Read Tungag ИИ ХАБЕР ЛУКАДАН 21 Bible Online

ИИ ХАБЕР ЛУКАДАН 21 - Tungag bible

ИИ ХАБЕР ЛУКАДАН 21

¹Иисус сииредӓрди, ниӂӓ зенгин адамнар баашыш койэрлар Айоз бинанын хазнасына.

²Гӧрдӱ бир фукаара дул карыйы, ангысы койду ики лепта [10].

³Иисус деди: «Доору сӧлеерим сизӓ, ани бу фукаара дул таа чок койду хепсиндӓн.

⁴Хепси койду кенди боллукларындан, ама бу кары кенди йоклуундан верди хепсини, не варды онда йашамак ичин».

⁵Ачан кимиси лафедӓрди Айоз бина ичин, ангысы гӧзӓл донакты кӓӓмил ташларлан хем баашышларлан, Иисус деди:

⁶«Гелеӂек вакыт, бурада калмайаӂэк таш ӱстӱндӓ таш, хепси йыкылаӂэк».

⁷Ӱӱрениӂилӓр Иисуса сордулар: «Ӱӱредиӂи, незаман буннар олаӂэк хем несой нышан гӧстереӂек буннарын йаклашмасыны?»

⁸Иисус ӂувап етти: «Бакын, алданмайасыныз. Зерӓ чойу гелеӂек Беним адыма да дейеӂек: „Бӓним Христос“ йада: „Вакыт гелди“. Сиз гитмейин оннарын ардына.

⁹Ачан ишидеӂениз ӂенклӓр ичин хем калкынмаклар ичин, коркмайын. Зерӓ илкин хепси буннар лӓӓзым олсун, ама биткиси тез гелмейеӂек».

¹⁰Ондан сора Иисус деди: «Миллет миллетӓ, падишахлык падишахлаа каршы калкаӂэк.

¹¹Кими ерлердӓ бӱӱк ер тепремелери, аачлык, салгыннар, башка титси ишлӓр хем бӱӱк нышаннар гӧктӓ олаӂэк.

¹²Хепсиндӓн ӧнӂӓ сизи тутаӂэклар хем коолайаӂэклар. Вереӂеклӓр синагогалара хем зынданнара, чыкараӂэклар сизи падишахларын хем кулланыӂыларын ӧнӱнӓ Беним адым ичин.

¹³Бу ишлӓр олаӂэк, ки шаатлык едӓсиниз Беним ичин.

¹⁴Буну ии аклынызда тутун: дӱшӱнмейин, насыл доорулуунузу чыкармаа.

¹⁵Зерӓ сизӓ аарифлик лафыныза вереӂӓм, да душманнарыныз сизӓ каршы дурамайаӂэк хем бишей дейӓмейеӂек.

¹⁶Оннарын еллеринӓ сизи вереӂеклӓр кенди ананыз, бобаныз, кардашларыныз, хысымнарыныз хем достларыныз. Кимисини сиздӓн ӧлдӱреӂеклӓр.

¹⁷Беним адым ичин сиздӓн хепси азетмейеӂек,

¹⁸ама бир дӓ сач башыныздан кайбелмейеӂек.

¹⁹Дайанмаклан сиз кендинизи куртараӂэныз.

²⁰Ачан гӧреӂениз Иерусалими, долайланмыш аскерлӓрлӓн, билӓсиниз, ани онун даалмасы йаклашты.

²¹Озаман, ким олаӂэк Иудейада, байырлара качсын. Ким булунаӂэк Иерусалим ичиндӓ, чыксын орадан. Ким олаӂэк кырда, гирмесин касабайа.

²²Буннар ӂеза гӱннери олаӂэк, ки таманнансын хепси, не йазылы.

²³О гӱннердӓ вай маамул хем ушак емзирӓн карылара! Зерӓ ер ӱстӱндӓ бир бӱӱк сыкынтылык олаӂэк, Аллахын ӱфкеси бу инсан ӱстӱнӓ гелеӂек.

²⁴Оннар кылычтан ӧлеӂек, есирлӓӓ хертӱрлӱ миллетлерӓ гӧтӱрӱлеӂек. Иерусалим йабанӂы миллетлӓрлӓн чииненмиш олаӂэк, озамана кадар, незаман миллетлерин вакытлары таманнанаӂэк.

²⁵Гӱндӓ, айда хем йылдызларда нышаннар олаӂэк. Ер ӱстӱндӓ сыкынтылык миллетлерин арасында олаӂэк. Оннар билмейеӂеклӓр, не йапсыннар денизин далгалары уултусундан.

²⁶Инсан байылаӂэк коркудан, белалары беклейерӓк, не дӱннӓ ӱстӱнӓ гелеӂек, зерӓ гӧкӱн куветлери сарсаланаӂэк.

²⁷Озаман гӧреӂеклӓр Адам Оолуну булут ичиндӓ гелӓркӓн бӱӱк куветлӓн хем метинниклӓн.

²⁸Ачан буннар башлайаӂэк олмаа, озаман доорулун хем калдырын бакышынызы йукары, зерӓ сизин куртулманыз йаклашты».

²⁹Сора бир ӧрнек сӧледи оннара: «Бакын инӂир фиданына хем калан фиданнара.

³⁰Ачан гӧрерсиниз оннары ешерӓркӓн, билерсиниз, ани йаз йакын.

³¹Хеп ӧлӓ, сиз дӓ ачан гӧреӂениз буннары олуркан, билин, ани Аллахын Падишахлыы йаклашэр.

³²Доору сӧлеерим сизӓ, ани бу бой инсан гечмейеӂек, хепси буннар таманнанмайынӂа.

³³Ер хем гӧк гечеӂек, ама Беним сӧзлерим хич гечмейеӂек.

³⁴Кенди-кендинизӓ есап алын, ки биртӱрлӱ аарлашмасын ӱреклериниз хобурлуктан, ичкиӂиликтӓн хем йашамак кахырларындан, да о гӱн гелмесин ап-ансыздан сизин ӱстӱнӱзӓ.

³⁵О гӱн аркан гиби гелеӂек бу ердӓ хепси йашайаннарын ӱстӱнӓ.

³⁶Херзаман олун ачыкгӧз хем дуа един, ки куртулабилӓсиниз хепси буннардан, не олаӂэк, да Адам Оолунун ӧнӱнӓ чыкабилӓсиниз».

³⁷Гӱндӱз Иисус ӱӱредӓрди Айоз бина ичиндӓ, ама авшамнен геӂелемӓӓ гидӓрди Зейтин байырына.

³⁸Инсан чин сабаалендӓн Айоз бинайа гелӓрди, ки сеслесин Ону.