Read Tungag ИИ ХАБЕР ИОАНДАН 6 Bible Online

ИИ ХАБЕР ИОАНДАН 6 - Tungag bible

ИИ ХАБЕР ИОАНДАН 6

¹Бундан сора Иисус гитти Галилейа (Тивериада) гӧлӱнӱн ӧбӱр тарафына.

²Чок инсан гидӓрди Онун ардына, зерӓ гӧрӓрдилӓр нышаннары, не йапарды хасталарлан.

³Иисус пинди байыр ӱстӱнӓ да отурурду орада ӱӱрениӂилериннӓн барабар.

⁴Паскеллӓ, иудейлерин йортусу, йаклашарды.

⁵Иисус бакты да гӧрдӱ чок инсан, ани гелӓрди Она. Озаман деди Филипӓ: «Нӓӓндан сатын алаӂэз окадар екмек, ки бу инсаны дойуралым?»

⁶Сӧледи бӧлӓ, ки денесин ону, зерӓ Кендиси билӓрди, не йапаӂэк.

⁷Филип ӂувап етти: «Икиӱз динарлык екмек дӓ етишмӓз оннара, ки херкези бирӓр парча алабилсин».

⁸Ӧбӱр ӱӱрениӂи, Андрей, Симон Петринин кардашы, деди:

⁹«Бурада вар бир чоӂук, ангысында вар беш екмек арпадан хем ики балык, ама недир оннар букадар инсана?»

¹⁰Иисус деди: «Сӧлейин, инсан отурсун». Орада варды чок чимен. Инсан отурду ерӓ. Хепси вардылар бир беш бин адамын долайында.

¹¹Иисус алды екмеклери, шӱкӱр етти Аллаха, сора пайетти /ӱӱрениӂилеринӓ, ӱӱрениӂилери да пайеттилӓр/ инсана. Хеп ӧлӓ пайетти балыклары, херкезинӓ, ким некадар истеди.

¹²Оннар дойундуктан сора, Иисус деди ӱӱрениӂилеринӓ: «Топлайын имӓк парчаларыны, ки бишей зӓн олмасын».

¹³Топладылар да долдурдулар оники сепет екмек парчасыннан, ани калдыйды о инилмиш беш арпа екмеендӓн.

¹⁴Инсан, ачан гӧрдӱ бу нышаны, ани йапты Иисус, деди: «Будур хакына пророк, ангысы лӓӓзым гелсин дӱннейӓ».

¹⁵Иисус билӓрди, ани неетленӓрдилӓр гелсиннӓр да зорлайып йапсыннар Ону падишах. Онуштан О саушту орадан да йалныз генӓ пинди бир байыр ӱстӱнӓ.

¹⁶Ачан авшам олду, Онун ӱӱрениӂилери гиттилӓр гӧл бойуна.

¹⁷Гирдилӓр кайык ичинӓ да гидӓрдилӓр гӧлӱн ӧбӱр тарафына, Капернаум касабасына. Караннык олдуйду, ама Иисус хеп окадар гелмӓрди оннара.

¹⁸Бир серт лӱзгӓр есӓрди, гӧл дӓ далгалыйды.

¹⁹Ачан ӱздӱлӓр бир ирми беш-отуз стади [8], гӧрдӱлӓр ани Иисус гезер су ӱстӱндӓ да кайаа йаклашэр. Оннар корктулар.

²⁰«Бу Бӓним, коркмайын!» — деди Иисус.

²¹Озаман оннар истӓрдилӓр алсыннар Ону кайык ичинӓ. Бундан сора бирдӓн кайык етишти о ерӓ, нерейи оннар гидӓрдилӓр.

²²Ертеси гӱнӱ инсаннар, ани калдылар гӧлӱн ӧбӱр тарафында, гӧрдӱлӓр, ани орада варды салт бир кайык. Аннадылар, ани Иисус гирмеди ӱӱрениӂилериннӓн кайык ичинӓ, ама ӱӱрениӂилӓр Онсуз гиттилӓр.

²³Гелди башка биркач кайык Тивериада касабасындан йакын о ерӓ, нередӓ идийдилӓр екмек Саабинин иисӧзлемесиндӓн сора.

