁶Сатылмээр мы беш сачак кушу ики ассарийӓ? Оннарын бириси билӓ унудулмээр Аллахтан.

⁷Сизин башынызда хепси сачларыныз сайылы. Онуштан коркмайын. Сиз таа паалыйсыныз чок сачак кушларындан.

⁸Сӧлеерим сизӓ, ани ким шаатлык едеӂек Бана инсанын ӧнӱндӓ, ону Адам Оолу да шаатлык едеӂек Аллахын ангиллеринин ӧнӱндӓ.

⁹Ама ким атылаӂэк Бендӓн инсанын ӧнӱндӓ, ондан Бӓн дӓ атылаӂам Аллахын ангиллеринин ӧнӱндӓ.

¹⁰Еер биркимсей лафедӓрсӓ Адам Оолуна каршы, афедилеӂек. Ама ким кӧтӱлейеӂек Айоз Духу, афедилмейеӂек.

¹¹Ачан гӧтӱреӂеклӓр сизи синагогаларын, заабитлерин хем чорбаӂыларын ӧнӱнӓ, дӱшӱнмейин, нетӱрлӱ доорулуунузу чыкармаа еки не ӂувап етмӓӓ,

¹²зерӓ Айоз Дух ӱӱредеӂек сизи, не лафедӓсиниз озаман».

¹³Бириси инсандан Иисуса деди: «Ӱӱредиӂи, сӧлӓ беним кардашыма, пайетсин бизӓ бобамыздан калма варлыы».

¹⁴«Бе адам, — ӂувап етти Иисус, — ким койду Бени дааваӂы олайым еки пайедейим варлыынызы?»

¹⁵Сора деди: «Бакын, корунун хертӱрлӱ пара тамахлыындан, зерӓ йашамак тутунмээр варлыын боллуундан».

¹⁶Сора сӧледи бир ӧрнек: «Бир зенгин адамын мерасында бӱӱк берекет олду.

¹⁷О кенди-кендинӓ дӱшӱнӓрди хем дейӓрди: „Нӓбайым? Йок нерейи берекедими топлайым.

¹⁸Тӓ не йапаӂам: ески амбарларымы бозаӂам да таа бӱӱк ени амбарлар йапаӂам. Орайы топлайаӂам хепси екиннерими хем варлыымы.

¹⁹Сора дейеӂӓм ӂаныма: ӂаным, вар чок иилик топлу чок йыллар ичин; диннен, и, ич хем шеннен!“

²⁰Ама Аллах деди она: „Сӓн фикирсизсин, бу геӂӓ сенин ӂанын алынаӂэк. Буннар, не хазырладын, кимӓ калаӂэк?“

²¹Хеп бутӱрлӱ олэр онуннан да, ким топлээр зенгинник кендиси ичин, ама зенгиннӓмеер Аллахта».

²²Сора Иисус деди ӱӱрениӂилеринӓ: «Онуштан деерим сизӓ, кахырланмайын йашамак ичин, дӱшӱнмейин, не ийеӂениз хем не гӱӱденизӓ гиийеӂениз.

²³Йашамак таа паалы, некадар имӓк, хем гӱӱдӓ таа паалы, некадар руба.

²⁴Бакын гаргалара. Оннар не екер, не дӓ бичер. Оннарын йок не амбарлары, не дӓ читлери, ама Аллах оннары дойурэр. Сиз чок таа паалыйсыныз кушлардан!

²⁵Хем ким сиздӓн, артык кахырланып, вар насыл еклесин баарлем бир ендезӓ кенди бойуна [6]?

²⁶Еер йапамарсайдыныз ен кӱчӱк иши, озаман нечин кахырланэрсыныз калан ишлӓр ичин?

²⁷Есап алын, несой бӱӱйер замбаклар. Оннар не зааметленер, не дӓ докуйэр. Ама деерим сизӓ: артык Соломон бӱтӱн донаклыында гиинӓмеди, ниӂӓ оннарын бириси.

²⁸Чӱнкӱ Аллах бӧлӓ гиидирер оту, ани бӱӱн кырда, ама йаарын атешӓ атылаӂэк, некадар таа чок гиидиреӂек сизи, аз инанӂылар?

²⁹Аарамайын, не имӓӓ хем не ичмӓӓ. Бунун ичин касаветленмейин.

³⁰Зерӓ хепсини буннары дӱннӓ инсаннары аарээр. Бобаныз билер, ани буннар лӓӓзым сизӓ.

³¹Хепсиндӓн ӧнӂӓ аарайын Аллахын Падишахлыыны, калан ишлӓр дӓ верилеӂек сизӓ.

³²Коркма, сӓн, кӱчӱк сӱрӱ. Сизин Гӧктеки Бобаныз хавезликлӓн верер Падишахлыы сизӓ.

³³Сатын не вар сиздӓ, да йапын иилик. Кендинизӓ ескимӓз кеселӓр хазырлайын — гечмӓз зенгинник гӧклердӓ, нерейи хырсыз сокулмээр хем гӱвӓ имеер.

³⁴Зерӓ нередӓ сизин зенгиннииниз, орада сизин ӱреениз дӓ олаӂэк.

