Read Tungag ИИ ХАБЕР ЛУКАДАН 2 Bible Online

ИИ ХАБЕР ЛУКАДАН 2 - Tungag bible

ИИ ХАБЕР ЛУКАДАН 2

¹О вакытта Кесар Августтан верилди сымарламак, ки бӱтӱн Рома падишахлыында хепси инсан йазылсыннар.

²Бу йазылмак илк сыра олду кулланыӂы Квиринийин вакыдында, ангысы кулланарды Сирийада.

³Херкези гитти йазылсын кенди дуумак касабасында.

⁴Иосиф, падишах Давидин сенселесиндӓнди, йолланды Галилейадан, Назарет касабасындан, гитмӓӓ Иудейайа, Вифлеем касабасына, Давидин дуума еринӓ.

⁵Гитти, ки йазылсын Марийайлан, йавклу олмушуннан, ангысы маамулду.

⁶Ачан оннар етиштилӓр орайы, Марийанын вакыды гелди, ки дуудурсун.

⁷О дуудурду илк Оолуну, сарды плӓналарлан да йаттырды ахыр ичинӓ, зерӓ конаклык евиндӓ булунмады ер оннара.

⁸Орада йакын гӱдӱӂӱлӓр койуннарлан кырда булунардылар. Оннар геӂӓ беклӓрдилӓр сӱрӱлерини.

⁹Бирдӓн гӧстерилди оннара бир ангил Саабидӓн. Доз-долайа Саабинин метиннии шафк етти. Оннар пек корктулар.

¹⁰Ангил деди: «Коркмайын, бӓн гетирерим сизӓ бир ии хабер, ани бир бӱӱк севинмӓк олаӂэк хепси инсана.

¹¹Бӱӱн сизӓ Давидин касабасында дууду Куртарыӂы, Сааби Христос.

¹²Тӓ нышан, ангысындан таныйаӂэныз: булаӂэныз бир Ушак сарылы плӓналарлан, Ангысы йатэр ахыр ичиндӓ».

¹³Бирдӓн бу ангилӓ екленди чок башка ангиллӓр. Хепси оннар метиннӓрдилӓр Аллахы бутӱрлӱ лафларлан:

¹⁴«Метинник Аллаха ӱӱсек гӧклердӓ! Ердӓ услулук Аллахы беендирӓн инсана!»

¹⁵Ачан ангиллӓр калктылар гӧкӓ, гӱдӱӂӱлӓр дедилӓр бири-биринӓ: «Гиделим Вифлеем касабасына да бакалым, не олду орада, не хаберледи бизӓ Сааби».

¹⁶Оннар хызлы йолландылар Вифлеемӓ, булдулар Марийайы Иосифлӓн хем Ушаа ахыр ичиндӓ.

¹⁷Гӧрӱп буну, гӱдӱӂӱлӓр хепсини сӧледилӓр, не ангил оннара хаберледийди Ушак ичин.

¹⁸Хепси, ким ишитти бу лафлары гӱдӱӂӱлердӓн, пек шашты.

¹⁹Марийа есаба алды хепси бу лафлары да херзаман дӱшӱнӓрди оннар ичин.

²⁰Гӱдӱӂӱлӓр дӧндӱлӓр геери, севинерӓк хем метиннейерӓк Аллахы, зерӓ гӧрдӱлӓр хем ишиттилӓр хепсини ӧлӓ, ниӂӓ хаберлендийди оннара.

²¹Секиз гӱндӓн сора, ачан гелди вакыт Ушаа кесиклик йапылсын, Онун адыны койдулар Иисус, ниӂӓ ангил сӧледийди, таа Марийа гебӓ калмадыйнан.

²²Ачан таманнанды вакыт пакланмак ичин Моисейин Законуна гӧрӓ, Иосиф хем Марийа гӧтӱрдӱлӓр Ушаа Иерусалимӓ, чыксын Саабинин ӧнӱнӓ дейни,

²³ниӂӓ вар йазылы Саабинин Законунда: «Хербир илк дуумуш чоӂук Саабийӓ аданмыш олсун».

²⁴Оннар лӓӓзымды гетирсиннӓр курбан ики гугуш йада ики гугуш йаврусу, ниӂӓ вар сымарланмыш Саабинин Законунда.

²⁵Иерусалимдӓ варды бир адам, ады Симеон. О бир доору хем кабаатсыз адамды, ангысы беклӓрди Израилин куртулмасыны. Онда Айоз Дух варды.

