Read Tungag АПОСТОЛЛАРЫН ЙАПТЫКЛАРЫ 20 Bible Online

АПОСТОЛЛАРЫН ЙАПТЫКЛАРЫ 20 - Tungag bible

АПОСТОЛЛАРЫН ЙАПТЫКЛАРЫ 20

¹Карышмалык усланмасындан сора Павли топлады ӱӱрениӂилерини, гиргиннетти оннары, сора сӧледи оннара «калын саалыӂаклан» да йолланды йола, Македонийайа гитмӓӓ.

²Гечип оралардан, чок лафетти инанӂыларлан да оннары ӱреклендирди. Сонда етишти Еллада ерлеринӓ.

³Орада ӱч ай калдыктан сора Павли истеди гемийлӓн гитсин Сирийайа, ама иудейлӓр кӧтӱ неет курдулар она каршы. Онуштан карарлады дӧнсӱн геери Македонийадан.

⁴Она йолдаш олдулар /Асийайа кадар/: верийалы Сопатер, Пирин оолу; Аристарх хем Секунд, Салоник касабасындан; дервийалы Гай; Тимофей; Тихик хем Трофим Асийадан.

⁵Оннар ӧнӂӓ гиттилӓр да беклӓрдилӓр бизи Троада касабасында.

⁶Хамурсуз йортуйу гечирдийнӓн, биз ӱздӱк гемийлӓн Филип касабасындан. Беш гӱндӓн сора етиштик оннары Троада касабасында, нередӓ калдык еди гӱн.

⁷Хафтанын илк гӱнӱ [17], ачан топлуйдук екмек кырмак ичин, Павли, ангысы ертеси гӱнӱ лӓӓзымды гитсин, насаат етти ӱӱрениӂилерӓ да узатты лафыны геӂӓ йарысынадан.

⁸О йукаркы одада, нередӓ биз топлуйдук, чок шафк йанарды.

⁹Бир деликанны, ады Евтих, отурарды пенчередӓ. Павлинин узун насаатында Евтих уйуйар калды да, енсенмиш уйкудан, дӱштӱ ӱчӱнӂӱ каттан ерӓ. Ону калдырдылар ӧлӱ.

¹⁰Павли ашаа инди, капанды ӱстӱнӓ, сора, алып ону куӂак, деди: «Кахырланмайын, о дири».

¹¹Павли енидӓн пинди геери ичери, кырды екмӓӓ да иди. О лафетти айдыннанынӂа, сора гитти кенди йолуна.

¹²Бу генч оланы гетирдилӓр ичери дири да бу олуш ичин чок гиргиннендилӓр.

¹³Биз Павлидӓн илери гиттик гемийӓ да ӱздӱк Ас касабасына. Орадан Павлийи алмаа дӱшӱнӱрдӱк, зерӓ о бӧлӓ сымарлады. Кендиси дӱшӱнӱрдӱ орайы кадар йайан гитмӓӓ.

¹⁴Ачан булушту бизимнӓн Ас касабасында, алдык ону да гемийӓ да гиттик Митилини касабасына.

¹⁵Орадан гемийлӓн ӱздӱк. Икинӂи гӱнӱ гелдик Хиос аданын каршысына. Ертеси гӱнӱ етиштик Самос адайа, /дургундук Трогиллийа касабасында,/ бир гӱндӓн сора гиттик Милит касабасына.

¹⁶Павли карарламышты гечмӓӓ Ефес касабасынын йанындан, ки ойаланмасын Асийада, зерӓ о алатларды, колайа гӧрӓ булунсун Иерусалимдӓ Еллинӂи йортусунда.

¹⁷Павли Милеттӓн йоллады хабер Ефес касабасына да чаартты клисенин пресвитерлерини.

¹⁸Ачан йанына гелдилӓр, Павли оннара деди: «Сиз билерсиниз, ниӂӓ херзаман сизиннӓндим илк гӱндӓн, айак бастыым заман Асийайа.

