Read Tungag ИИ ХАБЕР ЛУКАДАН 4 Bible Online

ИИ ХАБЕР ЛУКАДАН 4 - Tungag bible

ИИ ХАБЕР ЛУКАДАН 4

¹Иисус, долу Айоз Духлан, дӧндӱ Иордандан, да Дух гӧтӱрдӱ Ону чол ерӓ.

²Орада дененмиш олду диаволдан кырк гӱн. Бишей имеди о гӱннердӓ. Сонда аӂыкты.

³Диавол деди: «Еер Сӓн Аллахын Оолусайдын, сымарла бу таша, екмек олсун».

⁴Иисус ӂувап етти: «Йазылы, ани „Адам йашамээр салт екмеклӓн, /ама Аллахын хербир сӧзӱннӓн/“».

⁵Диавол пиндирди Ону бир ӱӱсек байыр ӱстӱнӓ да бир гӧз кыпымда гӧстерди хепси ерин падишахлыкларыны.

⁶О деди Она: «Сана вереӂӓм заабитлик хепси бу метинни падишахлыкларын ӱстӱнӓ, зерӓ оннар бана верили. Бӓн дӓ верерим, кимӓ истеерим.

⁷Еер баш иилдирсейдин бана, хепси олаӂэк Сенин».

⁸Иисус ӂувап етти: «/Чекил Бендӓн, шейтан, зерӓ/ вар йазылы: „Баш иилт сенин Сааби Аллахына хем салт Она измет ет“».

⁹Ондан сора диавол гӧтӱрдӱ Ону Иерусалимӓ, койду Айоз бинанын сачаана да деди: «Еер Сӓн Аллахын Оолусайдын, атыл бурадан ерӓ,

¹⁰зерӓ йазылы: „Аллах Кенди ангиллеринӓ сымарлайаӂэк, Сени корусуннар“

¹¹хем: „Сени куӂак алаӂэклар, урулмайасын айааннан бир таша дейни“».

¹²Иисус ӂувап етти: «Сӧленди: „Денӓмӓ сенин Сааби Аллахыны“».

¹³Ачан диавол Ону хертӱрлӱ денеди, сора гитти Ондан бир парча вакыда.

¹⁴Иисус Айоз Духун кувединнӓн дӧндӱ Галилейайа. Хабер Онун ичин даалды хепси долай ерлерӓ.

¹⁵О ӱӱредӓрди инсаны оннарын синагогаларында. Хепси Ону метиннӓрди.

¹⁶Иисус гелди Назарет касабасына, нередӓ бӱӱдӱйдӱ, Кенди алышмасына гӧрӓ, ӂумертеси гӱнӱ гирди синагога ичинӓ да калкты, окусун.

¹⁷Она вердилӓр пророк Исайанын кийадыны. О ачты кийады да булду о ери, нередӓ вар йазылы:

¹⁸«Саабинин Духу Беним ӱстӱмдӓ, О йаалады Бени, ии хабер гӧтӱрейим фукааралара. Йоллады Бени, /алыштырайым о фаланык ӱреклилери,/ насаат едейим есирликтӓ оланнара сербестлик, кӧӧрлара гӧрмӓк, зеетленмишлери колверейим сербестлӓӓ,

¹⁹хаберлейим аӂыйаннык йылыны Саабидӓн».

²⁰Сора капады кийады да верди изметчийӓ, Кендиси отурду еринӓ. Хепси, ким булунурду синагога ичиндӓ, бактылар Она.

²¹Озаман башлады оннара сӧлемӓӓ: «Бӱӱн таманнанды бу сӧзлӓр Айоз Йазыдан, ани шинди ишиттиниз».

²²Хепси ии лафедӓрдилӓр Онун ичин хем шашардылар, не кӓӓмил лафлар Онун аазындан чыкарды. «Диил ми О Иосифин оолу?» — сорардылар оннар бири-биринӓ.

