Read Tungag ИИ ХАБЕР ИОАНДАН 2 Bible Online

ИИ ХАБЕР ИОАНДАН 2 - Tungag bible

ИИ ХАБЕР ИОАНДАН 2

¹Ӱчӱнӂӱ гӱнӱ Галилейанын Кана кӱӱйӱндӓ дӱӱн варды. Иисусун анасы орадайды.

²Дӱӱнӓ чаардылар Иисусу да ӱӱрениӂилериннӓн.

³Чӱнкӱ шарап битмишти, Иисусун анасы деди Она: «Оннарда йок шарап».

⁴Иисус ӂувап етти: «О, кары! Бана хем сана не? Беним саадым таа гелмеди».

⁵Анасы изметкерлерӓ деди: «Йапасыныз ону, не дейеӂек».

⁶Орада варды алты кап таштан. Иудейлерин адетлеринӓ гӧрӓ, бу каплардан суйу файдалардылар йыканмак адетлериндӓ. Херкези бу каплардан аларды ики-ӱч ӧлчӱ [4] су.

⁷Иисус деди оннара: «Долдурун каплары суйлан». Оннар долдурдулар оннары аазларынадан.

⁸«Шинди алын да гӧтӱрӱн дӱӱн ӂувапчысына», — деди Иисус. Ӧлӓ дӓ йаптылар.

⁹Дӱӱн ӂувапчысы датты судан олмуш шарабы. О билмӓрди, нередӓн бу шарап, билӓрдилӓр изметкерлӓр, ани долдурдулар каплары. Дӱӱн ӂувапчысы чаарды гӱвеейи

¹⁰да деди она: «Инсан илкин койэр софрайа ии шарабы, да конаклар сарфош олдуктан сора, прост шарабы. Ама сӓн ии шарабы бракмышын шиндийӓ кадар».

¹¹Иисус йапты бу илк нышаны Галилейанын Кана кӱӱйӱндӓ. Бунуннан ачты Кенди метинниини, да ӱӱрениӂилери инандылар Она.

¹²Ондан сора, анасыннан, кардашларыннан хем ӱӱрениӂилериннӓн барабар гитти Капернаума. Орада калдылар биркач гӱн.

¹³Иудейлерин Паскеллеси йаклашарды. Иисус гелди Иерусалим касабасына.

¹⁴Булду Айоз бинанын аулунда ӧкӱз, койун, гугуш сатаннары хем отурукча пара дииштиреннери.

¹⁵Тасмадан йапты бир камчы да коолады хепсини дышары Айоз бинанын аулундан койуннарлан хем ӧкӱзлӓрлӓн, даатты пара дииштиреннерин гӱмӱшлерини, актарды масаларыны.

¹⁶Деди гугуш сатаннара: «Алын буннары бурадан да Беним Бобамын евини панайыра чевирмейин!»

¹⁷Ӱӱрениӂилери аклына гетирдилӓр, ани вар йазылы: «Хавезлик Сенин евин ичин Бени кемирер».

¹⁸Иудейлӓр бунун ичин дедилӓр Она: «Не нышаннан бизӓ гӧстереӂӓн, ани вар доорулуун буну йапасын?»

¹⁹Иисус деди: «Йыкын бу Айоз бинайы да Бӓн ӱч гӱнӓдӓн енидӓн калдыраӂам».

²⁰Иудейлӓр дедилӓр: «Лӓӓзым олду кырк алты йыл йапылсын бу Айоз бина, да Сӓн йапаӂан ону ӱч гӱндӓ ми?»

²¹Ама О, дейерӓк Айоз бина, Кенди гӱӱдеси ичин лафедӓрди.

²²Ачан дирилди ӧлӱдӓн, ӱӱрениӂилери аклына гетирдилӓр, ани о сӧледийди бу лафлары, да инандылар Айоз Йазылары хем Иисусун сӧзӱнӱ.

²³Ачан Иисус Паскеллӓ йортусунда Иерусалим касабасындайды, чок инсан инанды Она, зерӓ гӧрӓрдилӓр мераклы нышаннары, ани йапарды.

²⁴Ама Кендиси Иисус умудуну оннара коймарды, зерӓ таныйарды хепсини.

²⁵Онун йокту лӓӓзымныклыы, ки биркимсей аннатсын инсан ичин, зерӓ О Кендиси билӓрди, не вар инсанын ӱреендӓ.