Read Tungag АПОСТОЛЛАРЫН ЙАПТЫКЛАРЫ 14 Bible Online

АПОСТОЛЛАРЫН ЙАПТЫКЛАРЫ 14 - Tungag bible

АПОСТОЛЛАРЫН ЙАПТЫКЛАРЫ 14

¹Иконийа касабасында хеп бутӱрлӱ олду. Павли хем Варнава гирдилӓр иудей синагогасына да лафеттилӓр ӧлӓ, ани инанды чок инсан иудейлердӓн хем урумнардан.

²Ама о иудейлӓр, ангылары инанмадылар, дебрештирдилӓр тайфӓннары да чевирдилӓр оннарын ӱреклерини кардашлара каршы.

³Хеп окадар чок вакыт калып орада, лафеттилӓр кыйышмаклан Сааби ичин, Ангысы инандырырды сӧзӱ Кенди иивергиси ичин да верирди кувет, оннарын еллериннӓн йапылсын мераклы нышаннар хем шашмаклы ишлӓр.

⁴Инсан касаба ичиндӓ бӧлӱндӱ. Кимиси иудейлерин, кимиси апостолларын тарафындайды.

⁵Тайфӓннар хем иудейлӓр заабитлериннӓн билӓ неетлендилӓр зеетлесиннӓр да ӧлдӱрсӱннӓр ташлан апостоллары.

⁶Апостоллар аннадылар буну да качтылар Ликаонийа, Листра хем Дервийа касабаларына хем долай ерлеринӓ.

⁷Бу ерлердӓ оннар аннаттылар Ии Хабери.

⁸Листра касабасында варды бир адам, сакат айакларындан. О дуумактан хич гезмемишти.

⁹О, отуруп ердӓ, сеслӓрди, не сӧлеер Павли. Павли бакты уз онун гӧзлеринӓ, гӧрдӱ, ани онда вар инан саа олмаа дейни,

¹⁰да бӱӱк бир сеслӓн она деди: «Сана деерим, Сааби Иисус Христозун адыннан, калк айакча!» О адам чабук калкты айакча да башлады гезмӓӓ.

¹¹Инсаннар, гӧрӱп, не йапты Павли, калдырдылар бир бӱӱк сес да Ликаон дилиндӓ дедилӓр: «Аллахлар индилӓр арамыза адама бензӓр!»

¹²Варнавайа ад койдулар Зевс, ама Павлийӓ Ермис, зерӓ бу лафетмеклердӓ кулланыӂыйды.

¹³Зевсин айоз бинасы булунарды касабанын хемен дышында. Зевсин попазы гетирди айоз бина токатларына ӧкӱзлери хем фенецлери, истейип инсаннан барабар курбан гетирсин.

¹⁴Ама апостоллар, Варнава хем Павли, ишидип буну, йырттылар кенди рубаларыны коркудан, хызландылар инсан ичинӓ да баардылар:

¹⁵«Адамнар, нечин буну йапэрсыныз? Биз сизин гиби инсаныз. Биз сизӓ ии хабер гетирериз, ки дӧнӓсиниз бошуна ишлердӓн дири Аллаха, Она, Ким йаратты гӧкӱ, ери, денизи хем хепсини, не вар оннарда.

¹⁶Аллах евелки вакытларда бракты, хепси миллетлӓр гитсиннӓр кенди йолларында.

¹⁷Ама хич дургунмады шаатлык вермӓӓ кендиси ичин, зерӓ йапты иилик, верди йаамур гӧктӓн хем берекет, боллуктан имӓк верди хем севиндирди ӱреклеринизи».

¹⁸Бу лафларлан билӓ хемен-хемен дургудабилдилӓр инсаны курбан гетирмектӓн оннара.

¹⁹Антиохийа хем Иконийа касабаларындан гелди биркач иудей да, инсаны кенди тарафларына чекип, дӱӱдӱлӓр Павлийи ташлан, сора санарак, ани ӧлдӱ, сӱрӱдӱлӓр касабадан дышары.

²⁰Ама Павлинин ӱӱрениӂилери топландылар долайына, да о, калкып, гирди касаба ичинӓ. Икинӂи гӱнӱ Варнавайлан гиттилӓр Дервийа касабасына.

²¹Аннаттылар Ии Хабери бу касабада да едендилӓр чок ӱӱрениӂи. Сора дӧндӱлӓр геери Листра, Иконийа хем Антиохийа касабаларына.

²²Ӱӱрениӂилери духча каавиледилӓр хем ӱреклендирдилӓр, ки инанда калсыннар. Дедилӓр, ани лӓӓзым чок аӂылардан гечелим, ки Аллахын Падишахлыына гирӓбилелим.

²³Хербир клиседӓ айырдылар пресвитерлери, дуа едип хем оруч тутуп, вердилӓр оннары Саабинин елинӓ, Ангысына инандылар.

²⁴Ондан сора гечтилӓр Писидийадан да етиштилӓр Памфилийа еринӓ.

²⁵Хаберледилӓр Саабинин сӧзӱнӱ Пергӓ касабасында, сора гиттилӓр Атталийа касабасына.

²⁶Орадан гемийлӓн ӱздӱлӓр Антиохийа касабасына, нередӓ баштан верилмиштилӓр Аллахын иивергисинӓ о иш ичин, не шинди таманнадылар.

²⁷Етишип орайы, топладылар клисейи да аннаттылар хепсини, не Аллах йапты оннарлан хем ниӂӓ ачты башка миллетлерӓ инан капусуну.

²⁸Орада калдылар ӱӱрениӂилӓрлӓн чок вакыт.