Read Tungag ИИ ХАБЕР ИОАНДАН 11 Bible Online

ИИ ХАБЕР ИОАНДАН 11 - Tungag bible

ИИ ХАБЕР ИОАНДАН 11

¹Варды бир хаста адам, ады Лазар, Вифанийа кӱӱйӱндӓн, нередӓнди Марийа хем кызкардашы Марфа.

²Марийа о карыйды, ани йаалады Саабийи ии кокулуклан да силди айакларыны кенди сачларыннан. Хаста Лазар Марийанын кардашыйды.

³Бу кызкардашлар йолладылар, сӧлесиннӓр Иисуса: «Сааби, кими Сӓн северсин, хасталанды».

⁴Иисус, ачан ишитти бу хабери, деди: «Бу хасталык диил ӧлӱмӓ дейни, ама Аллахын метиннии ичин олду, ки бунун ашыры Аллахын Оолу метинненсин».

⁵Иисус севӓрди Марфайы, онун кызкардашыны хем Лазары.

⁶Ачан ишитти, ани Лазар хаста, таа ики гӱн ойаланды орада, нередӓ булунарды.

⁷Сонда деди ӱӱрениӂилеринӓ: «Хайдийин, дӧнелим Иудейа ерлеринӓ!»

⁸«Ӱӱредиӂи, шинди диил чоктан иудейлӓр Сени бакардылар ӧлдӱрмӓӓ ташлан, Сӓн дӓ геери дӧнерсин орайы мы?» — деди ӱӱрениӂилӓр.

⁹Иисус ӂувап етти: «Бир гӱндӓ диил ми оники саат? Ким гезер гӱндӱз, о сӱрчмеер, зерӓ гӧрер бу дӱннейин айдынныыны,

¹⁰ама ким гезер геӂӓ, о сӱрчер, зерӓ онда йок айдыннык».

¹¹Бу лафлардан сора деди: «Лазар, бизим достумуз, уйуду, ама Бӓн гидерим, уйкудан уйандырайым ону».

¹²Ӱӱрениӂилӓр дедилӓр: «Сааби, еер уйуйарсайды, алышаӂэк».

¹³Иисус лафеттийди онун ӧлӱмӱ ичин, ама оннар сандылар, ани лафедер хакына уйку ичин.

¹⁴Озаман Иисус ачык сӧледи: «Лазар ӧлдӱ.

¹⁵Бӓн севинерим, ани йоктум орада, ки инанасыныз. Хайдийин, гиделим она».

¹⁶Озаман Фома, ангысына денер Икиз, деди калан ӱӱрениӂилерӓ: «Хайдийин, гиделим биз дӓ Онуннан ӧлелим».

¹⁷Ачан гелди Иисус, аннады, ани Лазар дӧрт гӱн шиндӓн сора мезар ичиндӓ.

¹⁸Вифанийа кӱӱйӱ йакынды Иерусалим касабасына, узаклыы бир онбеш стади [13].

¹⁹Чойу иудейлердӓн гелдийдилӓр Марфайа хем Марийайа, ки иилендирсиннӓр оннары кардашын ӧлӱмӱ ичин.

²⁰Ачан ишитти Марфа, ани Иисус гелер, чыкты Она каршы, ама Марийа калды ичердӓ.

²¹Марфа деди Иисуса: «Сааби, еер Сӓн олайдын бурада, ӧлмейеӂейди беним кардашым!

²²Ама шинди билерим, ани не истейеӂӓн Аллахтан, О вереӂек Сана».

²³Иисус деди: «Сенин кардашын дирилеӂек».

²⁴Марфа деди: «Билерим, ани дирилеӂек битки гӱндӓ, ӧлӱлерин дирилмесиндӓ».

²⁵Иисус деди: «Бӓним дирилмӓк хем йашамак. Ким инанэр Бана, еер ӧлӱрсейди дӓ, хеп окадар йашайаӂэк.

²⁶Ким Бана йашаркан инанэр, о хич ӧлмейеӂек. Инанэрсын мы сӓн буну?»

²⁷Марфа деди Она: «Инанэрым, Сааби, ани Сӓнсин Христос, Аллахын Оолу, Ангысы лӓӓзымды гелсин бу дӱннейӓ».

²⁸Ачан деди бу лафлары, гидип, саклы чаарды кызкардашыны да деди: «Ӱӱредиӂи бурада, О чаарэр сени».

²⁹Марийа ишиттии гиби буну, хызлы калкты да чыкты Иисуса каршы.

³⁰Иисус кӱӱ ичинӓ таа гирмедийди, О дурарды хеп орада, нередӓ каршы етти Ону Марфа.

