Read Tungag АПОСТОЛЛАРЫН ЙАПТЫКЛАРЫ 5 Bible Online

АПОСТОЛЛАРЫН ЙАПТЫКЛАРЫ 5 - Tungag bible

АПОСТОЛЛАРЫН ЙАПТЫКЛАРЫ 5

¹Бир адам, ады Ананийа, кенди карысыннан Сапфирайлан, сатты кенди топраанын бир парчасыны,

²ама паранын бир пайыны, аннашып карысыннан, кендисинӓ бракты. Калан парайы гетирди да койду апостолларын айакларына.

³Петри деди: «Ананийа, нечин брактын, шейтан куллансын сенин ӱреени, ки йаландырасын Айоз Духу, саклайып паранын бир пайыны сатылмыш тарладан?

⁴Аӂаба тарла сатылмадаан диил мийди сенин? Хем саттыктан сора йокту му хакын парайы кулланасын, ниӂӓ истеерсин. Нечин брактын, пейдалансын бутӱрлӱ неет сенин ӱреендӓ? Сӓн йаландырмадын инсаны, ама Аллахы».

⁵Ананийа, ишидип бу лафлары, дӱштӱ ерӓ да ӂан верди. Бир бӱӱк корку хепсини алды, ким буну ишитти.

⁶Генчлӓр калктылар, сардылар онун гӱӱдесини да, чыкарып дышары, гӧмдӱлӓр.

⁷Бир ӱч сааттан сора гирди онун карысы да, билмейерӓк, не олду.

⁸Петри сорду она: «Сӧлӓ бана, бу паайлан мы саттыныз тарланызы?» «Да, бу паайлан», — ӂувап етти кары.

⁹Петри деди она: «Насыл сиз аннаштыныз, ки Саабинин Духуну денейӓсиниз? Тӓ оннар, ким гӧмдӱ сенин коӂаны, капуйа етиштилӓр, оннар сени дӓ гӧмеӂеклӓр».

¹⁰Кары хемен дӱштӱ Петринин айакларына да ӂан верди. Генчлӓр, гирип, ону ӧлӱ булдулар да, чыкарып коӂасынын йанына, гӧмдӱлӓр.

¹¹Бир бӱӱк корку алды бӱтӱн клисейи хем хепсини, ким ишитти бунун ичин.

¹²Апостолларын еллериннӓн оларды инсан ичиндӓ чок шашмаклы ишлӓр хем нышаннар. Оннар топланардылар бирери Соломонун колонадасында.

¹³Калан инсандан кимсей кыйышмарды оннара катылсын, макар ки инсан метедӓрди оннары.

¹⁴Оннарын, ким инанарды Саабийи да катыларды клисейӓ, сайылары, адам-кары, чок зееделенӓрди.

¹⁵Етишти орайы кадар, ани хасталары сокаклара йатак-дӧшек ӱстӱндӓ чыкарардылар, ки баарлем гӧлгеси Петринин гечсин кимисинин ӱстӱндӓн.

¹⁶Долай касабалардан чок инсан гелӓрди Иерусалимӓ, гетирип хасталары хем фена духтан зеетленмишлери, хепси саа олурдулар.

¹⁷Баш попаз хем хепси, ким онуннанды, садукей бӧлӱмӱндӓн, калктылар, долу кысканчлыклан,

¹⁸туттулар апостоллары да кападылар ӂумлӓ капана.

¹⁹Ама Саабидӓн бир ангил капанын капуларыны геӂӓ ачты да, чыкарып оннары дышары, деди:

²⁰«Гидин Айоз бина ичинӓ да орада дуруп, сӧлейин инсана хепси ени йашамак ичин сӧзлери».

²¹Апостоллар, сеслейип бу лафлары, чин-сабаалӓн гирдилӓр Айоз бина ичинӓ да ӱӱредӓрдилӓр инсаны. Баш попаз хем онун адамнары, гелип, топладылар бӱтӱн Синедриону, хепси Израилин аксакалларыны, да йолладылар изметкерлерини капана, ки гетирсиннӓр апостоллары.

