Read Tungag ИИ ХАБЕР ИОАНДАН 18 Bible Online

ИИ ХАБЕР ИОАНДАН 18 - Tungag bible

ИИ ХАБЕР ИОАНДАН 18

¹Бу лафлардан сора Иисус чыкты дышары ӱӱрениӂилериннӓн да гечти Кедрон дересинин ӧбӱр тарафына, нередӓ варды бир башчӓ. Иисус хем ӱӱрениӂилери гирдилӓр бу башчейӓ.

²Иуда да, ангысы сатты Иисусу, билӓрди о ери, зерӓ Иисус чок сыра топланарды ӱӱрениӂилериннӓн орайы.

³Иуда алды бир бӧлӱк аскер хем бекчилери бӱӱк попазлардан хем фарисейлердӓн, да гелдилӓр бурайы шафкларлан, фенерлӓрлӓн хем силӓхларлан [19].

⁴Иисус, ани билӓрди хепсини, не гелеӂек башына, чыкты оннара каршы да деди: «Кими аарээрсыныз?»

⁵Оннар ӂувап еттилӓр: «Назаретли Иисусу!» Иисус деди: «Бӓним». Иуда, сатыӂы, оннарлан барабарды.

⁶Ачан Иисус деди: «Бӓним», оннар чекилдилӓр геери да дӱштӱлӓр ерӓ.

⁷Иисус енидӓн сорду: «Кими аарээрсыныз?» «Назаретли Иисусу», — ӂувап еттилӓр оннар.

⁸Иисус деди: «Сӧледим сизӓ, ани Бӓним. Чӱнкӱ аарээрсыныз Бени, буннары бракын, гитсиннӓр».

⁹Буну деди, ки таманнансын сӧз, ани сӧледийди: «Кайбетмедим кимсейи оннардан, ани Сӓн вердин Бана».

¹⁰Симон Петри чыкарды кылыӂы, ани ташыйарды йанында, урду баш попазын чыраана да кести онун саа кулааны. Онун адыйды Малх.

¹¹Иисус деди Петрийӓ: «Кой кылыӂы кылыф ичинӓ. Не, ичмейеӂӓм ми Бӓн о филӂаны, ани Боба верди, ичейим?»

¹²Бинбашы, аскер бӧлӱӱ хем иудейлерин бекчилери туттулар да бааладылар Иисусу.

¹³Илкин гӧтӱрдӱлӓр Аннана, зерӓ о Кайафанын кайнатасыйды, ангысы о йыл баш попазды.

¹⁴Кайафа одур, ким акыл вердийди иудейлерӓ: «Таа ислӓӓ, ӧлсӱн бир адам хепси инсан ичин».

¹⁵Ама Симон Петри гидӓрди Иисусун ардына, хем ӧбӱр ӱӱрениӂи да. Ӧбӱр ӱӱрениӂи танышарды баш попазлан. О гирди Иисуслан барабар баш попазын аулу ичинӓ.

¹⁶Петри калды дышанда, токатлар йанында. Ӧбӱр ӱӱрениӂи, ани танышарды баш попазлан, чыкты дышары, лафетти токатларда бекчи карыйлан да гечирди Петрийи ичйанына.

¹⁷Токатларда бекчи кары деди Петрийӓ: «Диилсин ми сӓн дӓ бу Адамын ӱӱрениӂилериндӓн?» «Диилим», — ӂувап етти Петри.

¹⁸Озаман чыраклар хем бекчилӓр йакардылар бир атеш да йысынардылар долайында, чӱнкӱ суукту. Петри дурарды оннарлан барабар да йысынарды о да атештӓн.

¹⁹Баш попаз сорду Иисуса ӱӱрениӂилери ичин хем ӱӱретмеси ичин.

²⁰Иисус ӂувап етти: «Бӓн не сӧледим, ачык сӧледим инсана. Херзаман ӱӱреттим синагогалар ичиндӓ хем Айоз бинада, нерейи топланэр хепси иудейлӓр. Саклы бишей сӧлӓмедим.

