Read Tungag АПОСТОЛЛАРЫН ЙАПТЫКЛАРЫ 17 Bible Online

АПОСТОЛЛАРЫН ЙАПТЫКЛАРЫ 17 - Tungag bible

АПОСТОЛЛАРЫН ЙАПТЫКЛАРЫ 17

¹Амфиполис хем Аполлонийа касабаларындан гечтиктӓн сора Павли хем Сила гелдилӓр Салоник касабасына, нередӓ варды иудейлерин синагогасы.

²Павли, алышмасына гӧрӓ, гирди синагога ичинӓ да ӱч ӂумертеси оннарлан лафетти, окуйарак Айоз Йазылардан.

³Ачыклады да гӧстерди оннара, ани Христос лӓӓзымды зеетленсин да ӧлдӱктӓн сора дирилсин. «Бу Иисус, Ангысы ичин сизӓ хаберлеерим, О Христос», — дейӓрди о.

⁴Кимиси оннардан, бӱӱк бир сӱрӱ урум, ани коркардылар Аллахтан, хем анылмыш карылардан биркачы, инандылар да гечтилӓр Павлинин хем Силанын тарафына.

⁵Ама иудейлӓр, ким инанмады, кысканмактан алдылар сокаклардан кими йарамаз инсаннардан, олду бӱӱк калабалык, да дебрештирдилӓр касабайы. Ӱӱштӱлӓр Иасонун евинӓ, бактылар Павлийи хем Силайы чыкармаа инсанын ӧнӱнӓ.

⁶Ама буламадылар да сӱрӱдӱлӓр Иасону хем таа биркач кардашы касабанын заабитлери ӧнӱнӓ, баарып: «Буннар буландырэрлар бӱтӱн дӱннейи, шинди гелдилӓр бурайы да.

⁷Иасон конаклаа каблетти оннары. Хепси каршы дурэрлар Кесарын сымарламасына. Деерлӓр, ани вармыш бир башка падишах — Иисус».

⁸Бӧлӓ лафларлан иудейлӓр дебрештирӓрдилӓр инсаны хем касабанын заабитлерини.

⁹Заабитлӓр салвердилӓр Иасону хем ӧбӱрлерини салт ондан сора, ачан пара алдылар.

¹⁰Геӂӓ кардашлар алатлан йолладылар Павлийи хем Силайы Верийа касабасына. Ачан етиштилӓр орайы, гирдилӓр иудейлерин синагогаларына.

¹¹Буннар таа ачык фикирлийдилӓр, некадар иудейлӓр Салониктӓ. Оннар каблеттилӓр Аллахын сӧзӱнӱ бӱӱк хавезлӓн. Хер гӱн, аараштырып Айоз Йазылары, бакардылар аннасыннар, ӧлӓ ми, ниӂӓ сӧленер.

¹²Оннардан чойу инандылар хем бир сӱрӱ урум кары-адам ии инсаннардан.

¹³Ама иудейлӓр Салоник касабасындан, ачан аннадылар, ани Павли насаат едер Аллахын сӧзӱнӱ Верийа касабасында да, гелдилӓр орайы карышмалык йапсыннар хем инсаны дебрештирсиннӓр.

¹⁴Кардашлар алатлан йолладылар Павлийи дениз кенарына, ама Сила хем Тимофей калдылар Верийада.

¹⁵Павлийлӓн гиденнӓр ону гечирдилӓр Афина касабасынадан. Сора дӧндӱлӓр геери бир сымарламаклан, ки Сила хем Тимофей гитсиннӓр Павлийӓ некадар таа тез.

¹⁶Павли, беклӓркӓн оннары Афина касабасында, духунда дерин бир аӂы дуйду, гӧрӱп касабайы, долу идоллан.

¹⁷Синагога ичиндӓ лафедӓрди иудейлӓрлӓн хем Аллахтан коркан инсаннан. Мейданда лафедӓрди хер гӱн, киминнӓн каршы гелӓрди.

¹⁸Кимиси Эпикур хем Стоик философларындан онуннан атышмаа башладылар. Кимиси дейӓрди: «Не истеер сӧлесин бу бошуна лафедӓн?» Башкалары, ишидип, ани о аннадэр хабери Иисус ичин хем Онун дирилмеси ичин, дедилӓр: «Аллелем, о насаат едер йабанӂы аллахлар ичин».

¹⁹Алып гӧтӱрдӱлӓр ону Ареопага [14] да дедилӓр: «Вар мы ниӂӓ ӱӱренелим, насыл ени ӱӱретмӓк сӓн насаат едерсин?

²⁰Сӓн сӧлеерсин кими фасыл ишлӓр ичин. Истеериз билмӓӓ, буннарын аннамасы недир?»

²¹Зерӓ хепси Афиналылар хем ким орада йабанӂылардан бӱтӱн хайлак вакыды гечирип сӧлӓрдилӓр хем сеслӓрдилӓр сон ени хаберлери.

²²Павли дурду Ареопагын ортасында да деди: «Афиналылар! Бӓн гӧрерим, ани хер тарафтан пек инанӂыйсыныз.

²³Гезинип, бактым, нейӓ баш иилдерсиниз, уурадым бир курбаннык ӱстӱнӓ, нередӓ йазылы: „Билинмейӓн бир Аллаха“. Бу Аллахы, кими сиз билмейерӓк икрамнээрсыныз, Ону сизӓ хаберлеерим.

²⁴Бу Аллах, Ким йаратты дӱннейи хем хепсини, не вар, Одур, гӧкӱн хем ерин Саабиси. О йашамээр адам елиннӓн йапылы йапыларда.

²⁵Она измет етмӓӓ йоктур ниӂӓ адам елиннӓн, ниӂӓ ачан Онун олур лӓӓзымныы бишей ичин. О Кендиси хепси инсана йашамак, солук хем хепсини, не лӓӓзым, верер.

²⁶О бир инсандан йаратты хепси миллетлери, йашасыннар бӱтӱн ер ӱстӱндӓ. Сыралады белли вакытлары хем сынырлары, нередӓ лӓӓзым йашасыннар,

²⁷ки аарасыннар Аллахы да, еллериннӓн йоклайарак булсуннар, макар ки Аллах диил узак биздӓн.

²⁸Биз Онда йашээрыз, гезериз, булунэрыз, ниӂӓ сизин пеетчилердӓн бириси деди: „Биз дӓ Ондан чекилериз“.

²⁹Ӧлейсӓ, ки Аллахтан чекилериз, дӱшмеер саналым, ани Аллах бензеер алтына, гӱмӱшӓ еки таша, ани йапылмыш адам фикириннӓн хем беӂермесиннӓн.

³⁰Аллах коймээр есаба билмезлик вакыды гечмиштӓн, ама бӱӱн хепси инсана херердӓ сымарлээр, дӧнсӱннӓр Она гӱнахларындан.

³¹Зерӓ О белли етти бир гӱн, незаман даава кесеӂек дӱннейӓ доорулаа гӧрӓ бир Адамын араӂылыыннан, Кими О Кенди айырды. Ки инандырабилсин хепси инсаны, Ону дирилтти ӧлӱдӓн».

³²Ӧлӱдӓн дирилмӓк ичин ишидип, оннарын кимиси башлады гӱлмӓӓ алмаа, ама башкалары дедилӓр: «Бунун ичин сеслӓриз сени башка керӓ».

³³Бутакым, Павли чыкты оннарын арасындан.

³⁴Ама хеп окадар кимиси, гечип онун тарафына, инандылар. Буннарын арасында Дионисий, Ареопагын азасы, бир кары, ады Дамар, хем оннарлан башкалары да.