Read Tungag АПОСТОЛЛАРЫН ЙАПТЫКЛАРЫ 27 Bible Online

АПОСТОЛЛАРЫН ЙАПТЫКЛАРЫ 27 - Tungag bible

АПОСТОЛЛАРЫН ЙАПТЫКЛАРЫ 27

¹Ачан карар алынды, ки Италийайа ӱзелим гемийлӓн, Павлийи хем таа биркач капанӂыйы вердилӓр бир ӱзбашынын елинӓ, Августун полкундан, ады Иулий.

²Биз пиндик бир гемийӓ Адрамит касабасындан, ангысы лӓӓзымды ӱзсӱн Асийанын йанындан, да йола чыктык. Бизимнӓн гелди Аристарх Македонийадан, Салоник касабасындан.

³Икинӂи гӱнӱ етиштик Сидон касабасына. Иулий ии гӧтӱрӓрди кендини Павлийлӓн. О кайыл олду, ки Павли долашсын кенди достларыны, ки оннар йардым етсиннӓр она.

⁴Орадан йолландыктан сора Кипрунун лӱзгердӓн корунмуш йанындан гечтик, зерӓ каршы лӱзгӓр есӓрди.

⁵Гечтийнӓн денизи Киликийа хем Памфилийа бойундан, етиштик Ликийанын Мира касабасына.

⁶Орада ӱзбашы булду Александрийа касабасындан бир геми, ани ӱзӓрди Италийайа, да пиндирди бизи она.

⁷Чок гӱннӓр йаваш ӱздӱк, да зор-зоруна анӂак етиштик Книд касабасынын ачыклыына. Лӱзгӓр бизи дургудурду, Салмон бурнусуну долайлайып, гечтик Крит аданын лӱзгердӓн корунмуш йанындан.

⁸Зар-зор гечтик аданын бойундан, да етиштик бир ерӓ, ады Гӧзӓл Лиманнар, ани йакын Ласейа касабасына.

⁹Гечти чок вакыт, да йолӂулук су ӱстӱндӓ артык олду коркунч, зерӓ оруч гӱнӱ [24] гечтийди. Павли, данышып хепсинӓ, деди:

¹⁰«Адамнар! Бӓн гӧрерим, ани ӱзмемиз белалы олаӂэк хем зарар гетиреӂек диил саде гемийӓ хем ӱклӱ мала, ама бизим кенди йашамамыза да».

¹¹Ама аскер ӱзбашы таа чок сеследи капитаны хем геминин чорбаӂысыны, некадар Павлийи.

¹²Чӱнкӱ о лиман диилди ии кышламак ичин, чойу карарлады, ки гиделим орадан да денейелим, еер олурса колай, етишмӓӓ Финиксӓ, Крит аданын бир лиманына, кышламак ичин. Орасы ӱӱлен-гӱнбатысына хем пойраз-гӱнбатысына доору бакэр.

¹³Башлады ӱӱлендӓн бир илин лӱзгӓр есмӓӓ, да оннар, санып, ки истедии олду, ченгели алдылар да башладылар ӱзмӓӓ Крит аданын бойундан.

¹⁴Ама гечмеди чок вакыт, аданын ӱстӱндӓн копту бир фуртуналы лӱзгӓр, ады Евракилон [25].

¹⁵Геми фуртунадан тутулду, ангысына каршы гидӓмеди, онуштан гемийи брактык, сӱрӱкленсин.

¹⁶Сыйынып кӱчӱк бир аданын, ады Кавда, лӱзгердӓн корунмуш йанына, анӂак запедӓбилдик геминин кайыыны.

¹⁷Кайыы калдырдыктан сора, чатыларын йардымыннан, гемийи кушаттылар. Коркарак, геми конмасын Сирт кӧрфезинин кумнукларына, салвердилӓр елкеннери да брактылар лӱзгердӓн сӱрӱкленсиннӓр.

¹⁸Ертеси гӱнӱ боран бизим гемийӓ ӧлӓ чарпарды, ани башладылар атмаа ӱкленмиш маллары дениз ичинӓ.

¹⁹Ӱчӱнӂӱ гӱнӱ кенди еллеримизлӓн аттык геминин такымнарыны.

²⁰Чӱнкӱ чок гӱн гӧрӱнмеди не гӱнеш, не да йылдызлар, боран да пек каавиленди, сонда хептӓн кайбеттик умуду куртулмак ичин.

