Read Tungag ИИ ХАБЕР ЛУКАДАН 8 Bible Online

ИИ ХАБЕР ЛУКАДАН 8 - Tungag bible

ИИ ХАБЕР ЛУКАДАН 8

¹Бундан сора Иисус гезӓрди касабадан касабайа хем кӱӱдӓн кӱӱйӓ да насаат едӓрди хем хаберлӓрди Ии Хабери Аллахын Падишахлыы ичин оники ӱӱрениӂисиннӓн барабар.

²Онуннан варды биркач кары да, ангыларыны О куртардыйды фена духлардан хем дертлериндӓн: Марийа Магдалина, ангысындан чыкарды еди фена дух;

³Иоана, Хузанын карысы, ани Иродун евини кулланарды; Сусанна хем башкалары. Оннар йардым едӓрдилӓр нейлӓн варды колайлыклары.

⁴Ачан топланды чок инсан, гелмӓ хербир касабадан, Иисус сӧледи бӧлӓ бир ӧрнек:

⁵«Екиӂи чыкты тоом екмӓӓ. Ачан екӓрди, тоомнардан биразы дӱштӱ йол бойуна. Оннар чииненди айакларын алтында хем гӧк кушлары идилӓр оннары.

⁶Башка тоомнар ташлар ӱстӱнӓ дӱштӱлӓр. Ачан филизлендилӓр, тез курудулар, зерӓ йокту нередӓн немник чексиннӓр.

⁷Таа башка тоомнар чалылар ичинӓ дӱштӱлӓр. Чалылар бӱӱдӱлӓр оннарлан барабар да буулттулар филизлери.

⁸Ама калан тоомнар ии топраа дӱштӱлӓр. Оннар бӱӱдӱлӓр да гетирдилӓр ӱз катына берекет». Бу ӧрнӓӓ сӧледиктӓн сора Иисус бӱӱк сеслӓн деди: «Кимин вар кулаа ишитмӓӓ дейни, ко ишитсин!»

⁹Онун ӱӱрениӂилери сордулар: «Не аннамасы вар бу ӧрнӓӓн?»

¹⁰О ӂувап етти: «Сизӓ верилди, аннайасыныз Аллахын Падишахлыынын саклылыкларыны, ама каланына сӧленер ӧрнеклӓрлӓн. Ӧлӓ ки, оннар баксын, да гӧрмесин, ишитсин, да аннамасын.

¹¹Тӓ не аннамасы вар бу ӧрнӓӓн. Тоом — Аллахын сӧзӱ.

¹²Тоомнар, ани дӱштӱлӓр йол бойуна, оннардыр, ким ишидер сӧзӱ, ама диавол, гелип, чалэр сӧзӱ оннарын ӱреклериндӓн, инанмасыннар хем куртулмасыннар дейни.

¹³Тоомнар, ани дӱштӱлӓр ташлар ӱстӱнӓ, оннардыр, ким кабледер сӧзӱ севинмӓклӓн, ама кӧклешӓмеер, онун ичин инанэр бир вакыдадан, ама ачан гелер денемеклӓр, дӱшер.

¹⁴Тоомнар, ани дӱштӱлӓр чалылар арасына, оннардыр, ким ишидер сӧзӱ, ама йолларында гидӓркӓн, йашаманын кахырларыннан, зенгиннииннӓн, майыллыыннан буулэрлар, да берекет вермеерлӓр.

¹⁵Тоомнар, ани дӱштӱлӓр ии топраа, оннар, ким, ишидип сӧзӱ, койэр ии хем темиз ӱреенӓ, да гетирер берекет сабурлукта. Солейип буну, О деди: «Кимин вар кулаа ишитмӓӓ дейни, ко ишитсин!»

¹⁶Кимсей тутуштурмээр шафкы, ки койсун ону кап алтына еки пат алтына, ама койэр кандиллик ӱстӱнӓ, ки оннар, ким гирер, гӧрсӱннӓр айдынныы.