²¹Нечин сорэрсын Бана? Сор оннара, ким сеследи сӧзӱмӱ. Тӓ, оннар билерлӓр, не лафеттим».

²²Ачан бу лафлары ишитти бекчилердӓн бириси, ани дурарды орада, урду Иисуса бир шамар да деди: «Ӧлӓ ми Сӓн ӂувап едерсин баш попаза?»

²³Иисус деди: «Еер лафеттисейдим кӧтӱ бишей, гӧстер, не кӧтӱлӱк сӧледим. Ама лафеттисейдим ии, нечин урэрсын Бана?»

²⁴Озаман Аннан йоллады Ону баалы баш попаза, Кайафайа.

²⁵Симон Петри дурарды да атештӓ йысынарды. Озаман сордулар она: «Аӂаба диилсин ми сӓн дӓ Онун ӱӱрениӂилериндӓн?» О атылды да деди: «Диилим».

²⁶Баш попазын чыракларындан бириси, ани хысымды о адамнан, ангысынын Петри кестийди кулааны, деди: «Бӓн сени гӧрмедим ми башчедӓ Онуннан барабар?»

²⁷Петри енидӓн атылды, да таман о вакыт хороз ӧттӱ.

²⁸Сора Иисусу Кайафадан алып, гӧтӱрдӱлӓр Преториума [20]. Сабаады. Оннар кендилери Преториума гирмедилӓр, ки мындарланмасыннар да ийӓбилсиннӓр Паскеллейи.

²⁹Пилат чыкты оннара да сорду: «Нейлӓн сиз кабаатландырэрсыныз бу Адамы?»

³⁰Оннар ӂувап еттилӓр: «Еер О олмайайды бир фена йапыӂы, биз гетирмейеӂейдик Ону сана».

³¹Озаман Пилат деди: «Алын ону да даава кесин кендиниз сизин законунуза гӧрӓ». Ама иудейлӓр дедилӓр: «Бизим йок доорулуумуз ӧлдӱрмӓӓ кимсейи».

³²Бу олду, ки таманнансын о сӧз, ани сӧледийди Иисус, ачан ачты, не ӧлӱмнӓн ӧлеӂек.

³³Пилат енидӓн гирди Преториума, чаарды Иисусу да сорду Она: «Сӓнсин ми Иудейлерин Падишахы?»

³⁴Иисус ӂувап етти: «Сӓн кендилииндӓн деерсин буну оса башкалары мы сана сӧледилӓр Беним ичин?»

³⁵Пилат деди: «Не, бӓн иудейим ми? Кенди инсанын хем бӱӱк попазлар вердилӓр Сени беним елимӓ. Сӧлӓ, не йаптын?»

³⁶Иисус деди: «Беним Падишыхлыым диил бу дӱннедӓн. Еер Беним Падишахлыым олайды бу дӱннедӓн, озаман Беним изметчилерим дӱӱшеӂейдилӓр, ки Бӓн дӱшмейим иудейлерин еллеринӓ, ама Беним Падишахлыым диил бу дӱннедӓн».

³⁷Озаман Пилат деди Иисуса: «Демӓк, Сӓн Падишахсын, диил ми ӧлӓ?» Иисус ӂувап етти: «Сӓн сӧлеерсин, ани Падишахым. Онуштан Бӓн дуудум хем бу дӱннейӓ гелдим, ки шаатлык едейим аслылык ичин. Хепси, ким аслылык тарафында, сеслеерлӓр Беним сесими».

³⁸Пилат сорду Она: «Недир аслылык?» Буну сӧледиктӓн сора енидӓн чыкты иудейлерӓ да деди: «Бӓн булмээрым бир дӓ кабаат бу Адамда.

³⁹Сиздӓ вар бир адет, ки Паскеллӓ йортусунда колверейим сизӓ капандан бирисини. Истеерсиниз ми, колверейим сизӓ Иудейлерин Падишахыны?»

⁴⁰Озаман хепси таа бир сыра баардылар: «Диил Ону, колвер Вараввайы!» Варавва са бир хайдутту.