Read Tungag АПОСТОЛЛАРЫН ЙАПТЫКЛАРЫ 26 Bible Online

АПОСТОЛЛАРЫН ЙАПТЫКЛАРЫ 26 - Tungag bible

АПОСТОЛЛАРЫН ЙАПТЫКЛАРЫ 26

¹Агриппа деди Павлийӓ: «Верилер изин, лафедӓсин кендин ичин». Озаман Павли, узадып елини, башлады доорулууну чыкармаа:

²«Падишах Агриппа! Сайэрым кендими мутлу, ани бӱӱн вар колайлыым доорулууму чыкарайым сенин ӧнӱндӓ хепсиндӓн, нейлӓн иудейлӓр бени кабаатландырэр.

³Ен чок севинерим, чӱнкӱ Ӂанабин билерсин иудейлерин хепси адетлерини хем сорушларыны. Онуштан йалварэрым, сеслӓ бени сабурлу.

⁴Хепси иудейлӓр билерлӓр, насыл йашадым баштан, генчлиимдӓн кенди халкымын арасында хем Иерусалимдӓ.

⁵Бени чоктан таныйэрлар хем еер кайыл олурсайдылар, шаатлык едӓбилирлӓр, ани йашадым ниӂӓ бир фарисей, бизим динин ен сыкы бӧлӱмӱнӓ гӧрӓ.

⁶Да шинди дурэрым даава ӧнӱндӓ умудум ичин она, не Аллах адады бизим бобалара.

⁷Хепси бизим оники сенселӓ умутлан беклеер, бу адамак таманнансын, измет едерӓк Аллаха шереметликлӓн геӂӓ-гӱндӱз. Тӓ бу умут ичин, падишахым, кабаатландырэрлар бени иудейлӓр.

⁸Нечин сизӓ инанылмаз гӧрӱнӱр, ани Аллах ӧлӱлери дирилдер?

⁹Доору, ани бӓн дӓ санардым, ки лӓӓзым куветлӓн каршы гидейим Назаретли Иисуса.

¹⁰Ӧлӓ да йаптым Иерусалимдӓ. Бӱӱк попазлардан заабитлик кабледип, чойуну Аллахын айоз халкындан кападым зындана. Ачан оннар ӧлӱмӓ верилдилӓр, бӓн дӓ сес вердим оннара каршы.

¹¹Хепси синагогалары гезерӓк, чок сыра оннары ӂезалардым хем зорлардым, кӧтӱлесиннӓр Иисусу. Бӓн ӧлӓ кудурмуштум, ки артык йабанӂы миллетлерин касабаларына да гидӓрдим оннары кооламак ичин.

¹²Бу неетлӓн йолландым Дамаск касабасына заабитликлӓн хем бир маасуз сымарламаклан, не алдыйдым бӱӱк попазлардан.

¹³Ӱӱлендӓ, падишахым, йолда гӧрдӱм бир шафк гӧктӓн, таа кескин гӱнӱн айдынныындан, ани айдыннатты беним хем йолдашларымын долайыны.

¹⁴Хепсимиз ерӓ дӱштӱк. Бӓн ишиттим бир сес, ани деди бана чыфыт дилиндӓ: „Саул! Саул! Нечин Бени коолээрсын? Зор сана гитмӓӓ казаа каршы“.

¹⁵Озаман сордум: „Саабим, Кимсин Сӓн?“ Сааби деди: „Бӓним — Иисус, Кими сӓн коолээрсын.

¹⁶Хайди шинди калк айакча да дик дур, зерӓ Бӓн гӧрӱндӱм сана, ки койайым сени изметкӓр хем шаат, ниӂӓ оннар ичин, не гӧрдӱн хем не дӓ ачаӂам сана.

¹⁷Сени куртараӂам кенди халкындан хем башка миллетлердӓн, кимӓ Бӓн сени йоллээрым,

¹⁸ки ачасын оннарын гӧзлерини, да дӧнсӱннӓр каранныктан айдыннаа хем шейтанын кувединдӓн Аллаха, еденсиннӓр афетмӓк гӱнахларындан хем бир пай оннарлан, ким айозланэр инаннан Бана“.

¹⁹Онуштан, падишах Агриппа, бӓн каршы дурмадым гӧктӓн гӧрӱнмейӓ.

²⁰Насаат еттим илкин Дамаск касабасында, сора Иерусалимдӓ инсана, сора бӱтӱн Иудейа ериндӓ хем йабанӂы миллетлерӓ, ки пишман олсуннар гӱнахларындан, дӧнсӱннӓр геери Аллаха да йапсыннар, не йарашыр бу пишманныкта.

²¹Тӓ бунун ичин туттулар бени иудейлӓр Айоз бина ичиндӓ да бактылар параламаа.

²²Ама йардым каблеттим Аллахтан да бӱӱнӓдӓн йашамакта булунэрым хем шаатлык едерим кӱчӱӱнӓ-бӱӱнӓ. Бишей зеедӓ сӧлӓмеерим ондан каарӓ, не пророклар хем Моисей сӧледи, ки лӓӓзым таманнансын.

²³Оннар сӧледи, ани Христос лӓӓзымды зеетленсин да олсун ӧлӱлердӓн илк дирилӓн, хаберлесин айдынныы Кенди халкына хем йабанӂы миллетлерӓ».

²⁴Ачан Павли бутӱрлӱ доорулууну чыкарарды, Фест бӱӱк сеслӓн деди: «Павли, сӓн делийсин! Сенин чок ӱӱренмишлиин сени акылдан чыкарэр!»

²⁵«Диилим дели, чок хатырлы Фест! — ӂувап етти Павли. — Ама бӓн сӧлеерим аслы хем акыллы лафлар.

²⁶Буннары билер падишах. Онун ичин гиргин лафедерим онун ӧнӱндӓ хем санмээрым, ани падишаха буннардан калды саклы бишей, зерӓ буннар олмадылар бир кӧшедӓ.

²⁷Инанэрсын мы, падишах Агриппа, пророклары? Билерим, ани инанэрсын!»

²⁸Агриппа деди Павлийӓ: «Бени йакын инандырдын христиан олайым!»

²⁹Павли деди: «Аллах версин, таа тез йада таа геч, диил салт Ӂанабин, ама хепси, ким сеслеер бӱӱн бени, беним гиби олсуннар, бу синӂирлердӓн каарӓ».

³⁰/Ачан Павли деди буну,/ падишах, кулланыӂы хем Вереника, хем хепси орада отураннар калктылар.

³¹Топланып бир тарафта, лафеттилӓр бири-бириннӓн, ани бу адам йапмээр бир дӓ кӧтӱлӱк, ани лӓӓзым олсун ӂезалансын ӧлӱмнӓн еки капаннан.

³²Агриппа деди Фестӓ: «Варды ниӂӓ салвермӓӓ ону, еер о истӓмейди Кесарын даавасыны».