Read Tungag ИИ ХАБЕР ЛУКАДАН 6 Bible Online

ИИ ХАБЕР ЛУКАДАН 6 - Tungag bible

ИИ ХАБЕР ЛУКАДАН 6

¹Бир ӂумертеси гӱнӱ разгелди, ки Иисус гечсин екиннӓр ичиндӓн. Онун ӱӱрениӂилери копарардылар башаклардан, фалайып еллериндӓ, ийӓрдилӓр.

²Фарисейлердӓн кимилери дедилӓр: «Нечин ӂумертеси гӱнӱ йапэрсыныз, не дӱшмеер?»

³Иисус ӂувап етти оннара: «Окумадыныз мы, не йапты Давид хем кафадарлары, ачан аӂыктылар?

⁴Гирди Аллахын евинӓ, алды екмеклери, ани Аллахын ӧнӱнӓ койуларды, иди хем верди кафадарларына, бакмайарак, ани, попазлардан каарӓ, кимсей дӱшмӓрди исин бу екмеклердӓн?»

⁵Хем таа деди оннара: «Адам Оолу — ӂумертесинин Саабиси».

⁶Башка бир ӂумертеси олду, Иисус гирди бир синагога ичинӓ да ӱӱредӓрди инсаны. Орада булунду бир адам, ангысынын саа ели курумушту.

⁷Билгичлӓр хем фарисейлӓр бакардылар Иисусун ардына, гӧрсӱннӓр, алыштыраӂэк мы ӂумертеси гӱнӱ, ки олсун нейлӓн кабаатландырсыннар Ону.

⁸Ама Иисус билӓрди оннарын неетлерини, онуштан деди о куру еллӓн адама: «Калк айакча да чык каршыйа». Бу адам калкты айакча.

⁹Иисус деди оннара: «Сорэрым сизӓ, не дӱшер ӂумертеси гӱнӱ йапмаа: иилик ми оса кӧтӱлӱк мӱ, йашамайы куртармаа мы оса телеф етмӓӓ ми?» Оннар сусардылар.

¹⁰Бакты хепсинӓ да сора бу адама деди: «Узат елини!» Ачан о узатты, ели енидӓн саа олду.

¹¹Фарисейлӓр кудурурдулар ӱфкедӓн. Оннар лафеттилӓр бири-бириннӓн, не йапсыннар Иисуслан.

¹²О гӱннердӓ Иисус пинди бир байыр ӱстӱнӓ, дуа етмӓӓ дейни, да бӱтӱн геӂейи гечирди дуа едерӓк Аллаха.

¹³Ачан айдыннанды, чаарды ӱӱрениӂилерини, сечти оннардан оники киши, ангыларыны адлады апостол. Тӓ оннарын адлары:

¹⁴Симон, ангысынын адыны Иисус койду Петри; Андрей, онун кардашы; Иаков; Иоан; Филип; Варфоломей;

¹⁵Матфей; Фома; Иаков, Алфейин оолу; Симон, адланмыш Зилот;

¹⁶Иуда, Иаковун оолу хем Иуда Искариот, ангысы сатты Иисусу.

¹⁷Сора Иисус гитти оннарлан барабар да дургунду бир дӱзлӱктӓ, нередӓ варды чок Онун ӱӱрениӂилериндӓн хем чоклук инсан, топлу бӱтӱн Иудейадан, Иерусалимдӓн, Тир хем Сидон касабаларын долайындан, ани дениз бойунда булунэрлар.

¹⁸Оннар гелдилӓр Ону сеслесиннӓр, хасталыкларындан алышсыннар хем фена духлардан зеетли оланнар куртулсуннар.

¹⁹Хепси инсан бакарды диисин Она, зерӓ Ондан чыкарды бир бӱӱк кувет да хепсини алыштырарды.

²⁰Озаман чевирди Иисус бакышыны ӱӱрениӂилеринӓ да деди: «Мутлу духтан фукаара оланнара, зерӓ сизин Гӧк Падишахлыы!

²¹Мутлу сизӓ, шинди аач оланнар, зерӓ сиз дойунаӂэныз! Мутлу сизӓ, ани шинди аалээрсыныз, зерӓ сиз гӱлеӂениз!

²²Мутлу сизӓ, ачан сиздӓн инсан азетмеер, синагогадан чыкарэр, фена лафедер хем кӧтӱлеер сизин адынызы Адам Оолунун бетеринӓ!

²³Севинин о гӱндӓ хем шенненин, зерӓ бӱӱктӱр сизин ӧдеениз гӧктӓ. Хеп бутӱрлӱ йаптылар оннарын бобалары пророкларлан.

²⁴Ама вай сизӓ, зенгин оланнар, зерӓ сиз бурада олдунуз сефалыкта!

²⁵Вай сизӓ, ани токсунуз шинди, зерӓ сиз аӂыкаӂэныз. Вай сизӓ, ани бӱӱн гӱлерсиниз, зерӓ сиз аалайаӂэныз хем сызлайаӂэныз!

²⁶Вай сизӓ, ачан сизин ичин инсан лафедер ислӓӓ, зерӓ хеп бӧлӓ йапарды оннарын бобалары йаланӂы пророкларлан!

