Read Tungag АПОСТОЛЛАРЫН ЙАПТЫКЛАРЫ 8 Bible Online

АПОСТОЛЛАРЫН ЙАПТЫКЛАРЫ 8 - Tungag bible

АПОСТОЛЛАРЫН ЙАПТЫКЛАРЫ 8

¹Саул Стефанын ӧлдӱрӱлмесинӓ кайыл олду. О гӱн чекетти бӱӱк кооламак Иерусалим клисесинӓ каршы. Апостоллардан каарӓ, хепси даалды Иудейа хем Самарийа ерлеринӓ.

²Аллахтан коркан адамнар Стефаны гӧмдӱлӓр да чок ааладылар онун ичин.

³Саул са чалышты йок етмӓӓ клисейи. Гирӓрди евлерӓ, куветлӓн аларды адамнары хем карылары да зындана капарды.

⁴Оннар, ким даалыштылар, ердӓн ерӓ гидӓрдилӓр да ии хабери аннадардылар Аллахын сӧзӱ ичин.

⁵Филип Самарийа касабасына гитти да орада Христос ичин насаат едӓрди.

⁶Инсан, ниӂӓ бир адам, есап алмаклан сеслӓрди, не сӧлӓрди Филип, ишидип хем гӧрӱп мераклы нышаннары, ани о йапарды.

⁷Чок хасталардан баарып-чыкарды фена духлар, хем чок кӧтӱрӱм хем топал инсаннар саа олардылар.

⁸О касабада олду бӱӱк севинмӓк.

⁹Орада варды бир адам, ады Симон, ангысы чоктан бӱӱӂӱлӱк йапарды да шаштырарды Самарийа халкыны. О кендини ӱстӱн бир адам сайарды.

¹⁰Хепси, кӱчӱк-бӱӱк, есап алмаклан сеслӓрдилӓр ону да дейӓрдилӓр: «Бу адам о, кимӓ деерлӓр „Аллахын бӱӱк куведи“».

¹¹Сеслӓрдилӓр ону, зерӓ бӱӱӂӱлӱклӓн чок вакыт оннары шаштырарды.

¹²Ама, ачан инандылар Филипи, ангысы ии хабери аннадарды Аллахын Падишахлыы хем Иисус Христозун ады ичин, ваатиз олдулар адамнар хем карылар.

¹³Симон да артык инанды да ваатиз олду. О Филиптӓн хич айырылмарды да шашмаклан бакарды мераклы нышаннара хем кудретли ишлерӓ, ани йапыларды.

¹⁴Иерусалимдӓ апостоллар, ишидип, ани Самарийа каблетти Аллахын сӧзӱнӱ, орайы йолладылар Петрийи хем Иоаны.

¹⁵Оннар, гелип, дуа еттилӓр, ки самарийалылар каблетсиннӓр Айоз Духу.

¹⁶Зерӓ Айоз Дух таа хич биринин ӱзеринӓ инмемишти, саде ваатиз олмуштулар Сааби Иисусун адына.

¹⁷Озаман Петри хем Иоан койдулар еллерини оннарын ӱстӱнӓ, да оннар каблеттилӓр Айоз Духу.

¹⁸Ачан Симон гӧрдӱ, ани Айоз Дух верилер апостолларын ел коймакларыннан, озаман теклиф етти версин оннара пара

¹⁹да деди: «Верин бана да бу куветтӓн, ки кимин ӱстӱнӓ еллерими койаӂам, каблетсин Айоз Дух».

²⁰Ама Петри деди: «Сенин паран телеф олсун сениннӓн, зерӓ сӓн сандын, ки Аллахын баашышыны вар ниӂӓ казанмаа парайлан!

²¹Йок пайын, йок хакын бу иштӓ, зерӓ сенин ӱрӓӓн диил хализ Аллахын ӧнӱндӓ.

²²Пишманнык гетир сенин бу кӧтӱлӱӱндӓн да дуа ет Саабийӓ, беки афедилир сенин бу кӧтӱ неетин.

²³Зерӓ гӧрерим, ани долуйсун кин зихириннӓн хем баалыйсын законсузлук синӂирлериннӓн».

²⁴Симон ӂувап етти: «Дуа един беним ичин Саабийӓ, ки башыма гелмесин бишей бундан, не сӧлединиз».

²⁵Шаатлык едип, Саабинин сӧзӱнӱ насаат еттиктӓн сора Петри хем Иоан дӧндӱлӓр Иерусалимӓ, аннадарак Ии Хабери Самарийанын чок кӱӱлериндӓ.

²⁶Саабидӓн бир ангил Филипӓ деди: «Калк да гит ӱӱленӓ доору, о йола, ани Иерусалимдӓн Газа касабасына доору инер. О йол шинди бош».

²⁷Филип калкты да гитти. Бу арада бир ефиопийалы евнух [7], Кандакын, Ефиопийа падишахкасынын, бир кудретли изметкери, ани бакарды бӱтӱн онун хазнасыны, геери дӧнӓрди Иерусалимдӓн, нерейи гиттийди Аллаха баш иилтсин дейни.

²⁸О, файтонунда отурарак, окуйарды пророк Исайанын кийадыны.

²⁹Айоз Дух деди Филипӓ: «Гит да етиш бу файтону».

³⁰Филип качып етишти файтону да ишитти, ниӂӓ евнух окуйэр пророк Исайанын кийадыны. Филип сорду она: «Аӂаба аннээрсын мы, не окуйэрсын?»

³¹Евнух ӂувап етти: «Несой вар ниӂӓ аннайым, биркимсей йол гӧстермейинӂӓ бана?» Да йалварды Филипӓ, пинсин файтона да отурсун онуннан барабар.

³²Окуйарды о ери Айоз Йазыдан, нередӓ йазылы: «О гӧтӱрӱлдӱ, ниӂӓ бир койун кесилмӓӓ дейни, хем ниӂӓ бир кузу сусар кырканын ӧнӱндӓ, О ӧлӓ ачмады аазыны.

³³Ону ашааладылар хем доору даава йапмадылар. Ким анаӂэк Онун сенселесини, зерӓ йашамасы алынды бу ердӓн».

³⁴Евнух деди Филипӓ: «Йалварэрым, сӧлӓ, кимин ичин лафедер пророк? Кендиси ичин ми оса башкасы ичин мы?»

³⁵Озаман Филип алды лафы да башлады бу Йазыдан аннатмаа ии хабери Иисус ичин.

³⁶Оннар, йолда гидӓркӓн, етиштилӓр бир суйа. Евнух деди: «Тӓ су; не кӧстеклеер бени, ки ваатиз олайым?» /

³⁷Филип деди: «Еер инанарсайдын бӱтӱн ӱрӓӓннӓн, озаман вар ниӂӓ ваатиз оласын». Евнух ӂувап етти: «Инанэрым, ани Иисус Христос Аллахын Оолу»./

³⁸Сымарлады, файтону дургутсуннар. Индилӓр икиси дӓ су ичинӓ, да Филип ваатиз етти евнуху.

³⁹Ачан чыктылар су ичиндӓн, Саабинин Духу [8] алып гӧтӱрдӱ Филипи. Евнух башка ону гӧрмеди. О шен гитти кенди йолуна.

⁴⁰Ама Филип булду кендини Азот касабасында, нередӓн гитти Кесарийа касабасынадан, аннадарак Ии Хабери хепси касабаларда.