Read Tungag АПОСТОЛЛАРЫН ЙАПТЫКЛАРЫ 4 Bible Online

АПОСТОЛЛАРЫН ЙАПТЫКЛАРЫ 4 - Tungag bible

АПОСТОЛЛАРЫН ЙАПТЫКЛАРЫ 4

¹Ачан Петри хем Иоан лафедӓрдилӓр инсана, ап-ансыздан гелди попазлар, Айоз бинанын бекчилерин заабиди хем садукейлӓр.

²Дарсыктылар оннара, зерӓ ӱӱредерлӓр инсаны, ки хепси ӧлӱлӓр дирилеӂек, чӱнкӱ Иисус дирилди.

³Тутуп оннары, кападылар капана ертеси гӱнӓ кадар, зерӓ авшамды.

⁴Чойу оннардан, ани сеследилӓр насааты, инандылар, да инанӂыларын сайысы йаклашты беш бинӓ.

⁵Икинӂи гӱнӱ иудей ӧндерӂилери, аксакаллар хем билгичлӓр топландылар Иерусалимӓ.

⁶Баш попаз Аннан, Кайафа, Иоан, Александру, хем ӧбӱрлери дӓ, ким чекилер баш попазын сенселесиндӓн, орадайдылар.

⁷Алдылар Петрийи хем Иоаны арайа да сордулар оннара: «Не куветлӓн хем кимин адына сиз буну йаптыныз?»

⁸Озаман Петри, долу Айоз Духлан, деди оннара: «Халкын ӧндерӂилери хем /Израилин/ аксакаллары!

⁹Чӱнкӱ бу гӱн чаарылдык ӂуваба, ки йаптык иилик бир хастайа, да сорулэр, насыл о алышты,

¹⁰билиниз сиз хем бӱтӱн Израил миллети! Бу адам, хептӓн саа дурэр сизин ӧнӱнӱздӓ Назаретли Иисус Христозун адындан, Ангысыны сиз ставроза гердиниз, ама Аллах дирилтти Ону ӧлӱдӓн.

¹¹Одур таш, Ким сиздӓн, усталардан сыбыдылмыш, ама шинди етишти кӧшӓ ташы олсун.

¹²Йок башка кимсейдӓ куртармак, зерӓ йок гӧк алтында башка бир ад, баашланмыш инсана, ангысыннан куртулабилелим».

¹³Гӧрӱп Петринин хем Иоанын кыйышыклыыны, шаштылар, зерӓ аннадылар, ани оннар диил ӱӱренмиш хем сырадан инсаннар, да таныдылар, ани Иисуслан гезмишлӓр.

¹⁴Ама гӧрӱп саа олмуш адамы дураркан оннарын йанында, бишей каршы лафедӓмӓрдилӓр.

¹⁵Сымарладылар оннара, Синедриондан чыксыннар, сора дартышмаа башладылар:

¹⁶«Не вар насыл йапалым? — дедилӓр. — Хепси Иерусалимдӓ йашайан инсан билер, ани оннардан йапылды бу мераклы нышан. Биз йок ниӂӓ дейелим, ани бу олмады.

¹⁷Ама ки илери доору даалмасын бу хабер инсан арасында, коркудалым оннары да сымарлайалым, кимсейӓ насаат етмесиннӓр бу Адамын адыннан».

¹⁸Сора чаардылар да сымарладылар оннара, хич бир заман Иисусун адыны анмасыннар хем ӱӱретмесиннӓр инсаны Онун адыннан.

¹⁹Ама Петрийлӓн Иоан бӧлӓ ӂувап еттилӓр да дедилӓр: «Сиз кендиниз дӱшӱнӱн, доору му Аллахын ӧнӱндӓ олаӂэк, ки таа чок сеслейелим сизи, некадар Аллахы?

²⁰Биз йок ниӂӓ сӧлӓмейелим, не гӧрдӱк хем не ишиттик».

²¹Енидӓн оннары коркуттуктан сора брактылар, гитсиннӓр. Хич бир маана буламардылар ӂезаламаа оннары, зерӓ хепси инсан Аллахы бу олуш ичин метиннӓрди.

²²Зерӓ бу адам, ани мераклы нышаннан алыштырылмышты, кырк йашыны гечмишти.

²³Петри хем Иоан салверилдиктӓн сора дӧндӱлӓр кафадарларына да аннаттылар, не деди оннара бӱӱк попазлар хем аксакаллар.

²⁴Кафадарлары, буну сеслейип, дуада бирликтӓ олдулар, сеслерини Аллаха калдырып, дедилӓр: «Чорбаӂы, Сӓнсин, Ким гӧкӱ хем ери, денизлери хем хепсини, не вар оннар ичиндӓ, йаратты!

²⁵Сӓн Айоз Духуннан, сенин изметкерин, бизим бобанын, Давидин аазындан дедин: „Нечин дебрешер миллетлӓр, нечин инсаннар бош ишлӓр дӱшӱнерлӓр?

²⁶Ерин падишахлары калктылар, хем заабитлӓр бирлешти Саабийӓ хем Онун Христозуна каршы“.

²⁷Доору, ани бирлештилӓр бу касабада Ирод хем Понтий Пилат, тайфӓннарлан хем Израил миллетиннӓн билӓ, Сенин айоз Оолуна, Иисуса каршы, Кими Сӓн йааладын,

²⁸ки йапсыннар, не ӧнӂӓ Кенди кувединнӓн хем ии истедииннӓн карарладын олсун дейни.

²⁹Шинди, Сааби, есап ал оннарын коркутмакларыны да вер кувет сенин чыракларына гиргинниклӓн Сенин сӧзӱнӱ хаберлесиннӓр.

³⁰Сӓн дӓ узат елини, ки инсаннар алыштырылсын, да шашмаклы ишлӓр хем нышаннар йапылсын Сенин айоз Оолунун Иисусун адыннан».

³¹Оннарын дуаларындан сора ер сарсаланды, нередӓ оннар топлуйдулар. Хепси долду Айоз Духлан да башладылар гиргинниклӓн насаат етмӓӓ Аллахын сӧзӱнӱ.

³²Хепси инанӂылар бир ӱрек хем бир ӂан гибийдилӓр. Бириси билӓ демӓрди, ки варлыы салт кендисинин. Хепси ишлерини бири-бириннӓн пайлашардылар.

³³Апостоллар бӱӱк куветлӓн шаатлык едӓрдилӓр Сааби Иисус /Христозун/ дирилмеси ичин, да инсан [5] оннары хепсини чок беенӓрди.

³⁴Оннарын арасында йокту бириси билӓ, ани йоклук гӧтӱрсӱн, зерӓ херкезин, кимин варды тарласы еки еви, сатып, парасыны гетирӓрдилӓр

³⁵апостолларын айакларына, сора пара пай оларды херкезинӓ лӓӓзымныына гӧрӓ.

³⁶Кипруда дуумуш бир левийли, Иосиф, ангысына апостоллар дейӓрдилӓр Варнава, аннамасы «иилендириӂи»,

³⁷сатты кенди тарласыны да парайы апостолларын айакларына гетирди.