¹⁹Измет еттим Саабийӓ бӱтӱн йавашлыклан хем йашларлан, коймайарак есаба зорлуклары, ани башыма гелди иудейлерин кӧтӱ неетлери бетеринӓ.

²⁰Билерсиниз, ани бишей сиздӓн сакламадым, не ани сизин ичин файдалыдыр. Сакынмадым хаберлейим хем ӱӱредейим сизи инсан ӧнӱндӓ хем евлериниздӓ.

²¹Чаардым хем иудейлери, хем урумнары, дӧнсӱннӓр гӱнахларындан Аллаха да инансыннар Саабимиз Иисуса.

²²Шинди бӓн, Айоз Духтан чекилмиш, гидерим Иерусалимӓ. Билмеерим, не орада бенимнӓн олаӂэк.

²³Саде хербир касабада Айоз Дух бана хаберлеер, ки орада бени синӂирлӓр хем зеетлӓр беклеер.

²⁴Ама бӓн бишейӓ бакмээрым, йашамамы да паайа коймээрым. Истеерим салт севинмӓклӓн йолуму хем изметчилиими баша чыкарайым, ани каблеттим Сааби Иисустан, да шаатлык едейим Ии Хабери Аллахын иивергиси ичин.

²⁵Ама шинди билерим, ани артык хич бириниз билӓ беним ӱзӱмӱ гӧрмейеӂек, киминнӓн гездим хем насаат еттим Аллахын Падишахлыыны.

²⁶Бӱӱн шаатлык едерим сизӓ, не дӓ олурса сизин каныныздан бӓн пакым.

²⁷Зерӓ сакынмадым хаберлейим сизӓ Аллахын бӱтӱн истедиини.

²⁸Есап алын кенди-кендинизӓ хем бӱтӱн сӱрӱйӓ, кимин ӱстӱнӓ Аллах койду сизи гӱдӱӂӱ, ки гӱдӓсиниз Саабинин /хем Аллахын/ клисесини, ангысыны казанды Кенди каныннан.

²⁹Билерим, ани беним гитмемдӓн сора сизин араныза паралайыӂы йабанылар гиреӂек, ангылары аӂымайаӂэк сӱрӱйӱ.

³⁰Сизин дӓ араныздан калкаӂэк ӧлӓ адамнар, ангылары терсинӓ лафедеӂеклӓр, ки ӱӱрениӂилери кенди тарафына чексиннӓр.

³¹Онун ичин, кушку олун хем унутмайын, ани бӓн ӱч йыл геӂӓ-гӱндӱз йашлар гӧзлеримдӓ дурмамайӂа херкезинизи ӱӱреттим.

³²Ама шинди верерим сизи, кардашлар, Аллахын елинӓ хем Онун хайырлы сӧзӱнӓ, ани вар насыл сизи каавилесин да мираслык версин бӱтӱн айоз халкыннан.

³³Тамахланмадым кимсейин гӱмӱшӱнӓ, алтынына йада рубасына.

³⁴Кендиниз билерсиниз, ани бу еллерим измет етти кенди лӓӓзымныкларыма хем оннара, ким бенимнӓн барабарды.

³⁵Хербир ӱзерӓ сизӓ гӧстердим, ани, бутӱрлӱ ишлейип, лӓӓзым йардым еделим йуфка оланнара да унутмайалым Сааби Иисусун сӧзлерини, зерӓ О Кендиси деди: „Таа мутлу вермӓӓ, некадар алмаа“».

³⁶Бӧлӓ лафеттиктӓн сора Павли диз чӧктӱ да хепсиннӓн барабар дуа етти.

³⁷Хепси чок аалады да, сармашып Павлинин бойнусуна, ӧптӱлӓр ону.

³⁸Кахырландылар таа пек лафларындан, ани деди, ки артык гӧрмейеӂеклӓр онун ӱзӱнӱ. Сора гечирдилӓр ону гемийӓ кадар.