Read Tungag ПАВЛИНИН КИЙАДЫ РОМАЛЫЛАРА 10 Bible Online

ПАВЛИНИН КИЙАДЫ РОМАЛЫЛАРА 10 - Tungag bible

ПАВЛИНИН КИЙАДЫ РОМАЛЫЛАРА 10

¹Кардашлар, ӱреемин истедии хем дуам Аллаха будур: израиллилӓр куртулсуннар.

²Доорусуну сӧлейим, оннарда чалышмак вар Аллах ичин, ама диил аарифчесинӓ.

³Зерӓ аннамээрлар, ниӂӓ Аллах инсаны доору сайэр, хем бакэрлар кенди-кендилерини доорулаа чыкармаа, онуштан кайыл олмадылар Аллахын доорулууна.

⁴Зерӓ Христос — Законун биткиси, ки херкези, ким инанэр, доорулук еденсин.

⁵Моисей бӧлӓ йазды Закондан доору сайылмак ичин: «Ким Законун сымарламакларыны таманнайаӂэк, о йашайаӂэк».

⁶Ама инаннан доору сайылмак ичин бӧлӓ денер: «Демӓ кенди-кендинӓ: „Ким гӧкӓ калкаӂэк?“, ки Христозу индирсин,

⁷еки: „Ким дипсизлӓӓ инеӂек?“, ки Христозу ӧлӱдӓн калдырсын».

⁸Не денер? «Аллахын сӧзӱ йакын сана, сенин аазында хем ӱреендӓ». Бу сӧзӱ, ани инан ичин, биз насаат едериз.

⁹Еер аазындан ачык сӧлӓрсейдин «Иисус Саабидир» хем ӱректӓн инанарсайдын, ани Аллах ӧлӱдӓн Ону дирилтти, озаман куртулаӂан.

¹⁰Зерӓ ким ӱректӓн инанэр, о доорулук еденер, хем ким аазындан шаатлык едер, о куртулмак еденер.

¹¹Ниӂӓ Айоз Йазы деер: «Ким Она инанар, утанмыш калмаз».

¹²Йок айырмак иудейлерин хем урумнарын арасында, зерӓ хепсинин Саабиси бирдир. О херкезинӓ ӂӧмерт, ким Ону чаарэр.

¹³Зерӓ: «Ким Саабинин адыны чаараӂэк, о куртулаӂэк».

¹⁴Ама несой вар насыл чаарсыннар Ону, Кимӓ инанмадылар? Несой вар насыл инансыннар Она, Кимин ичин ишитмедилӓр? Несой вар насыл ишитсиннӓр, еер кимсей насаат етмӓрсӓ?

¹⁵Несой вар насыл насаат етсиннӓр, еер йолланмыш диилсейдилӓр? Ниӂӓ йазылы: «Не йакышыклы айаклары оннарын, кимнӓр /услулук хем/ Ии Хабери насаат едерлӓр!»

¹⁶Ама хепси Ии Хабери сеслӓмеди. Ниӂӓ Исайа деер: «Сааби, ким инанды бизим хабери?»

¹⁷Ӧлӓ ки, инан гелер хабери ишитмектӓн, ишитмӓк тӓ олэр, еер Христос ичин насаат едилирсӓ.

¹⁸Ама шинди сорэрым: не, ишитмедилӓр ми? Елбетки, ишиттилӓр. «Оннарын сеслери ишидилди бӱтӱн ер ӱстӱндӓ, хем лафлары етишти ерин кенарларына да».

¹⁹Енидӓн сорэрым: «Не, Израил билмӓрди ми буннары?» Аслы, ани билӓрди, зерӓ илкин Моисей деди: «Аллах деер: Бӓн дебрештиреӂӓм сиздӓ бир кысканчлык о инсаннарлан, ангылар миллет сайылмаз, кыздыраӂам сизи бир аннамаз халклан».

²⁰Сора Исайа кыйышмаклан деер: «Аллах деер: Бени булдулар оннар, ким аарамарды, Бӓн оннара ачылдым, ким Бени сормарды».

²¹Ама Израил ичин деер: «Бӱтӱн гӱн узаттым еллерими бир сеслӓ-мейӓн хем каршы дуран халка».