²⁶Айоз Духтан она верилдийди хабер, ани о ӧлмейеӂек гӧрмейинӂӓ Саабинин Христозуну.

²⁷Симеон, кулланылмыш Айоз Духтан, гелди Айоз бинайа. Да ачан Иосиф хем Марийа гетирдилӓр Ушаа, ки таманнасыннар Законун сымарладыыны,

²⁸Симеон алды Ону куӂак, иисӧзледи Аллахы да деди:

²⁹«Сааби, шинди салвер услулуклан Сенин чырааны, ниӂӓ Сӓн ададын,

³⁰зерӓ гӧрдӱ беним гӧзлерим Сенин куртулманы,

³¹ангысыны Сӓн хазырладын хепси миллетлерин гӧзлери ӧнӱндӓ,

³²айдыннатсын миллетлерӓ дейни хем икрам йапсын Израил инсанына».

³³Онун бобасы хем анасы шаштылар бу лафлара, не Ушак ичин ишиттилӓр.

³⁴Симеон иисӧзледи оннары да деди анасына, Марийайа: «Бу Ушак сыраланмыш чойун дӱшмеси ичин хем чойун калкмасы ичин Израилдӓ. О — бир нышан Аллахтан, ани дебрештиреӂек каршылык инсан ичиндӓ,

³⁵чок инсанын саклы неетлери ачылсын дейни, сенин ӱрӓӓн дӓ кылычлан сапланмыш олаӂэк».

³⁶Бурада булунарды бир кары, пророк Анна, Фануелин кызы, Асирин тамызлыындан. О пек ихтӓрды. Коӂасыннан йашамышты салт еди йыл.

³⁷Калмышты дул да шинди сексӓн дӧрт йашындайды. Анна хич айырылмарды Айоз бинадан, геӂӓ-гӱндӱз измет едӓрди Аллаха оручлан хем дуайлан.

³⁸Бу заман Анна, гелип, башлады метиннемӓӓ Аллахы хем сӧлемӓӓ Иисус ичин хепсинӓ, ким беклӓрди Иерусалимин куртулмасыны.

³⁹Ондан сора, ачан таманнадылар хепсини, не сыраланмышты Саабинин Законундан, Иосиф хем Марийа дӧндӱлӓр Галилейайа, кенди касабаларына, Назаретӓ.

⁴⁰Ама Ушак бӱӱйӓрди, каавиленӓрди хем аарифленӓрди гӱн-гӱндӓн. Аллахтан хайыр Онун ӱстӱндейди.

⁴¹Иисусун бобасы хем анасы хер йылын Паскеллӓ йортусунда гидӓрдилӓр Иерусалимӓ.

⁴²Ачан Иисус таманнады оники йашыны, гитти адетӓ гӧрӓ оннарлан йортуйа.

⁴³Ачан гечти йорту гӱннери, да оннар дӧнӓрдилӓр геери евӓ, Иисус калды Иерусалимдӓ, ама бобасы хем анасы буну билмедилӓр.

⁴⁴Сандылар, ани О кафадарларыннан барабар йолда. Ачан гиттилӓр бир гӱннӱк йол, чекеттилӓр аарамаа Ону хысымнарын хем кафадарларын арасында,

⁴⁵ама буламадылар. Иосиф хем Марийа дӧндӱлӓр геери Иерусалимӓ, аарасыннар ону дейни.

⁴⁶Ӱчӱнӂӱ гӱнӱ булдулар Ону Айоз бина ичиндӓ. О, ӱӱредиӂилерин арасында отуруп, сеслӓрди хем соруш койарды.

⁴⁷Хепси, ким сеслӓрди Ону, шашарды Онун аарифлиинӓ хем ӂувапларына.

⁴⁸Бобасы хем анасы, ачан гӧрдӱлӓр Ону, даптур гелдилӓр. Озаман анасы деди: «Оолум, нечин буну йаптын бизӓ? Бобан хем бӓн кахырлан аарээрыз Сени».

⁴⁹О деди: «Нечин Бени аарадыныз? Не, билмеерсиниз ми, ани Бӓн лӓӓзым олайым Беним Бобамын евиндӓ?»

⁵⁰Ама оннар аннамадылар Онун лафларыны.

⁵¹Сора О дӧндӱ оннарлан барабар геери Назаретӓ да сеследи оннары. Анасы хепси буннары тутту аклында.

⁵²Иисус бойлан бӱӱйӓрди, аарифленӓрди да гиттикчӓ Кендини беендирӓрди Аллаха хем инсана.