Read Tungag ИИ ХАБЕР ЛУКАДАН 24 Bible Online

ИИ ХАБЕР ЛУКАДАН 24 - Tungag bible

ИИ ХАБЕР ЛУКАДАН 24

¹Хафтанын илк гӱнӱндӓ, чин сабаалӓн, бу карылар /хем башкалары да оннарлан барабар/ гелдилӓр мезары гӧрмӓӓ. Гетирдилӓр кокулу йаалары, ани хазырладыйдылар.

²Булдулар ташы, мезардан бир тарафа актарылмыш.

³Гирдилӓр ичйанына, ама Сааби Иисусун гӱӱдесини булмадылар.

⁴Ачан билмӓрдилӓр, не йапсыннар, бирдӓн гӧстерилди оннара ики адам, гиийимни йалабык рубайлан.

⁵Карылар корктулар да ерӓдӓн баш иилттилӓр, ама бу адамнар дедилӓр: «Нечин аарээрсыныз дирийи ӧлӱлерин арасында?

⁶О йок бурада, дирилди. Аклыныза гетирин, не сӧледийди, ачан таа Галилейадайды.

⁷О демишти: „Адам Оолу гӱнахкерлерин елинӓ верилеӂек, ставроза герилеӂек да ӱчӱнӂӱ гӱнӱ дирилеӂек“».

⁸Бу карылар аклына гетирдилӓр Иисусун лафларыны.

⁹Дӧнӱп мезардан, хепсини буннары онбир апостола хем калан инсана сӧледилӓр.

¹⁰Ким бу хабери гетирди, буннарды: Марийа Магдалина, Иоана, Марийа, Иаковун анасы, хем каланы, ким оннарлан барабарды.

¹¹Оннарын лафлары апостоллара гӧрӱндӱ бир масал гиби, онуштан инанмардылар.

¹²Ама Петри калкты да качты мезара. Етиштийнӓн, иилди да бакты ичйанына, ама кетен чаршафлардан каарӓ бишей гӧрмеди. Ондан сора дӧндӱ геери, шашарак буна, не олду.

¹³О гӱнӱ ики ӱӱрениӂи гидӓрди бир кӱӱйӓ, ани ады Еммаус, Иерусалимдӓн алтмыш стади [13] узаклыы.

¹⁴Оннар лафедӓрди бири-бириннӓн хепси ичин, не олду.

¹⁵Оннар лафедӓркӓн хем сорушаркан, Иисус Кенди йаклашты оннара, да барабар гиттилӓр.

¹⁶Оннарын гӧзлери капалыйды, ки танымасыннар Ону.

¹⁷Иисус сорду: «Сиз, гидӓркӓн, не лафедерсиниз?» Оннар бир кахырлы ӱзлӓн дурдулар.

¹⁸Оннардан бириси, ады Клеопа, деди Она: «Аӂаба, сӓн йалныз мыйсын Иерусалимдӓ йабанӂылардан, ким билмеер, не олду бурада бу гӱннердӓ?»

¹⁹«Не олду?» — сорду Иисус. Оннар ӂувап еттилӓр: «Хепси буннар олду Иисуслан Назареттӓн, Ангысы бир бӱӱк пророкту лафында хем ишиндӓ, Аллахын хем бӱтӱн инсанын ӧнӱндӓ.

²⁰Ама бизим бӱӱк попазлар хем ӧндерӂилӓр даава кестилӓр ӧлӱмӓ да ставроза гердилӓр Ону.

²¹Ама биз умутланардык, ани О куртараӂэк Израили. Да тӓ бӱӱн ӱчӱнӂӱ гӱн, ниӂӓ бу олду.

²²Бундан каарӓ, биркач кары арамыздан шашмайа бизи койдулар. Оннар, чин-сабаалӓн мезара гидип,

²³Онун гӱӱдесини булмадылар. Сора, гелип бизӓ, сӧледилӓр, ани ангиллери гӧрмӱшлӓр. Ангиллӓр оннара демиш, ани Иисус дирилди.

²⁴Кимиси биздӓн гиттилӓр мезара да гӧрдӱлӓр, ани хепси буннар ӧлӓ, ниӂӓ карылар сӧледилӓр, ама Ону гӧрмедилӓр».

²⁵«Не фикирсизсиниз сиз! — ӂувап етти Иисус. — Не зор инанэрсыныз пророкларын сӧледиклерини!