²⁷Ама сизӓ, сеслейеннерӓ, деерим: севин душманнарынызы, йапын иилик оннара, ким сиздӓн азетмеер.

²⁸Иисӧзлейин оннары, ким сизи бетвалээр. Дуа единиз оннар ичин, ким сизи гӱӂендирер.

²⁹Урарсайды биркимсей сенин бир йанаана, чевир она ӧбӱр йанааны да. Зорлан аларсайды биркимсей ӱст рубаны, брак, алсын гӧлмеени дӓ.

³⁰Ким истеер сендӓн, вер она, хем ким зорлан алэр сендӓн, геери истӓмӓ ондан.

³¹Несой истеерсиниз, инсан сизиннӓн гӧтӱрсӱн кендини, ӧлӓ гӧтӱрӱнӱз сиз дӓ кендинизи инсаннан.

³²Еер севӓрсейдиниз салт оннары, ким сизи север, не шӱкӱрлӱк сизӓ? Гӱнахкерлӓр дӓ северлӓр оннары севеннери.

³³Еер йапарсайдыныз иилик оннара, ким сизӓ иилик йапэр, не шӱкӱрлӱк сизӓ? Хеп бӧлӓ гӱнахкерлӓр дӓ йапэрлар.

³⁴Еер верӓрсейдиниз ӧдӱнч оннара, кимдӓн умутланэрсыныз геери алмаа, не шӱкӱрлӱк сизӓ? Гӱнахкерлӓр дӓ верерлӓр ӧдӱнч гӱнахкерлерӓ, ки сора хеп окадар геери алсыннар.

³⁵Ама сиз душманнарынызы севин, иилик оннара йапын. Верин ӧдӱнч, дӱшӱнмейерӓк геери бишей алмаа. Озаман бӱӱк ӧдек олаӂэк сизӓ. Сиз олаӂэныз Пек ӱӱсек Аллахын ооллары, зерӓ О иилик йапэр оннара да, ким шӱкӱр етмеер хем феналык йапэр.

³⁶Олун аӂыйан, ниӂӓ сизин Бобаныз аӂыйан.

³⁷Даава кесмейин, Аллах да сизӓ даава кесмейеӂек. Мааналамайын, Аллах да сизи мааналамайаӂэк. Афедин, Аллах да сизи афедеӂек.

³⁸Верин, Аллах да сизӓ вереӂек чалканмыш, басылмыш хем тепеленмиш, ӂӧмертли хем койнунуза дӧкӱлӱ. Зерӓ, не ӧлчӱйлӓн ӧлчеӂениз, о ӧлчӱйлӓн Аллахтан ӧлчӱлӱ олаӂэныз».

³⁹Сӧледи сора бир ӧрнек: «Вар мы насыл бир кӧӧр йолу гӧстерсин башка кӧӧра? Аӂаба, дӱшмейеӂеклӓр ми икиси дӓ куйу ичинӓ?

⁴⁰Ӱӱрениӂи диил таа бӱӱк ӱӱредиӂисиндӓн. Ама ӂӱмлӓ ӱӱренменин биткисиндӓ вар насыл етишсин ӱӱредиӂисини.

⁴¹Нечин гӧрерсин кыймыы сенин кардашын гӧзӱндӓ, ама кенди гӧзӱндӓ казыы есап алмээрсын?

⁴²Насыл сӓн дейӓсин кардашына: „Кардаш, брак, чыкарайым кыймыы сенин гӧзӱндӓн“, ачан кенди гӧзӱндӓ казык дурэр? Икиӱзлӱ, илкин чыкар казыы кенди гӧзӱндӓн да сора ачык гӧреӂӓн, насыл чыкармаа кыймыы кардашынын гӧзӱндӓн.

⁴³Ии фидан йок насыл йапсын йабан мейвасы. Хеп ӧлӓ йабан фиданы да йок насыл йапсын ии мейва.

⁴⁴Зерӓ хербир фидан танынэр мейвасындан. Кимсей топламээр инӂир тикенни гӱмедӓн еки ӱзӱм салкымы чалыдан.

⁴⁵Ии адам чыкарэр ии ишлӓр ии ӱрӓӓн хазнасындан. Кӧтӱ адам чыкарэр кӧтӱ ишлӓр кӧтӱ ӱрӓӓн хазнасындан. Зерӓ адамын аазы лафедер ӱрӓӓн ташкынныындан.

⁴⁶Нечин деерсиниз: „Сааби, Сааби“, ама йапмээрсыныз, не сӧлеерим Бӓн?

⁴⁷Аннадаӂам сизӓ, кимӓ бензеер адам, ангысы сеслеер хем таманнээр Беним сӧзӱмӱ.

⁴⁸О бензеер бир адама, ангысы йапты бир ев. Илкин, казып дерин, темелини ерлештирди таш ӱстӱнӓ. Ачан ӱӱштӱ селли сулар ев ӱстӱнӓ, ев кымылдамады, зерӓ каави йывылмышты [2].

⁴⁹Ама ким ишидер да таманнамээр, о бензеер адама, ангысы йапты евини ер ӱстӱндӓ, темелсиз. Ачан селлӓр ӱӱштӱлӓр, осаат ев йыкылды. Онун йыкылмасы титси олду».