Read Tungag ПАВЛИНИН КИЙАДЫ РОМАЛЫЛАРА 2 Bible Online

ПАВЛИНИН КИЙАДЫ РОМАЛЫЛАРА 2 - Tungag bible

ПАВЛИНИН КИЙАДЫ РОМАЛЫЛАРА 2

¹Ӧлӓ ки, сана йок афетмӓк, бей адам, ким дӓ сӓн олсан, еер маана буларсайдын. Зерӓ, башкасына маана булуркан, кенди-кендини кабаатландырэрсын, зерӓ сӓн, ани маана булэрсын, кендин дӓ хеп ону йапэрсын.

²Биз билериз, ки бӧлӓ йапаннара Аллах доору даава кесер.

³Бей адам, сӓн, ани бӧлӓ йапаннара маана булэрсын, ама кендин дӓ хеп ӧлӓ йапэрсын, санэрсын Аллахын даавасындан куртулабилеӂӓн ми?

⁴Оса пайа коймээрсын Аллахын ӂӧмерт ииликлерини, сабурлууну хем чок дайанмасыны? Билмеерсин, ани Аллах ииликлерини узадэр, ки сени гӱнахларындан Кендисинӓ дӧндӱрсӱн?

⁵Ама сӓн инатлашэрсын да гӱнахларындан дӧнмӓӓ истӓмеерсин, онуштан Аллахын ӂезасыны о ӱфкели даава гӱнӱ ичин топлээрсын. Озаман Аллахын доору карары гӧрӱнеӂек.

⁶О херкезинӓ кенди йаптыкларына гӧрӓ ӧдейеӂек.

⁷Оннара, ким, дайма иилик йапарак, метинник, икрам хем ӧлӱмсӱзлӱк аарээр, дивеч йашамак вереӂек.

⁸Ама ким кендини север, аслылыы сеслӓмеер хем хаксызлаа верилер, оннара ӱфкесини гӧстереӂек хем бела вереӂек.

⁹Хепси, ким кӧтӱлӱк йапэр, ӧнӂӓ иудейлерин, сора урумнарын ӱстӱнӓ зеет хем сыкынты гелӓр.

¹⁰Буна каршы, хепсинӓ, ким иилик йапэр, ӧнӂӓ иудейлерӓ, сора урумнара, метинник, икрам хем услулук олаӂэк.

¹¹Зерӓ Аллах кимсейӓ пай тутмаз.

¹²Ким, Айоз Закону билмейерӓк, гӱнах йапэр, оннар, Закона бакмайарак, телеф олаӂэклар. Ама ким, Закону билерӓк, гӱнах йапэр, оннара Закона гӧрӓ дӓ даава олаӂэк.

¹³Зерӓ диил Закону ишиденнӓр Аллахын ӧнӱндӓ доору, ама Закону таманнайаннар доору сайылаӂэк.

¹⁴Зерӓ о миллетлӓр, кимдӓ йок Айоз Закон, дуйгуларындан Закона гӧрӓ йашадыкча, оннар гӧстерирлӓр, не лӓӓзым хем диил лӓӓзым йапылсын, макар ки Закону билмеерлӓр.

¹⁵Бунуннан гӧстерерлӓр, ани не Закон истеер, оннарын ӱреклериндӓ йазылы. Оннарын ичйандан дуйгулары буну дооруклээр, фикирлери оннары йа кабаатландырэр, йа да доору чыкарэр

¹⁶о гӱн, ачан Ии Хаберӓ гӧрӓ, ангысыны бӓн насаат едерим, Аллах даава йапаӂэк Иисус Христозлан инсаннарын саклы ишлеринӓ.

¹⁷Сӓн, ани кендини иудей сайэрсын, умутланып Айоз Закона, Аллахлан ӱӱнерсин,

¹⁸билерсин Онун истедиини хем, Закондан ӱӱренмиш, аннээрсын, не таа ии,

¹⁹инанэрсын, ани кӧӧрлары гездирӓбилирсин, каранныкта оланнара айдыннык олабилирсин,

²⁰акылсызлары йола гетирӓбилирсин хем ушаклары ӱӱредӓбилирсин, зерӓ Законнан етиштин билгинин хем аслылыын таманныына.

²¹Ӧлейсӓ, несой сӓн, башкасыны ӱӱредерӓк, кендини ӱӱретмеерсин? Насаат едерӓк: «чалмайасын», кендин чалэрсын?

²²«Ороспулук йапма» сӧлейерӓк, кендин йапэрсын? Идоллардан азетмейерӓк, кендин айоз биналары сойэрсын?

²³Айоз Законнан ӱӱнерсин, ама Аллахы ашаалээрсын, зерӓ Закону басэрсын?

²⁴Ниӂӓ вар йазылы: «Сизин бетеринизӓ Аллахын ады миллетлӓр арасында кӧтӱленер».

²⁵Еер Айоз Закону таманнарсайдын, елбетки кесиклиин файдасы вар, ама еер Закону басарсайдын, кесиклик олэр, ниӂӓ дӓ кесиксизлик.

²⁶Онуштан, еер кесиксиз адам Законун сымарламакларыны таманнарса, сайылмайаӂэк мы о ниӂӓ кесикли?

²⁷Ким гӱӱдейӂесинӓ кесиксиз, ама Закону таманнээр, кабаатландырмайаӂэк мы сени, кимдӓ вар Айоз Йазылар хем кесиклик, ама басэрсын Закону?

²⁸О диил иудей, ким дышандан ӧлӓ саде, хем о диил кесиклик, не гӱӱдедӓ нышанны саде.

²⁹Ама хакына иудей о, ким ичйандан ӧлӓ, хем хакына кесикли о, ани духча ӱректӓ кесикли, ама диил саде кийат ӱстӱндӓ. Хакына иудей одур, ким диил инсандан, ама Кендиндӓн Аллахтан метинни.