²⁴Ӧлӓ ки, инсан, гӧрӱп, ани орада йок не Иисус, не дӓ ӱӱрениӂилӓр, пинди кайыклара да гитти Капернаум касабасына Иисусу аарамаа.

²⁵Ачан булдулар Ону гӧлӱн ӧбӱр тарафында, дедилӓр Она: «Ӱӱредиӂи, незаман Сӓн бурайы гелдин?»

²⁶Иисус ӂувап етти оннара: «Доору, доору сӧлеерим сизӓ: аарээрсыныз Бени, диил ани гӧрдӱнӱз нышаннары, ама ани идиниз екмек да дойундунуз.

²⁷Чалышын диил гечӓр имӓк ичин, ама гечмӓз имӓк ичин, ани дивеч йашамайа гӧтӱрер. Буну сизӓ Адам Оолу вереӂек. Зерӓ Адам Оолуну Аллах Боба нышаннады Кенди мӱхӱрӱннӓн».

²⁸Оннар дедилӓр: «Не лӓӓзым йапалым, Аллахын ишини дейни таманнайалым?»

²⁹Иисус ӂувап етти: «Будур Аллахын иши, ки инанасыныз Она, Кими О йоллады».

³⁰Буна оннар ӂувап еттилӓр: «Не нышан гӧстерӓбилирсин бизӓ, ки гӧрелим да инаналым Сени? Не иш Сӓн йапэрсын?

³¹Бизим бобалар идилӓр манна [9] чолда, ниӂӓ вар йазылы: „Верди оннара екмек гӧктӓн“».

³²Иисус деди: «Доору, доору сӧлеерим сизӓ, ани Моисей вермеди екмек гӧктӓн сизӓ, ама Беним Бобам верер хакына екмек гӧктӓн.

³³Зерӓ Аллахын екмӓӓ Одур, Ким гӧктӓн инер да йашамак дӱннейӓ верер».

³⁴«Сааби, вер бизӓ херзаман бу екмектӓн», — дедилӓр оннар.

³⁵Иисус деди оннара: «Бӓним йашамак екмӓӓ. Ким Бана гелер, хич аӂыкмаз, ким Бана инанэр, бир сыра билӓ сусуз калмаз.

³⁶Ниӂӓ сӧледим сизӓ, гӧрдӱнӱз Бени да хеп окадар инанмадыныз.

³⁷Хепси, не Боба Бана верер, Бана гелер. Ким дӓ Бана гелер, ону хич бирзаман ууратмайаӂам дышары.

³⁸Зерӓ гӧктӓн индим, диил ани Кенди истедиими йапайым, ама Бени йоллайан Бобанын истедиини таманнайым.

³⁹Бени Йоллайанын истедии будур: бирини билӓ оннардан, ани Бана верди, кайбетмейим, ама битки гӱндӓ хепсинӓ йашамак верейим.

⁴⁰Будур Бобанын истедии: херкезин дивеч йашамасы олсун, ким гӧрер Оолу да инанэр, битки гӱндӓ ону дирилдеӂӓм».

⁴¹Иудейлӓр мырылданардылар Она каршы, зерӓ деди: «Бӓним гӧктӓн инмӓ екмек».

⁴²Дейӓрдилӓр: «Диил ми О — Иисус, Иосифин оолу, Ангысынын бобасыны хем анасыны биз таныйэрыз? Шинди нечин О деер: „Бӓн гӧктӓн индим?“»

⁴³Иисус ӂувап етти: «Мырылданмайын бири-биринизин аранызда.

⁴⁴Кимсей йок насыл Бана гелсин, еер Бени йоллайан Боба ону чекмӓрсейди. Она битки гӱндӓ Бӓн ӧмӱр вереӂӓм.

⁴⁵Пророкларын кийатларында йазылы: „Хепси Аллахтан ӱӱредилмиш олаӂэклар“. Хепси, ким Бобадан ишитти хем ӱӱренди, о Бана гелер.

⁴⁶Зерӓ кимсей Бобайы гӧрмеди, Ондан каарӓ, Ким Аллахтан гелди. О Бобайы гӧрдӱ.