¹⁷Зерӓ йок бишей саклы, ани ачылмасын, хем йок бишей ӧртӱлӱ, ани ӱзӓ чыкмасын да айдынныкта гӧрӱнмесин.

¹⁸Бакын, ниӂӓ сеслеерсиниз, зерӓ кимдӓ вар, она таа чок верилеӂек, ама кимдӓ йок, ондан алынаӂэк, не санэр, ани вар онда».

¹⁹Иисусун анасы хем кардашлары гелдилӓр Она, ама йаклашамадылар Она калабалык бетеринӓ.

²⁰Биркимсей деди Иисуса: «Сенин анан хем кардашларын, дышарда дуруп, истеерлӓр Сениннӓн гӧрӱшмӓӓ».

²¹Ама Иисус ӂувап етти: «Беним анам хем кардашларым оннар, ким сеслеер хем таманнээр Аллахын сӧзӱнӱ».

²²Бир гӱн Иисус пинди бир кайык ичинӓ ӱӱрениӂилериннӓн барабар да деди оннара: «Гечелим гӧлӱн ӧтӓӓнна». Оннар йолландылар.

²³Кайыклан ӱзӓркӓн, Иисус уйуду. Гӧл ӱстӱндӓ ӧлӓ бир кескин лӱзгӓр есмӓӓ башлады, ани долдурурду кайыы суйлан. Хепси бир бӱӱк хатада булунарды.

²⁴Йаклаштылар Иисуса, уйандырдылар Ону да дедилӓр: «Ӱӱредиӂи, Ӱӱредиӂи, кайбелериз!» Иисус уйанды, азарлады лӱзгери хем кабаран далгалары. Оннар усландылар, да бир сус олду.

²⁵Сора деди ӱӱрениӂилеринӓ: «Нӓӓнда инаныныз?» Долу коркуйлан, шашарак, оннар бири-биринӓ дейӓрдилӓр: «Кимдир Бу, Ким сымарлээр артык лӱзгерӓ хем далгалара, да оннар Ону сеслеерлӓр?»

²⁶Гелдилӓр кайыклан Гераса ерлеринӓ, ани Галилейайа каршы.

²⁷Ачан Иисус инди кенара, Она каршы чыкты бир адам касабадан, фена духлардан тутулмуш. Чок вакыттан беери гиимӓрди руба, йашамарды евдӓ, ама мезар лаамнары ичиндӓ.

²⁸Гӧрӱп Иисусу, бир кескин сеслӓн баарды да дӱштӱ Онун ӧнӱндӓ, бир бӱӱк сеслӓн дейип: «Нейин вар бенимнӓн, Иисус, Пек ӱӱсек Аллахын Оолу! Йалварэрым, зеетлӓмӓ бени!»

²⁹Иисус сымарладыйды фена дух чыксын бу адамдан, зерӓ запламышты ону чок вакыттан беери. Инсаннар ону тутардылар баалы синӂирлӓрлӓн хем алкаларлан, ки беклесиннӓр. Ама о копарарды синӂирлери хем алкалары, да фена дух кооларды ону чол ерлерӓ.

³⁰Иисус сорду она: «Несой сенин адын?» О ӂувап етти: «Легион [3]», зерӓ онда варды чок фена дух.

³¹Фена духлар Иисуса йалварардылар, ки сымарламасын гитсиннӓр дипсизлӓӓ.

³²Бурада, байыр йамаӂында отларды бир бӱӱк сӱрӱ домуз. Фена духлар йалвардылар Она, изин версин гирсиннӓр домузлара. Иисус изин етти.

³³Фена духлар, чыкып бу адамдан, гирдилӓр домузлар ичинӓ, да озаман бӱтӱн сӱрӱ хызланды дик йамачтан, атлады гӧл ичинӓ да буулду.

³⁴Ачан домузчулар гӧрдӱлӓр, не олду, качтылар да хаберледилӓр касабада хем кӱӱлердӓ.