³⁵Олун хазыр, белиниз кушаклы олсун, шафкларыныз йансын.

³⁶Олун, ниӂӓ адамнар, ани чорбаӂыларыны беклеерлӓр, дӱӱндӓн дӧнсӱн, ки гелип, капуйа урдуйнан, чабук ачсыннар.

³⁷Не мутлу чыраклар, ангыларыны чорбаӂы гелмесиндӓ ачыкгӧз булаӂэк! Доору сӧлеерим сизӓ, ани отурдаӂэк софрайа да, кушанып, измет едеӂек оннара.

³⁸Еер гелмиш оларсайды икинӂи еки ӱчӱнӂӱ геӂӓ бекчилииндӓ, не мутлу олаӂэк изметкерлерӓ, ангыларыны чорбаӂы ачыкгӧз булаӂэк!

³⁹Буну билин, еер билейди ев чорбаӂысы, не саатта хырсыз гелеӂек, кушку дураӂэйды да евини сойсун бракмайаӂэйды.

⁴⁰Сиз дӓ олун хазыр, зерӓ Адам Оолу гелеӂек о саатта, ачан хич дӱшӱнмеерсиниз».

⁴¹«Сааби, бизим ичин ми сӧлеерсин бу ӧрнӓӓ оса хепси ичин ми?» — сорду Петри.

⁴²Сааби ӂувап етти: «Кимдир инанч хем аариф векил, ангысыны чорбаӂысы койаӂэк ӂувапчы кенди евиндӓ хепси чыракларын ӱстӱнӓ, вакыдында имӓӓ версин оннара дейни?

⁴³Мутлу чырак, ангысыны чорбаӂысы, гелмесиндӓ, булаӂэк бӧлӓ йапаркан!

⁴⁴Доору сӧлеерим сизӓ, ани койаӂэк ону ӂувапчы бӱтӱн кенди варлыы ӱстӱнӓ.

⁴⁵Ама чырак акылӂа дейӓрсейди: „Чорбаӂым ойаланэр гелмӓӓ“, да башларсайды дӱӱмӓӓ изметкерлери хем изметчийкалары, имӓӓ, ичмӓӓ хем сарфошлук етмӓӓ,

⁴⁶онун чорбаӂысы гелеӂек бир гӱн, незаман хич беклӓмеер хем о саатта, незаман хич дӱшӱнмеер, чок дӱӱйеӂек да ону инансыз оланнарлан бир ерӓ койаӂэк.

⁴⁷О чырак, ангысы билӓрди чорбаӂынын истедиини, ама хазырланмады хем иши йапмады, ниӂӓ чорбаӂы истӓрди, бу чырак чок дӱӱлмӱш олаӂэк.

⁴⁸Ама о, ким билмейерӓк кабаат йапты, аз дӱӱлмӱш олаӂэк; зерӓ кимӓ чок верилди, чок истенеӂек дӓ, хем кимӓ чок инандырылды, ондан таа чок ӂувап истенеӂек.

⁴⁹Гелдим атеш гетирейим ер ӱстӱнӓ да пек истеерим, ки шинди тутушсун!

⁵⁰Бир ваатизлик вар, ангысындан лӓӓзым гечейим. Бу таманнанынӂа, чок зеетленерим.

⁵¹Санэрсыныз, гелдим, услулук му гетирейим ерӓ? Сӧлеерим сизӓ: диил услулук, ама бӧлӱнмӓк.

⁵²Зерӓ бӱӱндӓн ӧтӓӓ беш кишидӓн, ани йашайаӂэклар бир ев ичиндӓ, ӱчӱ калкаӂэк каршы икисинӓ, икиси дӓ ӱчӱнӓ.

⁵³Боба калкаӂэк оолуна каршы, оол да бобасына, ана — кызына каршы, кыз да анасына, кайнана — гелинӓ каршы калкаӂэк, гелин дӓ кайнанасына».

⁵⁴Иисус буну да деди инсана: «Ачан гӧрерсиниз, гӱнбатысындан калкэр булут, сиз хемен деерсиниз: „Йаамур йаайаӂэк“, ӧлӓ дӓ олэр.

⁵⁵Ачан лӱзгӓр есер ӱӱлендӓн, деерсиниз: „Сыӂак олаӂэк“, ӧлӓ дӓ олэр.

⁵⁶Икиӱзлӱлӓр, ерин хем гӧкӱн ӱзӱнӱ аннамаа билерсиниз. Насыл бу вакытлары танымээрсыныз?

⁵⁷Несой сиз кенди-кендиниздӓн танымээрсыныз, не доору?

⁵⁸Незаман дааваӂынын ӧнӱнӓ гидерсин сенин каршы дураныннан, бак таа йолда аннаш онуннан, ки сӱрӱмесин сени дааваӂынын ӧнӱнӓ, дааваӂы да вермесин сени зынданӂыйа, ангысы капайаӂэк сени зындана.

⁵⁹Сӧлеерим сана, ани чыкмайаӂан орадан, ӧдӓмейинӂӓ битки лептону [7]».