²²Ама изметкерлӓр, зындана гидип, оннары буламадылар. Дӧндӱлӓр геери да дедилӓр:

²³«Капаны булдук китли хем сыкы корунмуш, бекчилӓр дӓ дурурдулар капуларда. Ама капуйу ачып, кимсейи ичйанда буламадык».

²⁴Ачан бу лафлары ишитти бекчилерин заабиди хем бӱӱк попазлар, хич билмӓрдилӓр, не йапсыннар, да шаштылар, не бу олабилир.

²⁵Гелди биркимсей да сӧледи оннара: «Тӓ оннар, кими сиз капана кападыныз, Айоз бинанын аулу ичиндӓ дуруп, инсаны ӱӱредерлӓр».

²⁶Озаман бекчилерин заабиди, изметкерлериннӓн барабар гиттилӓр да гетирдилӓр апостоллары, ама диил зорлан, зерӓ коркардылар инсандан, ки ӧлдӱрмесиннӓр оннары ташлан.

²⁷Гетирдилӓр апостоллары Синедрионун ӧнӱнӓ да баш попаз сорду оннара:

²⁸«Сыкы сымарламадык мы биз сизӓ, ӱӱретмейӓсиниз бу адлан инсаны? Ама сиз бу ӱӱретменизлӓн долдурдунуз бӱтӱн Иерусалими да истеерсиниз бу Адамын каныны атмаа бизим ӱстӱмӱзӓ».

²⁹Петри хем ӧбӱр апостоллар ӂувап еттилӓр: «Биз Аллахы таа чок лӓӓзым сеслейелим, некадар инсаны!

³⁰Бизим бобаларымызын Аллахы дирилтти Иисусу, Кими сиз, асып ставроза, ӧлдӱрдӱнӱз.

³¹Ону Аллах Кенди саа тарафына ӱӱселтти, ки олсун Ӧндерӂи хем Куртарыӂы да верӓбилсин колайлык Израилӓ гӱнахларындан Аллаха дӧнсӱннӓр да афетмӓк кендилеринӓ еденсиннӓр.

³²Буннара биз шаадыз хем Айоз Дух, Ангысыны Аллах верди оннара, ким сеслеер Ону».

³³Ишидерӓк буну, Синедрионун азалары чатлардылар ӱфкедӓн да койдулар неетлеринӓ ӧлдӱрсӱннӓр апостоллары.

³⁴Ама калкты оннарын арасындан бир фарисей, ады Гамалиил, Законун ӱӱредиӂиси, хепси инсандан сайгылы, да буйур етти чыкарсыннар апостоллары бир парча вакыда дышары.

³⁵Сора деди Синедрионун азаларына: «Израиллилӓр! Ии бакын, не йапаӂэныз бу адамнарлан.

³⁶Зерӓ диил чоктан пейда олду Февда, ангысы койарды кендини бишей. Онун ардына гитти бир дӧртӱз киши, ама ачан ону ӧлдӱрдӱлӓр, хепси, ким ону сеслӓрди, даалыштылар да йок олдулар.

³⁷Бундан сора, йазылмак вакыдында, пейдаланды Иуда Галилейадан, о кенди ардына чок инсан чекти. Ама о да кайбелди хем хепси, ким ону сеслӓрди дармадаан олду.

³⁸Шинди деерим сизӓ: бу адамнардан ел чекин да бракын оннары, зерӓ еер оннарын бу неети хем йаптыклары инсандан гелирсейди, даалаӂэк,

³⁹ама еер Аллахтан гелирсейди, даадамазсыныз оннары. Бундан каарӓ, Аллаха каршы гиденнӓр чыкарсыныз».

⁴⁰Оннар сеследилӓр ону, чаарып апостоллары, дӱӱдӱлӓр да сымарладылар, насаат етмесиннӓр Иисус адыннан. Сора салвердилӓр оннары.

⁴¹Апостоллар гиттилӓр Синедриондан севинерӓк, чӱнкӱ пай алдылар зеетлердӓн Сааби Иисусун ады ичин.

⁴²Оннар хер гӱн Айоз бинада хем евлердӓ дайма ӱӱредӓрдилӓр хем Ии Хабери Иисус Христос ичин аннадардылар.