³⁵Инсан чыкты, гӧрсӱн, не олду. Оннар гелдилӓр Иисуса да булдулар адамы, ангысындан чыкты фена духлар, отурарак Иисусун айакларында, гиийимни хем аклы башында. Хепсини бир корку алды.

³⁶Оннар, ким гӧрдӱ, не олду, аннаттылар, насыл алыштырылды бу адам, ангысындан чыкарылды фена духлар.

³⁷Хепси инсан Гераса ериндӓн йалвардылар, Иисус гитсин оннардан, зерӓ пек корктуйдулар. Иисус гирди кайык ичинӓ да геери дӧндӱ.

³⁸Бу адам, ангысындан чыкарылды фена духлар, йалварарды, ки алсын ону да Кендисиннӓн, ама О йоллады ону евӓ да деди:

³⁹«Гит евӓ да сӧлӓ, не йапты Аллах сениннӓн». О гитти да сӧледи бӱтӱн касабада хепсини, не йапты она Иисус.

⁴⁰Ачан Иисус дӧндӱ геери, инсан Ону каблетти севинмӓклӓн, зерӓ хепси Ону беклӓрдилӓр.

⁴¹Гелди бир адам, ады Иаир, синагогадан бир ӧндерӂи. О дӱштӱ Иисусун айакларына да йалварды, гелсин она евӓ,

⁴²зерӓ онун бириӂик кызы, бир оники йашында, ӧлӱм дӧшеендейди. Иисус гидӓркӓн, инсан хер тарафтан сыкыштырарды Ону.

⁴³Бир кары, хаста кан акмасындан оники йылдан беери, ангысы /харӂамышты бӱтӱн варлыыны дофторлара, ама/ кимсей ону алыштырамамышты,

⁴⁴йаклашты ардындан Иисуса да дииди Онун рубасынын етеенӓ. Бирдӓн кан акмасы дургунду.

⁴⁵Иисус деди: «Ким дииди Бана?» Чӱнкӱ хепси атылырдылар, Петри хем оннар, ким онуннанды, дедилӓр Иисуса: «Ӱӱредиӂи, доз-долай инсан сени сыкыштырэр хем итирер, Сӓн дӓ сорэрсын: „Ким дииди Бана“?»

⁴⁶Ама Иисус ӂувап етти: «Бана биркимсей дииди, зерӓ дуйдум, ани бир кувет чыкты Бендӓн».

⁴⁷Ачан кары гӧрдӱ, ани тутулду, йаклашты Иисуса, титирейерӓк дӱштӱ Онун айакларына да сӧледи хепси инсана, не бетерӓ о дииди Она, хем ниӂӓ хемен алышты хасталыындан.

⁴⁸Иисус деди: «Гиргиннӓн, кызым! Сенин инанын сени алыштырды, гит услулуклан».

⁴⁹Иисус таа лафедӓркӓн, евдӓн бириси гелди да синагога ӧндерӂисинӓ деди: «Кызын ӧлдӱ, наафилӓ саваштырма Ӱӱредиӂийи».

⁵⁰Ама, ачан Иисус ишитти буну, деди она: «Коркма, саде инан, кыз куртулаӂэк».

⁵¹Ачан етишти онун евинӓ, бракмады кимсей гирсин Онуннан, саде Петрийи, Иоаны, Иакову, кызын бобасыны хем анасыны.

⁵²Хепси аалардылар хем сыралардылар. Иисус деди: «Ааламайын, кыз ӧлмеди, ама уйуйэр».

⁵³Оннар гӱлмӓӓ алдылар Ону, зерӓ билӓрдилӓр, ани кыз ӧлдӱ.

⁵⁴Ачан хепсини чыкарды дышары, Иисус тутту кызы елиндӓн да бӱӱк сеслӓн деди: «Калк, кызым!»

⁵⁵Кызын духу дӧндӱ геери, да о чабук калкты. Иисус сымарлады, версиннӓр кыза имӓӓ.

⁵⁶Кызын бобасы хем анасы шаш-беш калдылар. Иисус деди оннара, ки бу олуш ичин сӧлӓмесиннӓр кимсейӓ.