²¹Чок вакыт имедилӓр, онуштан Павли, ортайа чыкып, оннара деди: «Адамнар! Лӓӓзымды сеслейӓсиниз бени да айырылмайасыныз Крит адасындан. Озаман биз чекмейеӂейдик бу белалары хем зарарлары.

²²Шинди сизӓ данышэрым: Ӱрекленин! Зерӓ кимсей кайбелмейеӂек, саде геми йок олаӂэк.

²³Бу геӂӓ гӧстерилди бана бир ангил Аллахтан, Кимӓ баалыйым хем измет едерим, да деди:

²⁴„Коркма, Павли! Сӓн лӓӓзым чыкасын Кесарын ӧнӱнӓ. Да тӓ, Аллах сенин хатырын ичин куртарэр хепсини, ким сениннӓн барабар ӱзерлӓр“.

²⁵Онуштан ӱрекленин, адамнар! Бӓн инанэрым Аллахы, хепси ӧлӓ олаӂэк, ниӂӓ сӧленди.

²⁶Ама бизим геми лӓӓзым уурасын бир ада ӱстӱнӓ».

²⁷Ондӧрдӱнӂӱ геӂӓ сӱрӱкленӓрдик Адриатика денизиндӓ. Йакын геӂӓ йарысына гемиӂилӓр шӱпеленмӓӓ башладылар, ани йаклашэрыз куруйа.

²⁸Ӧлчтӱлӓр денизин деринниини да булдулар, ани ирми стынӂин, сора, таа бираз гидип, енидӓн ӧлчтӱлӓр да булдулар онбеш стынӂин [26].

²⁹Сакынарак, ки гемимиз урулмасын бир ташлы ерӓ, аттылар арка тарафтан дӧрт демир ченгел да бакардылар тез айдыннансын.

³⁰Бу вакыт гемиӂилӓр качмаа денедилӓр гемидӓн. Йапынарак сансын истеерлӓр салвермӓӓ ченгеллери геминин ӧнӱндӓн, индирдилӓр кайыы денизӓ.

³¹Озаман Павли деди аскер ӱзбашына хем аскерлерӓ: «Еер буннар калмарсайдылар гемидӓ, олмайаӂэк насыл куртуласыныз».

³²Аскерлӓр озаман кестилӓр кайыктан чатылары да брактылар кайык дӱшсӱн.

³³Гӱн дууаӂэйкан, Павли йалварды хепсинӓ, исиннӓр. О деди: «Бӱӱн ондӧрт гӱн, ниӂӓ кушку дурэрсыныз. Хич бишей имейип, ач дурдунуз.

³⁴Онуштан, йалварэрым сизӓ, ийин. Бу лӓӓзым сизин куртулманыз ичин, зерӓ кайбелмейеӂек сиздӓн бир дӓ сач билӓ башыныздан».

³⁵Бу лафлары сӧледиктӓн сора алды екмӓӓ, хепсинин ӧнӱндӓ шӱкӱр етти Аллаха да, кырып екмӓӓ, башлады имӓӓ.

³⁶Озаман хепси ӱреклендилӓр да екмек идилӓр.

³⁷Гемидӓ хепсимиз икиӱз етмиш алты кишийдик.

³⁸Дойундуктан сора башладылар илиннетмӓӓ гемийи, атып боодайы дениз ичинӓ.

³⁹Ачан айдыннанды, гемиӂилӓр танымадылар о ери, ама гӧрдӱлӓр бир кӧрфез, нередӓ варды кумсаллык. Орайы истедилӓр, еер олурса колай, кондурсуннар гемийи куруйа.

⁴⁰Чатылары кесип, ченгеллери денизӓ брактылар. Хеп о заманда дӱменин чатыларыны чӧздӱлӓр да, ӧн елкени лӱзгерӓ верерӓк, гемийи кумсаллаа доору дооруттулар.

⁴¹Геми бир кум ӱӱсеклиинӓ чарпты да орайы конду. Ӧнӱ кума сапланды да кымылдамаз олду, геерисини са далгалар, урарак, башладылар парчаламаа.

⁴²Аскерлӓр неетленди ӧлдӱрсӱннӓр капанӂылары, ки ӱзӱп кенара качмасыннар.

⁴³Ама ӱзбашы, ангысы истӓрди Павлийи куртармаа, дургутту бу нееттӓн оннары да сымарлады, ким билер ӱзмӓӓ, илкин атласын да ӱзсӱн кенара,

⁴⁴сора ӧбӱрлӓр, кимиси тафталарлан, башкалары геминин парчаларындан тутунуп, кенара чыксыннар. Бутӱрлӱ хепси саа-селӓм кенара чыктылар.