²⁶Дӱшмеер ми, Христос бӧлӓ зеетленсин, сора метинниинӓ етишсин?»

²⁷Сора башлады Моисейдӓн хем хепси пророклардан аннатмаа, не йазылы Онун ичин Айоз Йазыларда.

²⁸Йаклашып кӱӱйӓ, нерейи гидӓрдилӓр, Иисус йапылды, ани истеер гитмӓӓ таа илери.

²⁹Ама оннар йалвардылар Она да дедилӓр: «Кал бизимнӓн. Гӱн каушэр, геӂӓ олэр». О гирди, оннарлан калды.

³⁰Софрайа отурдуктан сора Иисус алды екмӓӓ, иисӧзледи, кырды да верди ӱӱрениӂилерӓ.

³¹Озаман ачылды гӧзлери, да таныдылар Ону, ама О гӧрӱнмӓз олду.

³²Оннар дейӓрдилӓр бири-биринӓ: «Аӂаба, йанмарды мы ӱреемиз, ачан О бизӓ йолда сӧлӓрди хем аннадарды Айоз Йазылары?»

³³Оннар хич ойаланмадылар, калкып, геери Иерусалимӓ дӧндӱлӓр. Орада булдулар онбир апостолу хем башка ӱӱрениӂилери, бирердӓ топлу,

³⁴ангылары сӧлӓрдилӓр бири-биринӓ: «Хакына, Сааби дирилди, гӧстерилди Симона».

³⁵Озаман бу ики ӱӱрениӂи сӧледилӓр, не олду оннарлан йолда, хем насыл таныдылар Иисусу, екмӓӓ кыраркан.

³⁶Бӧлӓ оннар лафедӓркӓн, Иисус Кендиси пейдаланды араларында да деди: «Услулук сизӓ!»

³⁷Оннар корктулар хем шаштылар, санып, ани гӧрерлӓр бир дух.

³⁸Ама О деди: «Нечин кахырланэрсыныз хем нечин икилеерсиниз ӱреениздӓ?

³⁹Бакын Беним еллеримӓ хем айакларыма. Бӓн Кендимим, диийин да бакын, зерӓ духун йок ети, не дӓ кемии, ниӂӓ гӧрерсиниз Бендӓ».

⁴⁰Ачан деди бу лафлары, гӧстерди оннара Кенди еллерини хем айакларыны.

⁴¹Оннар севинмектӓн хем шашмактан инанамардылар кенди гӧзлерини. Озаман Иисус деди: «Вар мы сиздӓ бурада бишей имӓӓ?»

⁴²Оннар вердилӓр Она бир парча пишмиш балык /хем бир парча гӧмеч балы/.

⁴³О алды да иди оннарын ӧнӱндӓ.

⁴⁴Сора деди: «Не сӧледийдим сизӓ, ачан таа булунардым сизиннӓн, ани хепси, не вар йазылы Моисейин Законунда, пророкларын кийатларында хем Псалмаларда Беним ичин, лӓӓзым таманнансын».

⁴⁵Озаман ачты оннарын фикирлерини, аннасыннар Айоз Йазылары.

⁴⁶Иисус деди: «Бӧлӓ йазылы, ани лӓӓзым зеетленсин Христос, ама ӱчӱнӂӱ гӱнӱ дирилсин ӧлӱдӓн.

⁴⁷Башлайып Иерусалим касабасындан, лӓӓзым насаат олсун Онун адыннан хепси миллетлерӓ, ки пишман олсуннар гӱнахларындан хем баашламак каблетсиннӓр.

⁴⁸Сиз шаатсыныз хепси бу ишлерӓ.

⁴⁹Бӓн йоллайаӂам сизӓ не аданмыш Беним Бобамдан. Сиз калын касаба ичиндӓ, кувет каблединӂӓ йукардан».

⁵⁰Иисус чыкарды оннары Иерусалимдӓн Вифанийа кӱӱйӱнӓ доору. Калдырды еллерини да иисӧзледи оннары.

⁵¹Ачан иисӧзлӓрди оннары, айырылды оннардан да калкты гӧкӓ.

⁵²Оннар баш иилттилӓр Она, сора дӧндӱлӓр Иерусалимӓ бӱӱк севинмӓклӓн.

⁵³Херзаман гидип Айоз бинайа, Аллахы метиннӓрдилӓр. /Амин./