Read Tungag ИИ ХАБЕР ИОАНДАН 1 Bible Online

ИИ ХАБЕР ИОАНДАН 1 - Tungag bible

ИИ ХАБЕР ИОАНДАН 1

¹Баштан Сӧз варды, Сӧз Аллахтайды, Сӧз Аллахты.

²Баштан О Аллахтайды.

³Хепси Онуннан курулду, Онсуз бишей курулмады.

⁴Онда йашамак варды. Йашамак инсан ичин айдынныкты.

⁵Айдыннык каранныкта шафк едер, караннык ону енсейӓмеди.

⁶Аллахтан бир адам гелди, онун ады Иоан.

⁷Гелди Айдыннык ичин шаатлык етсин, хепси инсан онун ашыры инансын.

⁸О Кенди диилди Айдыннык, ама гелди Айдыннык ичин сӧлесин.

⁹Одур хакына Айдыннык, Ангысы хербир адамы, бу дӱннейӓ гелӓн, айдыннадэр.

¹⁰О Кенди бу дӱннейӓ гелди. Дӱннӓ Онун ашыры йарадылды, ама дӱннӓ Ону танымады.

¹¹Кендикилеринӓ гелди, кендикилери Ону каблетмеди.

¹²Ама хепси оннар, ким Ону каблетти, ким Онун адына инанды, О изин верди оннар олсун Аллахын ушаклары,

¹³ангылары диил кандан, диил еттӓн хем диил адам истедииндӓн, ама Аллахтан дууду.

¹⁴Сӧз адам олду, бизим арамызда йашады, иивергийлӓн хем аслылыклан долу. Онун метинниини гӧрдӱк, ниӂӓ Бобадан бириӂик Оолун метинниини.

¹⁵Иоан Онун ичин шаатлык етти да бӱӱк сеслӓн бӧлӓ деди: «Будур О, Кимин ичин хаберледим: „О, Ким бендӓн сора гелер, таа ӱстӱн бендӓн, зерӓ Бендӓн таа илерийди“.

¹⁶Онун долушундан хепсимиз ииверги ӱстӱнӓ ииверги едендик».

¹⁷Зерӓ Закон Моисей ашыры верилди, ама хайыр хем аслылык Иисус Христос ашыры гелди.

¹⁸Аллахы бир сыра билӓ кимсей гӧрмеди. Бириӂик Оол, Аллах, ким Бобанын куӂаанда булунэр, О Аллахы ачты.

¹⁹Тӓ не сӧледи Иоан, ачан Иерусалимдӓн иудейлӓр йолладылар попазлары хем левийлилери она, сорсуннар: «Кимсин сӓн?»

²⁰Иоан ачык сӧледи, атылмады, бӧлӓ лафетти: «Бӓн диилим Христос».

²¹«Е кимсин сӓн? Илийайсын мы?» — сордулар оннар. «Диилим», — деди о. «Бекленӓн пророксун му?» «Диилим», — ӂувап етти о.

²²«Озаман кимсин сӓн, сӧлӓ бизӓ, ки билелим, не ӂувап етмӓӓ оннара, ким бизи йоллады. Не вар ниӂӓ сӓн сӧлейӓсин кендин ичин?» — сорду оннар.

²³О деди: «Бӓн — бир сес, чол ердӓ бааран: „Саабийӓ йолу узладын“, ниӂӓ пророк Исайа деди».

²⁴Озаман йолланмышлар фарисейлердӓн Она сордулар:

²⁵«Еер сӓн диилсейдин не Христос, не Илийа, не дӓ бекленӓн пророк, озаман нечин ваатиз едерсин?»

²⁶Иоан ӂувап етти оннара: «Бӓн суйлан ваатиз едерим, ама аранызда дурэр Бириси, Ангысыны сиз танымээрсыныз.

²⁷Одур, бендӓн сора гелӓн, /ама бендӓн ӱстӱн олан/. Бӓн диилим йакышыклы чӧзмӓӓ Онун айак капларынын тасмаларыны».

²⁸Бу олду Вифаварада [1], Иорданын ӧтӓӓнда, нередӓ Иоан ваатиз едӓрди.