³¹Иудейлӓр, ани ичердӓ булунардылар Марийайлан билӓ да иилендирӓрдилӓр ону, гӧрӱп, ани о хызлы калкты да чыкты дышары, гиттилӓр онун ардына. Сандылар, ани о гидер мезара, ааламаа.

³²Марийа, ачан етишти орайы, нередейди Иисус, гӧрӱп Ону, дӱштӱ Онун айакларына да деди: «Сааби, еер Сӓн олайдын бурада, ӧлмейеӂейди беним кардашым».

³³Ачан Иисус гӧрдӱ ону ааларкан хем иудейлери, ани гелдилӓр онуннан, гӱӂенди ӂанында да кахырланды.

³⁴Сора сорду: «Нередӓ ону койдунуз?» «Сааби, — ӂувап еттилӓр оннар, — гел да гӧр».

³⁵Иисус ааларды.

³⁶Озаман иудейлӓр дедилӓр: «Йа бак, О не севӓрди ону!»

³⁷Ама кимиси оннардан дедилӓр: «О, ани ачты кӧӧрларын гӧзлерини, не йокту му ниӂӓ йапсын, ки бу адам да ӧлмесин?»

³⁸Сора Иисус, ӧлӓ кахырлы, гелди мезара. Мезар бир лаамды, аазына да бир таш койулуйду.

³⁹«Актарын ташы бир тарафа», — деди Иисус. Марфа, ӧлӱнӱн кызкардашы, деди: «Сааби, о бет кокэр, зерӓ шиндӓн сора дӧрт гӱн, ниӂӓ ӧлдӱ».

⁴⁰Иисус деди: «Бӓн сана сӧлӓмедим ми, ани еер инанарсайдын, гӧреӂӓн Аллахын метинниини?»

⁴¹Актардылар ташы /лаам аазындан, нередейди ӧлӱ/. Иисус, калдырып бакышыны гӧкӓ, деди: «Боба, шӱкӱр едерим, ани ишиттин Бени.

⁴²Билерим, ани херзаман ишидерсин Бени, ама буну деерим бу инсан ичин, ани бурада дурэр, ки оннар инансыннар, ани Сӓн Бени йолладын».

⁴³Бу лафлардан сора баарды бӱӱк сеслӓн: «Лазар, чык дышары!»

⁴⁴Ӧлӱ чыкты, еллери хем айаклары баалы безлӓрлӓн, сураты да сарылы пешкирлӓн. Иисус деди: «Чӧзӱн ону, да гидӓбилсин».

⁴⁵Чойу иудейлердӓн, ангылары гелдийдилӓр Марийайа, гӧрӱп не йапты Иисус, инандылар Она.

⁴⁶Ама кимиси гиттилӓр фарисейлерӓ да сӧледилӓр, не йапты Иисус.

⁴⁷Озаман бӱӱк попазлар хем фарисейлӓр топладылар Синедриону да дедилӓр: «Не йапалым? Бу Адам йапэр чок мераклы нышан.

⁴⁸Еер бракарсак ӧлӓ Ону, хепси Она инанаӂэклар, гелеӂек ромалылар да телеф едеӂеклӓр хем бизим айоз ери, хем миллетимизи».

⁴⁹Бириси оннардан, Кайафа, ангысы о йыл баш попазды, деди: «Сиз бишей билмеерсиниз.

⁵⁰Аннамээрсыныз, ани таа ислӓӓ сизин ичин, бир адам ӧлсӱн хепси инсан ичин, некадар хепси инсан кайыба калсын?»

⁵¹Бу лафы о сӧлӓмеди кендиндӓн, ама чӱнкӱ о йыл баш попазды, пророклук етти, ани Иисус лӓӓзым ӧлсӱн хепси иудей миллети ичин,

⁵²да диил саде бу миллет ичин, ама топласын бирери хепси даалмыш Аллахын ушакларыны.

⁵³О гӱндӓн сора неетлендилӓр, ки ӧлдӱрсӱннӓр Ону.

⁵⁴Онун ичин Иисус гезмӓрди ачыкта иудейлӓр арасында. Гитти орадан бир ерӓ, ани йакын чола, бир касабайа, ады Ефраим, да орада калды ӱӱрениӂилериннӓн.

⁵⁵Иудейлерин Паскеллӓ йортусу йаклашарды. Чок инсан долайдан гелдилӓр Иерусалимӓ Паскелледӓн илери, паклансыннар дейни.

⁵⁶Оннар аарардылар Иисусу да бири-биринӓ сорардылар Айоз бинада: «Не деерсиниз, хич гелмейеӂек ми О йортуйа?»

⁵⁷Ама бӱӱк попазлар хем фарисейлӓр сымарладыйдылар, ани ким аннайаӂэк, нередӓ Иисус, хаберлесин оннара, ки оннар тутсуннар Ону.