²³Иисус оннара деди: «Шинди сиз сӧлейеӂениз Бана о сӧлейишин лафларыны: „Дофтор! Алыштыр илкин кенди-кендини“, йап бурада да, кенди ватанында, не ишиттик, йапмышын Капернаум касабасында».

²⁴Сора екледи: «Доору сӧлеерим сизӓ: бир дӓ пророк кабледилмеер ислӓӓ кенди ериндӓ.

²⁵Хакына сӧлеерим сизӓ, ани пророк Илийанын вакыдында, ачан китлендийди гӧк, йаамур йаамасын дейни ӱч йыл хем алты ай, незаман олду бӱӱк аачлык бӱтӱн мемлекеттӓ, о вакыт варды чок дул кары Израилдӓ.

²⁶Ама пророк Илийа йолланылмады бирисинӓ билӓ, ама салт дул карыйа Сарепта касабасындан, ани йакын Сидон касабасына.

²⁷Чок лепралы хаста варды Израилдӓ, ама пророк Елисейин вакыдында бириси билӓ пакланмады, саде Нааман Сирийадан».

²⁸Хепси, ким синагога ичиндейди, ишидип буну, пек ӱфкелендилӓр.

²⁹Калктылар да чектилӓр Ону касабадан дышары, гӧтӱрдӱлӓр байырда канаранын кенарына, нередӓ оннарын касабасы ерлешикти, ки атсыннар Ону дипсизлӓӓ.

³⁰Ама Иисус гечти оннарын арасындан да гитти.

³¹Бундан сора Иисус гитти Капернаум касабасына, Галилейа тарафына. Орада инсаны ӱӱредӓрди ӂумертеси гӱнӱ.

³²Оннар шашардылар Онун ӱӱретмесинӓ, зерӓ О лафедӓрди бӱӱк заабитликлӓн.

³³Синагога ичиндӓ варды бир адам, ангысында варды фена дух. Бу адам баарды бӱӱк сеслӓн:

³⁴«Брак бизи, не истеерсин биздӓн, Назаретли Иисус? Гелдин бизи телеф етмӓӓ? Билерим, кимсин Сӓн, Сӓн Аллах Айозуйсун!»

³⁵Ама Иисус таказалады ону да деди: «Сус да чык бу адамдан дышары!» Фена дух урду адамы ерӓ инсан арасында да сора чыкты дышары ондан. Йапмады бир дӓ зарар билӓ она.

³⁶Хепси шаштылар да лафедӓрдилӓр бири-бириннӓн: «Недир бу? О фена духлара заабитликлӓн хем куветлӓн сымарлээр, да оннар Ону сеслеер!»

³⁷Иисус ичин хабер даалды хепси долай ерлерӓ.

³⁸Чыкып синагогадан, Иисус гелди Симонун евинӓ. Симонун кайнанасы хастайды сытмадан, онуштан Иисуса йалвардылар, йардым етсин.

³⁹Иисус, иилип она, азарлады хасталыы, да сытма карыйы бракты. Кары чабук калкты да башлады измет етмӓӓ оннара.

⁴⁰Гӱн каушмасындан сора хепси, кимдӓ варды хаста оланнар хертӱрлӱ аарыларлан, гетирӓрдилӓр Иисуса, да О, койуп еллерини хербир хаста ӱстӱнӓ, алыштырарды оннары.

⁴¹Чойундан чыкарды фена духлар, ангылары баарардылар: «Сӓнсин Христос — Аллахын Оолу!» Ама О азарларды оннары да бракмарды сӧлесиннӓр, зерӓ оннар билӓрдилӓр, ани О Христос.

⁴²Ачан айдыннанмаа башлады, Иисус чыкты да гитти бир сапа ерӓ. Инсан аарарды Ону, да, булуп, тутардылар, гитмесин дейни оннардан.

⁴³Ама Иисус деди оннара: «Лӓӓзым башка касабаларда да насаат едейим Аллахын Падишахлыынын Ии Хаберини, зерӓ бунун ичин Аллах йоллады Бени».

⁴⁴О насаат едӓрди Иудейанын [1] синагогаларында.