Read Tungag ИИ ХАБЕР ИОАНДАН 5 Bible Online

ИИ ХАБЕР ИОАНДАН 5 - Tungag bible

ИИ ХАБЕР ИОАНДАН 5

¹Ондан сора олду иудейлердӓ бир йорту, да Иисус гитти Иерусалим касабасына.

²Иерусалимдӓ, Койун токатларында вар бир гӧл, ани чыфытчасына ады Вифезда, долайлы беш колонадайлан.

³Бу колонадалар алтында йатардылар чок тӱрлӱ хасталар: кӧӧрлар, топаллар, кӧтӱрӱмнӓр, /ангылары беклӓрдилӓр су ойнамасыны.

⁴Аллахтан бир ангил кимӓр сыра гелӓрди гӧлӓ да чалкаларды суйу. Ким илкин гирӓрди су ойнатмасындан сора, куртулурду хертӱрлӱ хасталыктан, недӓн хастайды/.

⁵Орада варды бир адам, ани хастайды отуз секиз йыл.

⁶Иисус гӧрдӱ ону йатаркан, да билерӓк, ани чок вакыттан беери хаста, сорду она: «Истеерсин ми саа олмаа?»

⁷Бу хаста ӂувап етти: «Чорбаӂы, йок кимсейим, су ичинӓ салверсин бени, ачан су фокурдээр. Бӓн гиринӂӓ, гирер башкасы бендӓн илери».

⁸«Калк, ал дӧшеени да гез», — деди Иисус.

⁹Бирдӓн бу адам саа олду, алды дӧшеени да чекетти гезмӓӓ. Бу олду бир ӂумертеси гӱнӱ.

¹⁰Иудейлӓр бу адама, ани саа олду, дедилӓр: «Бӱӱн, ӂумертеси гӱнӱ, дӱшмеер, ташыйасын дӧшеени».

¹¹О ӂувап етти оннара: «О, ким бана саалык верди, деди: „Ал дӧшеени да гез“».

¹²Оннар сордулар: «Кимдир О, Ангысы сана деди: „Ал дӧшеени да гез“?»

¹³Ама бу саа олмуш адам билмӓрди, кимди О, зерӓ Иисус орадан сауштуйду калабалык бетеринӓ.

¹⁴Сора Иисус онуннан каршы гелди Айоз бинада да деди: «Тӓ, алыштын, бак, зеедӓ гӱнаха гирмӓ, ки олмасын сениннӓн бишей таа бела».

¹⁵Бу адам гитти да сӧледи иудейлерӓ, ани Она Иисус саалык верди.

¹⁶Бу бетерӓ иудейлӓр башладылар излемӓӓ Иисусу да истӓрдилӓр ӧлдӱрсӱннӓр Ону, зерӓ йапарды бу ишлери ӂумертеси гӱнӱ.

¹⁷Иисус дейӓрди оннара: «Бобам Беним таа ишлеер, Бӓн дӓ ишлеерим».

¹⁸Онуштан иудейлӓр таа чок бакардылар ӧлдӱрсӱннӓр Ону, зерӓ диил саде ани басарды ӂумертесини, ама Аллаха дейӓрди: «Беним Бобам», койарак Кендини Аллахлан бир.

¹⁹Бунун ичин Иисус оннара деди: «Доору, доору сӧлеерим сизӓ, ани Оол йок насыл бишей йапсын Кенди-Кендиндӓн, еер гӧрмӓрсейди Бобайы йапаркан. Хепсини, не йапэр Боба, Оолу да йапэр хеп ӧлӓ.

²⁰Зерӓ Боба север Оолуну да гӧстерер Она хепсини, не йапэр. О гӧстереӂек Она таа бӱӱк ишлӓр дӓ, ки сиз шаш-беш каласыныз.

²¹Зерӓ, ниӂӓ Боба дирилдер ӧлӱлери да верер ӧмӱр оннара, хеп ӧлӓ Оол да верер ӧмӱр, кимӓ истеер.

²²Боба даава кесмеер кимсейӓ. Бӱтӱн даавайы верди Оолуна,

²³ки хепси икрамнасыннар Оолуну, ниӂӓ икрамнээрлар Бобайы. Ким икрамнамээр Оолу, о икрамнамээр Бобайы, Ангысы йоллады Ону.