²⁹Ертеси гӱнӱ гӧрер Иоан Иисусу, гелерӓк она доору, да деер: «Тӓ, Аллахын Кузусу, Ангысы алэр дӱннейин гӱнахыны!

³⁰Будур О, Кимин ичин сизӓ хаберледим, дейип: „Бендӓн сора гелер Адам, ани таа ӱстӱн бендӓн, зерӓ бендӓн илерийди“.

³¹Бӓн Ону танымардым, ама суйлан ваатиз етмӓӓ гелдим, ки Израил инсанына таныдылсын».

³²Иоан деди: «Бӓн гӧрдӱм Айоз Духу, гӧктӓн гугуш гиби инерӓк да Онун ӱстӱнӓ конарак.

³³Ону танымардым, ама О, Ким йоллады, ваатиз едейим, бана деди: „Бак, кимин ӱстӱнӓ Айоз Дух инерӓк конаӂэк, Одур, Ким Айоз Духлан ваатиз едеӂек“.

³⁴Бӓн буну кендим гӧрдӱм хем шаат олдум, ани Одур Аллахын Оолу».

³⁵Ертеси гӱнӱ Иоан ӱӱрениӂилериндӓн икисиннӓн булунарды.

³⁶Иисусу орадан гечӓркӓн гӧрдӱ да деди: «Тӓ, Аллахын Кузусу!»

³⁷Ӱӱрениӂилӓр, ишидип лафлары, икиси дӓ Иисусун ардына гиттилӓр.

³⁸Иисус дӧндӱ да, гӧрӱп оннары ардына гелиркӓн, деди: «Не аарээрсыныз?» Оннар дедилӓр Она: «Равви (аннамасы Ӱӱредиӂи), нередӓ йашээрсын?»

³⁹«Гелин да гӧрӱн», — ӂувап етти Иисус. Оннар гиттилӓр да гӧрдӱлӓр нередӓ йашээр, да о гӱнӱ Онуннан калдылар. Йакынды онунӂу [2] саат.

⁴⁰Бириси икисиндӓн, ани Иоанын шаатлыыны ишитти да Иисусун ардына гитти, Андрей, Симон Петринин кардашыйды.

⁴¹О илкин кенди кардашыны Симону булуп, деди она: «Биз булдук Мессийайы (аннамасы Христос)».

⁴²Гӧтӱрдӱ ону Иисуса. Иисус, ачан гӧрдӱ Симону, деди: «Сӓн — Симон, Иоанын оолу. Сенин адын олаӂэк Кифа (аннамасы таш [3])».

⁴³Ертеси гӱнӱ Иисус истеди гитсин Галилейайа. О, булуп Филипи, деди она: «Гел Беним ардыма».

⁴⁴Филип булунарды Вифсаида касабасында, нередӓн Андрей хем Петри.

⁴⁵Филип булду Нафанаили да деди она: «Биз булдук Ону, Кимин ичин Моисей Законда хем пророклар йазды, Иисусу Назарет касабасындан, Иосифин Оолуну».

⁴⁶Нафанаил деди она: «Вар мы ниӂӓ бишей ислӓӓ чыксын Назарет касабасындан?» «Сӓн гел дӓ гӧр», — ӂувап етти Филип.

⁴⁷Иисус, гӧрӱп Нафанаили гелиркӓн, деди онун ичин: «Тӓ, бу бир хакына Израил адамы, ангысында йок шалвирлик!»

⁴⁸«Нӓӓндан билерсин?» — сорду Нафанаил. Иисус ӂувап етти: «Гӧрдӱм сени, ачан Филип таа чаармадыйды, ачан сӓн булунурдун инӂир фиданын алтында».

⁴⁹Нафанаил деер Она: «Ӱӱредиӂи, Сӓнсин Аллахын Оолу, Сӓнсин Израилин Падишахы!»

⁵⁰Иисус ӂувап етти: «Сӓн инандын, зерӓ дедим: „Гӧрдӱм сени инӂир фиданын алтында“. Сӓн бундан таа бӱӱк ишлӓр гӧреӂӓн».

⁵¹Сора деди: «Доору, доору сӧлеерим сизӓ, ани бӱӱндӓн ӧтӓӓ гӧреӂениз ачылмыш гӧклери хем Аллахын ангиллерини пинерӓк хем инерӓк Адам Оолуна».