Read Tungag ИИ ХАБЕР ЛУКАДАН 3 Bible Online

ИИ ХАБЕР ЛУКАДАН 3 - Tungag bible

ИИ ХАБЕР ЛУКАДАН 3

¹Падишах Тиверий Кесарын онбешинӂи чорбаӂылык йылында Понтий Пилат кулланыӂыйды Иудейада. Ирод Галилейанын кулланыӂысыйды. Филип, Иродун кардашы, кулланыӂыйды Итурейа хем Трахонит ерлериндӓ. Лисаний кулланыӂыйды Авилини ерлериндӓ.

²Аннан хем Кайафа баш попаздылар. О вакыт Аллах лафетти Иоана, Захарийанын оолуна, ангысы йашарды чоллукта.

³Иоан гитти Иордан суйун долай ерлеринӓ, насаат едерӓк, ани инсан лӓӓзым дӧнсӱн гӱнахларындан Аллаха хем ваатиз олсун, ки баашланмак еденсин.

⁴Бу олду, ниӂӓ йазылыйды пророк Исайанын кийадында: «Бааранын сеси чол ердӓ ишидилер: „Саабийӓ йолу хазырлайын, йолӂаазлары узладын.

⁵Хербир ойук долдурулсун, ӱӱсеклик алчалдылсын, иири йоллар узладылсын хем чукурлу йоллар дӱзледилсин.

⁶Хепси инсан аннасын Аллахтан куртулмайы“».

⁷Иоан данышты инсаннара, ангылары гелӓрди, ваатиз олсуннар, оннара дейип: «Йылан йаврулары, ким ӱӱретти сизи, качасыныз Аллахын гелӓр ӱфкесиндӓн?

⁸Йапыныз йакышыклы мейва, гӧрӱнсӱн, ани дӧндӱнӱз Аллаха гӱнахларыныздан, да бошуна дӱшӱнмейин, дейип: „Бизим бобамыз — Авраам“, зерӓ сӧлеерим сизӓ, ани Аллах бу ташлардан вар насыл йапсын ушак Авраама.

⁹Артык наӂак фиданын кӧкӱндӓ саплы дурэр. Хербир фидан, ани гетирмеер ии мейва, кесилеӂек да атешӓ атылаӂэк».

¹⁰Инсаннар сорардылар: «Е биз не йапалым?»

¹¹О ӂувап етти: «Кимдӓ вар ики руба, пайлашсын онуннан, кимдӓ хич йок, хеп ӧлӓ йапсын о да, кимдӓ имеелик вар».

¹²Гелди харччылар, ваатиз олсуннар дейни, да сордулар: «Ӱӱредиӂи, биз не йапалым?»

¹³О ӂувап етти: «Истӓмейин таа зеедӓ харч ондан каарӓ, не сизӓ сымарланмыш».

¹⁴Аскерлердӓн кимиси сордулар: «Е биз не йапалым?» О ӂувап етти: «Кимсейдӓн бишей алмайын коркутмаклан, кимсейи йалан лафларлан кабаатландырмайын, шӱкӱр олун ӧдеенизӓ».

¹⁵Инсан, чӱнкӱ беклӓрди, гелсин Христос, хепси дӱшӱнӓрди Иоан ичин: «Аӂаба, О диил ми Христос?»

¹⁶Иоан ӂувап етти хепсинӓ: «Бӓн сизи суйлан ваатиз едерим, ама беним ардыма гелер О, Ким таа каави бендӓн. Бӓн диилим йакышыклы чӧзмӓӓ Онун айак капларынын тасмаларыны. О сизи Айоз Духлан хем атешлӓн ваатиз едеӂек.

¹⁷Онун елиндӓ кӱрек, О паклайаӂэк тыназыны. Боодайы топлайаӂэк амбара, ама плӓвайы йакаӂэк сӱӱнмӓз атештӓ».

¹⁸Бутӱрлӱ насаат едӓрди Иоан Ии Хабери хем верӓрди чок башка насаатлар да.

¹⁹Иоан таказалады Ирод бейи о бетерӓ, ани о алды кендинӓ кенди кардашынын Филипин карысыны, Иродиадайы, хем хепси башка кӧтӱ ишлери ичин дӓ.

²⁰Бунун ичин Ирод капады Иоаны зындана.

²¹Хепси инсандан сора Иисус да ваатиз олду. О дуа едӓркӓн, ачылды гӧк,

²²Айоз Дух инди, гӧрӱнӓр гугуш тени гиби, Онун ӱстӱнӓ. Гӧктӓн ишидилди бир сес, ани деди: «Сӓнсин Беним севгили Оолум, Сендӓ Беним ислеелиим».

²³Ачан Иисус чекетти инсаны ӱӱретмӓӓ, О бир отуз йашындайды. Ниӂӓ инсан сайарды, О Иосифин оолу, Илинин оолу,

²⁴Матфатын оолу, Левийин оолу, Мелхийин оолу, Йаннайын оолу, Иосифин оолу,

²⁵Маттафийанын оолу, Амосун оолу, Наумун оолу, Еслийин оолу, Наггейин оолу,

²⁶Маафын оолу, Маттафийанын оолу, Семейин оолу, Иосихин оолу, Иоданын оолу,

²⁷Иоананын оолу, Рисанын оолу, Зоровавелин оолу, Салафиилин оолу, Нирийин оолу,

²⁸Мелхийин оолу, Аддийин оолу, Косамын оолу, Елмадамын оолу, Ирин оолу,

²⁹Иисусун оолу, Елиезерин оолу, Иоримин оолу, Матфатын оолу, Левийин оолу,

³⁰Симеонун оолу, Иуданын оолу, Иосифин оолу, Ионамын оолу, Елиакимин оолу,

³¹Мелеанын оолу, Меннанын оолу, Маттафанын оолу, Нафанын оолу, Давидин оолу.

³²Иессейин оолу, Овидин оолу, Воозун оолу, Саланын оолу, Наассонун оолу.

³³Аминадавын оолу, Админин оолу, Арнийин оолу, Есромун оолу, Фаресин оолу, Иуданын оолу,

³⁴Иаковун оолу, Исаакын оолу, Авраамын оолу, Фаранын оолу, Нахорун оолу,

³⁵Серухун оолу, Рагавын оолу, Фалекин оолу, Еверин оолу, Саланын оолу,

³⁶Каинанын оолу, Арфаксадын оолу, Симин оолу, Нойун оолу, Ламехын оолу,

³⁷Мафусаланын оолу, Енохун оолу, Иаретин оолу, Малелеилин оолу, Каинанын оолу,

³⁸Еносун оолу, Сифин оолу, Адамын оолу, Аллахын оолу.