Read Tungag ПАВЛИНИН КИЙАДЫ РОМАЛЫЛАРА 12 Bible Online

ПАВЛИНИН КИЙАДЫ РОМАЛЫЛАРА 12 - Tungag bible

ПАВЛИНИН КИЙАДЫ РОМАЛЫЛАРА 12

¹Онуштан, кардашлар, йалварэрым Аллахын аӂыйанныыннан, гетирин сизин гӱӱделеринизи бир дири, айоз, беенилмиш курбан Аллаха. Будур сизин хакына изметчилииниз.

²Бу вакытларын адетлеринӓ гӧрӓ кендинизи кулланмайын, ама Аллах фикиринизи енилейип дииштирсин, ки таныйасыныз, недир Аллахын истедии — не ии, беенилмиш хем таман.

³Аллахын иивергисиннӓн, ани бана верилмиш, сизӓ хепсинизӓ деерим: дӱшӱнмейин кендиниз ичин таа ӱстӱн, некадар лӓӓзым. Ама ии дӱшӱнӱн о инан ӧлчӱсӱнӓ гӧрӓ, некадар Аллах херкезинӓ верди.

⁴Ниӂӓ бизим гӱӱдемиз бирдир, ама чок еклери вар, да ниӂӓ хер екинин вар кенди иши,

⁵хеп ӧлӓ биз дӓ, чоклук оларак, хепсимиз бир гӱӱдӓ олэрыз Христозда, айыры-айыры бири-биримизин еклери оларак.

⁶Айыры баашышлар каблеттик Аллахын иивергисинӓ гӧрӓ, ани верилмиш бизӓ. Кимдӓ вар пророклук баашышы, ону файдаласын кенди инан ӧлчӱсӱнӓ гӧрӓ.

⁷Кимдӓ вар измет баашышы, измет етсин. Ӱӱредиӂисейди, ӱӱретсин.

⁸Беӂерӓрсейди гиргиннетмӓӓ, гиргиннетсин. Беӂерӓрсейди пайетмӓӓ, ӂӧмертликлӓн пайетсин, не вар онда. Ӧндерӂисейди, чалышкан олсун. Ким башкаларына йардым едер, буну йапсын севинчлӓн.

⁹Сизин севгиниз олмасын йапынмаклан. Кӧтӱлӱктӓн ииренин, иилӓӓ йапышын.

¹⁰Севин бири-биринизи кардашчасына йалпаклыклан. Йарышмаклан бири-биринизӓ сайгы сӱрӱн.

¹¹Чалышкан олун, хайлаз олмайын. Духлан хашлак олун, Саабийӓ измет един.

¹²Умутлан севинин, зееттӓ сабурлу олун, кендинизи дуайа верин.

¹³Пайедин, не сиздӓ вар Аллахын айоз халкына, ачан о йоклукта. Бакын мусаафирӂи олмаа.

¹⁴Иисӧзлейин оннары, ким сизи коолээр, иисӧзлейин, ама бетваламайын.

¹⁵Ким севинер, оннарлан севинин, ким аалээр, оннарлан аалайын.

¹⁶Олун бир дӱшӱнмектӓ бири-биринизлӓн. Диклешмейин, ама кафадарлашын оннарлан, ким ашааланэр.

¹⁷Чевирмейин кимсейӓ кӧтӱлӱк ичин кӧтӱлӱк, чалышын йапмаа, не хепси инсан ии сайэр.

¹⁸Еер варса насыл сизин тарафыныздан, олун барышмакта хепси инсаннан.

¹⁹Севгили кардашлар, кимсейдӓн кин чыкармайын, бракын Аллахын ӱфкесинӓ, зерӓ йазылы: «Кин чыкармак Бенимдир, Бӓн ӧдейеӂӓм кӧтӱлӱклӓр ичин, деер Сааби».

²⁰Буна каршы, еер сенин душманын аачсайды, дойур ону. Сусузсайды, вер она су. Еер бӧлӓ йапарсан, топлайаӂан кызгын кӧмӱр онун башына [4].

²¹Кӧтӱлӱктӓн енсенмиш олма, ама ииликлӓн енсӓ кӧтӱлӱӱ.