⁴⁷Доору, доору сӧлеерим сизӓ: ким инанэр /Бана/, онун вар дивеч йашамасы.

⁴⁸Бӓним йашамак екмӓӓ.

⁴⁹Сизин бобаларыныз идилӓр манна чолда да ӧлдӱлӓр.

⁵⁰Гӧктӓн инӓн ӧлӓдир бир екмек, ани ким ону ийер, хич ӧлмеер.

⁵¹Бӓним йашамак екмӓӓ гӧктӓн инмӓ. Ким бу екмектӓн ийер, дивеч йашайаӂэк. Екмек, ани Бӓн верерим дӱннейин йашамасы ичин, Кенди гӱӱдӓм».

⁵²Ачан иудейлӓр бу лафлары ишиттилӓр, башладылар чекишмӓӓ бири-бириннӓн. Оннар дейӓрдилӓр: «Несой вар насыл бу Адам версин гӱӱдесини, ийелим?»

⁵³Иисус деди: «Доору, доору сӧлеерим сизӓ, ани еер имӓрсейдиниз Адам Оолунун гӱӱдесини хем ичмӓрсейдиниз Онун каныны, сиз йашамак еденмейеӂениз.

⁵⁴Ким ийер Беним гӱӱдеми хем ичер беним канымы, онун вар дивеч йашамасы. Ону дирилдеӂӓм битки гӱндӓ.

⁵⁵Зерӓ Беним гӱӱдӓм — хакына имӓк хем Беним каным — хакына ичмӓк.

⁵⁶Ким ийер Беним гӱӱдеми хем ичер Беним канымы, о калэр Бендӓ, Бӓн дӓ онда.

⁵⁷Ниӂӓ дири Боба йоллады Бени, да йашээрым Бобанын кувединнӓн, хеп ӧлӓ Бени дӓ ийӓн йашайаӂэк Беним куведимнӓн.

⁵⁸Будур гӧктӓн инмӓ екмек, диил ниӂӓ манна, ани бобаларыныз идилӓр да ӧлдӱлӓр. Ким ийер бу екмӓӓ, дивеч йашайаӂэк».

⁵⁹Иисус сӧледи буннары синагога ичиндӓ, ачан ӱӱредӓрди инсаны Капернаум касабасында.

⁶⁰Бу лафлардан сора чойу ӱӱрениӂилериндӓн дедилӓр: «Не фасыл лафлар, ким вар насыл каблетсин бу лафлары?»

⁶¹Ама Иисус билӓрди, ани Онун ӱӱрениӂилери мырылданэрлар, онуштан деди: «Бу лафлар сизӓ кӧстек ми?

⁶²Не дейеӂениз, ачан гӧреӂениз Адам Оолуну калкарак енидӓн орайы, нередӓ О баштан булунарды?

⁶³Йашамак верӓн духтур. Гӱӱдӓ бишейӓ йардым етмеер. Бу лафлар, ани сизӓ сӧледим, духтур хем ӧмӱрдӱр.

⁶⁴Ама вар сиздӓн кимиси инансыз». Иисус баштан билӓрди, ким инанмээр хем ким Ону сатаӂэк.

⁶⁵Да деди: «Бунун ичин сӧледим, ани кимсей йок насыл гелсин Бана, еер бу она диилсейди верилмиш Бобамдан».

⁶⁶Бу бетерӓ чойу Онун ӱӱрениӂилериндӓн дӧндӱлӓр геери да ондан сора Онуннан гезмедилӓр.

⁶⁷Озаман Иисус, данышып оникисинӓ, деди: «Беки сиз дӓ истеерсиниз гитмӓӓ?»

⁶⁸«Сааби, кимӓ гиделим? — деди Симон Петри. — Сендӓ дивеч йашамак сӧзлери.

⁶⁹Биз инандык да таныдык, ани Сӓнсин Аллахын Айозу [10]».

⁷⁰Иисус ӂувап етти: «Айырмадым мы Бӓн сизи оникинизи? Ама сиздӓн бириси диавол».

⁷¹Буну деди оникисиндӓн бириси ичин, Симон Искариотун оолу Иуда ичин, ангысы сонда сатты Ону.