Read Tungag АПОСТОЛЛАРЫН ЙАПТЫКЛАРЫ 24 Bible Online

АПОСТОЛЛАРЫН ЙАПТЫКЛАРЫ 24 - Tungag bible

АПОСТОЛЛАРЫН ЙАПТЫКЛАРЫ 24

¹Беш гӱндӓн сора гелди Ананийа, баш попаз, аксакалларлан барабар хем бир беӂерикли лаф устасыннан, ады Тертул. Оннар аалаштылар Павлидӓн кулланыӂынын ӧнӱндӓ.

²Чаардылар Павлийи да Тертул башлады кабаатландырмаа ону бутӱрлӱ: «Чок хатырлы Феликс, Ӂанабин йапэрсын, ки биз чок вакытлар йашээрыз барышмакта. Бу миллет ичин Ӂанабинин зааметиннӓн чок ии ишлӓр йапылды.

³Буннары биз чок шӱкӱрлӱклӓн анарыз херзаман хем херердӓ.

⁴Ама, ки таа йорултмайалым Ӂанабини дейни, йалварэрыз, сабурлуклан сеслӓ бизи кысадан.

⁵Биз булдук, ани бу адам — бир беладыр. О калкындырэр хепси иудейлери бӱтӱн дӱннедӓ хем бир ӧнӂӱдӱр назорейлерин сектасында.

⁶О кыйышты артык мындарласын Айоз бинайы, ама биз туттук ону /да истедик даава йапмаа бизим закона гӧрӓ,

⁷ама аскер бинбашы Лисий, гелип бӱӱк куветлӓн, капты ону бизим елимиздӓн

⁸да бизӓ, онун кабаатчыларына, сымарлады, гелелим Ӂанабинӓ/. Сӓн ону соруйа чекирсейдин, вар ниӂӓ кендин дӓ аннайасын хепсини буннары, нейлӓн биз ону кабаатлээрыз».

⁹Орадакы иудейлӓр, кабаатламайа катылып, дедилӓр, ани хепси буннар хакына аслы.

¹⁰Кулланыӂы Павлийӓ нышан йапты, ки лафетсин. Павли бӧлӓ деди: «Билерим, ани Ӂанабин чок йыллар даава йапэрсын бу миллетӓ, онуштан севинчлӓн бакаӂам, чыкарайым доорулууму.

¹¹Ӂанабин кендин вар ниӂӓ аннайасын, ани йок оники гӱндӓн зеедӓ, незамандан бӓн гиттим Иерусалимӓ, баш иилдейим Аллаха.

¹²Оннар не Айоз бина ичиндӓ, не синагогалар ичиндӓ, не да касаба ичиндӓ бени булмадылар бириннӓн лафедӓркӓн йада карышмалык инсан арасында йапаркан.

¹³Оннар йок насыл сана, чыкарып, гӧстерсиннӓр бунун аслысыны, нейлӓн шинди бени кабаатландырэрлар.

¹⁴Ама шаатлык едерим Ӂанабинӓ, ани измет едерим беним бобаларын Аллахына о йола гӧрӓ, ани оннар сайэрлар бир секта. Инанэрым хепсини, не вар йазылы Законда хем пророкларда.

¹⁵Умут едерим Аллаха, ниӂӓ оннар да инанэрлар, ани олаӂэк ӧлӱлерин дирилмеси, ниӂӓ доорулара, хем ӧлӓ доору олмайаннара да.

¹⁶Онуштан бӓн чалышэрым, ки херзаман пак ӱзлӓн олайым Аллахын хем инсанын ӧнӱндӓ.

¹⁷Чок йыллардан сора гелдим, ки гетирейим йардым миллетимӓ хем курбан Аллаха.

¹⁸Бӓн курбан гетириркӓн, Асийадан кими иудейлӓр хызландылар ӱстӱмӓ Айоз бинада. О вакыт бӓн пакландыйдым, долайымда да калабалык йада карышмалык йокту.

¹⁹Оннар кендилери лӓӓзымды гелсиннӓр Ӂанабинин ӧнӱнӓ да кабаатландырсыннар бени, еер варса не аалашсыннар бендӓн.

²⁰Йада, бурада оланнар сӧлесиннӓр, не кабаат бендӓ булдулар, ачан чыкардылар бени Синедрионун ӧнӱнӓ?

²¹Салт бир лафтан каарӓ, ани баардым, ки чыкарылдым оннарын ӧнӱнӓ: „Ӧлӱлерин дирилмеси ичин бӓн бӱӱн даава олэрым сизин ӧнӱнӱздӓ“».

²²Феликс, ангысы ии билӓрди Иисусун йолуну, атты даавайы башка вакыда да деди: «Сизин ишинизи аараштыраӂам, ачан гелеӂек бинбашы Лисий».

²³Сора о сымарлады ӱзбашына беклесин Павлийи, ама таа сербест браксын хем дургутмасын йакын оланнарыны, ки измет етсиннӓр она.

²⁴Биркач гӱндӓн сора Феликс гелди кенди карысыннан, Друзиллайлан, ангысы иудейкайды, чаартты Павлийи да сеследи онун лафыны Иисус Христозун инаны ичин.

²⁵Ачан Павли башлады сӧлемӓӓ доорулук ичин, кендини запламак ичин хем Аллахын гелӓн даавасы ичин, Феликс титсиленди да деди: «Шиндилик гит, ачан булаӂам вакыт, енидӓн чаардаӂам сени».

²⁶Бунуннан барабар о умут чекӓрди, ани Павли она пара вереӂек, ки салверсин ону. Онуштан сыкча чаардарды да лафа дурарды онуннан.

²⁷Ики йыл гечтиктӓн сора Феликсин еринӓ гелди Порций Фест. Феликс, ани истеди беендирсин кендини иудейлерӓ, бракты Павлийи капанда.