²⁴Доору, доору сӧлеерим: ким сеслеер Беним сӧзӱмӱ да инанэр Она, Ким Бени йоллады, онун вар дивеч йашамасы, о гелмеер даавайа, ама гечти ӧлӱмдӓн йашамайа.

²⁵Доору, доору сӧлеерим сизӓ, гелер вакыт, шиндӓн сора гелди, ачан ӧлӱлӓр ишидеӂеклӓр Аллахын Оолунун сесини, да ишиденнӓр дирилеӂеклӓр.

²⁶Ниӂӓ Бобанын вар йашамасы Кенди-Кендиндӓ, хеп ӧлӓ Оолуна да верди, йашамасы олсун Кенди-Кендиндӓ.

²⁷Верди заабитлик Она, даава кессин, зерӓ О — Адам Оолу.

²⁸Шашмайын буна, зерӓ гелер вакыт, ачан хепси, ким булунэр мезарлар ичиндӓ, ишидеӂеклӓр Адам Оолунун сесини.

²⁹Да чыкаӂэклар мезарлар ичиндӓн. Ким йапты иилик, дирилеӂек ӧмӱр ичин, ама ким йапты феналык, дирилеӂек даава ичин.

³⁰Бӓн йок насыл йапайым бишей Кендимдӓн. Бӓн даава йапэрым ӧлӓ, ниӂӓ ишидерим Бобадан. Беним даавам доору, зерӓ бакэрым йапайым диил Беним Кенди истедиими, ама Бобанын, Ангысы Бени йоллады.

³¹Еер шаатлык едӓрсейдим Кендим ичин, озаман Беним шаатлыым диил аслы.

³²Вар башка шаат, ангысы Беним ичин шаатлык едер. Бӓн билерим, ани Онун шаатлыы аслы.

³³Сиз йолладыныз Иоана, да о шаатлык етти аслылык ичин.

³⁴Диил ани Бӓн адамын шаатлыыны кабледерим, ама буннары сӧлеерим, ки сиз куртуласыныз.

³⁵Иоан бир шафкты, ани йанарды хем айдыннадарды. Сиз истединиз бираз шенненӓсиниз онун айдынныында.

³⁶Ама Бендӓ вар Иоанын шаатлыындан таа каави бир шаатлык: ишлӓр, ани Боба верди, йапайым, хем ангыларыны Бӓн йапэрым, буннар Беним ичин шаатлык едерлӓр, ани Боба Бени йоллады.

³⁷Бобам, ани Бени йоллады, Кендиси шаатлык етти Беним ичин. Сиз хич ишитмединиз Онун сесини хем гӧрмединиз ӱзӱнӱ.

³⁸Онун сӧзӱнӱ тутмээрсыныз ӱреениздӓ, зерӓ инанмээрсыныз Ону, Кими О йоллады.

³⁹Сиз аараштырэрсыныз Айоз Йазылары, дӱшӱнӱп, ки оннарлан еденӓсиниз дивеч йашамак. Оннар шаатлык едерлӓр Беним ичин!

⁴⁰Сиз истӓмеерсиниз гелӓсиниз Бана, олсун йашаманыз дейни.

⁴¹Бӓн каблетмеерим инсандан метинник.

⁴²Сизи билерим, сиздӓ йок севги Аллаха.

⁴³Бӓн гелдим Беним Бобамын адына, да каблетмеерсиниз Бени, ама гелӓрсейди башка биркимсей кенди адына, ону сиз кабледеӂениз.

⁴⁴Несой вар ниӂӓ сиз инанасыныз, ачан аарээрсыныз метинник бири-бириниздӓн, ама аарамээрсыныз метиннии, ани гелер бир Аллахтан.

⁴⁵Санмайасыныз, ани Бӓн сизи кабаатландыраӂам Бобанын ӧнӱндӓ, вар ким сизи кабаатландырсын: Моисей, ангысына умудунузу койдунуз.

⁴⁶Еер инанайдыныз Моисейи, инанаӂэйдыныз Бени дӓ, зерӓ о йазды Беним ичин.

⁴⁷Ама чӱнкӱ инанмээрсыныз онун йазыларыны, несой вар насыл инанасыныз Беним сӧзӱмӱ?»